3 ਸਟਾਰ ਜਾਂ 5 ਸਟਾਰ? ਜਾਣੋ ਕਿਹੜਾ AC ਬਚਾਏਗਾ ਤੁਹਾਡੇ ਹਜ਼ਾਰਾਂ ਰੁਪਏ

ਨਵੀਂ ਦਿੱਲੀ - ਗਰਮੀ ਦਾ ਸੀਜ਼ਨ ਸ਼ੁਰੂ ਹੁੰਦੇ ਹੀ ਲੋਕਾਂ ਦੇ ਮਨਾਂ 'ਚ ਨਵਾਂ ਏਅਰ ਕੰਡੀਸ਼ਨਰ ਖਰੀਦਣ ਦਾ ਖਿਆਲ ਸਭ ਤੋਂ ਪਹਿਲਾਂ ਆਉਂਦਾ ਹੈ ਪਰ ਜਦੋਂ ਬਾਜ਼ਾਰ 'ਚ 3 ਸਟਾਰ ਅਤੇ 5 ਸਟਾਰ AC ਦੇ ਵਿਕਲਪ ਸਾਹਮਣੇ ਆਉਂਦੇ ਹਨ, ਤਾਂ ਬਹੁਤ ਸਾਰੇ ਲੋਕ ਉਲਝਣ 'ਚ ਪੈ ਜਾਂਦੇ ਹਨ ਕਿ ਕਿਹੜਾ ਖਰੀਦਣਾ ਫਾਇਦੇਮੰਦ ਰਹੇਗਾ। ਇਸ ਦਾ ਜਵਾਬ ਸਿਰਫ਼ AC ਦੀ ਕੀਮਤ 'ਚ ਨਹੀਂ, ਸਗੋਂ ਬਿਜਲੀ ਦੀ ਖਪਤ ਦੇ ਗਣਿਤ ਵਿੱਚ ਛਿਪਿਆ ਹੈ।

ਸਟਾਰ ਰੇਟਿੰਗ ਦਾ ਕੀ ਹੈ ਮਤਲਬ?
AC 'ਤੇ ਲੱਗੀ ਸਟਾਰ ਰੇਟਿੰਗ ਉਸ ਦੀ ਊਰਜਾ ਕੁਸ਼ਲਤਾ ਨੂੰ ਦਰਸਾਉਂਦੀ ਹੈ। ਭਾਰਤ 'ਚ ਇਹ ਰੇਟਿੰਗ 'ਬਿਊਰੋ ਆਫ਼ ਐਨਰਜੀ ਐਫੀਸ਼ੀਐਂਸੀ' (BEE) ਦੁਆਰਾ ਤੈਅ ਕੀਤੀ ਜਾਂਦੀ ਹੈ। ਸਿੱਧੇ ਸ਼ਬਦਾਂ 'ਚ, ਜਿੰਨੇ ਜ਼ਿਆਦਾ ਸਟਾਰ ਹੋਣਗੇ, AC ਉਨੀ ਹੀ ਘੱਟ ਬਿਜਲੀ ਖਪਤ ਕਰੇਗਾ। ਹਾਲਾਂਕਿ, 5 ਸਟਾਰ ਮਾਡਲ ਦੀ ਸ਼ੁਰੂਆਤੀ ਕੀਮਤ 3 ਸਟਾਰ ਦੇ ਮੁਕਾਬਲੇ ਜ਼ਿਆਦਾ ਹੁੰਦੀ ਹੈ।

ਬਿਜਲੀ ਦੇ ਬਿੱਲ 'ਚ ਵੱਡਾ ਫਰਕ
 ਜੇਕਰ ਅਸੀਂ ਇਕ 1.5 ਟਨ ਦੇ AC ਦੀ ਉਦਾਹਰਣ ਲਈਏ ਜੋ ਰੋਜ਼ਾਨਾ 8 ਘੰਟੇ ਅਤੇ ਮਹੀਨੇ 'ਚ 25 ਦਿਨ ਚੱਲਦਾ ਹੈ, ਤਾਂ ਬਿਜਲੀ ਦੀ ਖਪਤ ਦਾ ਫਰਕ ਇਸ ਤਰ੍ਹਾਂ ਹੋਵੇਗਾ :-

3 ਸਟਾਰ AC
- ਇਹ ਲਗਭਗ 1.5 ਯੂਨਿਟ ਪ੍ਰਤੀ ਘੰਟਾ ਖਪਤ ਕਰਦਾ ਹੈ, ਜਿਸ ਨਾਲ ਮਹੀਨੇ ਦੀ ਕੁੱਲ ਖਪਤ 300 ਯੂਨਿਟ ਬਣਦੀ ਹੈ। ਜੇਕਰ ਬਿਜਲੀ ਦੀ ਦਰ 8 ਰੁਪਏ ਪ੍ਰਤੀ ਯੂਨਿਟ ਹੋਵੇ, ਤਾਂ ਮਹੀਨੇ ਦਾ ਬਿੱਲ 2,400 ਰੁਪਏ ਆਵੇਗਾ।

5 ਸਟਾਰ AC
- ਇਹ ਲਗਭਗ 1.25 ਯੂਨਿਟ ਪ੍ਰਤੀ ਘੰਟਾ ਖਪਤ ਕਰਦਾ ਹੈ, ਜਿਸ ਨਾਲ ਮਹੀਨੇ ਦੀ ਕੁੱਲ ਖਪਤ 250 ਯੂਨਿਟ ਬਣਦੀ ਹੈ। 8 ਰੁਪਏ ਦੀ ਦਰ ਨਾਲ ਇਸ ਦਾ ਬਿੱਲ 2,000 ਰੁਪਏ ਹੋਵੇਗਾ।

ਇਸ ਹਿਸਾਬ ਨਾਲ, 5 ਸਟਾਰ AC ਰਾਹੀਂ ਤੁਸੀਂ ਹਰ ਮਹੀਨੇ 400 ਰੁਪਏ ਅਤੇ ਸਾਲਾਨਾ ਲਗਭਗ 4,800 ਰੁਪਏ ਦੀ ਬਚਤ ਕਰ ਸਕਦੇ ਹੋ। ਕੁਝ ਹੀ ਸਾਲਾਂ 'ਚ 5 ਸਟਾਰ AC ਦੀ ਵਾਧੂ ਕੀਮਤ ਬਿਜਲੀ ਦੀ ਬਚਤ ਰਾਹੀਂ ਵਸੂਲ ਹੋ ਜਾਂਦੀ ਹੈ।

ਤੁਹਾਡੇ ਲਈ ਕਿਹੜਾ AC ਹੈ ਸਹੀ?
- ਜੇਕਰ ਤੁਹਾਡੀ AC ਦੀ ਵਰਤੋਂ ਘੱਟ ਹੈ, ਜਿਵੇਂ ਕਿ ਸਿਰਫ਼ ਰਾਤ ਨੂੰ ਕੁਝ ਘੰਟਿਆਂ ਲਈ, ਤਾਂ 3 ਸਟਾਰ ਮਾਡਲ ਇਕ ਚੰਗਾ ਵਿਕਲਪ ਹੋ ਸਕਦਾ ਹੈ।
- ਜੇਕਰ ਤੁਸੀਂ ਭਿਆਨਕ ਗਰਮੀ ਵਾਲੇ ਸ਼ਹਿਰ ਵਿੱਚ ਰਹਿੰਦੇ ਹੋ ਅਤੇ AC ਰੋਜ਼ਾਨਾ ਕਈ ਘੰਟਿਆਂ ਤੱਕ ਚੱਲਦਾ ਹੈ, ਤਾਂ ਲੰਬੇ ਸਮੇਂ ਲਈ 5 ਸਟਾਰ AC ਹੀ ਸਭ ਤੋਂ ਕਿਫਾਇਤੀ ਸਾਬਤ ਹੁੰਦਾ ਹੈ।

ਇਸ ਲਈ, ਸਿਰਫ਼ ਸ਼ੁਰੂਆਤੀ ਕੀਮਤ ਵੇਖ ਕੇ ਫੈਸਲਾ ਨਾ ਲਓ। AC ਖਰੀਦਣ ਤੋਂ ਪਹਿਲਾਂ ਆਪਣੀ ਲੋੜ, ਬਿਜਲੀ ਦੀ ਦਰ ਅਤੇ ਰੋਜ਼ਾਨਾ ਵਰਤੋਂ ਦੇ ਘੰਟਿਆਂ ਦਾ ਹਿਸਾਬ ਜ਼ਰੂਰ ਲਗਾਓ।