Shane Warne ਦੀ ਮੌਤ ''ਤੇ ਵੱਡਾ ਖੁਲਾਸਾ, ਕਮਰੇ ''ਚੋਂ ਮਿਲੀ ਸੀ ਰਹੱਸਮਈ ਦਵਾਈ ਦੀ ਸ਼ੀਸ਼ੀ

ਇੰਟਰਨੈਸ਼ਨਲ ਡੈਸਕ : ਆਸਟ੍ਰੇਲੀਆ ਦੇ ਮਹਾਨ ਕ੍ਰਿਕਟਰ ਸ਼ੇਨ ਵਾਰਨ ਦੀ ਰਹੱਸਮਈ ਮੌਤ ਨੂੰ 3 ਸਾਲ ਬੀਤ ਚੁੱਕੇ ਹਨ। ਅਪ੍ਰੈਲ 2022 ਵਿੱਚ 52 ਸਾਲਾਂ ਦੇ ਵਾਰਨ ਦੀ ਦਿਲ ਦਾ ਦੌਰਾ ਪੈਣ ਕਾਰਨ ਮੌਤ ਹੋ ਗਈ ਸੀ। ਉਹ ਉਸ ਸਮੇਂ ਥਾਈਲੈਂਡ ਵਿੱਚ ਮੌਜੂਦ ਸੀ। ਹੁਣ ਉਨ੍ਹਾਂ ਦੀ ਮੌਤ ਨੂੰ ਲੈ ਕੇ ਹੈਰਾਨ ਕਰਨ ਵਾਲਾ ਖੁਲਾਸਾ ਹੋਇਆ ਹੈ। ਇਕ ਨਵੀਂ ਰਿਪੋਰਟ ਅਨੁਸਾਰ ਉਸ ਦੇ ਕਮਰੇ ਵਿੱਚੋਂ ਇੱਕ ਉਤੇਜਕ ਦਵਾਈ ਦੀ ਸ਼ੀਸ਼ੀ ਮਿਲੀ ਸੀ, ਜਿਸ ਨੂੰ ਮੌਕੇ 'ਤੇ ਮੌਜੂਦ ਪੁਲਸ ਅਧਿਕਾਰੀਆਂ ਨੇ ਹਟਾਉਣ ਦੇ ਆਦੇਸ਼ ਦਿੱਤੇ ਸਨ। ਅੰਗਰੇਜ਼ੀ ਮੀਡੀਆ ਸਾਈਟ 'ਡੇਲੀ ਮੇਲ' ਮੁਤਾਬਕ ਸ਼ੇਨ ਵਾਰਨ ਦੇ ਕਮਰੇ 'ਚ ਜਾਂਚ ਦੌਰਾਨ ਪੁਲਸ ਨੂੰ ਉਤੇਜਕ ਡਰੱਗ ਦੀ ਇਕ ਸ਼ੀਸ਼ੀ ਮਿਲੀ ਸੀ। ਇਹ ਦਵਾਈ ਇਰੈਕਟਾਈਲ ਨਪੁੰਸਕਤਾ (Erectile Dysfunction) ਦੇ ਇਲਾਜ ਲਈ ਵਰਤੀ ਜਾਂਦੀ ਹੈ। ਰਿਪੋਰਟ ਅਨੁਸਾਰ ਇਸ ਦਵਾਈ ਦਾ ਸੇਵਨ ਉਨ੍ਹਾਂ ਲਈ ਨੁਕਸਾਨਦੇਹ ਹੋ ਸਕਦਾ ਹੈ ਜੋ ਪਹਿਲਾਂ ਤੋਂ ਹੀ ਦਿਲ ਨਾਲ ਜੁੜੀਆਂ ਸਮੱਸਿਆਵਾਂ ਤੋਂ ਪੀੜਤ ਹਨ। ਹੈਰਾਨ ਕਰਨ ਵਾਲੀ ਗੱਲ ਇਹ ਹੈ ਕਿ ਅਧਿਕਾਰੀਆਂ ਨੂੰ ਇਸ ਸ਼ੀਸ਼ੀ ਨੂੰ ਤੁਰੰਤ ਹਟਾਉਣ ਦੇ ਆਦੇਸ਼ ਦਿੱਤੇ ਗਏ ਸਨ ਤਾਂ ਜੋ ਵਾਰਨ ਦੀ ਮੌਤ ਨਾਲ ਸਬੰਧਤ ਕਿਸੇ ਵੀ ਨਕਾਰਾਤਮਕ ਖਬਰ ਨੂੰ ਜਨਤਕ ਹੋਣ ਤੋਂ ਰੋਕਿਆ ਜਾ ਸਕੇ।

ਇਹ ਵੀ ਪੜ੍ਹੋ : 'ਆਂਖ ਮਾਰੇ ਓ ਲੜਕਾ....' ਗੁਹਾਟੀ ਸਟੇਡੀਅਮ 'ਚ ਸਾਰਾ ਅਲੀ ਖਾਨ ਨੇ ਲਾਇਆ ਗਲੈਮਰ ਦਾ ਤੜਕਾ

ਸ਼ੀਸ਼ੀ ਨੂੰ ਹਟਾਉਣ ਦਾ ਸੀ ਆਦੇਸ਼
'ਡੇਲੀ ਮੇਲ' ਦੀ ਰਿਪੋਰਟ ਵਿੱਚ ਇੱਕ ਪੁਲਸ ਅਧਿਕਾਰੀ ਦੇ ਹਵਾਲੇ ਨਾਲ ਕਿਹਾ ਗਿਆ ਹੈ, "ਸਾਨੂੰ ਸਾਡੇ ਉੱਚ ਅਧਿਕਾਰੀਆਂ ਨੇ ਸ਼ੀਸ਼ੀ ਨੂੰ ਹਟਾਉਣ ਦਾ ਹੁਕਮ ਦਿੱਤਾ ਸੀ। ਇਹ ਹੁਕਮ ਉੱਪਰੋਂ ਆਇਆ ਸੀ ਅਤੇ ਇਸ ਵਿੱਚ ਆਸਟ੍ਰੇਲੀਆਈ ਅਧਿਕਾਰੀਆਂ ਦਾ ਵੀ ਹੱਥ ਸੀ। ਉਹ ਨਹੀਂ ਚਾਹੁੰਦੇ ਸਨ ਕਿ ਵਾਰਨ ਵਰਗੀ ਉੱਘੀ ਸ਼ਖ਼ਸੀਅਤ ਦੀ ਮੌਤ ਨਾਲ ਜੁੜੇ ਸੰਵੇਦਨਸ਼ੀਲ ਪਹਿਲੂਆਂ ਦਾ ਪਰਦਾਫਾਸ਼ ਹੋਵੇ।"

ਕੀ ਸੀ ਸਾਜ਼ਿਸ਼?
ਪੁਲਸ ਅਧਿਕਾਰੀ ਮੁਤਾਬਕ ਵਾਰਨ ਦੇ ਕਮਰੇ 'ਚ ਖੂਨ ਅਤੇ ਉਲਟੀਆਂ ਦੇ ਨਿਸ਼ਾਨ ਵੀ ਮਿਲੇ ਹਨ, ਜਿਸ ਤੋਂ ਪਤਾ ਲੱਗਦਾ ਹੈ ਕਿ ਉਸ ਦੀ ਹਾਲਤ ਅਚਾਨਕ ਵਿਗੜ ਗਈ ਸੀ। ਹਾਲਾਂਕਿ ਇਸ ਮਾਮਲੇ 'ਚ ਕਿਸੇ ਵੀ ਤਰ੍ਹਾਂ ਦੀ ਸਾਜ਼ਿਸ਼ ਤੋਂ ਰਸਮੀ ਤੌਰ 'ਤੇ ਇਨਕਾਰ ਕਰ ਦਿੱਤਾ ਗਿਆ। ਰਿਪੋਰਟ ਮੁਤਾਬਕ ਵਾਰਨ ਨੂੰ ਆਖਰੀ ਵਾਰ ਦੋ ਔਰਤਾਂ ਨੇ ਜ਼ਿੰਦਾ ਦੇਖਿਆ ਸੀ। ਇਹ ਦੋਵੇਂ ਔਰਤਾਂ ਇੱਕ ਮਸਾਜ ਪਾਰਲਰ ਨਾਲ ਜੁੜੀਆਂ ਹੋਈਆਂ ਸਨ ਅਤੇ ਥਾਈ ਪੁਲਸ ਵੱਲੋਂ ਇਨ੍ਹਾਂ ਤੋਂ ਪੁੱਛਗਿੱਛ ਕੀਤੀ ਜਾ ਰਹੀ ਹੈ। ਪਰ ਹੈਰਾਨੀ ਦੀ ਗੱਲ ਇਹ ਹੈ ਕਿ ਇਹ ਦੋਵੇਂ ਔਰਤਾਂ ਅਚਾਨਕ ਆਪਣੀ ਜਗ੍ਹਾ ਤੋਂ ਗਾਇਬ ਹੋ ਗਈਆਂ। ਕੋਹ ਸਾਮੂਈ ਵਿੱਚ ਇੱਕ ਸਥਾਨਕ ਸਰੋਤ ਨੇ ਕਿਹਾ, "ਪੁਲਸ ਨੇ ਔਰਤਾਂ ਨੂੰ ਸਥਾਨ ਛੱਡਣ ਲਈ ਕਿਹਾ ਕਿਉਂਕਿ ਵਾਰਨ ਦੀ ਮੌਤ ਨੇ ਅੰਤਰਰਾਸ਼ਟਰੀ ਮੀਡੀਆ ਦਾ ਧਿਆਨ ਖਿੱਚਿਆ ਸੀ ਅਤੇ ਇਹ ਥਾਈਲੈਂਡ ਦੇ ਸੈਰ-ਸਪਾਟੇ ਲਈ ਚੰਗਾ ਨਹੀਂ ਸੀ।" ਉਨ੍ਹਾਂ ਦਾ ਅਚਾਨਕ ਲਾਪਤਾ ਹੋਣਾ ਕਈ ਸਵਾਲ ਖੜ੍ਹੇ ਕਰਦਾ ਹੈ।

ਇਹ ਵੀ ਪੜ੍ਹੋ : ਦੇਸ਼ 'ਚ ਬਣੇਗਾ Dubai ਵਰਗਾ 'Bharat Bazaar', ਸਰਕਾਰ ਨੇ ਤਿਆਰ ਕੀਤਾ ਮਾਸਟਰ ਪਲਾਨ

ਪਿਛਲੇ ਕੁਝ ਘੰਟੇ, ਕੀ ਹੋਇਆ ਸੀ ਵਾਰਨ ਨਾਲ?
ਡੇਲੀ ਮੇਲ ਮੁਤਾਬਕ ਸ਼ੇਨ ਵਾਰਨ ਥਾਈਲੈਂਡ ਦੇ ਸਮੂਆਨਾ ਵਿਲਾ ਰਿਜ਼ੋਰਟ 'ਚ ਆਪਣੇ ਦੋਸਤਾਂ ਨਾਲ ਠਹਿਰੇ ਹੋਏ ਸਨ, ਜਿੱਥੇ ਰੋਜ਼ਾਨਾ ਦਾ ਕਿਰਾਇਆ 1 ਲੱਖ ਤੋਂ 4.5 ਲੱਖ ਰੁਪਏ ਤੱਕ ਸੀ। ਆਪਣੀ ਮੌਤ ਤੋਂ ਪਹਿਲਾਂ ਉਸਨੇ ਆਸਟ੍ਰੇਲੀਆ-ਪਾਕਿਸਤਾਨ ਟੈਸਟ ਮੈਚ ਦੇਖਿਆ ਸੀ ਅਤੇ ਆਪਣੇ ਦੋਸਤ ਐਂਡਰਿਊ ਨਿਓਫਾਈਟੋ ਨਾਲ ਰਾਤ ਦੇ ਖਾਣੇ ਲਈ ਮਿਲਣਾ ਸੀ। ਜਦੋਂ ਐਂਡਰਿਊ ਆਪਣੇ ਕਮਰੇ ਵਿਚ ਪਹੁੰਚਿਆ ਤਾਂ ਉਸ ਨੇ ਵਾਰਨ ਨੂੰ ਬੇਹੋਸ਼ ਪਾਇਆ।

ਪੋਸਟਮਾਰਟਮ ਰਿਪੋਰਟ 'ਚ ਕੀ ਕਿਹਾ ਗਿਆ?
ਵਾਰਨ ਦੀ ਮੌਤ ਤੋਂ ਬਾਅਦ ਥਾਈਲੈਂਡ ਦੇ ਸੂਰਤ ਥਾਨੀ ਹਸਪਤਾਲ ਦੀ ਪੋਸਟਮਾਰਟਮ ਰਿਪੋਰਟ ਵਿੱਚ ਕਿਹਾ ਗਿਆ ਹੈ ਕਿ ਉਸਦੀ ਮੌਤ ਕੁਦਰਤੀ ਕਾਰਨਾਂ ਕਰਕੇ ਹੋਈ ਹੈ। ਖਬਰਾਂ ਮੁਤਾਬਕ ਉਹ ਪਹਿਲਾਂ ਹੀ ਦਿਲ ਦੀ ਬਿਮਾਰੀ ਅਤੇ ਦਮੇ ਤੋਂ ਪੀੜਤ ਸੀ। ਹਾਲਾਂਕਿ ਪੁਲਸ ਅਧਿਕਾਰੀ ਵੱਲੋਂ ਕੀਤੇ ਗਏ ਨਵੇਂ ਖੁਲਾਸੇ ਤੋਂ ਬਾਅਦ ਉਸ ਦੀ ਮੌਤ ਨੂੰ ਲੈ ਕੇ ਕਈ ਨਵੀਆਂ ਕਿਆਸਅਰਾਈਆਂ ਲੱਗ ਰਹੀਆਂ ਹਨ। ਸ਼ੇਨ ਵਾਰਨ ਕ੍ਰਿਕਟ ਇਤਿਹਾਸ ਦੇ ਸਭ ਤੋਂ ਵਧੀਆ ਸਪਿਨਰਾਂ ਵਿੱਚੋਂ ਇੱਕ ਸਨ ਅਤੇ ਉਨ੍ਹਾਂ ਦੀ ਮੌਤ ਅਜੇ ਵੀ ਕ੍ਰਿਕਟ ਪ੍ਰੇਮੀਆਂ ਲਈ ਇੱਕ ਰਹੱਸ ਬਣੀ ਹੋਈ ਹੈ। ਇਸ ਮਾਮਲੇ ਨਾਲ ਸਬੰਧਤ ਨਵੇਂ ਖੁਲਾਸੇ ਆਉਣ ਵਾਲੇ ਦਿਨਾਂ ਵਿੱਚ ਹੋਰ ਸਨਸਨੀ ਪੈਦਾ ਕਰ ਸਕਦੇ ਹਨ।

ਜਗ ਬਾਣੀ ਈ-ਪੇਪਰ ਨੂੰ ਪੜ੍ਹਨ ਅਤੇ ਐਪ ਨੂੰ ਡਾਊਨਲੋਡ ਕਰਨ ਲਈ ਇੱਥੇ ਕਲਿੱਕ ਕਰੋ

For Android:- https://play.google.com/store/apps/details?id=com.jagbani&hl=en

For IOS:- https://itunes.apple.com/in/app/id538323711?mt=8