71 ਸਾਲ ਦਾ ਦਰਿੰਦਾ! 72 ਅਜਨਬੀਆਂ ਨੇ ਕੀਤਾ ਪਤਨੀ ਨਾਲ ਜਬਰ ਜਨਾਹ, ਇਸ ਤਰ੍ਹਾਂ ਬੁਲਾਉਂਦਾ ਸੀ ਘਰ
Thursday, Sep 05, 2024 - 06:57 PM (IST)
ਪੈਰਿਸ : ਫਰਾਂਸ ਤੋਂ ਇਕ ਬਹੁਤ ਹੀ ਹੈਰਾਨ ਕਰਨ ਵਾਲਾ ਮਾਮਲਾ ਸਾਹਮਣੇ ਆਇਆ ਹੈ, ਜਿਸ 'ਚ ਇਕ 71 ਸਾਲਾ ਵਿਅਕਤੀ 'ਤੇ ਆਪਣੀ ਪਤਨੀ ਨਾਲ 72 ਅਜਨਬੀਆਂ ਵੱਲੋਂ 10 ਸਾਲ ਤੱਕ ਬਲਾਤਕਾਰ ਕਰਵਾਉਣ ਦਾ ਦੋਸ਼ ਲਗਾਇਆ ਗਿਆ ਹੈ। ਇਹ ਵਿਅਕਤੀ ਆਪਣੀ ਪਤਨੀ ਨੂੰ ਲਗਾਤਾਰ ਨਸ਼ੇ ਦੇ ਕੇ ਬੇਹੋਸ਼ੀ ਦੀ ਹਾਲਤ ਵਿੱਚ ਰੱਖਦਾ ਸੀ ਤਾਂ ਜੋ ਉਹ ਉਸਦੇ ਨਾਲ ਹੋ ਰਹੇ ਸਰੀਰਕ ਸ਼ੋਸ਼ਣ ਤੋਂ ਅਣਜਾਣ ਰਹੇ। ਇਸ ਮਾਮਲੇ ਵਿਚ ਅਦਾਲਤ ਵਿੱਚ ਸੁਣਵਾਈ ਚੱਲ ਰਹੀ ਹੈ। ਘਟਨਾ ਫਰਾਂਸ ਦੇ ਡੋਮਿਨਿਕ ਨਾਂ ਦੇ ਵਿਅਕਤੀ ਨਾਲ ਸਬੰਧਿਤ ਹੈ, ਜਿਸ ਨੇ ਆਪਣੀ 72 ਸਾਲਾ ਪਤਨੀ ਗਿਜ਼ੇਲ ਨਾਲ 10 ਸਾਲ ਤੱਕ ਅਣਮਨੁੱਖੀ ਹਰਕਤਾਂ ਕੀਤੀਆਂ। ਡੋਮਿਨਿਕ ਨੇ ਆਪਣੀ ਪਤਨੀ ਦਾ ਸ਼ੋਸ਼ਣ ਕਰਨ ਲਈ 72 ਲੋਕਾਂ ਨਾਲ ਸੰਪਰਕ ਕੀਤਾ ਅਤੇ ਉਨ੍ਹਾਂ ਨੂੰ ਆਪਣੇ ਘਰ ਬੁਲਾਇਆ ਅਤੇ ਗਿਜ਼ੇਲ ਨਾਲ ਜਬਰ ਜਨਾਹ ਕਰਵਾਇਆ। ਇਸ ਦੌਰਾਨ ਗਿਜ਼ੇਲ ਨੂੰ ਨਸ਼ੇ ਦੇ ਕੇ ਬੇਹੋਸ਼ ਰੱਖਿਆ ਗਿਆ, ਜਿਸ ਕਾਰਨ ਉਹ ਆਪਣੇ ਨਾਲ ਹੋ ਰਹੇ ਅੱਤਿਆਚਾਰਾਂ ਤੋਂ ਪੂਰੀ ਤਰ੍ਹਾਂ ਅਣਜਾਣ ਸੀ।
ਡੋਮਿਨਿਕ ਨੇ ਬਲਾਤਕਾਰੀਆਂ ਲਈ ਵੀ ਕੁਝ ਨਿਯਮ ਬਣਾਏ ਹਨ। ਉਸਨੇ ਉਨ੍ਹਾਂ ਨੂੰ ਹਿਦਾਇਤ ਦਿੱਤੀ ਕਿ ਉਹ ਗਿਜ਼ੇਲ ਨੂੰ ਜਗਾਉਣ ਦੀ ਕੋਸ਼ਿਸ਼ ਨਾ ਕਰਨ, ਆਫਟਰਸ਼ੇਵ ਜਾਂ ਸਿਗਰੇਟ ਦੀ ਵਰਤੋਂ ਨਾ ਕਰਨ ਅਤੇ ਘਰ ਵਿੱਚ ਦਾਖਲ ਹੋਣ ਤੋਂ ਪਹਿਲਾਂ ਆਪਣੇ ਨਹੁੰ ਕੱਟਣ। ਇਸ ਤੋਂ ਇਲਾਵਾ, ਉਸਨੇ ਉਨ੍ਹਾਂ ਨੂੰ ਰਸੋਈ ਵਿੱਚ ਆਪਣੇ ਕੱਪੜੇ ਉਤਾਰਨ ਲਈ ਕਿਹਾ ਤਾਂ ਜੋ ਕੋਈ ਨਿਸ਼ਾਨ ਨਾ ਮਿਲੇ। ਇਹ ਅਣਮਨੁੱਖੀ ਕਾਰਾ 2011 ਤੋਂ 2020 ਤੱਕ ਜਾਰੀ ਰਿਹਾ। ਇਸ ਸਾਜ਼ਿਸ਼ ਦਾ ਖੁਲਾਸਾ ਉਦੋਂ ਹੋਇਆ ਜਦੋਂ ਪੁਲਸ ਨੇ ਡੋਮਿਨਿਕ ਨੂੰ ਔਰਤਾਂ ਦੇ ਕੱਪੜਿਆਂ ਹੇਠ ਲੁਕ ਕੇ ਵੀਡੀਓ ਬਣਾਉਣ ਦੇ ਦੋਸ਼ 'ਚ ਗ੍ਰਿਫਤਾਰ ਕਰ ਲਿਆ। ਜਾਂਚ ਦੌਰਾਨ ਪੁਲਸ ਨੂੰ ਉਸ ਦੇ ਘਰੋਂ ਸਬੂਤ ਮਿਲੇ ਹਨ ਜੋ ਉਸ ਦੀ ਪਤਨੀ ਦੇ ਸ਼ੋਸ਼ਣ ਨੂੰ ਸਾਬਤ ਕਰਦੇ ਹਨ।
ਹੁਣ ਤੱਕ 51 ਲੋਕਾਂ ਦੀ ਪਛਾਣ ਹੋ ਚੁੱਕੀ ਹੈ, ਜਿਨ੍ਹਾਂ 'ਚ ਕਈ ਵਿਆਹੇ ਲੋਕ ਅਤੇ ਉੱਚ ਅਹੁਦਿਆਂ 'ਤੇ ਕੰਮ ਕਰਨ ਵਾਲੇ ਲੋਕ ਵੀ ਸ਼ਾਮਲ ਹਨ। ਗਿਜ਼ੇਲ ਨੇ ਇਸ ਹੈਵਾਨੀਅਤ ਦੇ ਖਿਲਾਫ ਕਾਨੂੰਨੀ ਲੜਾਈ ਸ਼ੁਰੂ ਕੀਤੀ ਹੈ ਅਤੇ ਆਪਣੀ ਪਛਾਣ ਛੁਪਾਉਣ ਤੋਂ ਇਨਕਾਰ ਕਰ ਦਿੱਤਾ ਹੈ। ਉਸ ਦਾ ਕਹਿਣਾ ਹੈ ਕਿ ਉਹ ਇਸ ਘਟਨਾ ਨੂੰ ਦੁਨੀਆਂ ਦੇ ਸਾਹਮਣੇ ਲਿਆਉਣਾ ਚਾਹੁੰਦੀ ਹੈ ਤਾਂ ਜੋ ਸਮਾਜ ਵਿੱਚ ਜਾਗਰੂਕਤਾ ਫੈਲਾਈ ਜਾ ਸਕੇ। ਇਸ ਮਾਮਲੇ ਦੀ ਸੁਣਵਾਈ ਹੁਣ ਅਦਾਲਤ ਵਿਚ ਚੱਲ ਰਹੀ ਹੈ। ਦੋਸ਼ੀ ਡੋਮਿਨਿਕ ਅਤੇ 20 ਹੋਰਾਂ ਨੂੰ ਹਿਰਾਸਤ ਵਿਚ ਰੱਖਿਆ ਗਿਆ ਹੈ, ਜਦਕਿ ਬਾਕੀ ਜ਼ਮਾਨਤ 'ਤੇ ਰਿਹਾਅ ਹਨ। ਗਿਜ਼ੇਲ ਦਾ ਕਹਿਣਾ ਹੈ ਕਿ ਉਸ ਨੂੰ ਉਨ੍ਹਾਂ ਘਟਨਾਵਾਂ ਦੀ ਕੋਈ ਯਾਦ ਨਹੀਂ ਹੈ, ਪਰ ਉਹ ਹੁਣ ਇਸ ਸੱਚਾਈ ਨਾਲ ਜਿਉਣ ਦਾ ਹੌਸਲਾ ਜੁਟਾ ਰਹੀ ਹੈ।
