WhatsApp ਚੈਟਿੰਗ ਦਾ ਬਦਲੇਗਾ ਅੰਦਾਜ਼, ਆ ਰਿਹਾ ਹੈ ਨਵਾਂ ਫੀਚਰ

Friday, Nov 20, 2026 - 02:40 AM (IST)

WhatsApp ਚੈਟਿੰਗ ਦਾ ਬਦਲੇਗਾ ਅੰਦਾਜ਼, ਆ ਰਿਹਾ ਹੈ ਨਵਾਂ ਫੀਚਰ

ਨਵੀਂ ਦਿੱਲੀ : ਮਸ਼ਹੂਰ ਮੈਸੇਜਿੰਗ ਐਪ ਵਟਸਐਪ (WhatsApp) ਆਪਣੇ ਯੂਜ਼ਰਸ ਦੇ ਚੈਟਿੰਗ ਅਨੁਭਵ ਨੂੰ ਹੋਰ ਮਜ਼ੇਦਾਰ ਬਣਾਉਣ ਲਈ ਇੱਕ ਨਵਾਂ ਅਤੇ ਦਿਲਚਸਪ ਫੀਚਰ ਲੈ ਕੇ ਆ ਰਿਹਾ ਹੈ। ਹੁਣ ਤੱਕ ਕਿਸੇ ਮੈਸੇਜ 'ਤੇ ਪ੍ਰਤੀਕਿਰਿਆ (Reaction) ਦੇਣ ਲਈ ਯੂਜ਼ਰਸ ਸਿਰਫ਼ ਇਮੋਜੀ ਦੀ ਵਰਤੋਂ ਹੀ ਕਰ ਸਕਦੇ ਸਨ, ਪਰ ਜਲਦੀ ਹੀ ਇਸ ਵਿੱਚ ਵੱਡਾ ਬਦਲਾਅ ਹੋਣ ਜਾ ਰਿਹਾ ਹੈ। ਕੰਪਨੀ 'ਸਟਿੱਕਰ ਰੀਐਕਸ਼ਨ' (Sticker Reaction) ਨਾਮ ਦਾ ਨਵਾਂ ਫੀਚਰ ਲਿਆਉਣ ਦੀ ਤਿਆਰੀ ਕਰ ਰਹੀ ਹੈ, ਜਿਸ ਰਾਹੀਂ ਯੂਜ਼ਰਸ ਕਿਸੇ ਵੀ ਮੈਸੇਜ 'ਤੇ ਆਪਣੇ ਮਨਪਸੰਦ ਸਟਿੱਕਰ ਨਾਲ ਰੀਐਕਟ ਕਰ ਸਕਣਗੇ।

WABetaInfo ਦੀ ਰਿਪੋਰਟ ਮੁਤਾਬਕ, ਇਸ ਨਵੇਂ ਫੀਚਰ ਨੂੰ ਵਟਸਐਪ ਦੇ ਐਂਡਰਾਇਡ ਬੀਟਾ ਵਰਜ਼ਨ (2.26.46.5) ਵਿੱਚ ਦੇਖਿਆ ਗਿਆ ਹੈ। ਇਸ ਅਪਡੇਟ ਤਹਿਤ ਮੈਸੇਜ ਦੇ ਮੀਨੂ ਵਿੱਚ 'ਸਟਿੱਕਰ ਰੀਐਕਸ਼ਨ' ਦਾ ਇੱਕ ਨਵਾਂ ਸ਼ਾਰਟਕੱਟ ਮਿਲੇਗਾ, ਜਿਸ 'ਤੇ ਟੈਪ ਕਰਦਿਆਂ ਹੀ ਸਟਿੱਕਰ ਕੀਬੋਰਡ ਖੁੱਲ੍ਹ ਜਾਵੇਗਾ। ਖ਼ਾਸ ਗੱਲ ਇਹ ਹੈ ਕਿ ਯੂਜ਼ਰਸ ਸਧਾਰਨ (Static) ਸਟਿੱਕਰਾਂ ਦੇ ਨਾਲ-ਨਾਲ ਐਨੀਮੇਟਿਡ (Animated) ਸਟਿੱਕਰਾਂ ਦੀ ਵੀ ਵਰਤੋਂ ਕਰ ਸਕਣਗੇ। ਚੁਣਿਆ ਹੋਇਆ ਸਟਿੱਕਰ ਸਬੰਧਤ ਮੈਸੇਜ ਦੇ ਹੇਠਾਂ ਦਿਖਾਈ ਦੇਵੇਗਾ, ਜਿਸ ਨੂੰ ਚੈਟ ਵਿੱਚ ਸ਼ਾਮਲ ਬਾਕੀ ਲੋਕ ਵੀ ਦੇਖ ਸਕਣਗੇ।

ਰਿਪੋਰਟ ਅਨੁਸਾਰ, ਯੂਜ਼ਰਸ ਨੂੰ ਇੱਕ ਹੀ ਮੈਸੇਜ 'ਤੇ ਵੱਧ ਤੋਂ ਵੱਧ 20 ਸਟਿੱਕਰ ਰੀਐਕਸ਼ਨ ਲਗਾਉਣ ਦੀ ਸਹੂਲਤ ਮਿਲ ਸਕਦੀ ਹੈ। ਇਸ ਵਿੱਚ ਵੱਖ-ਵੱਖ ਸਟਿੱਕਰਾਂ ਦੇ ਨਾਲ-ਨਾਲ ਇੱਕ ਹੀ ਸਟਿੱਕਰ ਨੂੰ ਵਾਰ-ਵਾਰ ਵਰਤਣ ਦਾ ਵਿਕਲਪ ਵੀ ਹੋਵੇਗਾ। ਹਾਲਾਂਕਿ, ਕਿਸੇ ਮੈਸੇਜ 'ਤੇ 20 ਸਟਿੱਕਰ ਪੂਰੇ ਹੋਣ ਤੋਂ ਬਾਅਦ ਹੋਰ ਸਟਿੱਕਰ ਨਹੀਂ ਜੋੜੇ ਜਾ ਸਕਣਗੇ।

ਫਿਲਹਾਲ ਇਹ ਫੀਚਰ ਚੋਣਵੇਂ ਐਂਡਰਾਇਡ ਬੀਟਾ ਟੈਸਟਰਾਂ ਲਈ ਜਾਰੀ ਕੀਤਾ ਗਿਆ ਹੈ ਅਤੇ ਆਉਣ ਵਾਲੇ ਹਫ਼ਤਿਆਂ ਵਿੱਚ ਇਸ ਨੂੰ ਸਾਰੇ ਐਂਡਰਾਇਡ ਅਤੇ ਆਈਫੋਨ (iPhone) ਯੂਜ਼ਰਸ ਲਈ ਰੋਲਆਊਟ ਕੀਤੇ ਜਾਣ ਦੀ ਉਮੀਦ ਹੈ।
 


author

Inder Prajapati

Content Editor

Related News