25 ਸਾਲ ਪਹਿਲਾਂ ਇੰਡਸਟਰੀ ਤੋਂ ਅਚਾਨਕ ਗਾਇਬ ਹੋਈ ਅਦਾਕਾਰਾ, ਸਾਹਮਣੇ ਆ ਹੁਣ ਖੁਦ ਦੱਸਿਆ ਸੱਚ

ਮੁੰਬਈ- ਬਾਲੀਵੁੱਡ ਦੀ ਖ਼ੂਬਸੂਰਤ ਅਦਾਕਾਰਾ ਲੀਜ਼ਾ ਰੇਅ ਜਿਸ ਦੀ ਤਸਵੀਰ ਕਦੇ ਹਰ ਮੈਗਜ਼ੀਨ ਦੇ ਕਵਰ ਪੇਜ ਦੀ ਸ਼ਾਨ ਹੁੰਦੀ ਸੀ, ਨੇ ਅਚਾਨਕ ਫਿਲਮੀ ਦੁਨੀਆ ਤੋਂ ਦੂਰੀ ਕਿਉਂ ਬਣਾਈ? ਇਸ ਸਵਾਲ ਦਾ ਜਵਾਬ ਹੁਣ 25 ਸਾਲਾਂ ਬਾਅਦ ਖੁਦ ਅਦਾਕਾਰਾ ਨੇ ਸਾਂਝਾ ਕੀਤਾ ਹੈ। ਲੀਜ਼ਾ ਨੇ ਇੱਕ ਭਾਵੁਕ ਇੰਸਟਾਗ੍ਰਾਮ ਪੋਸਟ ਰਾਹੀਂ ਆਪਣੇ ਕਰੀਅਰ ਦੇ ਸਿਖਰ 'ਤੇ ਲਏ ਗਏ ਉਸ ਹੈਰਾਨੀਜਨਕ ਫੈਸਲੇ ਦੀ ਸੱਚਾਈ ਦੱਸੀ ਹੈ।
'ਸੁੰਦਰ ਮਾਡਲ' ਦੀ ਇਮੇਜ ਹੇਠ ਦਬ ਗਈ ਸੀ ਅਸਲੀਅਤ
ਲੀਜ਼ਾ ਰੇਅ ਨੇ ਖੁਲਾਸਾ ਕੀਤਾ ਕਿ ਸਾਲ 2001 ਵਿੱਚ ਜਦੋਂ ਉਹ ਆਪਣੇ ਕਰੀਅਰ ਦੇ ਸਭ ਤੋਂ ਉੱਚੇ ਮੁਕਾਮ 'ਤੇ ਸੀ, ਤਾਂ ਉਸ ਨੇ ਮਹਿਸੂਸ ਕੀਤਾ ਕਿ ਇੰਡਸਟਰੀ ਵਿੱਚ ਉਸ ਦੀ ਅਸਲੀ ਪਛਾਣ ਗੁਆਚ ਰਹੀ ਹੈ। ਉਸ ਨੇ ਲਿਖਿਆ, "ਮੈਨੂੰ ਸਿਰਫ਼ ਇੱਕ ਸੁੰਦਰ ਮਾਡਲ ਦੇ ਰੂਪ ਵਿੱਚ ਦੇਖਿਆ ਜਾ ਰਿਹਾ ਸੀ," ਜਿਸ ਕਾਰਨ ਉਸ ਦੀ ਅਸਲੀ ਆਵਾਜ਼ ਅਤੇ ਵਿਅਕਤੀਤਵ ਦਬ ਕੇ ਰਹਿ ਗਿਆ ਸੀ। ਕਈ ਫਿਲਮਾਂ ਦੇ ਆਫਰ ਹੋਣ ਦੇ ਬਾਵਜੂਦ ਉਸ ਨੇ ਪ੍ਰਸਿੱਧੀ ਦੀ ਬਜਾਏ ਖੁਦ ਨੂੰ ਜਾਣਨ ਅਤੇ ਸਮਝਣ ਲਈ ਸਮਾਂ ਦੇਣ ਦਾ ਫੈਸਲਾ ਕੀਤਾ।
ਲੰਡਨ ਵਿੱਚ ਸ਼ੇਕਸਪੀਅਰ ਅਤੇ ਯੋਗ ਦਾ ਲਿਆ ਸਹਾਰਾ
ਫਿਲਮੀ ਚਕਾਚੌਂਧ ਤੋਂ ਦੂਰ ਹੋ ਕੇ ਲੀਜ਼ਾ ਲੰਡਨ ਚਲੀ ਗਈ, ਜਿੱਥੇ ਉਸ ਨੇ ਕਾਲਜ ਵਿੱਚ ਸ਼ੇਕਸਪੀਅਰ ਅਤੇ ਕਵਿਤਾ ਦਾ ਅਧਿਐਨ ਕੀਤਾ। ਉਸ ਨੇ ਆਪਣਾ ਸਮਾਂ ਮਿਊਜ਼ੀਅਮਾਂ ਅਤੇ ਕਲਾ ਦੇ ਵਿਚਕਾਰ ਬਿਤਾਇਆ ਅਤੇ ਬੌਧ ਧਰਮ ਤੇ ਯੋਗ ਬਾਰੇ ਜਾਣਕਾਰੀ ਹਾਸਲ ਕੀਤੀ। ਲੀਜ਼ਾ ਅਨੁਸਾਰ ਉਹ ਆਪਣਾ ਜੀਵਨ ਲੋਕਾਂ ਦੀਆਂ ਨਜ਼ਰਾਂ ਵਿੱਚ ਰਹਿਣ ਦੀ ਬਜਾਏ ਆਤਮਿਕ ਸ਼ਾਂਤੀ ਅਤੇ ਸਿੱਖਣ 'ਤੇ ਆਧਾਰਿਤ ਬਣਾਉਣਾ ਚਾਹੁੰਦੀ ਸੀ।
ਪੈਸੇ ਲਈ ਨਹੀਂ, ਸਕੂਨ ਲਈ ਕੀਤੀਆਂ ਫਿਲਮਾਂ
ਇਸ ਆਤਮ-ਖੋਜ ਤੋਂ ਬਾਅਦ ਲੀਜ਼ਾ ਨੇ ਮੁੱਖ ਧਾਰਾ ਦੀਆਂ ਫਿਲਮਾਂ ਦੀ ਬਜਾਏ ਇੰਡੀਪੈਂਡੈਂਟ (ਆਜ਼ਾਦ) ਫਿਲਮਾਂ ਵੱਲ ਕਦਮ ਵਧਾਇਆ। ਉਸ ਨੇ ਦੱਸਿਆ ਕਿ ਉਸ ਦਾ ਮਕਸਦ ਸਿਰਫ਼ ਪੈਸਾ ਕਮਾਉਣਾ ਨਹੀਂ ਸੀ, ਸਗੋਂ ਉਹ ਅਜਿਹੇ ਕਿਰਦਾਰ ਨਿਭਾਉਣਾ ਚਾਹੁੰਦੀ ਸੀ ਜਿਸ ਨਾਲ ਉਹ ਆਪਣੇ ਵਿਅਕਤੀਤਵ ਨੂੰ ਹੋਰ ਡੂੰਘਾਈ ਨਾਲ ਸਮਝ ਸਕੇ। ਜ਼ਿਕਰਯੋਗ ਹੈ ਕਿ ਉਸ ਨੇ 'ਕਸੂਰ', 'ਬਾਲੀਵੁੱਡ/ਹੌਲੀਵੁੱਡ' ਅਤੇ ਆਸਕਰ ਨਾਮਜ਼ਦ ਫਿਲਮ 'ਵਾਟਰ' ਵਰਗੇ ਪ੍ਰੋਜੈਕਟਾਂ ਵਿੱਚ ਸ਼ਾਨਦਾਰ ਕੰਮ ਕੀਤਾ ਸੀ।
"ਸਮੇਂ ਨੇ ਮੈਨੂੰ ਮਿਟਾਇਆ ਨਹੀਂ, ਉਜਾਗਰ ਕੀਤਾ"
ਆਪਣੀਆਂ ਪੁਰਾਣੀਆਂ ਤਸਵੀਰਾਂ ਨੂੰ ਯਾਦ ਕਰਦਿਆਂ ਲੀਜ਼ਾ ਨੇ ਕਿਹਾ ਕਿ ਉਸ ਲਈ ਅਸਲੀ ਕੰਮ ਜੀਵਨ ਵਿੱਚ ਡੂੰਘਾਈ ਲਿਆਉਣਾ ਅਤੇ ਲੋਕਾਂ ਦੀਆਂ ਉਮੀਦਾਂ ਦਾ ਬੋਝ ਹਟਾਉਣਾ ਸੀ। ਉਸ ਨੇ ਅੰਤ ਵਿੱਚ ਲਿਖਿਆ ਕਿ ਇਹ ਸਫਰ ਉਸ ਲਈ ਆਪਣੇ ਆਪ ਨੂੰ ਸਮਝਣ ਅਤੇ ਅਪਣਾਉਣ ਦਾ ਇੱਕ ਵੱਡਾ ਅਨੁਭਵ ਸਾਬਤ ਹੋਇਆ ਹੈ।