ਨਵੇਂ ਕੋਰੀਆਈ ਕਾਨੂੰਨ ਤਹਿਤ ਐਪਲ ਤੇ ਗੂਗਲ ’ਤੇ ਲੱਗੇਗਾ 2 ਫੀਸਦੀ ਤਕ ਦਾ ਜੁਰਮਾਨਾ

ਗੈਜੇਟ ਡੈਸਕ– ਦੱਖਣ ਕੋਰੀਆ ਦੀ ਦੂਰਸੰਚਾਰ ਰੈਗੁਲੇਟਰੀ ਨੇ ਕਿਹਾ ਹੈ ਕਿ ਐਪ ਸਟੋਰ ਸੰਚਾਲਕਾਂ ਦੁਆਰਾ ਡਿਵੈਲਪਰਾਂ ਨੂੰ ਆਪਣੇ ਖੁਦ ਦੇ ਇਨ-ਐਪ ਭੁਗਤਾਨ ਸਿਸਟਮ ਦੀ ਵਰਤੋਂ ਕਰਨ ਲਈ ਮਜਬੂਰ ਕਰਨ ਨੂੰਲੈ ਕੇ ਦੋ ਫੀਸਦੀ ਤਕ ਦਾ ਜੁਰਮਾਨਾ ਭਰਨਾ ਪਵੇਗਾ। ਕੋਰੀਆ ਸੰਚਾਰ ਕਮਿਸ਼ਨ (ਕੇ.ਸੀ.ਸੀ.) ਨੇ ਜਾਣਕਾਰੀ ਦਿੰਦੇ ਹੋਏ ਦੱਸਿਆ ਹੈ ਕਿ ਗੂਗਲ ਅਤੇ ਹੋਰ ਐਪ ਸਟੋਰ ਆਪਰੇਟਰਾਂ ਦੇ ਪ੍ਰਭੂਤੱਵ ਨੂੰ ਰੋਕਣ ਦੇ ਉਦੇਸ਼ ਨਾਲ ਐਪ ਸਟੋਰ ਆਪਰੇਟਰਾਂ ਨੂੰ ਐਪਸ ਦੀ ਸਮੀਖਿਆ ’ਚ ਦੇਰੀ ਲਈ ਆਪਣੇ ਰੈਵੇਨਿਊ ਦਾ ਇਕ ਫੀਸਦੀ ਦਾ ਭੁਗਤਾਨ ਕਰਨਾ ਹੋਵੇਗਾ।

ਯੋਨਹਾਪ ਸਮਾਚਾਰ ਏਜੰਸੀ ਦੀ ਰਿਪੋਰਟ ਮੁਤਾਬਕ, ਇਹ ਕਦਮ ਗੂਗਲ ਅਤੇ ਐਪਲ ਖਿਲਾਫ ਵਧਦੀ ਗਲੋਬਲ ਜਾਂਚ ਦੇ ਚਲਦੇ ਸਾਹਮਣੇ ਆਇਆ ਹੈ। ਦੱਸ ਦੇਈਏ ਕਿ ਇਨ੍ਹੀਂ ਦਿਨੀਂ ਡਿਵੈਲਪਰਾਂ ਨੂੰ ਆਪਣੇ ਐਪ ਸਟੋਰ ’ਤੇ ਆਪਣਾ ਮਾਲਿਕਾਨਾ ਭੁਗਤਾਨ ਸਿਸਟਮ ਦਾ ਇਸਤੇਮਾਲ ਕਰਨ ਦੀ ਲੋੜ ਪੈ ਰਹੀ ਹੈ। ਇਸ ਨਾਲ ਯੂਜ਼ਰਸ ਕੋਲੋਂਐਪਸ ’ਚੋਂ ਡਿਜੀਟਲ ਸਾਮਾਨ ਖਰੀਦਣ ’ਤੇ 30 ਫੀਸਦੀ ਤਕ ਭੁਗਤਾਨ ਲਿਆ ਜਾਂਦਾ ਹੈ। 

ਜਾਣਕਾਰੀ ਲਈ ਦੱਸ ਦੇਈਏ ਕਿ ਦੁਨੀਆ ਭਰ ਦੇ ਡਿਵੈਲਪਰਾਂ ਨੇ ਐਪ ਮਾਰਕੀਟ ਆਪਰੇਟਰਾਂ ਦੀਆਂ ਇਨ-ਐਪ ਭੁਗਤਾਨ ਪ੍ਰਣਾਲੀਆਂ ’ਤੇ ਸਵਾਲ ਚੁੱਕਿਆ ਹੈ। ਇਸ ਤੋਂ ਬਾਅਦ ਕਾਫੀ ਵਿਰੋਧ ਹੋਇਆ ਹੈ ਅਤੇ ਮੰਗ ਕੀਤੀ ਜਾ ਰਹੀ ਹੈ ਕਿ ਹੋਰ ਪ੍ਰਣਾਲੀਆਂ ਦਾ ਸੁਤੰਤਰ ਰੂਪ ਨਾਲ ਇਸਤੇਮਾਲ ਹੋਣਾ ਚਾਹੀਦਾ ਹੈ।