29 ਸਾਲਾਂ ਦੀ ਹੋਈ ਸਾਰਾ ਗੁਰਪਾਲ, ਜਨਮਦਿਨ ਮਨਾਉਂਦਿਆਂ ਸਾਂਝੀਆਂ ਕੀਤੀਆਂ ਤਸਵੀਰਾਂ
11/19/2020 1:25:33 PM
ਜਲੰਧਰ (ਬਿਊਰੋ)– ਪੰਜਾਬੀ ਮਾਡਲ, ਗਾਇਕਾ ਤੇ ਅਦਾਕਾਰਾ ਸਾਰਾ ਗੁਰਪਾਲ 29 ਸਾਲਾਂ ਦੀ ਹੋ ਗਈ ਹੈ। ਸਾਰਾ ਗੁਰਪਾਲ ਨੇ ਆਪਣੇ ਜਨਮਦਿਨ ਮਨਾਉਂਦਿਆਂ ਦੀਆਂ ਖ਼ਾਸ ਤਸਵੀਰਾਂ ਆਪਣੇ ਪ੍ਰਸ਼ੰਸਕਾਂ ਨਾਲ ਸਾਂਝੀਆਂ ਕੀਤੀਆਂ ਹਨ, ਜਿਨ੍ਹਾਂ ਨੂੰ ਕੁਝ ਹੀ ਘੰਟਿਆਂ ’ਚ ਲੱਖਾਂ ਲਾਈਕਸ ਮਿਲ ਚੁੱਕੇ ਹਨ।
ਸਾਰਾ ਦੀਆਂ ਇਨ੍ਹਾਂ ਤਸਵੀਰਾਂ ’ਤੇ ਪੰਜਾਬੀ ਗਾਇਕ ਜੱਸੀ ਗਿੱਲ, ਅਖਿਲ, ਅਰਮਾਨ ਬੇਦਿਲ, ਹੈਪੀ ਰਾਏਕੋਟੀ ਤੇ ਮਿਸ ਪੂਜਾ ਸਮੇਤ ਕਈ ਕਲਾਕਾਰਾਂ ਨੇ ਵਧਾਈ ਦਿੰਦਿਆਂ ਕੁਮੈਂਟਸ ਕੀਤੇ ਹਨ।
ਦੱਸਣਯੋਗ ਹੈ ਕਿ ਸਾਰਾ ਗੁਰਪਾਲ ਦਾ ਜਨਮ 19 ਨਵੰਬਰ, 1991 ਨੂੰ ਹਰਿਆਣਾ ਦੇ ਫਤਿਹਾਬਾਦ ਜ਼ਿਲੇ ’ਚ ਹੋਇਆ ਹੈ। ਹਾਲਾਂਕਿ ਸਾਰਾ ਦੀ ਪਰਵਰਿਸ਼ ਚੰਡੀਗੜ੍ਹ ’ਚ ਹੋਈ।
ਸਾਰਾ ਗੁਰਪਾਲ ਨੇ ਸਾਲ 2013 ’ਚ ਰਣਜੀਤ ਬਾਵਾ ਦੇ ਗੀਤ ‘ਜੀਨ’ ਨਾਲ ਮਿਊਜ਼ਿਕ ਵੀਡੀਓ ’ਚ ਡੈਬਿਊ ਕੀਤਾ ਸੀ। ਸਾਰਾ ਨੇ 2016 ’ਚ ਸਿੰਗਿੰਗ ਡੈਬਿਊ ਕੀਤਾ। ਉਸ ਦਾ ਪਹਿਲਾ ਗੀਤ ‘ਲੱਗਦੀ ਅੱਤ’ ਹੈ।
ਸਾਰਾ ਗੁਰਪਾਲ ਨੇ ਪੰਜਾਬੀ ਫ਼ਿਲਮ ‘ਮੰਜੇ ਬਿਸਤਰੇ’ ਨਾਲ 2017 ’ਚ ਐਕਟਿੰਗ ਡੈਬਿਊ ਕੀਤਾ ਸੀ। ਸਾਰਾ ਗੁਰਪਾਲ ਪੰਜਾਬੀ ਮਾਡਲ ਤੇ ਗਾਇਕਾ ਹਿਮਾਂਸ਼ੀ ਖੁਰਾਣਾ ਤੇ ਸ਼ਹਿਨਾਜ਼ ਕੌਰ ਗਿੱਲ ਦੀ ਚੰਗੀ ਦੋਸਤ ਹੈ।
ਸਾਲ 2018 ’ਚ ਖ਼ਬਰ ਆਈ ਸੀ ਕਿ ਸਾਰਾ ਗੁਰਪਾਲ ਨੇ ਅਮਰੀਕਾ ਦੇ ਇਕ ਬਿਜ਼ਨੈੱਸਮੈਨ ਨਾਲ ਚੁੱਪ-ਚੁਪੀਤੇ ਵਿਆਹ ਕਰਵਾ ਲਿਆ ਹੈ। ਬਾਅਦ ’ਚ ਸਾਰਾ ਨੇ ਖ਼ੁਲਾਸਾ ਕੀਤਾ ਸੀ ਕਿ ਇਹ ਸਿਰਫ ਅਫ਼ਵਾਹ ਹੈ। ਉਹ ਕਿਸੇ ਵੀ ਅਮਰੀਕੀ ਬਿਜ਼ਨੈੱਸਮੈਨ ਨੂੰ ਨਹੀਂ ਜਾਣਦੀ ਹੈ।
ਸਾਰਾ ਗੁਰਪਾਲ ‘ਬਿੱਗ ਬੌਸ 14’ ਦਾ ਹਿੱਸਾ ਵੀ ਬਣ ਚੁੱਕੀ ਹੈ। ਹਾਲਾਂਕਿ ਬਿੱਗ ਬੌਸ ਦੇ ਘਰੋਂ ਐਲੀਮੀਨੇਟ ਹੋਣ ਵਾਲੀ ਸਾਰਾ ਪਹਿਲੀ ਮੁਕਾਬਲੇਬਾਜ਼ ਸੀ, ਜਿਸ ਦੀਆਂ ਮੁੜ ਬਿੱਗ ਬੌਸ ਦੇ ਘਰ ’ਚ ਵਾਈਲਡ ਕਾਰਡ ਐਂਟਰੀ ਦੀਆਂ ਚਰਚਾਵਾਂ ਚੱਲ ਰਹੀਆਂ ਹਨ।
ਸਾਰਾ ਗੁਰਪਾਲ ਇੰਸਟਾਗ੍ਰਾਮ ’ਤੇ ਆਪਣੀਆਂ ਤਸਵੀਰਾਂ ਤੇ ਵੀਡੀਓਜ਼ ਕਾਰਨ ਖ਼ੂਬ ਚਰਚਾ ’ਚ ਰਹਿੰਦੀ ਹੈ। ਸਾਰਾ ਦੇ ਇੰਸਟਾਗ੍ਰਾਮ ’ਤੇ 2.6 ਮਿਲੀਅਨ ਤੋਂ ਵੱਧ ਫਾਲੋਅਰਜ਼ ਹਨ।
