ਚੀਨ ਆਪਣੇ ਤੀਜੇ ਏਅਰਕ੍ਰਾਫਟ ਕੈਰੀਅਰ ਲਈ ਸਟੀਲਥ ਲੜਾਕੂ ਜਹਾਜ਼ ਦਾ ਕਰ ਰਿਹੈ ਪ੍ਰੀਖਣ : ਰਿਪੋਰਟ

ਬੀਜਿੰਗ : ਚੀਨ ਆਪਣੇ ਤੀਜੇ ਏਅਰਕ੍ਰਾਫਟ ਕੈਰੀਅਰ 'ਫੁਜਿਆਨ' 'ਤੇ ਤਾਇਨਾਤ ਕੀਤੇ ਜਾਣ ਲਈ ਜੇ-35 ਨਾਂ ਦੇ ਇਕ ਨਵੇਂ ਸਟੀਲਥ ਲੜਾਕੂ ਜਹਾਜ਼ ਦਾ ਪ੍ਰੀਖਣ ਕਰ ਰਿਹਾ ਹੈ। ਗਲੋਬਲ ਟਾਈਮਜ਼ ਨੇ ਰਾਜ ਪ੍ਰਸਾਰਕ ਸੀਸੀਟੀਵੀ ਦੇ ਹਵਾਲੇ ਨਾਲ ਕਿਹਾ ਕਿ ਇਸ ਸਾਲ ਦੇ ਸ਼ੁਰੂ ਵਿਚ, ਏਅਰਕ੍ਰਾਫਟ ਕੈਰੀਅਰ 'ਲਿਆਓਨਿੰਗ' 'ਤੇ ਇੱਕ ਨਵੀਂ ਕਿਸਮ ਦੇ ਜੰਗੀ ਜਹਾਜ਼ ਦਾ ਪ੍ਰੀਖਣ ਕੀਤਾ ਗਿਆ ਸੀ। 

ਇਸ ਵਿਚ ਕਿਹਾ ਗਿਆ ਹੈ ਕਿ ਨਵਾਂ ਜਹਾਜ਼ ਲੰਬੇ ਸਮੇਂ ਤੋਂ ਉਡੀਕਿਆ ਜਾ ਰਿਹਾ J-35, ਚੀਨ ਦਾ ਅਗਲੀ ਪੀੜ੍ਹੀ ਦਾ ਸਟੀਲਥ ਲੜਾਕੂ ਜਹਾਜ਼ ਹੋ ਸਕਦਾ ਹੈ। ਚੀਨ ਕੋਲ ਇਸ ਸਮੇਂ ਦੋ ਏਅਰਕ੍ਰਾਫਟ ਕੈਰੀਅਰ ਹਨ। ਇਨ੍ਹਾਂ ਵਿੱਚੋਂ 'ਲਿਆਓਨਿੰਗ' ਇੱਕ ਨਵੀਨੀਕਰਨ ਕੀਤਾ ਸੋਵੀਅਤ ਯੁੱਗ ਦਾ ਜਹਾਜ਼ ਹੈ ਅਤੇ 'ਸ਼ਾਂਡੋਂਗ' ਦੂਜਾ ਸਵਦੇਸ਼ੀ ਤੌਰ 'ਤੇ ਬਣਾਇਆ ਗਿਆ ਏਅਰਕ੍ਰਾਫਟ ਕੈਰੀਅਰ ਹੈ ਜਿਸ ਨੂੰ 2019 ਵਿਚ ਸੇਵਾ ਵਿਚ ਸ਼ਾਮਲ ਕੀਤਾ ਗਿਆ ਸੀ। ਇਸ ਦਾ ਤੀਜਾ ਏਅਰਕ੍ਰਾਫਟ ਕੈਰੀਅਰ 'ਫੁਜਿਆਨ' ਦੋਵਾਂ ਜਹਾਜ਼ਾਂ ਤੋਂ ਵੱਡਾ ਹੈ ਅਤੇ ਫਿਲਹਾਲ ਇਸ ਦੀ ਜਾਂਚ ਕੀਤੀ ਜਾ ਰਹੀ ਹੈ। ਸਾਊਥ ਚਾਈਨਾ ਮਾਰਨਿੰਗ ਪੋਸਟ ਅਖਬਾਰ ਨੇ ਕਿਹਾ ਕਿ ਜੇ-35 ਨੂੰ ਸ਼ੇਨਯਾਂਗ ਏਅਰਕ੍ਰਾਫਟ ਕਾਰਪੋਰੇਸ਼ਨ ਜੇ-20 ਤੋਂ ਬਾਅਦ ਚੀਨ ਦੇ ਦੂਜੇ ਪੰਜਵੀਂ ਪੀੜ੍ਹੀ ਦੇ ਲੜਾਕੂ ਜਹਾਜ਼ ਵਜੋਂ ਵਿਕਸਤ ਕਰ ਰਿਹਾ ਹੈ।