ਟਰੰਪ ਨੂੰ ਖ਼ੁਸ਼ ਕਰਨ ਲਈ US ਨਾਲ ਇਹ ਵੱਡੀ ਡੀਲ ਕਰੇਗਾ ਤਾਇਵਾਨ! ਮੂੰਹ ਤੱਕਦਾ ਰਹਿ ਜਾਵੇਗਾ ਚੀਨ
Tuesday, Nov 12, 2024 - 12:18 AM (IST)
ਵਾਸ਼ਿੰਗਟਨ : ਅਮਰੀਕਾ ਦੀਆਂ ਚੋਣਾਂ ਵਿਚ ਸੱਤਾ ਬਦਲ ਗਈ ਹੈ। ਹੁਣ ਡੋਨਾਲਡ ਟਰੰਪ ਇਕ ਵਾਰ ਫਿਰ ਅਮਰੀਕਾ ਦੇ ਰਾਸ਼ਟਰਪਤੀ ਹੋਣਗੇ। ਅਮਰੀਕੀ ਰਾਜਨੀਤੀ 'ਚ ਬਦਲਾਅ ਦਾ ਅਸਰ ਦੂਜੇ ਦੇਸ਼ਾਂ ਨਾਲ ਸਬੰਧਾਂ 'ਤੇ ਵੀ ਦੇਖਣ ਨੂੰ ਮਿਲੇਗਾ। ਟਰੰਪ ਦੇ ਪਿਛਲੇ ਕਾਰਜਕਾਲ ਦੌਰਾਨ ਜਿਨ੍ਹਾਂ ਦੇਸ਼ਾਂ 'ਤੇ ਜ਼ਿਆਦਾ ਤਵੱਜੋ ਦਿੱਤੀ ਗਈ ਸੀ, ਉਹ ਦੇਸ਼ ਇਕ ਵਾਰ ਫਿਰ ਉਸੇ ਉਮੀਦ ਨਾਲ ਚਿੰਬੜੇ ਹੋਏ ਹਨ। ਤਾਇਵਾਨ ਦੀ ਵੀ ਇਹੀ ਸਥਿਤੀ ਹੈ, ਜੋ ਇਸ ਵੇਲੇ ਅਮਰੀਕਾ ਨਾਲ ਵੱਡਾ ਰੱਖਿਆ ਸੌਦਾ ਕਰਕੇ ਟਰੰਪ ਨੂੰ ਖੁਸ਼ ਕਰਨਾ ਚਾਹੁੰਦਾ ਹੈ।
ਹਾਲਾਂਕਿ, ਚੀਨ ਅਜਿਹਾ ਬਿਲਕੁਲ ਵੀ ਨਹੀਂ ਹੋਣ ਦੇਣਾ ਚਾਹੁੰਦਾ ਪਰ ਜੇਕਰ ਟਰੰਪ ਦੂਜੇ ਕਾਰਜਕਾਲ 'ਚ ਤਾਇਵਾਨ ਵੱਲ ਜ਼ਿਆਦਾ ਝੁਕਾਅ ਰੱਖਦੇ ਹਨ ਤਾਂ ਇਹ ਯਕੀਨੀ ਤੌਰ 'ਤੇ ਉਸ ਲਈ ਚਿੰਤਾ ਦਾ ਵਿਸ਼ਾ ਹੋ ਸਕਦਾ ਹੈ। ਦੂਜੇ ਪਾਸੇ ਤਾਇਵਾਨ ਸਰਕਾਰ ਦੇ ਉੱਚ ਅਧਿਕਾਰੀ ਚੁੱਪ-ਚੁਪੀਤੇ ਕਿਸੇ ਵੱਡੇ ਰੱਖਿਆ ਸੌਦੇ ਦੀ ਗੱਲ ਕਰ ਰਹੇ ਹਨ ਪਰ ਸਰਕਾਰ ਅਧਿਕਾਰਤ ਤੌਰ 'ਤੇ ਕੁਝ ਵੀ ਦੱਸਣ ਤੋਂ ਬਚਦੀ ਨਜ਼ਰ ਆ ਰਹੀ ਹੈ।
ਤਾਇਵਾਨ ਦੇ ਰਾਸ਼ਟਰਪਤੀ ਲਾਈ ਚਿੰਗ ਤੇਹ ਦੇ ਬੁਲਾਰੇ ਕੈਰਿਨ ਕੁਓਨ ਨੇ ਇਸ ਗੱਲ ਦੀ ਪੁਸ਼ਟੀ ਨਹੀਂ ਕੀਤੀ ਕਿ ਟਰੰਪ ਦੀ ਟੀਮ ਅਤੇ ਤਾਇਵਾਨ ਦੇ ਸੀਨੀਅਰ ਅਧਿਕਾਰੀ ਕਿਸੇ ਰੱਖਿਆ ਪੈਕੇਜ 'ਤੇ ਚਰਚਾ ਕਰ ਰਹੇ ਸਨ। ਪਰ ਉਨ੍ਹਾਂ ਨੇ ਕਿਹਾ ਕਿ ਤਾਇਵਾਨ ਅਤੇ ਆਸਪਾਸ ਦੇ ਖੇਤਰ 'ਚ ਚੀਨ ਵੱਲੋਂ ਲਗਾਤਾਰ ਵਧਦੇ ਫੌਜੀ ਖਤਰੇ ਦਾ ਸਾਹਮਣਾ ਕਰਦੇ ਹੋਏ ਅਸੀਂ ਅਤੇ ਆਲੇ-ਦੁਆਲੇ ਦੇ ਹੋਰ ਦੇਸ਼ ਆਪਣੀ ਸੁਰੱਖਿਆ ਨੂੰ ਮਜ਼ਬੂਤ ਕਰਨ ਲਈ ਲਗਾਤਾਰ ਕੋਸ਼ਿਸ਼ ਕਰ ਰਹੇ ਹਾਂ। ਦੂਜੇ ਪਾਸੇ ਇਸ ਮੁੱਦੇ 'ਤੇ ਟਰੰਪ ਦੀ ਟੀਮ ਵੱਲੋਂ ਕੋਈ ਪ੍ਰਤੀਕਿਰਿਆ ਨਹੀਂ ਆਈ। ਹਾਲਾਂਕਿ, ਅਮਰੀਕਾ ਵਿਚ ਚੀਨੀ ਦੂਤਘਰ ਨੇ ਜਵਾਬ ਦਿੱਤਾ ਹੈ। ਚੀਨੀ ਦੂਤਘਰ ਦੀ ਤਰਫੋਂ ਕਿਹਾ ਗਿਆ ਸੀ ਕਿ ਅਮਰੀਕਾ ਤਾਇਵਾਨ ਨੂੰ ਹਥਿਆਰ ਵੇਚਣਾ ਬੰਦ ਕਰੇ।
ਇਹ ਵੀ ਪੜ੍ਹੋ : Trump ਦਾ ਐਲਾਨ, ਟੌਮ ਹੋਮੈਨ ਹੋਣਗੇ ਬਾਰਡਰ ਅਫਸਰ
ਅਮਰੀਕਾ ਤੋਂ ਕਿਹੜੇ ਹਥਿਆਰ ਜਾਂ ਸਾਜ਼ੋ-ਸਾਮਾਨ ਚਾਹੁੰਦਾ ਹੈ ਤਾਇਵਾਨ?
ਤਾਇਵਾਨ ਦੀ ਸਥਿਤੀ 'ਤੇ ਨਜ਼ਰ ਰੱਖਣ ਵਾਲੇ ਕੁਝ ਲੋਕਾਂ ਦਾ ਮੰਨਣਾ ਹੈ ਕਿ ਟਰੰਪ ਦੇ ਸੱਤਾ 'ਚ ਆਉਣ ਤੋਂ ਬਾਅਦ ਤਾਇਵਾਨ ਅਮਰੀਕਾ ਤੋਂ ਲਾਕਹੀਡ ਮਾਰਟਿਨ ਜਹਾਜ਼ ਅਤੇ ਏਅਰਬੋਰਨ ਰਾਡਾਰ ਸਿਸਟਮ (ਨਾਰਥਰੋਪ ਗ੍ਰੁਮਨ ਈ-2ਡੀ ਐਡਵਾਂਸਡ ਹਾਕ ਆਈ) ਦੀ ਮੰਗ ਕਰ ਸਕਦਾ ਹੈ। ਇਸ ਦੇ ਨਾਲ ਹੀ ਤਾਇਵਾਨ ਕੁਝ ਮਿਜ਼ਾਈਲਾਂ ਅਤੇ ਐੱਫ-35 ਲੜਾਕੂ ਜਹਾਜ਼ਾਂ ਲਈ ਵੀ ਗੱਲ ਕਰ ਸਕਦਾ ਹੈ। ਅਮਰੀਕਾ ਵਿਚ ਟਰੰਪ ਪ੍ਰਸ਼ਾਸਨ ਦਾ ਹਿੱਸਾ ਰਹੇ ਇਕ ਸਾਬਕਾ ਅਧਿਕਾਰੀ ਨੇ ਕਿਹਾ ਕਿ ਤਾਇਵਾਨ ਇਕ ਅਜਿਹੇ ਪੈਕੇਜ ਬਾਰੇ ਸੋਚ ਰਿਹਾ ਹੈ ਜੋ ਦਿਖਾ ਸਕੇ ਕਿ ਉਹ ਇਸ ਮਾਮਲੇ ਵਿਚ ਗੰਭੀਰ ਹੈ। ਉਸ ਨੇ ਕਿਹਾ ਕਿ ਜੇਕਰ ਉਹ ਅਜਿਹਾ ਕਰਦਾ ਹੈ ਤਾਂ ਉਸ ਦਾ ਨਾਂ ਆਉਣ 'ਤੇ ਉਹ ਅਮਰੀਕਾ ਦੇ ਰਾਸ਼ਟਰੀ ਸੁਰੱਖਿਆ ਸਲਾਹਕਾਰ ਕੋਲ ਜਾ ਕੇ ਅਮਰੀਕੀ ਹਥਿਆਰਾਂ ਦਾ ਬਹੁਤ ਵੱਡਾ ਪੈਕੇਜ ਪੇਸ਼ ਕਰੇਗਾ।
ਤਾਇਵਾਨ ਸਰਕਾਰ ਅਤੇ ਡੋਨਾਲਡ ਟਰੰਪ ਟੀਮ ਦੀ ਹੋ ਰਹੀ ਹੈ ਖ਼ੁਫ਼ੀਆ ਗੱਲਬਾਤ?
ਤਾਇਵਾਨ ਦੇ ਇਕ ਸੀਨੀਅਰ ਰਾਸ਼ਟਰੀ ਸੁਰੱਖਿਆ ਅਧਿਕਾਰੀ ਨੇ ਕਿਹਾ ਕਿ ਟਰੰਪ ਦੀ ਟੀਮ ਨਾਲ ਇਸ ਬਾਰੇ ਗੈਰ ਰਸਮੀ ਗੱਲਬਾਤ ਹੋਈ ਹੈ ਕਿ ਤਾਇਵਾਨ ਦੀ ਰੱਖਿਆ ਲਈ ਕਿਸ ਕਿਸਮ ਦਾ ਹਥਿਆਰ ਪੈਕੇਜ ਸਭ ਤੋਂ ਵਧੀਆ ਹੋਵੇਗਾ। ਉਨ੍ਹਾਂ ਅੱਗੇ ਕਿਹਾ ਕਿ ਅਜਿਹੇ ਬਹੁਤ ਸਾਰੇ ਹਥਿਆਰ ਅਤੇ ਸਾਜ਼ੋ-ਸਾਮਾਨ ਹਨ, ਜਿਨ੍ਹਾਂ 'ਤੇ ਸਾਡੀ ਫੌਜ ਲੰਬੇ ਸਮੇਂ ਤੋਂ ਨਜ਼ਰ ਰੱਖ ਰਹੀ ਹੈ ਪਰ ਅਸੀਂ ਉਨ੍ਹਾਂ ਨੂੰ ਹਾਸਲ ਨਹੀਂ ਕਰ ਪਾ ਰਹੇ ਹਾਂ। ਅਜਿਹੀ ਸਥਿਤੀ ਵਿਚ, ਬਹੁਤ ਸਾਰੀਆਂ ਚੀਜ਼ਾਂ ਹਨ ਜੋ ਕੀਤੀਆਂ ਜਾ ਸਕਦੀਆਂ ਹਨ। ਇਕ ਹੋਰ ਅਧਿਕਾਰੀ ਨੇ ਕਿਹਾ ਕਿ ਏਜੀਸ ਕੰਬੈਟ ਸਿਸਟਮ ਸਾਡੀ ਤਰਜੀਹ ਹੈ। ਦੱਸਣਯੋਗ ਹੈ ਕਿ ਏਜੀਸ ਕੰਬੈਟ ਸਿਸਟਮ ਇਕ ਅਮਰੀਕੀ ਜਲ ਸੈਨਾ ਹਥਿਆਰ ਪ੍ਰਣਾਲੀ ਹੈ। ਹਾਲਾਂਕਿ ਅਧਿਕਾਰੀਆਂ ਅਤੇ ਰੱਖਿਆ ਮਾਹਿਰਾਂ ਦਾ ਇਹ ਵੀ ਕਹਿਣਾ ਹੈ ਕਿ ਇਨ੍ਹਾਂ ਤੋਂ ਇਲਾਵਾ ਹੋਰ ਵੀ ਕਈ ਮਹਿੰਗੀਆਂ ਚੀਜ਼ਾਂ ਹਨ, ਜਿਨ੍ਹਾਂ ਦੀ ਤਾਇਵਾਨ ਨੂੰ ਵੀ ਲੋੜ ਹੈ ਅਤੇ ਜਿਨ੍ਹਾਂ ਦਾ ਅਮਰੀਕਾ 'ਤੇ ਵੀ ਵੱਡਾ ਅਸਰ ਪਵੇਗਾ।
ਜਗ ਬਾਣੀ ਈ-ਪੇਪਰ ਨੂੰ ਪੜ੍ਹਨ ਅਤੇ ਐਪ ਨੂੰ ਡਾਊਨਲੋਡ ਕਰਨ ਲਈ ਇੱਥੇ ਕਲਿੱਕ ਕਰੋ
For Android:- https://play.google.com/store/apps/details?id=com.jagbani&hl=en
For IOS:- https://itunes.apple.com/in/app/id538323711?mt=8
