ਐਸਟੋਨੀਅਨ ਰੱਖਿਆ ਮੰਤਰੀ ਨੇ ਦਿੱਤਾ ਅਸਤੀਫ਼ਾ ! ਯੂਕ੍ਰੇਨ ਨਾਲ ਜੁੜੇ 768 ਕਰੋੜ ਦੇ ਮਾਮਲੇ ''ਚ ਕਬੂਲੀ ਜ਼ਿੰਮੇਵਾਰੀ

ਲੰਡਨ/ਤਾਲਿਨ (ਸਰਬਜੀਤ ਸਿੰਘ ਬਨੂੜ)- ਯੂਕ੍ਰੇਨ ਲਈ ਤੋਪਾਂ ਦੇ ਗੋਲੇ ਖ਼ਰੀਦਣ ਨਾਲ ਸਬੰਧਤ ਕਰੀਬ 70 ਮਿਲੀਅਨ ਯੂਰੋ (ਲਗਭਗ 768 ਕਰੋੜ ਰੁਪਏ) ਦੇ ਵਿਵਾਦਤ ਸੌਦੇ ਤੋਂ ਬਾਅਦ ਐਸਟੋਨੀਆ ਦੇ ਰੱਖਿਆ ਮੰਤਰੀ ਹੈਨੋ ਪੇਵਕੁਰ ਨੇ ਸਿਆਸੀ ਜ਼ਿੰਮੇਵਾਰੀ ਕਬੂਲਦਿਆਂ ਆਪਣੇ ਅਹੁਦੇ ਤੋਂ ਅਸਤੀਫ਼ਾ ਦੇ ਦਿੱਤਾ ਹੈ।

ਐਸਟੋਨੀਆ ਦੇ ਸਰਕਾਰੀ ਪ੍ਰਸਾਰਕ ਅਤੇ ਯੂਰਪੀ ਮੀਡੀਆ ਰਿਪੋਰਟਾਂ ਅਨੁਸਾਰ ਐਸਟੋਨੀਅਨ ਸੈਂਟਰ ਫਾਰ ਡਿਫੈਂਸ ਇਨਵੈਸਟਮੈਂਟਸ ਨੇ 2024 ਦੌਰਾਨ ਇਟਲੀ ਵਿੱਚ ਰਜਿਸਟਰਡ ਕੰਪਨੀ ‘ਡਾਟਾਸੇਲ ਐੱਸ.ਆਰ.ਐੱਲ.’ ਨਾਲ ਚਾਰ ਸਮਝੌਤੇ ਕੀਤੇ ਸਨ। ਇਹ ਕੰਪਨੀ ਮਾਰਚ 2024 ਵਿੱਚ ਭਾਰਤ ਦੀ ਨਾਗਪੁਰ ਸਥਿਤ ‘ਨੇਕੋ ਡਿਫੈਂਸ ਮਿਊਨੀਸ਼ਨਜ਼’ ਵੱਲੋਂ ਖ਼ਰੀਦੀ ਗਈ ਸੀ।

ਸਰਕਾਰੀ ਏਜੰਸੀ ਮੁਤਾਬਕ ਸੌਦਿਆਂ ਤਹਿਤ ਕਰੀਬ 70 ਮਿਲੀਅਨ ਯੂਰੋ ਐਡਵਾਂਸ ਅਦਾ ਕੀਤੇ ਗਏ। ਰਿਪੋਰਟਾਂ 'ਚ ਕਿਹਾ ਗਿਆ ਹੈ ਕਿ ਸਮਝੌਤਿਆਂ ਤੋਂ ਪਹਿਲਾਂ ਡਾਟਾਸੇਲ ਜਾਂ ਇਸ ਦੀ ਨਵੀਂ ਮਾਲਕ ਕੰਪਨੀ ਵੱਲੋਂ ਤੋਪਾਂ ਦੇ ਗੋਲੇ ਵੇਚੇ ਜਾਣ ਦਾ ਕੋਈ ਸਥਾਪਤ ਰਿਕਾਰਡ ਸਾਹਮਣੇ ਨਹੀਂ ਆਇਆ ਸੀ।

ਇਹ ਵੀ ਪੜ੍ਹੋ- ਪਾਕਿਸਤਾਨ ਦਾ F-16 ਡੇਗਣ ਵਾਲੇ ਅਭਿਨੰਦਨ ਨੇ ਛੱਡੀ ਭਾਰਤੀ ਏਅਰ ਫ਼ੋਰਸ ! ਚੁਣਿਆ ਨਵਾਂ ਕਰੀਅਰ

ਐਸਟੋਨੀਅਨ ਅਧਿਕਾਰੀਆਂ ਦਾ ਕਹਿਣਾ ਹੈ ਕਿ ਸਪਲਾਈ ਦਾ ਕੁਝ ਹਿੱਸਾ ਯੂਰਪ ਦੇ ਇਕ ਗੋਦਾਮ ਤੱਕ ਪਹੁੰਚਿਆ, ਪਰ ਗੋਲਾ-ਬਾਰੂਦ ਅਧੂਰਾ ਸੀ ਅਤੇ ਨਿਰਧਾਰਤ ਗੁਣਵੱਤਾ ਮਾਪਦੰਡਾਂ ’ਤੇ ਪੂਰਾ ਨਹੀਂ ਉਤਰਿਆ। ਇਸ ਕਾਰਨ ਇਹ ਯੂਕ੍ਰੇਨ ਨੂੰ ਨਹੀਂ ਸੌਂਪਿਆ ਜਾ ਸਕਿਆ। ਨਵੰਬਰ 2025 ਵਿੱਚ ਸਮਝੌਤੇ ਰੱਦ ਕਰਕੇ ਕੰਪਨੀ ਤੋਂ ਰਕਮ ਵਾਪਸ ਮੰਗੀ ਗਈ ਸੀ।

ਦੂਜੇ ਪਾਸੇ ਡਾਟਾਸੇਲ ਨੇ ਐਸਟੋਨੀਆ ਦੇ ਦਾਅਵਿਆਂ ਨਾਲ ਅਸਹਿਮਤੀ ਪ੍ਰਗਟ ਕੀਤੀ ਹੈ। ਕੰਪਨੀ ਦਾ ਕਹਿਣਾ ਹੈ ਕਿ ਉਸ ਨੂੰ ਲਗਭਗ 59 ਮਿਲੀਅਨ ਯੂਰੋ ਮਿਲੇ ਅਤੇ ਉਸ ਵੱਲੋਂ ਕਰੀਬ 58 ਮਿਲੀਅਨ ਯੂਰੋ ਦਾ ਸਾਮਾਨ ਮੁਹੱਈਆ ਕਰਵਾਇਆ ਗਿਆ। ਕੰਪਨੀ ਨੇ ਦੇਰੀ ਲਈ ਅੰਤਰਰਾਸ਼ਟਰੀ ਸਪਲਾਈ ਸਿਸਟਮ ਅਤੇ ਐਸਟੋਨੀਅਨ ਏਜੰਸੀ ਦੇ ਕੁਝ ਫ਼ੈਸਲਿਆਂ ਨੂੰ ਜ਼ਿੰਮੇਵਾਰ ਦੱਸਿਆ ਹੈ। ਦੋਵਾਂ ਧਿਰਾਂ ਦਾ ਵਿਵਾਦ ਹੁਣ ਐਸਟੋਨੀਆ ਦੀਆਂ ਅਦਾਲਤਾਂ ਅਤੇ ਅੰਤਰਰਾਸ਼ਟਰੀ ਸਾਲਸੀ ਕੋਲ ਵਿਚਾਰ ਅਧੀਨ ਹੈ।

ਅਸਤੀਫ਼ੇ ਦਾ ਐਲਾਨ ਕਰਦਿਆਂ ਪੇਵਕੁਰ ਨੇ ਕਿਹਾ ਕਿ ਭਾਵੇਂ ਰੱਖਿਆ ਮੰਤਰੀ ਖ਼ੁਦ ਠੇਕਿਆਂ ਦੀ ਗੱਲਬਾਤ ਜਾਂ ਅਦਾਇਗੀਆਂ ਦੇ ਵੇਰਵਿਆਂ ਵਿੱਚ ਸ਼ਾਮਲ ਨਹੀਂ ਹੁੰਦਾ, ਪਰ ਵਿਭਾਗ ਦੀ ਸਮੁੱਚੀ ਕਾਰਗੁਜ਼ਾਰੀ ਲਈ ਉਸ ਦੀ ਸਿਆਸੀ ਜ਼ਿੰਮੇਵਾਰੀ ਬਣਦੀ ਹੈ। ਯੂਰਪੀ ਕਮਿਸ਼ਨ ਨੇ ਕਿਹਾ ਹੈ ਕਿ ਉਹ ਐਸਟੋਨੀਆ ਦੇ ਅਧਿਕਾਰੀਆਂ ਨਾਲ ਸੰਪਰਕ ਵਿੱਚ ਹੈ ਅਤੇ ਇਹ ਪਤਾ ਲਗਾਇਆ ਜਾ ਰਿਹਾ ਹੈ ਕਿ ਯੂਰਪੀ ਪੀਸ ਫੈਸਿਲਿਟੀ ਵਿੱਚੋਂ ਦਿੱਤੀ ਗਈ ਰਕਮ ਵਾਪਸ ਵਸੂਲਣ ਦੀ ਲੋੜ ਪਵੇਗੀ ਜਾਂ ਨਹੀਂ।

ਇਹ ਵੀ ਪੜ੍ਹੋ- ਵੀਆਚਾ ਆਰਮੀ ਬੇਸ 'ਚ ਹੋ ਗਿਆ ਜ਼ਬਰਦਸਤ ਧਮਾਕਾ ! ਘੱਟੋ-ਘੱਟ 10 ਲੋਕਾਂ ਦੀ ਮੌਤ, 60 ਹੋਰ ਜ਼ਖ਼ਮੀ

ਤਾਜ਼ਾ ਤੇ ਵੱਡੀਆਂ ਖ਼ਬਰਾਂ ਸਭ ਤੋਂ ਪਹਿਲਾਂ ਪੜ੍ਹਨ ਲਈ ਜੁਆਇਨ ਕਰੋ ‘ਜਗ ਬਾਣੀ’ ਦਾ ਵਟਸਐਪ ਚੈਨਲ

👇Join us on Whatsapp channel👇

https://whatsapp.com/channel/0029Va94hsaHAdNVur4L170e