ਪਾਕਿਸਤਾਨ ''ਚ ਖੁਫੀਆ ਕਾਰਵਾਈ ਦੌਰਾਨ ਮਾਰੇ ਗਏ 15 ਅੱਤਵਾਦੀ

ਪੇਸ਼ਾਵਰ/ਇਸਲਾਮਾਬਾਦ (ਏਜੰਸੀ)- ਉੱਤਰ-ਪੱਛਮੀ ਪਾਕਿਸਤਾਨ ਦੇ ਖੈਬਰ ਪਖਤੂਨਖਵਾ ਸੂਬੇ ਵਿੱਚ ਸ਼ਨੀਵਾਰ ਨੂੰ 2 ਵੱਖ-ਵੱਖ ਖੁਫੀਆ ਕਾਰਵਾਈਆਂ ਵਿੱਚ ਘੱਟੋ-ਘੱਟ 15 ਅੱਤਵਾਦੀ ਮਾਰੇ ਗਏ, ਜਦੋਂਕਿ 4 ਫੌਜੀ ਜਵਾਨ ਵੀ ਮਾਰੇ ਗਏ। ਫੌਜ ਦੇ ਮੀਡੀਆ ਵਿੰਗ, ਇੰਟਰ-ਸਰਵਿਸਿਜ਼ ਪਬਲਿਕ ਰਿਲੇਸ਼ਨਜ਼ (ISPR) ਦੇ ਇੱਕ ਬਿਆਨ ਦੇ ਅਨੁਸਾਰ, ਸੂਬੇ ਦੇ ਡੇਰਾ ਇਸਮਾਈਲ ਅਤੇ ਉੱਤਰੀ ਵਜ਼ੀਰਿਸਤਾਨ ਜ਼ਿਲ੍ਹਿਆਂ ਵਿੱਚ ਵੱਖ-ਵੱਖ ਖੁਫੀਆ ਅਭਿਆਨ ਚਲਾਏ ਗਏ। ਪਹਿਲਾ ਅਭਿਆਨ ਡੇਰਾ ਇਸਮਾਈਲ ਖਾਨ ਜ਼ਿਲ੍ਹੇ ਦੇ ਹਥਲਾ ਦੇ ਜਨਰਲ ਖੇਤਰ ਵਿੱਚ ਚਲਾਇਆ ਗਿਆ।

ਸੁਰੱਖਿਆ ਬਲਾਂ ਨੇ ਅੱਤਵਾਦੀਆਂ ਨੂੰ ਉਨ੍ਹਾਂ ਦੇ ਟਿਕਾਣਿਆਂ 'ਤੇ ਪ੍ਰਭਾਵਸ਼ਾਲੀ ਢੰਗ ਨਾਲ ਘੇਰ ਲਿਆ। ਆਈ.ਐਸ.ਪੀ.ਆਰ. ਨੇ ਕਿਹਾ ਕਿ ਮਾਰੇ ਗਏ ਕੁਝ ਅੱਤਵਾਦੀਆਂ ਵਿੱਚ ਖਤਰਨਾਕ ਅੱਤਵਾਦੀ ਸਨ, ਜਿਨ੍ਹਾਂ ਦੀ ਪਛਾਣ ਫਰਮਾਨ ਉਰਫ਼ ਸਾਕਿਬ, ਖਾਰਜੀ ਅਮਾਨਉੱਲਾ ਉਰਫ਼ ਤੂਰੀ, ਖਾਰਜੀ ਸਈਦ ਉਰਫ਼ ਲਿਆਕਤ ਅਤੇ ਖਾਰਜੀ ਬਿਲਾਲ ਵਜੋਂ ਹੋਈ ਹੈ। ਏਜੰਸੀ ਨੇ ਕਿਹਾ ਕਿ ਇਹ ਅੱਤਵਾਦੀ ਖੇਤਰ ਵਿੱਚ ਕਈ ਅੱਤਵਾਦੀ ਗਤੀਵਿਧੀਆਂ ਵਿੱਚ ਸ਼ਾਮਲ ਸਨ ਅਤੇ ਕਾਨੂੰਨ ਲਾਗੂ ਕਰਨ ਵਾਲੀਆਂ ਏਜੰਸੀਆਂ ਦੀ 'ਵਾਂਟੇਡ' ਸੂਚੀ ਵਿੱਚ ਸਿਖਰ 'ਤੇ ਸਨ।

ਦੂਜਾ ਅਭਿਆਨ ਉੱਤਰੀ ਵਜ਼ੀਰਿਸਤਾਨ ਜ਼ਿਲ੍ਹੇ ਦੇ ਮੀਰਾਂਸ਼ਾਹ ਦੇ ਇਲਾਕੇ ਵਿੱਚ ਚਲਾਇਆ ਗਿਆ, ਜਿੱਥੇ ਸੁਰੱਖਿਆ ਬਲਾਂ ਨੇ 6 ਅੱਤਵਾਦੀਆਂ ਨੂੰ ਮਾਰ ਦਿੱਤਾ। ਹਾਲਾਂਕਿ, ਆਈ.ਐਸ.ਪੀ.ਆਰ. ਅਨੁਸਾਰ ਭਿਆਨਕ ਮੁਕਾਬਲੇ ਵਿੱਚ ਲਾਹੌਰ ਜ਼ਿਲ੍ਹੇ ਦੇ ਲੈਫਟੀਨੈਂਟ ਮੁਹੰਮਦ ਹਸਨ ਅਰਸ਼ਫ (21) ਅਤੇ ਉਨ੍ਹਾਂ ਦੇ ਤਿੰਨ ਸਾਥੀ ਮਾਰੇ ਗਏ। ਏਜੰਸੀ ਨੇ ਦੱਸਿਆ ਕਿ ਮੁਕਾਬਲੇ ਵਿੱਚ ਮਾਰੇ ਗਏ 3 ਹੋਰ ਸੈਨਿਕਾਂ ਦੀ ਪਛਾਣ ਡੇਰਾ ਇਸਮਾਈਲ ਖਾਨ ਜ਼ਿਲ੍ਹੇ ਦੇ ਨਿਵਾਸੀ ਨਾਇਬ ਸੂਬੇਦਾਰ ਮੁਹੰਮਦ ਬਿਲਾਲ (39), ਲੱਕੀ ਮਰਵਾਤ ਜ਼ਿਲ੍ਹੇ ਦੇ ਨਿਵਾਸੀ ਸਿਪਾਹੀ ਫਰਹਤ ਉੱਲਾ (27) ਅਤੇ ਮੋਮੰਡ ਜ਼ਿਲ੍ਹੇ ਦੇ ਨਿਵਾਸੀ ਸਿਪਾਹੀ ਹਿੰਮਤ ਖਾਨ (29) ਵਜੋਂ ਹੋਈ ਹੈ। ਆਈ.ਐਸ.ਪੀ.ਆਰ. ਨੇ ਕਿਹਾ ਕਿ ਇਲਾਕੇ ਵਿੱਚ ਹੋਰ ਅੱਤਵਾਦੀਆਂ ਨੂੰ ਮਾਰਨ ਲਈ ਤਲਾਸ਼ੀ ਮੁਹਿੰਮ ਜਾਰੀ ਹੈ।