ਮਹਾਦੇਵ ਐਪ ਮਾਮਲੇ 'ਚ ਜਲੰਧਰ ਦੇ ਬਿਲਡਰ ਦਾ ਨਾਂ ਸਾਹਮਣੇ ਆਉਣ ਮਗਰੋਂ ਲੁਧਿਆਣਾ ਤੱਕ ਮਚੀ ਹਲਚਲ

ਜਲੰਧਰ- ਦੇਸ਼ ਦੇ ਬਹੁਤ ਹੀ ਚਰਚਿਤ ਮਹਾਦੇਵ ਐਪ ਘਪਲੇ ਦੇ ਮਾਮਲੇ 'ਚ ਚੰਦਰ ਅਗਰਵਾਲ ਦਾ ਨਾਂ ਆਉਣ ਤੋਂ ਬਾਅਦ ਜਲੰਧਰ ਤੋਂ ਲੈ ਕੇ ਲੁਧਿਆਣਾ ਤੱਕ ਰੀਅਲ ਅਸਟੇਟ ਸੈਕਟਰ 'ਚ ਹਲਚਲ ਮਚ ਗਈ ਹੈ। ਇਸ ਮਾਮਲੇ 'ਚ ਮੈਚ ਫਿਕਸਿੰਗ, ਮਨੀ ਲਾਂਡਰਿੰਗ ਤੋਂ ਲੈ ਕੇ ਅੰਡਰਵਰਲਡ ਤੱਕ ਦੇ ਲਿੰਕ ਸਾਹਮਣੇ ਆ ਰਹੇ ਹਨ, ਜਿਸ 'ਚ ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ਵਲੋਂ 5 ਸੂਬਿਆਂ ਦੇ ਚੋਣ ਪ੍ਰਚਾਰ ਦੌਰਾਨ ਖੁਦ ਕਾਰਵਾਈ ਕਰਨ ਦੇ ਐਲਾਨ ਤੋਂ ਬਾਅਦ ਈਡੀ ਅਤੇ ਐੱਨ. ਏ. ਆਈ. ਵੱਲੋਂ ਜਾਂਚ ਸ਼ੁਰੂ ਕਰਨ ਦਾ ਨੋਟਿਸ ਲਿਆ ਗਿਆ ਹੈ। ਇਸ ਸਬੰਧੀ ਮੁੰਬਈ ਦੇ ਮਟੂਗਾ ਪੁਲਸ ਸਟੇਸ਼ਨ ਵੱਲੋਂ ਦਰਜ ਐੱਫ਼. ਆਈ. ਆਰ. ਵਿੱਚ ਜਲੰਧਰ ਦੇ ਚੰਦਰ ਅਗਰਵਾਲ ਦਾ ਨਾਮ ਵੀ ਸ਼ਾਮਲ ਹੈ। ਜਿਸ ਨੂੰ ਕਥਿਤ ਤੌਰ 'ਤੇ ਮੈਚ ਫਿਕਸਿੰਗ ਦਾ ਅੰਤਰਰਾਸ਼ਟਰੀ ਕਿੰਗ ਵੀ ਕਿਹਾ ਜਾਂਦਾ ਹੈ ਅਤੇ ਕੁਝ ਸਮਾਂ ਪਹਿਲਾਂ ਇਨਕਮ ਟੈਕਸ ਦੇ ਛਾਪਿਆਂ ਕਾਰਨ ਵਿਵਾਦਾਂ 'ਚ ਘਿਰ ਚੁੱਕਿਆ ਹੈ।

ਪ੍ਰਾਪਤ ਜਾਣਕਾਰੀ ਅਨੁਸਾਰ ਚੰਦਰ ਅਗਰਵਾਲ ਨੇ ਮੈਚ ਫਿਕਸਿੰਗ ਦੇ ਕਾਲੇ ਧਨ ਕਾਰਨ ਪਿਛਲੇ ਸਮੇਂ ਦੌਰਾਨ ਜਲੰਧਰ ਦੇ ਨਾਲ-ਨਾਲ ਲੁਧਿਆਣਾ ਦੇ ਰੀਅਲ ਅਸਟੇਟ ਸੈਕਟਰ ਵਿੱਚ ਵੀ ਵੱਡਾ ਨਿਵੇਸ਼ ਕੀਤਾ ਹੈ। ਜਿਸ ਵਿਚ ਲੁਧਿਆਣਾ ਦੇ ਸਾਊਥ ਸਿਟੀ ਸਿੱਧਵਾ ਕੈਨਾਲ, ਫਿਰੋਜ਼ਪੁਰ ਰੋਡ, ਲਾਡੋਵਾਲ ਬਾਈਪਾਸ 'ਤੇ ਕਰੀਬ 10 ਕਰੋੜ ਏਕੜ ਤੋਂ ਵੱਧ ਦੀ ਜ਼ਮੀਨ ਖ਼ਰੀਦੇ ਜਾਣ ਦੀ ਚਰਚਾ ਹੈ।

ਇਹ ਵੀ ਪੜ੍ਹੋ:  ਰੋਹਿਤ ਕਤਲ ਕੇਸ: ਕਾਤਲ ਤੇ CIA ਸਟਾਫ਼ ਆਹਮੋ-ਸਾਹਮਣੇ, ਦੋਵਾਂ ਵਿਚਾਲੇ ਚੱਲੀਆਂ ਗੋਲ਼ੀਆਂ

ਇਸੇ ਤਰ੍ਹਾਂ ਪੱਖੋਵਾਲ ਰੋਡ ’ਤੇ ਫਲੈਟ ਬਣਾਉਣ ਦੇ ਨਵੇਂ ਪ੍ਰਾਜੈਕਟ ਵਿੱਚ ਚੰਦਰ ਅਗਰਵਾਲ ਦੀ ਹਿੱਸੇਦਾਰੀ ਵੀ ਦੱਸੀ ਜਾਂਦੀ ਹੈ। ਇਹੀ ਕਾਰਨ ਹੈ ਕਿ ਕਈ ਸੌ ਕਰੋੜ ਰੁਪਏ ਦੇ ਭੁਗਤਾਨ ਅਤੇ ਰਜਿਸਟ੍ਰੇਸ਼ਨ ਤੋਂ ਬਾਅਦ ਸਾਈਟ 'ਤੇ ਉਸਾਰੀ ਦਾ ਕੰਮ ਵੀ ਪੂਰੀ ਰਫ਼ਤਾਰ ਨਾਲ ਚੱਲ ਰਿਹਾ ਹੈ ਪਰ ਕਰੀਬ 15 ਹਜ਼ਾਰ ਕਰੋੜ ਰੁਪਏ ਦੇ ਮਹਾਦੇਵ ਐਪ ਮਾਮਲੇ 'ਚ ਚੰਦਰ ਅਗਰਵਾਲ ਦਾ ਨਾਂ ਆਉਣ ਤੋਂ ਬਾਅਦ ਰੀਅਲ ਅਸਟੇਟ, ਮੈਚ ਫਿਕਸਿੰਗ ਦਾ ਕੰਮ ਕਰਨ ਵਾਲਿਆਂ ਤੋਂ ਇਲਾਵਾ ਜ਼ਮੀਨਾਂ ਵੇਚਣ ਵਾਲਿਆਂ ਵਿੱਚ ਵੀ ਬੇਚੈਨੀ ਪਾਈ ਜਾ ਰਹੀ ਹੈ। ਕਿਉਂਕਿ ਆਉਣ ਵਾਲੇ ਸਮੇਂ ਵਿੱਚ ਜਾਂਚ ਏਜੰਸੀਆਂ ਚੰਦਰ ਅਗਰਵਾਲ ਰਾਹੀਂ ਲੁਧਿਆਣਾ ਦੇ ਨਾਲ-ਨਾਲ ਜਲੰਧਰ ਵਿੱਚ ਜ਼ਮੀਨਾਂ ਜਾਂ ਪ੍ਰਾਜੈਕਟਾਂ ਵਿੱਚ ਕੀਤੇ ਨਿਵੇਸ਼ ਦੇ ਵੇਰਵਿਆਂ ਦੀ ਵੀ ਪੜਤਾਲ ਕਰ ਸਕਦੀਆਂ ਹਨ। ਇਸ 'ਚ ਵੇਖਿਆ ਜਾਵੇਗਾ ਕਿ ਰੀਅਲ ਅਸਟੇਟ 'ਚ ਵੱਡੇ ਪੱਧਰ 'ਤੇ ਨਿਵੇਸ਼ ਕੀਤਾ ਗਿਆ ਪੈਸਾ ਕਿਸ ਦਾ ਹੈ ਅਤੇ ਕਿਸ ਕੋਲ ਗਿਆ ਹੈ। ਇਸ ਦੇ ਮੱਦੇਨਜ਼ਰ ਪਿਛਲੇ ਦੋ ਦਿਨਾਂ ਤੋਂ ਲੁਧਿਆਣਾ ਵਿੱਚ ਰੀਅਲ ਅਸਟੇਟ ਅਤੇ ਮੈਚ ਫਿਕਸਿੰਗ ਨਾਲ ਜੁੜੇ ਲੋਕਾਂ ਦੇ ਨਾਲ-ਨਾਲ ਵੱਡੇ ਕਾਰੋਬਾਰੀ ਚੰਦਰ ਅਗਰਵਾਲ ਦੇ ਮਾਮਲੇ ਨੂੰ ਲੈ ਕੇ ਇਕ ਦੂਜੇ ਤੋਂ ਫੀਡਬੈਕ ਲੈ ਰਹੇ ਹਨ।

ਇਹ ਵੀ ਪੜ੍ਹੋ:  ਜਲੰਧਰ ਵਿਖੇ ਰਵੀ ਜਿਊਲਰਜ਼ 'ਚ ਹੋਈ ਲੁੱਟ ਦੇ ਮਾਮਲੇ 'ਚ ਨਵਾਂ ਮੋੜ, ਮਾਲਕ ਹੀ ਨਿਕਲਿਆ ਝੂਠੀ ਕਹਾਣੀ ਦਾ ਰਚੇਤਾ

ਨਗਰ ਨਿਗਮ ਨੇ ਰੋਕਿਆ ਸਿੰਜਾਈ ਵਿਭਾਗ ਦੀ ਜ਼ਮੀਨ ਕਵਰ ਕਰਕੇ ਨਕਸ਼ੇ ਦੇ ਉਲਟ ਬਣਾਇਆ ਜਾ ਰਿਹਾ ਕੰਪਲੈਕਸ
ਮਹਾਦੇਵ ਐਪ ਮਾਮਲੇ 'ਚ ਮੁੱਖ ਜਾਂਚ ਏਜੰਸੀਆਂ ਦੀ ਰਿਪੋਰਟ 'ਚ ਚੰਦਰ ਅਗਰਵਾਲ ਦਾ ਨਾਂ ਆਉਣ ਤੋਂ ਬਾਅਦ ਜਲੰਧਰ ਅਤੇ ਲੁਧਿਆਣਾ ਦੀ ਰੀਅਲ ਅਸਟੇਟ ਅਤੇ ਮੈਚ ਫਿਕਸਿੰਗ ਨਾਲ ਜੁੜੇ ਲੋਕਾਂ ਤੋਂ ਇਲਾਵਾ ਨਗਰ ਨਿਗਮ ਵੀ ਹਰਕਤ 'ਚ ਆ ਗਿਆ ਹੈ। ਪ੍ਰਾਪਤ ਜਾਣਕਾਰੀ ਅਨੁਸਾਰ ਨਗਰ ਨਿਗਮ ਨੇ ਸਾਊਥ ਸਿਟੀ ਕੈਨਾਲ ਖੇਤਰ ਵਿੱਚ ਪੁਸ਼ਪ ਵਿਹਾਰ ਸੂਏ ਦੇ ਕੰਢੇ ’ਤੇ ਬਣ ਰਹੇ ਕੰਪਲੈਕਸ ਦੀ ਉਸਾਰੀ ’ਤੇ ਰੋਕ ਲਾ ਦਿੱਤੀ ਹੈ। ਚੰਦਰ ਅਗਰਵਾਲ ਦਾ ਵੀ ਇਸ ਕੰਪਲੈਕਸ ਵਿੱਚ ਨਿਵੇਸ਼ ਦੱਸਿਆ ਜਾਂਦਾ ਹੈ ਜਦਕਿ ਇਸ ਕੰਪਲੈਕਸ ਵਿੱਚ ਸਿੰਚਾਈ ਵਿਭਾਗ ਦੀ ਜ਼ਮੀਨ ਦਾ ਕੁਝ ਹਿੱਸਾ ਢੱਕਣ ਸਬੰਧੀ ਸ਼ਿਕਾਇਤ ਨਗਰ ਨਿਗਮ ਕੋਲ ਪੁੱਜੀ ਹੈ। ਇਸ ਤੋਂ ਇਲਾਵਾ ਐਸਸੀਓ ਦਾ ਨਕਸ਼ਾ ਪਾਸ ਕਰਵਾਉਣ ਦੀ ਆੜ ਵਿੱਚ ਨਿਯਮਾਂ ਦੀ ਉਲੰਘਣਾ ਕਰਕੇ ਕੰਪਲੈਕਸ ਬਣਾਇਆ ਜਾ ਰਿਹਾ ਹੈ। ਜਿਸ ਕਾਰਨ ਦੂਜੀ ਸ਼ਾਖਾ ਤੋਂ ਬਿਲਡਿੰਗ ਬ੍ਰਾਂਚ ਦਾ ਚਾਰਜ ਲੈਣ ਵਾਲੇ ਅਧਿਕਾਰੀ ਨੂੰ ਲੱਖਾਂ ਰੁਪਏ ਲੈਣ ਦੇ ਬਦਲੇ ਬਿਲਡਿੰਗ ਬਣਾਉਣ ਦੀ ਮਨਜ਼ੂਰੀ ਦੇ ਦਿੱਤੀ ਗਈ ਸੀ ਪਰ ਹੁਣ ਚੰਦਰ ਅਗਰਵਾਲ ਦਾ ਨਾਂ ਇਸ ਬਿਲਡਿੰਗ ਨਾਲ ਜੁੜ ਗਿਆ ਹੈ ਜਿਸ ਤੋਂ ਬਾਅਦ ਈਡੀ ਅਤੇ ਐੱਨ. ਆਈ. ਏ. ਵੱਲੋਂ ਜਾਂਚ ਸ਼ੁਰੂ ਕਰ ਦਿੱਤੀ ਗਈ ਹੈ। ਨਗਰ ਨਿਗਮ ਦੇ ਅਧਿਕਾਰੀਆਂ ਨੇ ਪੈਰ ਪਿੱਛੇ ਕਰ ਲਏ ਹਨ ਅਤੇ ਜਗ੍ਹਾ ਦਾ ਕੰਮ ਰੋਕ ਦਿੱਤਾ ਹੈ।
ਇਹ ਵੀ ਪੜ੍ਹੋ: ਪੰਜਾਬ ਹੋ ਰਿਹੈ ਖ਼ਾਲੀ, ਅਨੇਕਾਂ ਘਰਾਂ ਤੇ ਕੋਠੀਆਂ ਨੂੰ ਲੱਗ ਰਹੇ ਹਨ 'ਜਿੰਦਰੇ', ਹੈਰਾਨ ਕਰਨ ਵਾਲੀ ਹੈ ਰਿਪੋਰਟ

ਜਗਬਾਣੀ ਈ-ਪੇਪਰ ਨੂੰ ਪੜ੍ਹਨ ਅਤੇ ਐਪ ਨੂੰ ਡਾਊਨਲੋਡ ਕਰਨ ਲਈ ਇੱਥੇ ਕਲਿੱਕ ਕਰੋ 

For Android:- 

 https://play.google.com/store/apps/details?id=com.jagbani&hl=en&pli=1

For IOS:-  

https://apps.apple.com/in/app/id538323711