‘ਸ਼ਮਸ਼ੇਰਾ’ ਦੇ ਫਲਾਪ ਹੋਣ ’ਤੇ ਛਲਕਿਆ ਡਾਇਰੈਕਟਰ ਕਰਨ ਮਲਹੋਤਰਾ ਦਾ ਦਰਦ, ਇੰਝ ਕੀਤਾ ਬਿਆਨ

ਮੁੰਬਈ (ਬਿਊਰੋ)– ਰਣਬੀਰ ਕਪੂਰ ਦੀ ਨਵੀਂ ਰਿਲੀਜ਼ ਫ਼ਿਲਮ ‘ਸ਼ਮਸ਼ੇਰਾ’ ਨਾਲ ਦਰਸ਼ਕਾਂ ਦੇ ਨਾਲ-ਨਾਲ ਫ਼ਿਲਮ ਇੰਡਸਟਰੀ ਨੂੰ ਕਾਫੀ ਉਮੀਦਾਂ ਸਨ ਪਰ 22 ਜੁਲਾਈ ਨੂੰ ਰਿਲੀਜ਼ ਹੋਈ ਇਹ ਫ਼ਿਲਮ ਬਾਕਸ ਆਫਿਸ ’ਤੇ ਚਾਰ ਦਿਨਾਂ ’ਚ ਹੀ ਢੇਰ ਹੋ ਗਈ ਹੈ। 150 ਕਰੋੜ ਦੇ ਬਜਟ ’ਚ ਬਣੀ ਤੇ ਵੱਡੇ ਸਿਤਾਰਿਆਂ ਨਾਲ ਸਜੀ ਇਹ ਫ਼ਿਲਮ ਬਾਕਸ ਆਫਿਸ ’ਤੇ ਆਪਣਾ ਜਾਦੂ ਨਹੀਂ ਦਿਖਾ ਪਾਈ।

ਇਹ ਫ਼ਿਲਮ ਜਿਸ ਹੌਲੀ ਰਫਤਾਰ ਨਾਲ ਅੱਜੇ ਵੱਧ ਰਹੀ ਹੈ, ਲੱਗ ਰਿਹਾ ਹੈ ਕਿ ਇਹ 100 ਕਰੋੜ ਰੁਪਏ ਵੀ ਨਹੀਂ ਕਮਾ ਪਾਏਗੀ। ‘ਸ਼ਮਸ਼ੇਰਾ’ ਦੇ ਡਾਇਰੈਕਟਰ ਕਰਨ ਮਲਹੋਤਰਾ ਆਪਣੀ ਇਸ ਫ਼ਿਲਮ ਦੀ ਅਸਫਲਤਾ ਤੋਂ ਦੁਖੀ ਹੈ। ਉਨ੍ਹਾਂ ਕਿਹਾ ਕਿ ਉਹ ਫ਼ਿਲਮ ਦੇ ਅਸਫਲ ਹੋਣ ’ਤੇ ਮਿਲੀ ਨਫਰਤ ਤੇ ਗੁੱਸੇ ਨੂੰ ਝੱਲ ਨਹੀਂ ਪਾਏ।

ਇਹ ਖ਼ਬਰ ਵੀ ਪੜ੍ਹੋ : ਸੁਸ਼ਾਂਤ ਸਿੰਘ ਦੀ ਤਸਵੀਰ ਲੱਗੀ ਟੀ-ਸ਼ਰਟ ’ਤੇ ਮਚਿਆ ਹੰਗਾਮਾ, ਫਲਿਪਕਾਰਟ ਦੇ ਬਾਈਕਾਟ ਦੀ ਉਠੀ ਮੰਗ

ਕਰਨ ਮਲਹੋਤਰਾ ਨੇ ਸੋਸ਼ਲ ਮੀਡੀਆ ’ਤੇ ਇਕ ਪੋਸਟ ’ਚ ‘ਸ਼ਮਸ਼ੇਰਾ’ ਦੀ ਅਸਫਲਤਾ ਤੇ ਹੌਲੀ ਕਮਾਈ ’ਤੇ ਪ੍ਰਤੀਕਿਰਿਆ ਦਿੱਤੀ ਹੈ। ਉਨ੍ਹਾਂ ਨੇ ਆਪਣੇ ਨੋਟ ਦੀ ਸ਼ੁਰੂਆਤ ’ਚ ‘ਸ਼ਮਸ਼ੇਰਾ ਮੇਰਾ ਹੈ’ ਲਿਖਿਆ ਹੈ।

ਕਰਨ ਮਲਹੋਤਰਾ ਨੇ ਲਿਖਿਆ, ‘‘ਮੇਰੇ ਪਿਆਰੇ ਸ਼ਮਸ਼ੇਰਾ ਤੂੰ ਤੇਜਸਵੀ ਹੈ। ਮੇਰੇ ਲਈ ਇਸ ਪਲੇਟਫਾਰਮ ’ਤੇ ਖ਼ੁਦ ਨੂੰ ਐਕਸਪ੍ਰੈੱਸ ਕਰਨਾ ਬਹੁਤ ਜ਼ਰੂਰੀ ਹੈ ਕਿਉਂਕਿ ਇਹ ਉਹ ਜਗ੍ਹਾ ਹੈ, ਜਿਥੇ ਤੁਹਾਡੇ ਲਈ ਪਿਆਰ, ਨਫਰਤ, ਜਸ਼ਨ ਤੇ ਅਪਮਾਨ ਮੌਜੂਦ ਹੈ। ਪਿਛਲੇ ਕੁਝ ਦਿਨਾਂ ਤੋਂ ਤੁਹਾਨੂੰ ਇਸ ਤਰ੍ਹਾਂ ਛੱਡ ਦੇਣ ਲਈ ਮੈਂ ਤੁਹਾਡੇ ਤੋਂ ਵਾਰ-ਵਾਰ ਮੁਆਫ਼ੀ ਮੰਗਦਾ ਹਾਂ ਕਿਉਂਕਿ ਮੈਂ ਉਹ ਨਫਰਤ ਤੇ ਗੁੱਸਾ ਨਹੀਂ ਝੱਲ ਪਾ ਰਿਹਾ ਸੀ।’’

ਕਰਨ ਨੇ ਅੱਗੇ ਲਿਖਿਆ, ‘‘ਮੇਰਾ ਇਸ ਤਰ੍ਹਾਂ ਦਾ ਨਾਅਤਾ ਤੋੜ ਕੇ ਰਹਿਣਾ ਮੇਰੀ ਕਮਜ਼ੋਰੀ ਸੀ ਤੇ ਇਸ ਲਈ ਕੋਈ ਬਹਾਨਾ ਨਹੀਂ ਹੈ ਪਰ ਹੁਣ ਮੈਂ ਇਥੇ ਹਾਂ, ਤੁਹਾਡੇ ਨਾਲ ਖੜ੍ਹਾ ਹਾਂ। ਮਾਣ ਤੇ ਸਨਮਾਨਿਤ ਮਹਿਸੂਸ ਕਰ ਰਿਹਾ ਹਾਂ ਕਿ ਤੁਸੀਂ ਮੇਰੇ ਹੋ। ਅਸੀਂ ਦੋਵੇਂ ਹਰ ਚੀਜ਼ ਦਾ ਸਾਹਮਣਾ ਇਕੱਠੇ ਕਰਾਂਗੇ, ਚੰਗਾ-ਮਾੜਾ ਤੇ ਬਦਸੂਰਤ ਸਭ ਤੇ ਸ਼ਮਸ਼ੇਰਾ ਪਰਿਵਾਰ, ਸ਼ਮਸ਼ੇਰਾ ਦੇ ਕਲਾਕਾਰਾਂ, ਕਾਸਟ ਤੇ ਕਰਿਊ ਨੂੰ ਬਹੁਤ ਵਧਾਈ। ਸਾਡੇ ’ਤੇ ਜੋ ਪਿਆਰ, ਪਰਵਾਹ ਤੇ ਆਸ਼ੀਰਵਾਦ ਬਣਾਈ ਰੱਖਿਆ ਗਿਆ, ਉਹ ਬੇਸ਼ਕੀਮਤੀ ਹੈ ਤੇ ਉਸ ਨੂੰ ਸਾਡੇ ਤੋਂ ਕੋਈ ਨਹੀਂ ਖੋਹ ਸਕਦਾ।’’

ਨੋਟ– ਇਸ ਖ਼ਬਰ ’ਤੇ ਆਪਣੀ ਪ੍ਰਤੀਕਿਰਿਆ ਕੁਮੈਂਟ ਕਰਕੇ ਸਾਂਝੀ ਕਰੋ।