ਕਿਊਬਿਕ ''ਚ ਕੋਰੋਨਾ ਕਾਰਨ ਸਖ਼ਤ ਮਨਾਹੀ ਦੇ ਬਾਵਜੂਦ 250 ਲੋਕ ਕੈਸੀਨੋ ''ਚ ਹੋਏ ਇਕੱਠੇ
10/15/2020 10:16:49 PM
ਮਾਂਟਰੀਅਲ- ਕੋਰੋਨਾ ਵਾਇਰਸ ਫੈਲਣ ਕਾਰਨ ਕੈਨੇਡੀਅਨ ਲੋਕਾਂ ਨੂੰ ਥੈਂਕਸਗਿਵਿੰਗ ਵੀਕਐਂਡ 'ਤੇ ਘਰਾਂ ਵਿਚ ਰਹਿਣ ਦੀ ਅਪੀਲ ਕੀਤੀ ਗਈ ਸੀ। ਕਿਊਬਿਕ ਸੂਬੇ ਵਿਚ ਵੀ ਵਾਰ-ਵਾਰ ਇਹ ਅਪੀਲਾਂ ਕੀਤੀਆਂ ਜਾ ਰਹੀਆਂ ਸਨ। ਇਸ ਦੇ ਬਾਵਜੂਦ ਕਈ ਲੋਕ ਬਿੰਗੋ ਹਾਲ ਵਿਚ ਕੈਸੀਨੋ ਖੇਡਣ ਲਈ ਇਕੱਠੇ ਹੋਏ। ਜਾਣਕਾਰੀ ਮੁਤਾਬਕ ਇੱਥੇ ਕੈਸੀਨੋ ਵਿਚ ਜਿੱਤਣ ਵਾਲੇ ਲਈ ਇਕ ਲੱਖ ਡਾਲਰ ਦਾ ਇਨਾਮ ਰੱਖਿਆ ਗਿਆ ਸੀ ਤੇ ਘੱਟ ਤੋਂ ਘੱਟ 250 ਲੋਕ ਇੱਥੇ ਮੌਜੂਦ ਸਨ।
ਇਸ ਸਬੰਧੀ ਮਿਲੀ ਵੀਡੀਓ ਤੇ ਤਸਵੀਰਾਂ ਵਿਚ ਸਪੱਸ਼ਟ ਪਤਾ ਲੱਗਾ ਹੈ ਕਿ ਸੈਂਟ ਜੀਨ ਸੁਰ ਰਿਚਲੀ ਦੇ ਬਿੰਗੋ ਹਾਲ ਵਿਚ 250 ਲੋਕ ਸ਼ੁੱਕਰਵਾਰ ਨੂੰ ਇਕੱਠੇ ਹੋਏ ਸਨ।
ਹਾਲਾਂਕਿ ਇਸ ਕੈਸੀਨੋ ਦੇ ਮੈਨੇਜਰ ਦਾ ਕਹਿਣਾ ਹੈ ਕਿ ਉਨ੍ਹਾਂ ਕੋਲ 500 ਲੋਕਾਂ ਨੂੰ ਬਿਠਾਉਣ ਦਾ ਪ੍ਰਬੰਧ ਹੈ ਪਰ ਇੱਥੇ 250 ਲੋਕ ਬੈਠੇ ਤੇ ਮੇਜ਼ ਵੀ ਵੱਡੇ ਹੋਣ ਕਾਰਨ ਹਰ ਵਿਅਕਤੀ ਇਕ ਦੂਜੇ ਕੋਲੋਂ 2 ਮੀਟਰ ਦੀ ਦੂਰੀ 'ਤੇ ਸੀ। ਇਸ ਦੇ ਨਾਲ ਹੀ ਉਨ੍ਹਾਂ ਤਰਕ ਦਿੱਤਾ ਕਿ ਇਸ ਖੇਡ ਵਿਚ ਨਾ ਤਾਂ ਕੋਈ ਇਕ-ਦੂਜੇ ਨਾਲ ਗੱਲਾਂ ਕਰਦਾ ਹੈ, ਨਾ ਉੱਠ ਕੇ ਘੁੰਮਦਾ ਹੈ ਤੇ ਨਾ ਹੀ ਕਿਸੇ ਨਾਲ ਕੋਈ ਚੀਜ਼ ਸਾਂਝੀ ਕਰਦਾ ਹੈ, ਅਜਿਹੇ ਵਿਚ ਇਸ ਸੁਸਤੀ ਭਰੀ ਖੇਡ ਨਾਲ ਕਿਸੇ ਨੂੰ ਕਿਸੇ ਦੇ ਕੋਲ ਜਾਣ ਦਾ ਵੀ ਸਮਾਂ ਨਹੀਂ ਮਿਲਦਾ ਅਤੇ ਸਮਾਜਕ ਦੂਰੀ ਵੀ ਬਣੀ ਰਹਿੰਦੀ ਹੈ। ਹਾਲਾਂਕਿ ਕੁਝ ਲੋਕਾਂ ਦਾ ਕਹਿਣਾ ਹੈ ਕਿ ਇਹ ਗਲਤ ਹੈ ਕਿਉਂਕਿ ਇਸ ਵਿਚ ਵਧੇਰੇ ਵੱਡੀ ਉਮਰ ਦੇ ਲੋਕ ਇਕੱਠੇ ਹੋਏ ਸਨ।
ਜ਼ਿਕਰਯੋਗ ਹੈ ਕਿ ਸੂਬੇ ਦੇ ਮੁੱਖ ਮੰਤਰੀ ਪਹਿਲਾਂ ਹੀ ਸਖ਼ਤਾਈ ਨਾਲ ਕਹਿ ਚੁੱਕੇ ਹਨ ਕਿ ਕੋਰੋਨਾ ਕਾਰਨ ਲੱਗੀਆਂ ਪਾਬੰਦੀਆਂ ਨੂੰ ਤੋੜਨ ਵਾਲਿਆਂ ਨੂੰ ਮੁਆਫ ਨਹੀਂ ਕੀਤਾ ਜਾਵੇਗਾ।
