15 ਸਾਲਾਂ ਤੋਂ ਰਾਗਾਂ 'ਚ ਕੀਰਤਨ ਕਰ ਰਹੀ ਹੈ ਇਹ ਵਿਦੇਸ਼ੀ ਬੀਬੀ
02/11/2019 1:59:19 PM
ਰੋਮ, (ਕੈਂਥ)— ਸਾਡਾ ਮਹਾਨ ਸਿੱਖ ਧਰਮ ਜਿੱਥੇ ਸਭ ਨੂੰ ਬਿਨਾਂ ਭੇਦ-ਭਾਵ ਦੇ 'ਜੀ ਆਇਆ' ਆਖਦਾ ਹੈ, ਉੱਥੇ ਕਿਰਤ ਕਰਨ , ਵੰਡ ਛਕਣ ਤੇ ਨਾਮ ਜਪਣ ਲਈ ਵੀ ਪ੍ਰੇਰਦਾ ਹੈ। ਸਤਿਗੁਰੂ ਸ੍ਰੀ ਨਾਨਕ ਦੇਵ ਸਾਹਿਬ ਜੀ ਦਾ ਇਹ ਮਿਸ਼ਨ ਜਿਸ ਨੂੰ ਸਮਝ ਆ ਗਿਆ, ਉਹੀ ਸਿੱਖ ਬਣ ਜਾਂਦਾ ਹੈ ਅਤੇ ਫਿਰ ਆਪਣਾ ਜੀਵਨ ਗੁਰੂ ਨੂੰ ਸਮਰਪਿਤ ਕਰਨਾ ਸ਼ੁਰੂ ਕਰ ਦਿੰਦਾ ਹੈ ।ਬੇਸ਼ੱਕ ਕੁੱਝ ਵਿਦੇਸ਼ੀ ਪੰਜਾਬੀ ਅੱਜ ਸਿੱਖੀ ਤੋਂ ਕਿਨਾਰਾ ਕਰ ਕੇ ਪੱਛਮੀ ਸੱਭਿਆਚਾਰ 'ਚ ਮਾਡਰਨ ਸਿੱਖ ਬਣ ਗਏ ਹਨ ਪਰ ਦੁਨੀਆ 'ਚ ਅੱਜ ਵੀ ਵਿਦੇਸ਼ੀ ਅਜਿਹੇ ਲੋਕ ਹਨ, ਜਿਨ੍ਹਾਂਦੀਆਂ ਕਾਰਵਾਈਆਂ 'ਤੇ ਪੂਰੀ ਸਿੱਖ ਕੌਮ ਨੂੰ ਮਾਣ ਹੋਵੇਗਾ। ਅਜਿਹੀ ਹੀ ਸ਼ਖ਼ਸੀਅਤ ਹੈ ਇਟਲੀ ਦੀ ਡਾ. ਫਰਾਂਸਚੇਸਕਾ ਕਾਸੀਓ ਮਿਊਜ਼ਕ ਟੀਚਰ ਉਰਫ਼ ਬੀਬੀ ਬਲਿਹਾਰੀ ਕੌਰ ਜਿਹੜੀ ਕਿ ਪਿਛਲੇ 15 ਸਾਲਾਂ ਤੋਂ ਸ੍ਰੀ ਗੁਰੂ ਨਾਨਕ ਦੇਵ ਜੀ ਦੇ ਘਰ ਨਾਲ ਜੁੜ ਕੇ ਪੁਰਾਤਨ ਮਰਿਆਦਾ ਅਨੁਸਾਰ ਰਾਗਾਂ ਵਿੱਚ ਕੀਰਤਨ ਕਰਦੇ ਹਨ ਅਤੇ ਅਮਰੀਕਾ ਦੇ ਸ਼ਹਿਰ ਨਿਊਯਾਰਕ ਵਿਖੇ ਯੂਨੀਵਰਸਟੀ ਦੇ ਵਿਦਿਆਰਥੀਆਂ ਨੂੰ ਪੁਰਾਤਨ ਮਰਿਆਦਾ ਵਿੱਚ ਕੀਰਤਨ ਕਰਨ ਦੀ ਸਿਖਲਾਈ ਦੇ ਰਹੇ ਹਨ। ਬੀਬੀ ਬਲਿਹਾਰੀ ਕੌਰ ਮਹਾਨ ਸਿੱਖ ਧਰਮ ਨੂੰ ਸਮਝਣ ਲਈ 15 ਸਾਲ ਭਾਰਤ ਵਿੱਚ ਵੀ ਰਹੇ। ਬੀਬੀ ਬਲਿਹਾਰੀ ਅਨੁਸਾਰ ਰਾਗਾਂ ਦਾ ਕੀਰਤਨ ਰੂਹ ਨੂੰ ਸਕੂਨ ਦਿੰਦਾ ਹੈ ।
ਇਟਲੀ ਫੇਰੀ ਮੌਕੇ ਬੀਬੀ ਬਲਿਹਾਰੀ ਕੌਰ ਹੁਰਾਂ ਆਪਣੇ ਸਾਥੀ ਸੰਤ ਸੁਭਾਗ ਕੌਰ ਅਤੇ ਗਿਆਨੀ ਪਰਮਿੰਦਰ ਸਿੰਘ ਨਾਲ ਇਲਾਕੇ ਦੇ ਗੁਰਦੁਆਰਾ ਸਾਹਿਬ ਸਿੰਘ ਸਭਾ ਬੋਰਗੋ ਹਰਮਾਦਾ ਲਾਤੀਨਾ ਵਿਖੇ ਆਪਣੀ ਮਧੁਰ ਅਤੇ ਸੁਰੀਲੀ ਆਵਾਜ਼ ਰਾਹੀਂ ਪੁਰਾਤਨ ਮਰਿਆਦਾ ਅਨੁਸਾਰ ਪੂਰੇ ਰਾਗਾਂ ਵਿੱਚ ਸਤਿਗੁਰਾਂ ਦੀ ਇਲਾਹੀ ਬਾਣੀ ਦਾ ਕੀਰਤਨ ਕੀਤਾ। ਇਸ ਨੂੰ ਸੁਣਨ ਲਈ ਰੋਮ ਤੋਂ ਮੈਡਮ ਰੀਤਨ ਸੰਧੂ ਰਾਜਦੂਤ ਭਾਰਤੀ ਅੰਬੈਂਸੀ ਰੋਮ ਨੇ ਸ਼ਿਰਕਤ ਕੀਤੀ। ਇਸ ਮੌਕੇ ਮੈਡਮ ਸੰਧੂ ਨੇ ਕਿਹਾ ਕਿ ਜੋ ਬੀਬੀ ਬਲਿਹਾਰੀ ਕੌਰ ਕਰ ਰਹੇ ਹਨ, ਉਹ ਭਾਰਤ ਅਤੇ ਇਟਲੀ ਦੇ ਆਪਸੀ ਪਿਆਰ ਨੂੰ ਪਹਿਲਾਂ ਨਾਲੋਂ ਹੋਰ ਵੀ ਗੂੜਾ ਅਤੇ ਮਜ਼ਬੂਤ ਕਰਦਾ ਹੈ। ਇਸ ਮੌਕੇ ਪ੍ਰਬੰਧਕਾਂ ਵੱਲੋਂ ਬੀਬੀ ਬਲਿਹਾਰੀ ਕੌਰ ਅਤੇ ਉਨ੍ਹਾਂ ਦੇ ਸਾਥੀਆਂ ਦਾ ਗੁਰੂ ਦੀ ਬਖ਼ਸ਼ੀਸ਼ ਸਿਰੋਪਾਓ ਨਾਲ ਵਿਸ਼ੇਸ਼ ਸਨਮਾਨ ਵੀ ਕੀਤਾ ਗਿਆ। ਇਸ ਮੌਕੇ ਗੁਰਦੁਆਰਾ ਸਾਹਿਬ ਦੇ ਸੇਵਾਦਾਰ ਭਾਈ ਹਰਪਾਲ ਸਿੰਘ, ਗੁਰਮੁੱਖ ਸਿੰਘ ਹਜ਼ਾਰਾ ਤੋਂ ਇਲਾਵਾ ਭਾਈ ਰਾਜਵਿੰਦਰ ਸਿਘ ਰਾਜਾ ਲਵੀਨਿਓ, ਹਰਭਜਨ ਸਿੰਘ ਬੁੱਲੋਚੱਕ ਆਦਿ ਵੀ ਮੌਜੂਦ ਸਨ।
