ਜਲੰਧਰ ਵਾਸੀ ਸਾਵਧਾਨ: ਸ਼ਹਿਰ ''ਚ ਐਕਟਿਵ ਹੋਇਆ ਪ੍ਰੋਫੈਸ਼ਨਲ ਕਾਰ ਚੋਰ ਗਿਰੋਹ, ਕਰ ਰਿਹੈ ਵੱਡੀਆਂ ਵਾਰਦਾਤਾਂ

ਜਲੰਧਰ (ਜ.ਬ.)– ਸ਼ਹਿਰ ਵਿਚ ਫਿਰ ਤੋਂ ਪ੍ਰੋਫੈਸ਼ਨਲ ਚੋਰ ਗਿਰੋਹ ਐਕਟਿਵ ਹੋ ਚੁੱਕਾ ਹੈ। ਕਈ ਥਾਵਾਂ ’ਤੇ ਵਾਰਦਾਤਾਂ ਨੂੰ ਅੰਜਾਮ ਦੇ ਚੁੱਕੇ ਇਸ ਗਿਰੋਹ ਦੇ ਮੈਂਬਰਾਂ ਨੇ ਕਾਲੀਆ ਕਾਲੋਨੀ ਵਿਚ 2 ਹਾਂਡਾ ਸਿਟੀ ਕਾਰਾਂ ਦਾ ਇਕ ਮਿੰਟ ਵਿਚ ਲਾਕ ਖੋਲ੍ਹਿਆ ਅਤੇ ਸਟਾਰਟ ਕਰਕੇ ਲੈ ਗਏ। ਇਹ ਚੋਰ ਆਲਟੋ ਆਈ-10 ਕਾਰ ਵਿਚ ਸਵਾਰ ਹੋ ਕੇ ਆਏ ਸਨ, ਜਿਨ੍ਹਾਂ ਦੀ ਗਿਣਤੀ 4 ਦੱਸੀ ਜਾ ਰਹੀ ਹੈ। ਕਾਰ ਦਾ ਲਾਕ ਖੋਲ੍ਹਣ ਵਾਲੇ ਚੋਰ ਨੇ ਪਰਨੇ ਨਾਲ ਆਪਣਾ ਸਿਰ ਅਤੇ ਮੂੰਹ ਢਕਿਆ ਹੋਇਆ ਸੀ। ਜ਼ਿਆਦਾਤਰ ਅਜਿਹੇ ਪਰਨੇ ਹਰਿਆਣਾ ਦੇ ਲੋਕ ਹੀ ਵਰਤੋਂ ਕਰਦੇ ਹਨ ਪਰ ਹੁਣ ਪੰਜਾਬ ਦੇ ਲੋਕ ਵੀ ਇਸ ਨੂੰ ਵਰਤਣ ਲੱਗੇ ਹਨ।

ਜਾਣਕਾਰੀ ਦਿੰਦੇ ਤ੍ਰੇਹਣ ਕਾਰ ਬਾਜ਼ਾਰ ਦੇ ਮਾਲਕ ਚੇਤਨ ਤ੍ਰੇਹਣ ਵਾਸੀ ਕਾਲੀਆ ਕਾਲੋਨੀ ਨੇ ਦੱਸਿਆ ਕਿ ਬੁੱਧਵਾਰ ਸਵੇਰੇ ਉਹ ਜਦੋਂ ਬਾਹਰ ਆਏ ਤਾਂ ਵੇਖਿਆ ਕਿ ਉਨ੍ਹਾਂ ਦੀ ਹਾਂਡਾ ਸਿਟੀ ਕਾਰ ਗਾਇਬ ਸੀ। ਉਨ੍ਹਾਂ ਨੇ ਜਦੋਂ ਘਰ ਦੇ ਬਾਹਰ ਲੱਗੇ ਸੀ. ਸੀ. ਟੀ. ਵੀ. ਕੈਮਰੇ ਚੈੱਕ ਕੀਤੇ ਤਾਂ ਵੇਖਿਆ ਕਿ ਉਨ੍ਹਾਂ ਦੇ ਘਰ ਦੇ ਬਾਹਰ ਸਫੈਦ ਰੰਗ ਦੀ ਆਲਟੋ ਆਈ-10 ਕਾਰ ਆ ਕੇ ਰੁਕੀ, ਜਿਸ ਦੀਆਂ ਲਾਈਟਾਂ ਬੰਦ ਸਨ। ਕਾਰ ਦੀ ਪਿੱਛੇ ਵਾਲੀ ਸੀਟ ਤੋਂ ਇਕ ਨੌਜਵਾਨ ਉਤਰਿਆ ਅਤੇ ਸਿਰਫ 30 ਸੈਕਿੰਡਾਂ ਵਿਚ ਉਨ੍ਹਾਂ ਦੀ ਗੱਡੀ ਦਾ ਲਾਕ ਖੋਲ੍ਹ ਕੇ ਸਟਾਰਟ ਕਰਕੇ ਫ਼ਰਾਰ ਹੋ ਗਿਆ।

ਇਹ ਵੀ ਪੜ੍ਹੋ- ਖੰਨਾ 'ਚ ਪ੍ਰੇਮੀ ਨੇ ਡਾਂਸਰ ਪ੍ਰੇਮਿਕਾ ਦੇ ਘਰ ਕੀਤੀ ਖ਼ੁਦਕੁਸ਼ੀ, ਫਿਰ ਪ੍ਰੇਮਿਕਾ ਨੇ ਕੀਤਾ ਲੂ ਕੰਡੇ ਕਰ ਦੇਣ ਵਾਲਾ ਕਾਰਾ

ਇਸੇ ਦੌਰਾਨ ਪਤਾ ਲੱਗਾ ਕਿ ਉਨ੍ਹਾਂ ਦੇ ਘਰ ਦੇ ਸਾਹਮਣੇ ਰਹਿੰਦੇ ਪਰਿਵਾਰ ਦੀ ਵੀ ਹਾਂਡਾ ਸਿਟੀ ਕਾਰ ਚੋਰੀ ਹੋ ਗਈ ਹੈ। ਉਹ ਕਾਰ ਵੀ ਉਕਤ ਚੋਰਾਂ ਨੇ ਚੋਰੀ ਕੀਤੀ ਅਤੇ ਉਸ ਕਾਰ ਨੂੰ ਚੋਰੀ ਕਰਦੇ ਹੋਏ ਵੀ ਉਹ ਸੀ. ਸੀ. ਟੀ. ਵੀ. ਕੈਮਰੇ ਵਿਚ ਕੈਦ ਹੋ ਗਏ। ਚੇਤਨ ਨੇ ਦੱਸਿਆ ਕਿ 10 ਦਿਨ ਪਹਿਲਾਂ ਵੀ ਉਕਤ ਚੋਰ ਉਨ੍ਹਾਂ ਦੀ ਥਾਰ ਗੱਡੀ ਚੋਰੀ ਕਰਨ ਆਏ ਸਨ। ਉਨ੍ਹਾਂ ਨੇ ਥਾਰ ਦਾ ਲਾਕ ਤਾਂ ਖੋਲ੍ਹ ਲਿਆ ਪਰ ਉਸ ਨੂੰ ਸਟਾਰਟ ਨਹੀਂ ਕਰ ਸਕੇ ਅਤੇ ਉਸੇ ਤਰ੍ਹਾਂ ਹੀ ਗੱਡੀ ਨੂੰ ਖੁੱਲ੍ਹਾ ਛੱਡ ਕੇ ਚਲੇ ਗਏ ਸਨ। ਥਾਣਾ ਨੰਬਰ 1 ਵਿਚ ਦੋਵਾਂ ਗੱਡੀਆਂ ਦੇ ਮਾਲਕਾਂ ਨੇ ਸ਼ਿਕਾਇਤ ਦਰਜ ਕਰਵਾਈ ਹੈ। ਪੁਲਸ ਨੇ ਸੀ. ਸੀ. ਟੀ. ਵੀ. ਕੈਮਰਿਆਂ ਦੀ ਫੁਟੇਜ ਕਬਜ਼ੇ ਵਿਚ ਲੈ ਕੇ ਜਾਂਚ ਸ਼ੁਰੂ ਕਰ ਦਿੱਤੀ ਹੈ।

ਇਹ ਵੀ ਪੜ੍ਹੋ- ਗੁਰਦੁਆਰਾ ਸਾਹਿਬ ਤੋਂ ਮੱਥਾ ਟੇਕ ਕੇ ਪਰਤ ਰਹੇ ਭੈਣ-ਭਰਾ ਨਾਲ ਵਾਪਰੀ ਅਣਹੋਣੀ, ਭਰਾ ਨੇ ਤੜਫ਼-ਤੜਫ਼ ਤੋੜਿਆ ਦਮ

ਨੋਟ- ਇਸ ਖ਼ਬਰ ਸਬੰਧੀ ਆਪਣੇ ਵਿਚਾਰ ਕੁਮੈਂਟ ਬਾਕਸ 'ਚ ਸਾਂਝੇ ਕਰੋ।

ਪੰਜਾਬ ਅਤੇ ਦੇਸ਼ ਦੁਨੀਆਂ ਦੀਆਂ ਖ਼ਬਰਾਂ ਟੈਲੀਗ੍ਰਾਮ ’ਤੇ ਵੀ ਪੜ੍ਹਨ ਲਈ ਇਸ ਲਿੰਕ ’ਤੇ ਕਲਿੱਕ ਕਰੋ https://t.me/onlinejagbani