ਮਿਸ ਇੰਡੀਆ ਰਹੀ ਮਸ਼ਹੂਰ ਅਦਾਕਾਰਾ ਨੇ ਲਿਆ ਸੰਨਿਆਸ ; ਗਲੈਮਰ ਦੀ ਦੁਨੀਆਂ ਨੂੰ ਅਲਵਿਦਾ ਆਖ ਬਣੀ ਸਾਧਵੀ
Thursday, May 07, 2026 - 02:07 PM (IST)
ਮੁੰਬਈ - ਫਿਲਮੀ ਦੁਨੀਆ ਦੀ ਚਕਾਚੌਂਧ ਅਤੇ ਗਲੈਮਰ ਦੀ ਦੁਨੀਆ ਨੂੰ ਛੱਡ ਕੇ ਅਧਿਆਤਮ ਦੇ ਰਾਹ 'ਤੇ ਚੱਲਣਾ ਹਰ ਕਿਸੇ ਦੇ ਵੱਸ ਦੀ ਗੱਲ ਨਹੀਂ ਹੁੰਦੀ। 90 ਦੇ ਦਹਾਕੇ ਦੀ ਇਕ ਮਸ਼ਹੂਰ ਅਦਾਕਾਰਾ ਬਰਖਾ ਮਦਾਨ ਨੇ ਕੁਝ ਅਜਿਹਾ ਹੀ ਕੀਤਾ ਹੈ। ਕਦੇ ਆਪਣੀ ਖ਼ੂਬਸੂਰਤੀ ਨਾਲ ਐਸ਼ਵਰਿਆ ਰਾਏ ਵਰਗੀਆਂ ਹਸੀਨਾਵਾਂ ਨੂੰ ਟੱਕਰ ਦੇਣ ਵਾਲੀ ਇਹ ਅਦਾਕਾਰਾ ਅੱਜ ਸਭ ਕੁਝ ਤਿਆਗ ਕੇ ਇਕ ਬੌਧ ਭਿਖਸ਼ੂ ਬਣ ਚੁੱਕੀ ਹੈ।
ਮਿਸ ਇੰਡੀਆ ਮੁਕਾਬਲੇ 'ਚ ਦਿਖਾਇਆ ਸੀ ਜਲਵਾ
ਬਰਖਾ ਮਦਾਨ ਨੇ 1994 'ਚ ਮਿਸ ਇੰਡੀਆ ਮੁਕਾਬਲੇ 'ਚ ਹਿੱਸਾ ਲਿਆ ਸੀ। ਇਹ ਉਹੀ ਸਾਲ ਸੀ ਜਦੋਂ ਐਸ਼ਵਰਿਆ ਰਾਏ ਅਤੇ ਸੁਸ਼ਮਿਤਾ ਸੇਨ ਵੀ ਇਸੇ ਮੁਕਾਬਲੇ ਦਾ ਹਿੱਸਾ ਸਨ। ਬਰਖਾ ਨੇ ਉਨ੍ਹਾਂ ਦੋਵਾਂ ਨੂੰ ਸਖ਼ਤ ਟੱਕਰ ਦਿੱਤੀ ਅਤੇ 'ਮਿਸ ਟੂਰਿਜ਼ਮ ਇੰਡੀਆ' ਦਾ ਖ਼ਿਤਾਬ ਆਪਣੇ ਨਾਮ ਕੀਤਾ। ਇਸ ਤੋਂ ਬਾਅਦ ਉਹ ਇੱਕ ਸਫਲ ਮਾਡਲ ਵਜੋਂ ਉੱਭਰੀ।
ਅਕਸ਼ੈ ਕੁਮਾਰ ਨਾਲ ਕੀਤੀਆਂ ਫਿਲਮਾਂ
ਮਾਡਲਿੰਗ ਤੋਂ ਬਾਅਦ ਬਰਖਾ ਨੇ ਬਾਲੀਵੁੱਡ 'ਚ ਕਦਮ ਰੱਖਿਆ। 1996 'ਚ ਉਨ੍ਹਾਂ ਨੇ ਅਕਸ਼ੈ ਕੁਮਾਰ, ਰੇਖਾ ਅਤੇ ਰਵੀਨਾ ਟੰਡਨ ਵਰਗੇ ਵੱਡੇ ਸਿਤਾਰਿਆਂ ਨਾਲ ਫਿਲਮ 'ਖਿਲਾੜੀਆਂ ਕਾ ਖਿਲਾੜੀ' 'ਚ ਕੰਮ ਕੀਤਾ। ਇਸ ਤੋਂ ਇਲਾਵਾ ਉਨ੍ਹਾਂ ਨੇ ਫਿਲਮ 'ਭੂਤ' ਅਤੇ ਕਈ ਮਸ਼ਹੂਰ ਟੀਵੀ ਸ਼ੋਅ ਜਿਵੇਂ 'ਨਿਆਏ', '1857 ਕ੍ਰਾਂਤੀ' ਅਤੇ 'ਸਾਤ ਫੇਰੇ' 'ਚ ਵੀ ਦਮਦਾਰ ਭੂਮਿਕਾਵਾਂ ਨਿਭਾਈਆਂ।
ਕਿਉਂ ਚੁਣਿਆ ਅਧਿਆਤਮ ਦਾ ਰਾਹ?
ਸਫਲਤਾ ਦੇ ਸਿਖਰ 'ਤੇ ਹੋਣ ਦੇ ਬਾਵਜੂਦ ਬਰਖਾ ਅੰਦਰੋਂ ਖਾਲੀਪਨ ਮਹਿਸੂਸ ਕਰਦੀ ਸੀ। ਉਨ੍ਹਾਂ ਦਾ ਮਨ ਅਕਸਰ ਬੇਚੈਨ ਰਹਿੰਦਾ ਸੀ। ਅਖੀਰ ਉਨ੍ਹਾਂ ਨੇ ਆਪਣੀ ਅੰਤਰ-ਆਤਮਾ ਦੀ ਆਵਾਜ਼ ਸੁਣੀ ਅਤੇ ਦਲਾਈ ਲਾਮਾ ਦੀਆਂ ਸਿੱਖਿਆਵਾਂ ਤੋਂ ਪ੍ਰਭਾਵਿਤ ਹੋ ਕੇ ਬੌਧ ਧਰਮ ਅਪਣਾਉਣ ਦਾ ਫੈਸਲਾ ਕੀਤਾ।
ਹੁਣ ਜੀ ਰਹੇ ਹਨ ਸਾਦਾ ਜੀਵਨ
ਸਾਲ 2012 ਵਿੱਚ ਬਰਖਾ ਮਦਾਨ ਨੇ ਫਿਲਮੀ ਦੁਨੀਆ ਨੂੰ ਪੂਰੀ ਤਰ੍ਹਾਂ ਅਲਵਿਦਾ ਕਹਿ ਦਿੱਤਾ ਅਤੇ ਬੌਧ ਭਿਖਸ਼ੂ ਬਣ ਗਏ। ਉਨ੍ਹਾਂ ਨੇ ਆਪਣਾ ਨਾਮ ਬਦਲ ਕੇ 'ਗਿਆਲਟੇਨ ਸਮਤੇਨ' ਰੱਖ ਲਿਆ ਹੈ। ਅੱਜ ਉਹ ਹਿਮਾਲਿਆ ਦੀਆਂ ਸ਼ਾਂਤ ਵਾਦੀਆਂ ਵਿੱਚ ਰਹਿੰਦੇ ਹਨ ਅਤੇ ਹਮੇਸ਼ਾ ਮਰੂਨ ਰੰਗ ਦੇ ਕੱਪੜਿਆਂ (ਚੋਲੇ) 'ਚ ਨਜ਼ਰ ਆਉਂਦੇ ਹਨ। ਉਹ ਸੋਸ਼ਲ ਮੀਡੀਆ 'ਤੇ ਵੀ ਸਰਗਰਮ ਹਨ ਅਤੇ ਲੋਕਾਂ ਨੂੰ ਬੌਧ ਧਰਮ ਦੀਆਂ ਸਿੱਖਿਆਵਾਂ ਦਿੰਦੇ ਹਨ।
