ਕਿੰਗਸ ਇਲੇਵਨ ਦੀ ਪ੍ਰਿਟੀ ਜ਼ਿੰਟਾ ਬਣੀ ''ਕੋਵਿਡ ਟੈਸਟ ਕੁਈਨ'', ਦੱਸਿਆ ਕੀ ਹੈ ''ਬਾਇਓ ਬੱਬਲ ਆਈ. ਪੀ. ਐੱਲ''
10/21/2020 10:41:08 AM
ਮੁੰਬਈ (ਬਿਊਰੋ) - ਆਈ. ਪੀ. ਐੱਲ. ਦਾ 13ਵਾਂ ਸੀਜ਼ਨ ਦੁਬਈ 'ਚ ਚੱਲ ਰਿਹਾ ਹੈ। ਜਿਥੇ ਕਿੰਗਸ ਇਲੇਵਨ ਪੰਜਾਬ ਦੀ ਓਨਰ ਤੇ ਅਦਾਕਾਰਾ ਪ੍ਰਿਟੀ ਜ਼ਿੰਟਾ ਵੀ ਟੀਮ ਨਾਲ ਮੌਜੂਦ ਹਨ। ਪ੍ਰਿਟੀ ਨੇ ਇਕ ਵੀਡੀਓ ਸਾਂਝੀ ਕੀਤੀ ਹੈ, ਜਿਸ 'ਚ ਉਨ੍ਹਾਂ ਨੇ ਖ਼ੁਦ ਨੂੰ ਕੋਵਿਡ ਟੈਸਟ ਕੁਈਨ ਦੱਸਿਆ ਹੈ। ਅਜਿਹਾ ਇਸ ਲਈ ਕਿਉਂਕਿ ਉਹ ਦੁਬਈ ਪਹੁੰਚਣ ਦੇ ਪਹਿਲਾਂ ਤੋਂ ਲੈ ਕੇ 20 ਅਕਤੂਬਰ ਤੱਕ 20 ਵਾਰ ਕੋਰੋਨਾ ਟੈਸਟ ਕਰਵਾ ਚੁੱਕੀ ਹੈ। ਇਹ ਗਨੀਮਤ ਰਹੀ ਹੈ ਕਿ ਹਰ ਵਾਰ ਰਿਜੈਲਟ ਨੇਗੈਟਿਵ ਹੀ ਆਇਆ।
ਦੱਸਿਆ ਕੀ ਹੈ ਬਾਇਓ ਬੱਬਲ ਆਈ. ਪੀ. ਐੱਲ.
ਪ੍ਰਿਟੀ ਜ਼ਿੰਟਾ 15 ਸਤੰਬਰ ਤੋਂ ਯੂ. ਏ. ਈ. 'ਚ ਹੈ। ਪ੍ਰਿਟੀ ਨੇ ਇਸ ਵੀਡੀਓ ਨਾਲ ਲਿਖਿਆ ਹੈ, 'ਹਰ ਕੋਈ ਮੈਨੂੰ ਪੁੱਛਦਾ ਹੈ ਕਿ ਆਈ. ਪੀ. ਐੱਲ. ਬਾਇਓ ਬੱਬਲ 'ਚ ਹੋਣ ਵਾਲੇ ਦਾ ਕੀ ਮਤਲਬ ਹੈ। ਤਾਂ ਮੈ ਦੱਸਣਾ ਚਾਹੁੰਦੀ ਹਾਂ ਕਿ ਇਹ 6 ਦਿਨ ਦੇ ਇਕਾਂਤਵਾਸ ਤੋਂ ਸ਼ੁਰੂ ਹੁੰਦਾ ਹੈ। ਹਰ 4 ਦਿਨ 'ਚ ਕੋਵਿਡ ਟੈਸਟ ਹੁੰਦਾ ਹੈ। ਕੋਈ ਬਾਹਰ ਨਹੀਂ ਜਾਂਦਾ, ਤੁਹਾਡਾ ਰੂਮ, ਗੱਡੀ, ਰੈਸਟੋਰੈਂਟ, ਜਿਮ ਤੇ ਸਟੇਡੀਅਮ ਬਸ। ਡਰਾਈਵਰ, ਕੁੱਕ ਵੀ ਬਾਇਓ ਬੱਬਲ 'ਚ ਹਨ। ਬਾਹਰ ਦਾ ਖਾਣਾ, ਲੋਕਾਂ ਨੂੰ ਮਿਲਣਾ ਬੰਦ ਹੈ। ਮੇਰੇ ਵਰਗੇ ਲੋਕਾਂ ਲਈ ਔਖਾ ਹੈ ਪਰ ਮੈਂ ਸਾਰੇ ਵਾਰੀਅਰਸ ਦਾ ਧੰਨਵਾਦ ਕਰਾਂਗੀ, ਜਿਨ੍ਹਾਂ ਕਾਰਨ ਮਹਾਮਾਰੀ 'ਚ ਆਈ. ਪੀ. ਐੱਲ. ਹੋ ਰਿਹਾ ਹੈ।
ਅੰਪਾਅਰਿੰਗ 'ਤੇ ਭੜਕ ਗਈ ਸੀ ਪ੍ਰਿਟੀ ਜ਼ਿੰਟਾ
ਬੱਬਲੀ ਗਰਲ ਦੇ ਨਾਂ ਨਾਲ ਮਸ਼ਹੂਰ ਪ੍ਰਿਟੀ ਜ਼ਿੰਟਾ ਨੂੰ ਇਸੇ ਸੀਜ਼ਨ ਦੌਰਾਨ ਸੋਸ਼ਲ ਮੀਡੀਆ 'ਤੇ ਆਪਣਾ ਗੁੱਸਾ ਕੱਢਦੇ ਵੀ ਦੇਖਿਆ ਗਿਆ ਸੀ। ਜਦੋਂ ਉਨ੍ਹਾਂ ਨੇ ਦਿੱਲੀ ਨਾਲ ਹੋਏ ਮੈਚ 'ਚ ਅੰਪਾਅਰਿੰਗ 'ਤੇ ਟਵੀਟ ਕੀਤਾ ਸੀ। 21 ਸਤੰਬਰ ਨੂੰ ਕੀਤੇ ਗਏ ਇਸ ਟਵੀਟ ਦੌਰਾਨ ਪ੍ਰਿਟੀ 5 ਵਾਰ ਕੋਵਿਡ ਟੈਸਟ ਕਰਵਾ ਚੁੱਕੀ ਸੀ। ਇਹ ਗੱਲ ਲਿਖਦੇ ਹੋਏ ਉਹ ਬੋਲੀ ਕਿ ਇਕ ਸ਼ਾਰਟ ਰਨ ਨੇ ਮੈਨੂੰ ਕੋਵਿਡ ਟੈਸਟ ਤੋਂ ਕਿਤੇਂ ਜ਼ਿਆਦਾ ਤਕਲੀਫ਼ ਦਿੱਤੀ।