'ਗੋਲਮਾਲ 5' 'ਚ ਅਕਸ਼ੈ ਕੁਮਾਰ ਦੀ ਐਂਟਰੀ: ਹੀਰੋ ਨਹੀਂ ਸਗੋਂ ਇਸ ਵਾਰ ਨਿਭਾਉਣਗੇ ਖਤਰਨਾਕ ਵਿਲੇਨ ਦਾ ਕਿਰਦਾਰ
Tuesday, Feb 03, 2026 - 09:53 AM (IST)
ਮੁੰਬਈ - ਬਾਲੀਵੁੱਡ ਦੀ ਸਭ ਤੋਂ ਮਸ਼ਹੂਰ ਕਾਮੇਡੀ ਫ੍ਰੈਂਚਾਇਜ਼ੀ 'ਗੋਲਮਾਲ' ਇਕ ਵਾਰ ਫਿਰ ਦਰਸ਼ਕਾਂ ਨੂੰ ਹਸਾਉਣ ਲਈ ਤਿਆਰ ਹੈ, ਪਰ ਇਸ ਵਾਰ ਕਹਾਣੀ 'ਚ ਇੱਕ ਅਜਿਹਾ ਮੋੜ ਆਉਣ ਵਾਲਾ ਹੈ ਜਿਸ ਦੀ ਕਿਸੇ ਨੇ ਕਲਪਨਾ ਵੀ ਨਹੀਂ ਕੀਤੀ ਸੀ। ਰੋਹਿਤ ਸ਼ੈੱਟੀ ਦੀ ਇਸ ਸੁਪਰਹਿੱਟ ਫ੍ਰੈਂਚਾਇਜ਼ੀ ਦੀ ਅਗਲੀ ਫਿਲਮ 'ਗੋਲਮਾਲ 5' ਨੂੰ ਲੈ ਕੇ ਵੱਡਾ ਖੁਲਾਸਾ ਹੋਇਆ ਹੈ ਕਿ ਅਕਸ਼ੇ ਕੁਮਾਰ ਇਸ ਫਿਲਮ 'ਚ ਸ਼ਾਮਲ ਹੋਣ ਜਾ ਰਹੇ ਹਨ। ਹੈਰਾਨੀ ਦੀ ਗੱਲ ਇਹ ਹੈ ਕਿ ਅਕਸ਼ੇ ਇਸ 'ਚ ਹੀਰੋ ਦੇ ਰੂਪ ਵਿੱਚ ਨਹੀਂ, ਸਗੋਂ ਇਕ ਮਜ਼ਬੂਤ ਵਿਲੇਨ ਦੇ ਰੂਪ 'ਚ ਨਜ਼ਰ ਆਉਣਗੇ। ਮਿਲੀ ਜਾਣਕਾਰੀ ਅਨੁਸਾਰ 'ਗੋਲਮਾਲ 5' 'ਚ ਪਹਿਲੀ ਵਾਰ ਕਹਾਣੀ ਨੂੰ ਇਕ ਮਜ਼ਬੂਤ ਨਕਾਰਾਤਮਕ ਕਿਰਦਾਰ ਮਿਲਣ ਵਾਲਾ ਹੈ। ਅਕਸ਼ੇ ਕੁਮਾਰ ਦਾ ਇਹ ਕਿਰਦਾਰ ਕਾਮਿਕ ਹੋਣ ਦੇ ਨਾਲ-ਨਾਲ ਕਹਾਣੀ ਨੂੰ ਇਕ ਫੈਂਟੇਸੀ ਟਚ ਵੀ ਦੇਵੇਗਾ, ਜਿਸ ਨਾਲ ਫਿਲਮ ਦਾ ਪੱਧਰ ਪਹਿਲਾਂ ਨਾਲੋਂ ਕਿਤੇ ਵੱਡਾ ਹੋ ਜਾਵੇਗਾ।
ਅਜੇ ਦੇਵਗਨ ਅਤੇ ਅਕਸ਼ੇ ਕੁਮਾਰ ਵਿਚਾਲੇ ਹੋਵੇਗੀ ਟੱਕਰ
ਇਸ ਫਿਲਮ ਰਾਹੀਂ ਅਜੇ ਦੇਵਗਨ ਅਤੇ ਅਕਸ਼ੇ ਕੁਮਾਰ ਦੀ ਜੋੜੀ ਲਗਭਗ 32 ਸਾਲ ਲੰਬੇ ਕਰੀਅਰ 'ਚ 6ਵੀਂ ਵਾਰ ਇਕੱਠੇ ਪਰਦੇ 'ਤੇ ਨਜ਼ਰ ਆਵੇਗੀ। ਹਾਲਾਂਕਿ ਪਹਿਲਾਂ ਇਹ ਜੋੜੀ ਕਈ ਫਿਲਮਾਂ 'ਚ ਇਕੱਠੇ ਕੰਮ ਕਰ ਚੁੱਕੀ ਹੈ, ਪਰ ਇਸ ਵਾਰ ਦੋਵੇਂ ਆਹਮੋ-ਸਾਹਮਣੇ ਹੋਣਗੇ। ਜਿੱਥੇ ਅਜੇ ਦੇਵਗਨ ਆਪਣੀ ਟੀਮ ਨਾਲ ਹਾਸੇ ਦਾ ਤੜਕਾ ਲਗਾਉਣਗੇ, ਉੱਥੇ ਅਕਸ਼ੇ ਦਾ ਵਿਲੇਨ ਅਵਤਾਰ ਕਹਾਣੀ 'ਚ ਨਵੇਂ ਰੰਗ ਭਰੇਗਾ।
ਪੁਰਾਣੀ ਸਟਾਰਕਾਸਟ ਦੀ ਹੋਵੇਗੀ ਵਾਪਸੀ
ਫਿਲਮ ਦੀ ਸਟਾਰਕਾਸਟ ਦੀ ਗੱਲ ਕਰੀਏ ਤਾਂ 'ਗੋਲਮਾਲ 5' 'ਚ ਪੁਰਾਣੀ ਟੀਮ ਦੀ ਵਾਪਸੀ ਲਗਭਗ ਤੈਅ ਹੈ। ਅਜੇ ਦੇਵਗਨ ਦੇ ਨਾਲ ਅਰਸ਼ਦ ਵਾਰਸੀ, ਤੁਸ਼ਾਰ ਕਪੂਰ, ਕੁਨਾਲ ਖੇਮੂ ਅਤੇ ਸ਼੍ਰੇਅਸ ਤਲਪੜੇ ਇਕ ਵਾਰ ਫਿਰ ਆਪਣੀ ਕਾਮਿਕ ਟਾਈਮਿੰਗ ਨਾਲ ਦਰਸ਼ਕਾਂ ਨੂੰ ਗੁਦਗੁਦਾਉਣਗੇ। ਇਸ ਤੋਂ ਇਲਾਵਾ ਜੌਨੀ ਲੀਵਰ, ਸੰਜੇ ਮਿਸ਼ਰਾ, ਮੁਕੇਸ਼ ਤਿਵਾਰੀ ਅਤੇ ਅਸ਼ਵਨੀ ਕਾਲਸੇਕਰ ਵਰਗੇ ਕਲਾਕਾਰ ਵੀ ਫਿਲਮ ਦਾ ਹਿੱਸਾ ਹੋਣਗੇ। ਸ਼ਰਮਨ ਜੋਸ਼ੀ ਦੀ ਵਾਪਸੀ ਬਾਰੇ ਵੀ ਚਰਚਾ ਹੈ, ਜਦਕਿ ਕਰੀਨਾ ਕਪੂਰ ਖਾਨ ਦੇ ਨਾਂ 'ਤੇ ਅਜੇ ਸਸਪੈਂਸ ਬਣਿਆ ਹੋਇਆ ਹੈ।
2027 'ਚ ਰਿਲੀਜ਼ ਹੋਵੇਗੀ ਫਿਲਮ
ਗੋਲਮਾਲ ਫ੍ਰੈਂਚਾਇਜ਼ੀ ਦੀ ਸ਼ੁਰੂਆਤ ਸਾਲ 2006 'ਚ ਹੋਈ ਸੀ ਅਤੇ ਇਹ ਆਪਣੇ 20 ਸਾਲ ਪੂਰੇ ਕਰਨ ਜਾ ਰਹੀ ਹੈ। ਫਿਲਮ ਦੀ ਸ਼ੂਟਿੰਗ ਫਰਵਰੀ ਦੇ ਅੰਤ ਤੱਕ ਮੁੰਬਈ ਦੀ ਫਿਲਮ ਸਿਟੀ 'ਚ ਸ਼ੁਰੂ ਹੋਣ ਦੀ ਉਮੀਦ ਹੈ ਅਤੇ ਇਸ ਨੂੰ 2027 ਦੀ ਸ਼ੁਰੂਆਤ ਵਿਚ ਸਿਨੇਮਾਘਰਾਂ 'ਚ ਰਿਲੀਜ਼ ਕਰਨ ਦੀ ਯੋਜਨਾ ਹੈ।
