ਅਮਰੀਕਾ ਸਥਿਤ ਭਾਰਤੀ ਸੰਗਠਨ ਨੇ ਬ੍ਰਿਟੇਨ ਦੇ PM ਅਹੁਦੇ ਲਈ ਚੋਣ 'ਚ ਸੁਨਕ ਨੂੰ ਦਿੱਤਾ ਸਮਰਥਨ
Tuesday, Aug 09, 2022 - 11:22 AM (IST)
ਵਾਸ਼ਿੰਗਟਨ (ਭਾਸ਼ਾ)- ਅਮਰੀਕਾ ਸਥਿਤ ਇਕ ਭਾਰਤੀ ਸੰਗਠਨ ਨੇ ਸੋਮਵਾਰ ਨੂੰ ਭਾਰਤੀ ਮੂਲ ਦੇ ਰਿਸ਼ੀ ਸੁਨਕ ਨੂੰ ਆਪਣਾ ਸਮਰਥਨ ਦਿੱਤਾ, ਜੋ ਬ੍ਰਿਟੇਨ ਦੇ ਪ੍ਰਧਾਨ ਮੰਤਰੀ ਅਹੁਦੇ ਦੀ ਦੌੜ ‘ਚ ਸ਼ਾਮਲ ਹਨ। ਬ੍ਰਿਟੇਨ ਵਿਚ ਕੰਜ਼ਰਵੇਟਿਵ ਪਾਰਟੀ ਦੇ ਨਵੇਂ ਨੇਤਾ ਦੀ ਚੋਣ ਕਰਨ ਦੀ ਦੌੜ ਵਿਚ ਆਖਰੀ ਦੋ ਉਮੀਦਵਾਰ ਰਿਸ਼ੀ ਸੁਨਕ ਅਤੇ ਲਿਜ਼ ਟਰਸ ਨੇ ਸੋਮਵਾਰ ਨੂੰ ਦੇਸ਼ ਵਿਚ ਮਹਿੰਗਾਈ ਨਾਲ ਨਜਿੱਠਣ ਲਈ ਆਪਣੇ ਪ੍ਰਸਤਾਵਾਂ 'ਤੇ ਬਹਿਸ ਕੀਤੀ। ਕੰਜ਼ਰਵੇਟਿਵ ਪਾਰਟੀ ਦਾ ਨਵਾਂ ਨੇਤਾ ਅਗਲੇ ਮਹੀਨੇ ਦੇ ਸ਼ੁਰੂ ਵਿੱਚ ਬ੍ਰਿਟੇਨ ਦੇ ਪ੍ਰਧਾਨ ਮੰਤਰੀ ਦਾ ਅਹੁਦਾ ਵੀ ਸੰਭਾਲੇਗਾ। ਜੇਕਰ ਸੁਨਕ ਇਸ ਚੋਣ ਵਿੱਚ ਕਾਮਯਾਬ ਹੋ ਜਾਂਦੇ ਹਨ ਤਾਂ ਉਹ ਬ੍ਰਿਟੇਨ ਦੇ ਭਾਰਤੀ ਮੂਲ ਦੇ ਪਹਿਲੇ ਪ੍ਰਧਾਨ ਮੰਤਰੀ ਬਣ ਸਕਦੇ ਹਨ।
ਰਿਪਬਲਿਕਨ ਹਿੰਦੂ ਕੁਲੀਸ਼ਨ (ਆਰ.ਐੱਚ.ਸੀ.) ਨੇ ਕਿਹਾ ਕਿ ਯੂਕੇ ਦੇ ਅਗਲੇ ਪ੍ਰਧਾਨ ਮੰਤਰੀ ਵਜੋਂ ਸੁਨਕ ਦਾ ਸਮਰਥਨ ਕਰਦੇ ਹਾਂ, ਕਿਉਂਕਿ ਉਹ ਆਪਣੇ ਮੁੱਲਾਂ ਅਤੇ ਸਿਧਾਂਤਾਂ ਦਾ ਸਨਮਾਨ ਕਰਦੇ ਹਨ। ਉਨ੍ਹਾਂ ਨੇ ਕਿਹਾ ਕਿ ਅਸੀਂ ਸੁਨਕ ਦਾ ਨਾ ਸਿਰਫ਼ ਇਸ ਲਈ ਸਮਰਥਨ ਕਰ ਰਹੇ ਹਾਂ ਕਿਉਂਕਿ ਉਹ ਇੱਕ ਹਿੰਦੂ ਹੈ, ਸਗੋਂ ਇਸ ਲਈ ਵੀ ਹੈ ਕਿਉਂਕਿ ਸੁਨਕ ਰਿਪਬਲਿਕਨ ਹਿੰਦੂ ਕੁਲੀਸ਼ਨ ਵਾਂਗ ਸਾਡੇ ਮੂਲ ਮੁੱਲਾਂ ਅਤੇ ਸੰਸਥਾਪਕ ਸਿਧਾਂਤਾਂ ਦਾ ਪੂਰੀ ਤਰ੍ਹਾਂ ਸਨਮਾਨ ਕਰਦਾ ਹੈ, ਜਿਸ ਵਿੱਚ ਸੀਮਤ ਸ਼ਕਤੀਆਂ ਵਾਲੀ ਸਰਕਾਰ ਦੇ ਨਾਲ ਮੁਫ਼ਤ ਉੱਦਮ, ਵਿੱਤੀ ਅਨੁਸ਼ਾਸਨ, ਪਰਿਵਾਰਕ ਕਦਰਾਂ-ਕੀਮਤਾਂ ਅਤੇ ਇੱਕ ਮਜ਼ਬੂਤਵਿਦੇਸ਼ ਨੀਤੀ ਸ਼ਾਮਲ ਹੈ। ਇੱਥੇ ਦੱਸ ਦਈਏ ਕਿ RHC ਦੀ ਸਥਾਪਨਾ ਅਮਰੀਕਾ ਵਿੱਚ 2015 ਵਿੱਚ ਹਿੰਦੂ-ਅਮਰੀਕਨ ਭਾਈਚਾਰੇ ਅਤੇ ਰਿਪਬਲਿਕਨ ਨੀਤੀ ਨਿਰਮਾਤਾਵਾਂ ਅਤੇ ਨੇਤਾਵਾਂ ਵਿਚਕਾਰ ਇੱਕ ਪੁਲ ਬਣਾਉਣ ਦੇ ਉਦੇਸ਼ ਨਾਲ ਕੀਤੀ ਗਈ ਸੀ।
ਪੜ੍ਹੋ ਇਹ ਅਹਿਮ ਖ਼ਬਰ- ਅਮਰੀਕਾ ਵੱਲੋਂ ਯੂਕ੍ਰੇਨ ਨੂੰ ਇਕ ਅਰਬ ਅਮਰੀਕੀ ਡਾਲਰ ਦੀ ਹਥਿਆਰ ਸਹਾਇਤਾ ਨੂੰ ਮਨਜ਼ੂਰੀ
ਸੰਸਥਾ ਦੇ ਸੰਸਥਾਪਕ, ਪ੍ਰਧਾਨ ਅਤੇ ਸੀਈਓ ਸ਼ਲਭ ਕੁਮਾਰ ਨੇ ਕਿਹਾ ਕਿ ਰਿਸ਼ੀ ਸੁਨਕ ਨੂੰ ਮੇਰਾ ਅਤੇ RHC ਦਾ ਪੂਰਾ ਸਮਰਥਨ ਹੈ। ਸੁਨਕ ਬ੍ਰਿਟੇਨ ਦੇ ਨਵੇਂ ਪ੍ਰਧਾਨ ਮੰਤਰੀ ਵਜੋਂ ਬਹੁਤ ਸਫਲ ਹੋਣਗੇ। ਸੁਨਕ ਨਾ ਸਿਰਫ ਬ੍ਰਿਟੇਨ ਲਈ ਸਗੋਂ ਇਸ ਦੇ ਰਣਨੀਤਕ ਸਹਿਯੋਗੀ ਅਮਰੀਕਾ ਅਤੇ ਭਾਰਤ ਲਈ ਵੀ ਇਕ ਵਧੀਆ ਵਿਕਲਪ ਸਾਬਤ ਹੋਵੇਗਾ। ਉਹਨਾਂ ਨੇ ਕਿਹਾ ਕਿ ਅਸੀਂ ਸਾਰੇ ਕੰਜ਼ਰਵੇਟਿਵ ਦੇ ਨਾਲ-ਨਾਲ ਦੁਨੀਆ ਭਰ ਵਿਚ ਮੌਜੂਦ ਇਕ ਅਰਬ ਹਿੰਦੂਆਂ ਨੂੰ ਉਤਸ਼ਾਹਿਤ ਕਰਦੇ ਹਾਂ ਕਿ ਉਹ ਬ੍ਰਿਟਿਸ਼ ਐੱਨ.ਈ.ਸੀ. ਨਿਯਮਾਂ ਦੀ ਪਾਲਣਾ ਕਰਦੇ ਹੋਏ, ਬ੍ਰਿਟੇਨ ਦੇ ਪ੍ਰਧਾਨ ਮੰਤਰੀ ਦੇ ਅਹੁਦੇ ਲਈ ਰਿਸ਼ੀ ਦੀ ਉਮੀਦਵਾਰੀ ਨੂੰ ਪੂਰਾ ਸਮਰਥਨ ਦੇਣ ਲਈ ਆਪਣੀ ਪੂਰੀ ਕੋਸ਼ਿਸ਼ ਕਰਨ। ਸੁਨਕ ਨਿਯਮਿਤ ਤੌਰ 'ਤੇ ਮੰਦਰ ਜਾਂਦੇ ਹਨ। ਉਹ ਸਾਊਥੈਂਪਟਨ ਵਿੱਚ ਪੈਦਾ ਹੋਇਆ ਸੀ ਅਤੇ ਨਵੰਬਰ 2020 ਵਿੱਚ '11 ਡਾਊਨਿੰਗ ਸਟ੍ਰੀਟ' ਸਥਿਤ ਆਪਣੇ ਦਫ਼ਤਰ-ਨਿਵਾਸ ਦੇ ਬਾਹਰ ਦੀਵਾਲੀ ਦੀਵੇ ਜਗਾਉਣ ਵਾਲਾ ਪਹਿਲਾ ਵਿੱਤ ਮੰਤਰੀ ਸੀ। ਉਨ੍ਹਾਂ ਦੀਆਂ ਧੀਆਂ ਅਨੁਸ਼ਕਾ ਅਤੇ ਕ੍ਰਿਸ਼ਨਾ ਵੀ ਭਾਰਤੀ ਸੰਸਕ੍ਰਿਤੀ ਤੋਂ ਪੂਰੀ ਤਰ੍ਹਾਂ ਜਾਣੂ ਹਨ। ਸੁਨਕ ਦੀ ਪਤਨੀ ਅਕਸ਼ਤਾ ਇਨਫੋਸਿਸ ਦੇ ਸਹਿ-ਸੰਸਥਾਪਕ ਨਰਾਇਣ ਮੂਰਤੀ ਦੀ ਬੇਟੀ ਹੈ।
