ਆਸਟਰੇਲੀਆ ਦੀ ਸੰਸਦੀ ਖੁਫੀਆ ਕਮੇਟੀ ਮੁਖੀ ਦੇ ਚੀਨ ਵਿਚ ਦਾਖਲੇ ''ਤੇ ਲੱਗੀ ਰੋਕ

ਸਿਡਨੀ (ਏਜੰਸੀ)- ਆਸਟਰੇਲੀਆ ਦੀ ਸੰਸਦੀ ਖੁਫੀਆ ਕਮੇਟੀ ਦੇ ਮੁਖੀ ਦੇ ਪ੍ਰਸਤਾਵਿਤ ਬੀਜਿੰਗ ਦੌਰੇ ਨੂੰ ਚੀਨ ਦੀ ਸਰਕਾਰ ਨੇ ਇਜਾਜ਼ਤ ਦੇਣ ਤੋਂ ਮਨਾਂ ਕਰ ਦਿੱਤਾ ਹੈ। ਮੰਨਿਆ  ਜਾ ਰਿਹਾ ਹੈ ਕਿ ਸੱਤਾਧਾਰੀ ਕਮਿਊਨਿਸਟ ਪਾਰਟੀ ਬਾਰੇ ਦਿੱਤੇ ਗਏ ਉਨ੍ਹਾਂ ਦੇ ਬਿਆਨ ਤੋਂ ਨਾਰਾਜ਼ ਹੋ ਕੇ ਚੀਨ ਨੇ ਇਹ ਕਦਮ ਚੁੱਕਿਆ ਹੈ। ਇਹ ਜਾਣਕਾਰੀ ਖੁਦ ਖੁਫੀਆ ਕਮੇਟੀ ਦੇ ਮੁਖੀ ਐਂਡ੍ਰਿਊ ਹੇਸਟੀ ਨੇ ਦਿੱਤੀ।
ਦਰਅਸਲ ਹੇਸਟੀ ਨੂੰ ਆਪਣੇ ਸਾਥੀ ਰਾਜਨੇਤਾ ਅਤੇ ਸੈਨੇਟਰ ਜੇਮਸ ਪੈਟਰਸਨ ਨਾਲ ਅਗਲੇ ਮਹੀਨੇ ਇਕ ਦੌਰੇ 'ਤੇ ਚੀਨ ਆਉਣਾ ਸੀ, ਪਰ ਚੀਨ ਨੇ ਦੋਹਾਂ ਦੇ ਦੇਸ਼ ਵਿਚ ਦਾਖਲੇ 'ਤੇ ਪਾਬੰਦੀ ਲਗਾ ਦਿੱਤੀ। ਯਾਤਰਾ ਦਾ ਪ੍ਰਬੰਧ ਕਰਨ ਵਾਲੀ ਸੰਸਥਾ ਚਾਈਨਾ ਮੈਟਰਸ ਨੇ ਸ਼ੁੱਕਰਵਾਰ ਦੇਰ ਸ਼ਾਮ ਹੇਸਟੀ ਨੂੰ ਭੇਜੇ ਸੰਦੇਸ਼ ਵਿਚ ਕਿਹਾ ਕਿ ਸਾਨੂੰ ਪੀਪਲਜ਼ ਰੀਪਬਲਿਕ ਆਫ ਚਾਈਨਾ ਸਰਕਾਰ ਦੇ ਫੈਸਲੇ 'ਤੇ ਅਫਸੋਸ ਹੈ ਅਤੇ ਫਿਲਹਾਲ ਅਸੀਂ ਤੁਹਾਡੇ ਦੋਹਾਂ ਦਾ ਬੀਜਿੰਗ ਵਿਚ ਸਵਾਗਤ ਨਹੀਂ ਕਰ ਸਕਦੇ।
ਦੱਸ ਦਈਏ ਕਿ ਅਗਸਤ ਵਿਚ ਸਿਡਨੀ ਮਾਰਨਿੰਗ ਹੇਰਾਲਡ ਵਿਚ ਲਿਖੇ ਇਕ ਲੇਖ ਵਿਚ ਹੇਸਟੀ ਨੇ ਕਿਹਾ ਸੀ ਕਿ ਆਸਟ੍ਰੇਲੀਆ ਦੀ ਪ੍ਰਭੂਸੱਤਾ ਅਤੇ ਸੁਤੰਤਰਤਾ ਨੂੰ ਬੀਜਿੰਗ ਤੋਂ ਖਤਰਾ ਹੋ ਸਕਦਾ ਹੈ। ਇਹ ਠੀਕ ਉਸੇ ਤਰ੍ਹਾਂ ਹੋਵੇਗਾ ਜਿਵੇਂ ਦੂਜੇ ਵਿਸ਼ਵ ਯੁੱਧ ਦੀ ਸ਼ੁਰੂਆਤ ਵਿਚ ਫਰਾਂਸ ਦੇ ਕੁਝ ਖੇਤਰ 'ਤੇ ਜਰਮਨੀ ਨੇ ਆਪਣਾ ਕਬਜ਼ਾ ਕਰ ਲਿਆ ਸੀ।
ਉਨ੍ਹਾਂ ਨੇ ਕਿਹਾ ਸੀ ਕਿ ਚੀਨ ਦੇ ਨਾਲ ਸਬੰਧਾਂ ਦਾ ਅਗਲਾ ਦਹਾਕਾ ਆਸਟ੍ਰੇਲੀਆ ਦੇ ਲੋਕਤੰਤਰਿਕ ਕੀਮਤਾਂ ਦਾ ਪ੍ਰੀਖਣ ਕਰੇਗਾ। ਉਨ੍ਹਾਂ ਦੀ ਇਸ ਟਿੱਪਣੀ ਨੂੰ ਆਸਟਰੇਲੀਆ ਸਥਿਤ ਚੀਨੀ ਸਫਾਰਤਖਾਨੇ ਨੇ ਸ਼ੀਤ ਯੁੱਧ ਦੀ ਮਾਨਸਿਕਤਾ ਅਤੇ ਵਿਚਾਰਕ ਪੱਖਪਾਤ ਤੋਂ ਪੀੜਤ ਦੱਸਿਆ ਸੀ।