ਰਾਹਗੀਰ ਨੇ ਇੰਝ ਖਦੇੜਿਆ ਅੱਤਵਾਦੀ, ਮਿਲਿਆ ਲੱਖਾਂ ਦਾ ਚੰਦਾ (ਵੀਡੀਓ)

ਮੈਲਬੌਰਨ (ਬਿਊਰੋ)— ਆਸਟ੍ਰੇਲੀਆ ਦੇ ਸ਼ਹਿਰ ਮੈਲਬੌਰਨ ਵਿਚ ਬੀਤੇ ਸ਼ੁੱਕਰਵਾਰ ਨੂੰ ਭੀੜ ਭਰੇ ਵਾਲੇ ਇਲਾਕੇ ਵਿਚ ਸ਼ੱਕੀ ਆਈ.ਐੱਸ.ਆਈ.ਐੱਸ. ਅੱਤਵਾਦੀ ਨੇ ਲੋਕਾਂ 'ਤੇ ਚਾਕੂ ਨਾਲ ਹਮਲਾ ਕਰ ਦਿੱਤਾ ਸੀ। ਇਸ ਹਮਲੇ ਦੌਰਾਨ ਇਕ ਰਾਹਗੀਰ ਲੋਕਾਂ ਨੂੰ ਬਚਾਉਣ ਲਈ ਟ੍ਰਾਲੀ ਲੈ ਕੇ ਅੱਤਵਾਦੀ ਨਾਲ ਭਿੜ ਗਿਆ, ਜਿਸ ਦਾ ਵੀਡੀਓ ਵਾਇਰਲ ਹੋ ਰਿਹਾ ਹੈ। ਰਾਹਗੀਰ ਦਾ ਨਾਮ ਮਾਈਕਲ ਰੌਜਰਸ ਹੈ। ਲੋਕ ਉਸ ਨੂੰ 'ਟ੍ਰਾਲੀਮੈਨ' ਕਹਿ ਕੇ ਹੀਰੋ ਦਾ ਦਰਜਾ ਦੇ ਰਹੇ ਹਨ। 

ਜਦੋਂ ਲੋਕਾਂ ਨੂੰ ਪਤਾ ਲੱਗਾ ਕਿ ਮਾਈਕਲ ਬੇਘਰ ਹੈ ਤਾਂ ਲੋਕਾਂ ਨੇ ਉਸ ਦੀ ਮਦਦ ਲਈ ਆਨਲਾਈਨ ਫੰਡਿੰਗ ਮੁਹਿੰਮ ਸ਼ੁਰੂ ਕਰ ਦਿੱਤੀ। ਹੁਣ ਤੱਕ ਮਾਈਕਲ ਨੂੰ ਘਰ ਦਿਵਾਉਣ ਲਈ ਇਕ ਲੱਖ ਆਸਟ੍ਰੇਲੀਆਈ ਡਾਲਰ (ਕਰੀਬ 58 ਲੱਖ ਰੁਪਏ) ਇਕੱਠੇ ਕੀਤੇ ਜਾ ਚੁੱਕੇ ਹਨ। ਕਰੀਬ 3700 ਲੋਕਾਂ ਨੇ ਮਾਈਕਲ ਲਈ ਰਾਸ਼ੀ ਦਾਨ ਕੀਤੀ ਹੈ।

ਖਾਸ ਗੱਲ ਇਹ ਹੈ ਕਿ ਫੰਡਿੰਗ ਲਈ 45 ਹਜ਼ਾਰ ਡਾਲਰ ਦਾ ਟੀਚਾ ਮਿੱਥਿਆ ਗਿਆ ਸੀ ਪਰ ਹੁਣ ਤੱਕ ਇਸ ਟੀਚੇ ਦੇ ਦੁਗਣੇ ਤੋਂ ਜ਼ਿਆਦਾ ਰਾਸ਼ੀ ਇਕੱਠੀ ਕੀਤੀ ਜਾ ਚੁੱਕੀ ਹੈ। ਇੱਥੇ ਦੱਸ ਦਈਏ ਕਿ ਸ਼ੁੱਕਰਵਾਰ ਸ਼ਾਮ ਮੈਲਬੌਰਨ ਦੇ ਭੀੜ ਭਰੇ ਬਾਜ਼ਾਰ ਵਿਚ ਇਕ ਹਮਲਾਵਰ ਨੇ ਚਾਕੂ ਮਾਰ ਕੇ ਇਕ ਵਿਅਕਤੀ ਦੀ ਜਾਨ ਲੈ ਲਈ ਅਤੇ ਦੋ ਹੋਰ ਨੂੰ ਜ਼ਖਮੀ ਕਰ ਦਿੱਤਾ ਸੀ।

ਉਹ ਹੋਰ ਲੋਕਾਂ 'ਤੇ ਹਮਲਾ ਕਰ ਪਾਉਂਦਾ, ਇਸ ਤੋਂ ਪਹਿਲਾਂ ਹੀ ਮਾਈਕਲ ਨੇ ਟ੍ਰਾਲੀ ਨਾਲ ਉਸ ਨੂੰ ਟੱਕਰ ਮਾਰ ਦਿੱਤੀ। ਵਾਈਰਲ ਵੀਡੀਓ ਵਿਚ ਮਾਈਕਲ ਹਮਲਾਵਰ ਨੂੰ ਦੌੜਾਉਂਦੇ ਹੋਏ ਦੇਖਿਆ ਜਾ ਸਕਦਾ ਹੈ। ਮਾਈਕਲ ਦਾ ਕਹਿਣਾ ਹੈ ਕਿ ਉਹ ਕੋਈ ਹੀਰੋ ਨਹੀਂ ਹੈ ਪਰ ਟ੍ਰਾਲੀ ਦੀ ਮਦਦ ਨਾਲ ਸ਼ਾਇਦ ਉਸ ਨੇ ਕਿਸੇ ਦੀ ਜਾਨ ਬਚਾ ਲਈ ਹੋਵੇ।

ਪੁਲਸ ਨੇ ਹਮਲਾਵਰ ਨੂੰ ਰੁੱਕ ਜਾਣ ਦੀ ਚਿਤਾਵਨੀ ਵੀ ਦਿੱਤੀ ਸੀ। ਭਾਵੇਂਕਿ ਕੰਟਰੋਲ ਤੋਂ ਬਾਹਰ ਹੋਣ ਦੇ ਬਾਅਦ ਉਸ ਨੂੰ ਗੋਲੀ ਮਾਰਨੀ ਪਈ। ਹਮਲਾਵਰ ਦੀ ਪਛਾਣ 30 ਸਾਲਾ ਹਸਨ ਅਲੀ ਦੇ ਤੌਰ ਤੇ ਹੋਈ। ਜਾਂਚ ਵਿਚ ਉਸ ਦੇ ਆਈ.ਐੱਸ.ਆਈ. ਐੱਸ. ਤੋਂ ਪ੍ਰਭਾਵਿਤ ਹੋਣ ਦੀ ਗੱਲ ਸਾਹਮਣੇ ਆਈ ਹੈ।