ਵਿਵਾਦਾਂ ''ਚ ਘਿਰੀ ਯਸ਼ ਦੀ ਫਿਲਮ ''ਟੌਕਸਿਕ'', ਟੀਜ਼ਰ ''ਚ ਲੱਗੇ ਅਸ਼ਲੀਲਤਾ ਦੇ ਦੋਸ਼

ਐਂਟਰਟੇਨਮੈਂਟ ਡੈਸਕ- 'ਕੇ.ਜੀ.ਐੱਫ.' (KGF) ਫੇਮ ਸੁਪਰਸਟਾਰ ਯਸ਼ ਦੀ ਆਉਣ ਵਾਲੀ ਫਿਲਮ 'ਟੌਕਸਿਕ' (Toxic) ਆਪਣੇ ਪਹਿਲੇ ਟੀਜ਼ਰ ਦੇ ਰਿਲੀਜ਼ ਹੁੰਦੇ ਹੀ ਵੱਡੇ ਵਿਵਾਦਾਂ ਵਿੱਚ ਫਸ ਗਈ ਹੈ। ਫਿਲਮ ਦੇ ਟੀਜ਼ਰ ਵਿੱਚ ਦਿਖਾਏ ਗਏ ਇੱਕ ਇੰਟੀਮੇਟ (ਬੋਲਡ) ਸੀਨ ਨੂੰ ਲੈ ਕੇ ਹੰਗਾਮਾ ਮਚ ਗਿਆ ਹੈ। ਆਮ ਆਦਮੀ ਪਾਰਟੀ ਦੀ ਮਹਿਲਾ ਵਿੰਗ ਨੇ ਇਸ ਮਾਮਲੇ ਵਿੱਚ ਕਰਨਾਟਕ ਰਾਜ ਮਹਿਲਾ ਕਮਿਸ਼ਨ ਕੋਲ ਇੱਕ ਰਸਮੀ ਸ਼ਿਕਾਇਤ ਦਰਜ ਕਰਵਾਈ ਹੈ।
ਕਾਰ ਵਾਲੇ ਸੀਨ 'ਤੇ ਜਤਾਇਆ ਇਤਰਾਜ਼ 
ਸਰੋਤਾਂ ਅਨੁਸਾਰ ਟੀਜ਼ਰ ਵਿੱਚ ਯਸ਼ ਨੂੰ ਇੱਕ ਔਰਤ ਨਾਲ ਕਾਰ ਵਿੱਚ ਇੰਟੀਮੇਟ ਹੁੰਦੇ ਦਿਖਾਇਆ ਗਿਆ ਹੈ, ਜਿਸ 'ਤੇ ਮਹਿਲਾ ਵਿੰਗ ਨੇ ਸਖ਼ਤ ਇਤਰਾਜ਼ ਜਤਾਇਆ ਹੈ। 'ਆਪ' ਦੀ ਸੂਬਾ ਸਕੱਤਰ ਊਸ਼ਾ ਮੋਹਨ ਨੇ ਮਹਿਲਾ ਕਮਿਸ਼ਨ ਨੂੰ ਲਿਖੇ ਪੱਤਰ ਵਿੱਚ ਕਿਹਾ ਹੈ ਕਿ ਟੀਜ਼ਰ ਵਿੱਚ 'ਅਸ਼ਲੀਲ ਅਤੇ ਅਪੱਤੀਜਨਕ' ਦ੍ਰਿਸ਼ ਹਨ, ਜੋ ਔਰਤਾਂ ਅਤੇ ਬੱਚਿਆਂ ਦੀ ਸਮਾਜਿਕ ਭਲਾਈ ਨੂੰ ਨੁਕਸਾਨ ਪਹੁੰਚਾ ਸਕਦੇ ਹਨ। ਉਨ੍ਹਾਂ ਦਾ ਕਹਿਣਾ ਹੈ ਕਿ ਇਹ ਟੀਜ਼ਰ ਬਿਨਾਂ ਕਿਸੇ ਉਮਰ ਸਬੰਧੀ ਚੇਤਾਵਨੀ ਦੇ ਜਨਤਕ ਕੀਤਾ ਗਿਆ ਹੈ, ਜੋ ਔਰਤਾਂ ਦੀ ਗ਼ੈਰਤ ਨੂੰ ਠੇਸ ਪਹੁੰਚਾਉਂਦਾ ਹੈ ਅਤੇ ਕੰਨੜ ਸੱਭਿਆਚਾਰ ਦਾ ਅਪਮਾਨ ਹੈ।
ਟੀਜ਼ਰ 'ਤੇ ਪਾਬੰਦੀ ਲਗਾਉਣ ਦੀ ਮੰਗ
ਪਾਰਟੀ ਨੇ ਮੰਗ ਕੀਤੀ ਹੈ ਕਿ ਮਹਿਲਾ ਕਮਿਸ਼ਨ ਤੁਰੰਤ ਦਖ਼ਲ ਦੇਵੇ ਅਤੇ ਸੂਬਾ ਸਰਕਾਰ ਨੂੰ ਨਿਰਦੇਸ਼ ਜਾਰੀ ਕਰੇ ਕਿ ਇਸ ਟੀਜ਼ਰ 'ਤੇ ਪਾਬੰਦੀ ਲਗਾਈ ਜਾਵੇ ਅਤੇ ਇਸ ਨੂੰ ਸੋਸ਼ਲ ਮੀਡੀਆ ਪਲੇਟਫਾਰਮਾਂ ਤੋਂ ਹਟਾਇਆ ਜਾਵੇ। ਉਨ੍ਹਾਂ ਚਿੰਤਾ ਜ਼ਾਹਰ ਕੀਤੀ ਕਿ ਇਸ ਦਾ ਨਾਬਾਲਗਾਂ 'ਤੇ ਗਲਤ ਅਸਰ ਪੈ ਸਕਦਾ ਹੈ।
ਸੈਂਸਰ ਬੋਰਡ ਨੇ ਦਿੱਤਾ ਸਪੱਸ਼ਟੀਕਰਨ ਇਸ ਵਿਵਾਦ ਦਰਮਿਆਨ ਸੈਂਸਰ ਬੋਰਡ ਦੇ ਸੂਤਰਾਂ ਨੇ ਦੱਸਿਆ ਹੈ ਕਿ ਫਿਲਮ ਦਾ ਅਜੇ ਤੱਕ ਕੋਈ ਵੀ ਕੰਟੈਂਟ ਸਰਟੀਫਾਈ ਨਹੀਂ ਕੀਤਾ ਗਿਆ ਹੈ। ਕਿਉਂਕਿ ਟੀਜ਼ਰ ਸਿਰਫ਼ ਡਿਜੀਟਲ ਪਲੇਟਫਾਰਮਾਂ 'ਤੇ ਰਿਲੀਜ਼ ਹੋਇਆ ਸੀ, ਇਸ ਲਈ ਇਸ ਨੂੰ ਸੈਂਸਰ ਬੋਰਡ ਦੀ ਮਨਜ਼ੂਰੀ ਦੀ ਲੋੜ ਨਹੀਂ ਸੀ। ਸੋਸ਼ਲ ਮੀਡੀਆ ਪਲੇਟਫਾਰਮਾਂ ਦੇ ਆਪਣੇ ਨਿਯਮ ਹੁੰਦੇ ਹਨ ਜੋ ਇਹ ਤੈਅ ਕਰਦੇ ਹਨ ਕਿ ਕਿਹੜੀ ਸਮੱਗਰੀ ਕਿਸ ਉਮਰ ਦੇ ਲੋਕ ਦੇਖ ਸਕਦੇ ਹਨ।
ਸੰਦੀਪ ਰੈੱਡੀ ਵਾਂਗਾ ਅਤੇ ਰਾਮ ਗੋਪਾਲ ਵਰਮਾ ਨੇ ਕੀਤੀ ਤਾਰੀਫ਼ 
ਇੱਕ ਪਾਸੇ ਜਿੱਥੇ ਆਲੋਚਕ ਨਿਰਦੇਸ਼ਕ ਗੀਤੂ ਮੋਹਨਦਾਸ 'ਤੇ ਔਰਤਾਂ ਨੂੰ 'ਆਬਜੈਕਟ' ਵਜੋਂ ਦਿਖਾਉਣ ਦਾ ਦੋਸ਼ ਲਗਾ ਰਹੇ ਹਨ, ਉੱਥੇ ਹੀ ਦੂਜੇ ਪਾਸੇ ਦਿੱਗਜ ਫਿਲਮਸਾਜ਼ਾਂ ਨੇ ਇਸ ਦੀ ਸ਼ਲਾਘਾ ਕੀਤੀ ਹੈ। ਰਾਮ ਗੋਪਾਲ ਵਰਮਾ ਨੇ ਗੀਤੂ ਮੋਹਨਦਾਸ ਨੂੰ ਮਹਿਲਾ ਸਸ਼ਕਤੀਕਰਨ ਦੀ ਮਿਸਾਲ ਦੱਸਿਆ, ਜਦਕਿ 'ਐਨੀਮਲ' ਦੇ ਡਾਇਰੈਕਟਰ ਸੰਦੀਪ ਰੈੱਡੀ ਵਾਂਗਾ ਨੇ ਕਿਹਾ ਕਿ ਟੀਜ਼ਰ ਦੇ ਸਟਾਈਲ ਅਤੇ ਐਟੀਟਿਊਡ ਨੇ ਉਨ੍ਹਾਂ ਨੂੰ ਪੂਰੀ ਤਰ੍ਹਾਂ ਹਿਲਾ ਕੇ ਰੱਖ ਦਿੱਤਾ ਹੈ। ਦੱਸ ਦੇਈਏ ਕਿ 'ਟੌਕਸਿਕ' 19 ਮਾਰਚ 2026 ਨੂੰ ਰਿਲੀਜ਼ ਹੋਣ ਵਾਲੀ ਹੈ, ਜਿਸ ਵਿੱਚ ਯਸ਼ ਦੇ ਨਾਲ ਨਯਨਤਾਰਾ, ਕਿਆਰਾ ਅਡਵਾਨੀ ਅਤੇ ਹੁਮਾ ਕੁਰੈਸ਼ੀ ਵਰਗੇ ਵੱਡੇ ਸਿਤਾਰੇ ਨਜ਼ਰ ਆਉਣਗੇ।