ਰਾਇਲ ਐਨਫੀਲਡ 6 ਨਵੰਬਰ ਨੂੰ ਭਾਰਤ ’ਚ ਲਾਂਚ ਕਰੇਗੀ ਨਵਾਂ ਮੋਟਰਸਾਈਕਲ, ਇੰਨੀ ਹੋ ਸਕਦੀ ਹੈ ਕੀਮਤ

ਆਟੋ ਡੈਸਕ– ਰਾਇਲ ਐਨਫੀਲਡ ਦੇ ਆਉਣ ਵਾਲੇ ਮੋਟਰਸਾਈਕਲ ਮਿਟਿਓਰ 350 ਨੂੰ ਜਲਦ ਹੀ ਹੁਣ ਭਾਰਤੀ ਬਾਜ਼ਾਰ ’ਚ ਉਤਾਰ ਦਿੱਤਾ ਜਾਵੇਗਾ। ਰਿਪੋਰਟ ਮੁਤਾਬਕ, ਆਧੁਨਿਕ ਫੀਚਰਜ਼ ਨਾਲ ਲੈਸ ਇਸ ਮੋਟਰਸਾਈਕਲ ਨੂੰ 6 ਨਵੰਬਰ ਨੂੰ ਭਾਰਤ ’ਚ ਲਾਂਚ ਕੀਤਾ ਜਾਣਾ ਤੈਅ ਕੀਤਾ ਗਿਆ ਹੈ। ਦੱਸ ਦੇਈਏ ਕਿ ਰਾਇਲ ਐਨਫੀਲਡ ਮਿਟਿਓਰ 350 ਨੂੰ ਥੰਡਰਬਰਡ ਤੋਂ ਪ੍ਰੇਰਿਤ ਬਣਾਇਆ ਗਿਆ ਹੈ। ਇਸ ਨੂੰ ਟਿਅਰਡ੍ਰੋਪ ਫਿਊਲ ਟੈਂਕ, ਗੋਲਾਕਾਰ ਹੈੱਡਲਾਈਟ ਅਤੇ ਬ੍ਰਾਈਟ ਰੰਗਾਂ ਦੇ ਆਪਸ਼ਨ ਨਾਲ ਲਿਆਇਆ ਜਾਵੇਗਾ। ਰਾਇਲ ਐਨਫੀਲਡ ਮਿਟਿਓਰ 350 ਭਾਰਤੀ ਬਾਜ਼ਾਰ ’ਚ ਜਾਵਾ ਦੇ ਮੋਟਰਸਾਈਕਲ, ਬੇਨੇਲੀ ਇੰਪੀਰੀਅਲ 400 ਅਤੇ ਹਾਲ ਹੀ ’ਚ ਲਾਂਚ ਹੋਏ ਹੋਂਡਾ ਹਾਈਨੈਸ ਸੀ.ਬੀ. 350 ਨੂੰ ਟੱਕਰ ਦੇਣ ਵਾਲਾ ਹੈ। ਖ਼ਾਸ ਗੱਲ ਹੈ ਕਿ ਇਸ ਮੋਟਰਸਾਈਕਲ ਨੂੰ ਸਪਲਿਟ ਸੀਟ ਅਤੇ ਅਲੌਏ ਵ੍ਹੀਲ ਦੇ ਨਾਲ ਹੀ ਲਿਆਇਆ ਜਾਵੇਗਾ। ਇਸ ਵਿਚ ਨਵਾਂ ਸਵਿੱਚ ਗਿਅਰ, ਐੱਲ.ਈ.ਡੀ. ਡੀ.ਆਰ.ਐੱਲ., ਐੱਲ.ਈ.ਡੀ. ਟੇਲ ਲਾਈਟ, ਸੈਮੀ ਡਿਜੀਟਲ ਇੰਸਟਰੂਮੈਂਟ ਕਲੱਸਟਰ, ਬਲੂਟੂਥ ਕੁਨੈਕਟੀਵਿਟੀ, ਨੈਵਿਗੇਸ਼ਨ ਸਿਸਟਮ ਅਤੇ ਯੂ.ਐੱਸ.ਬੀ. ਚਾਰਜਰ ਵਰਗੇ ਫੀਚਰਜ਼ ਦਿੱਤੇ ਗਏ ਹਨ। ਇਸ ਵਿਚੋਂ ਕਈ ਤਾਂ ਫਰਸਟ ਇਨ ਸੈਗਮੈਂਟ ਫੀਚਰਜ਼ ਦੱਸੇ ਜਾ ਰਹੇ ਹਨ। 

ਆਕਾਰ ’ਚ ਵੱਡਾ ਹੋਵੇਗਾ ਇਹ ਮੋਟਰਸਾਈਕਲ
ਮਿਟਿਓਰ 350 ਦੀ ਲੰਬਾਈ 2140mm, ਉਚਾਈ 1140mm ਅਤੇ ਸੀਟ ਦੀ ਹਾਈਟ 765mm ਦੱਸੀ ਜਾ ਰਹੀ ਹੈ। ਇਸ ਤੋਂ ਇਲਾਵਾ 170mm ਦੀ ਗਰਾਊਂਡ ਕਲੀਅਰੈਂਸ ਦੇ ਨਾਲ 1400mm ਦਾ ਵ੍ਹੀਲਬੇਸ ਦਿੱਤਾ ਗਿਆ ਹੈ। ਕੰਪਨੀ ਇਸ ਦੇ ਨਾਲ 3 ਸਾਲ ਦੀ ਵਾਰੰਟੀ ਦੇਵੇਗੀ।

ਇੰਜਣ
ਨਵੇਂ ਮਿਟਿਓਰ 350 ’ਚ ਕੰਪਨੀ ਨੇ 349cc ਦੀ ਸਮਰੱਥਾ ਦਾ ਸਿੰਗਲ ਸਿਲੰਡਰ ਏਅਰ ਕੂਲਡ ਇੰਜਣ ਦਿੱਤਾ ਜਾਵੇਗਾ। ਇਹ ਇੰਜਣ 20.2 ਐੱਚ.ਪੀ. ਅਤੇ 27 ਐੱਨ.ਐੱਮ. ਦਾ ਟਾਰਕ ਜਨਰੇਟ ਕਰਦਾ ਹੈ। ਇਸ ਇੰਜਣ ਨੂੰ 5 ਸਪੀਡ ਗਿਅਰਬਾਕਸ ਨਾਲ ਜੋੜਿਆ ਗਿਆ ਹੈ। 

ਮਿਟਿਓਰ 350 ’ਚ ਮਿਲਣਗੇ Ceat ਦੇ ਟਾਇਰ
ਇਸ ਮੋਟਰਸਾਈਕਲ ’ਚ ਕੰਪਨੀ Ceat ਕੰਪਨੀ ਦੇ ਟਾਇਰ ਦੀ ਵਰਤੋਂ ਕਰ ਰਹੀ ਹੈ। ਇਸ ਦੇ ਫਰੰਟ ’ਚ 19 ਇੰਚ ਦਾ ਵ੍ਹੀਲ ਅਤੇਰੀਅਰ ’ਚ 17 ਇੰਚ ਦਾ ਵ੍ਹੀਲ ਦਿੱਤਾ ਗਿਆ ਹੈ। 

ਸੰਭਾਵਿਤ ਕੀਮਤ
ਨਵਾਂ ਮਿਟਿਓਰ 350 ਬਾਜ਼ਾਰ ’ਚ ਲਾਂਚ ਹੋਣ ਤੋਂ ਬਾਅਦ ਸਿੱਧੇ ਤੌਰ ’ਤੇ ਕੰਪਨੀ ਦੇ ਆਪਣੇ ਹੀ Thunderbird ਨੂੰ ਰਿਪਲੇਸ ਕਰ ਦੇਵੇਗਾ। ਜਾਣਕਾਰਾਂ ਦਾ ਮੰਨਣਾ ਹੈ ਕਿ ਕੰਪਨੀ ਇਸ ਮੋਟਰਸਾਈਕਲ ਨੂੰ 1.65 ਲੱਖ ਰੁਪਏ ਦੀ ਸ਼ੁਰੂਆਤੀ ਕੀਮਤ ਨਾਲ ਲਾਂਚ ਕਰ ਸਕਦੀ ਹੈ।