ਸੁਪਰਸਟਾਰ ਦੇ ਪੁੱਤਰ ਨੇ ਫ਼ਿਲਮੀ ਦੁਨੀਆ ਨੂੰ ਠੋਕਰ ਮਾਰ ਰਾਤਾਂ ਨੂੰ ਕੀਤੀ ਨੌਕਰੀ, ਹੁਣ ਬਣਿਆ IAS ਅਫ਼ਸਰ
Thursday, May 14, 2026 - 01:18 PM (IST)
ਮਨੋਰੰਜਨ ਡੈਸਕ - ਆਮ ਤੌਰ 'ਤੇ ਦੇਖਿਆ ਜਾਂਦਾ ਹੈ ਕਿ ਫ਼ਿਲਮ ਇੰਡਸਟਰੀ ਨਾਲ ਜੁੜੇ ਪਰਿਵਾਰਾਂ ਦੇ ਬੱਚੇ ਆਪਣੇ ਮਾਤਾ-ਪਿਤਾ ਦੇ ਨਕਸ਼ੇ-ਕਦਮਾਂ 'ਤੇ ਚੱਲਦੇ ਹੋਏ ਗਲੈਮਰ ਦੀ ਦੁਨੀਆ 'ਚ ਹੀ ਆਪਣਾ ਕਰੀਅਰ ਤਲਾਸ਼ਦੇ ਹਨ। ਪਰ ਸ਼੍ਰੁਤੰਜੇ ਨਾਰਾਇਣਨ ਨੇ ਇਸ ਰਵਾਇਤ ਨੂੰ ਤੋੜਦਿਆਂ ਇਕ ਅਜਿਹੀ ਮਿਸਾਲ ਕਾਇਮ ਕੀਤੀ ਹੈ, ਜੋ ਅੱਜ ਦੇ ਨੌਜਵਾਨਾਂ ਲਈ ਪ੍ਰੇਰਨਾ ਦਾ ਸਰੋਤ ਹੈ।
ਕੌਣ ਹੈ ਸ਼੍ਰੁਤੰਜੇ ਨਾਰਾਇਣਨ?
ਸ਼੍ਰੁਤੰਜੇ ਦੇ ਪਿਤਾ ਚਿੰਨੀ ਜਯੰਤ (ਕ੍ਰਿਸ਼ਨਾਮੂਰਤੀ ਨਾਰਾਇਣਨ) ਤਮਿਲ ਸਿਨੇਮਾ ਦੇ ਇਕ ਬਹੁਤ ਹੀ ਸਤਿਕਾਰਤ ਅਤੇ ਮਸ਼ਹੂਰ ਹਾਸਰਸ ਅਦਾਕਾਰ ਹਨ। ਉਨ੍ਹਾਂ ਨੇ 1980 ਦੇ ਦਹਾਕੇ 'ਚ ਸੁਪਰਸਟਾਰ ਰਜਨੀਕਾਂਤ ਨਾਲ ਕਈ ਫ਼ਿਲਮਾਂ 'ਚ ਆਪਣੀ ਅਦਾਕਾਰੀ ਦਾ ਲੋਹਾ ਮਨਵਾਇਆ ਹੈ। ਇੰਨੇ ਵੱਡੇ ਫ਼ਿਲਮੀ ਪਿਛੋਕੜ ਤੋਂ ਹੋਣ ਦੇ ਬਾਵਜੂਦ, ਸ਼੍ਰੁਤੰਜੇ ਨੇ ਕੈਮਰੇ ਦੇ ਸਾਹਮਣੇ ਆਉਣ ਦੀ ਬਜਾਏ ਪ੍ਰਸ਼ਾਸਨਿਕ ਸੇਵਾਵਾਂ ਰਾਹੀਂ ਜਨਤਾ ਦੀ ਸੇਵਾ ਕਰਨ ਦਾ ਔਖਾ ਰਸਤਾ ਚੁਣਿਆ।
ਸੰਘਰਸ਼ ਅਤੇ ਮਿਹਨਤ ਦੀ ਮਿਸਾਲ
ਸ਼੍ਰੁਤੰਜੇ ਦੀ ਸਫਲਤਾ ਦਾ ਸਫ਼ਰ ਇੰਨਾ ਸੌਖਾ ਨਹੀਂ ਸੀ। ਉਨ੍ਹਾਂ ਨੇ ਕਦੇ ਵੀ ਆਪਣੇ ਪਿਤਾ ਦੇ ਸਟਾਰਡਮ ਜਾਂ ਆਰਥਿਕ ਮਜ਼ਬੂਤੀ ਦਾ ਸਹਾਰਾ ਨਹੀਂ ਲਿਆ। ਆਪਣੇ ਆਈ.ਏ.ਐੱਸ. (IAS) ਬਣਨ ਦੇ ਸੁਪਨੇ ਨੂੰ ਪੂਰਾ ਕਰਨ ਲਈ ਉਨ੍ਹਾਂ ਨੇ ਇਕ ਸਟਾਰਟਅੱਪ 'ਚ ਰਾਤ ਦੀ ਸ਼ਿਫਟ 'ਚ ਨੌਕਰੀ ਕੀਤੀ। ਉਹ ਰਾਤ ਭਰ ਕੰਮ ਕਰਦੇ ਸਨ ਅਤੇ ਦਿਨ ਵੇਲੇ 4 ਤੋਂ 5 ਘੰਟੇ ਸਖ਼ਤ ਮਿਹਨਤ ਨਾਲ ਪੜ੍ਹਾਈ ਕਰਦੇ ਸਨ। ਉਨ੍ਹਾਂ ਨੇ ਗਿੰਡੀ ਕਾਲਜ ਆਫ਼ ਇੰਜੀਨੀਅਰਿੰਗ ਤੋਂ ਗ੍ਰੈਜੂਏਸ਼ਨ ਅਤੇ ਅਸ਼ੋਕਾ ਯੂਨੀਵਰਸਿਟੀ ਤੋਂ ਮਾਸਟਰਜ਼ ਦੀ ਡਿਗਰੀ ਹਾਸਲ ਕੀਤੀ ਹੈ।
ਦੂਜੀ ਕੋਸ਼ਿਸ਼ 'ਚ ਹਾਸਲ ਕੀਤਾ 75ਵਾਂ ਰੈਂਕ
ਉਨ੍ਹਾਂ ਦੀ ਮਿਹਨਤ ਨੂੰ ਫਲ ਉਦੋਂ ਮਿਲਿਆ ਜਦੋਂ ਸਾਲ 2015 'ਚ ਉਨ੍ਹਾਂ ਨੇ ਆਪਣੇ ਦੂਜੇ ਯਤਨ 'ਚ ਹੀ UPSC ਸਿਵਲ ਸੇਵਾਵਾਂ ਪ੍ਰੀਖਿਆ 'ਚ ਆਲ ਇੰਡੀਆ ਰੈਂਕ 75 ਹਾਸਲ ਕਰ ਲਿਆ। ਉਨ੍ਹਾਂ ਨੇ ਸਮਾਜ ਸ਼ਾਸਤਰ ਨੂੰ ਆਪਣੇ ਵਿਕਲਪਿਕ ਵਿਸ਼ੇ ਵਜੋਂ ਚੁਣਿਆ ਸੀ।
ਅੱਜ ਤਮਿਲਨਾਡੂ ਕੇਡਰ 'ਚ ਨਿਭਾ ਰਹੇ ਹਨ ਅਹਿਮ ਜ਼ਿੰਮੇਵਾਰੀ
ਮੌਜੂਦਾ ਸਮੇਂ 'ਚ ਸ਼੍ਰੁਤੰਜੇ ਨਾਰਾਇਣਨ ਤਮਿਲਨਾਡੂ ਕੇਡਰ ਦੇ ਇਕ ਹੋਣਹਾਰ ਅਧਿਕਾਰੀ ਵਜੋਂ ਆਪਣੀਆਂ ਸੇਵਾਵਾਂ ਦੇ ਰਹੇ ਹਨ। ਉਹ ਤਿਰੂਪੁਰ 'ਚ ਸਬ-ਕਲੈਕਟਰ ਅਤੇ ਵਿੱਲੂਪੁਰਮ 'ਚ ਐਡੀਸ਼ਨਲ ਕਲੈਕਟਰ ਵਰਗੇ ਅਹੁਦਿਆਂ 'ਤੇ ਰਹਿ ਕੇ ਸਰਕਾਰੀ ਯੋਜਨਾਵਾਂ ਨੂੰ ਸਮਾਜ ਦੇ ਆਖਰੀ ਵਿਅਕਤੀ ਤੱਕ ਪਹੁੰਚਾਉਣ 'ਚ ਅਹਿਮ ਭੂਮਿਕਾ ਨਿਭਾ ਰਹੇ ਹਨ। ਉਨ੍ਹਾਂ ਦੀ ਇਹ ਕਹਾਣੀ ਸਾਬਤ ਕਰਦੀ ਹੈ ਕਿ ਜੇਕਰ ਇਰਾਦੇ ਮਜ਼ਬੂਤ ਹੋਣ ਤਾਂ ਇਨਸਾਨ ਆਪਣੀ ਮਿਹਨਤ ਦੇ ਦਮ 'ਤੇ ਇਕ ਵੱਖਰੀ ਅਤੇ ਸਤਿਕਾਰਯੋਗ ਪਛਾਣ ਬਣਾ ਸਕਦਾ ਹੈ।
