ਦੇਸ਼ ਚ ਬਣੇ ਵਾਹਨਾਂ ਦੀ ਵਿਦੇਸ਼ਾਂ 'ਚ ਮੰਗ , ਇਹਨਾਂ ਕੰਪਨੀਆਂ ਨੇ ਸਭ ਤੋਂ ਵੱਧ ਵਾਹਨ ਕੀਤੇ ਨਿਰਯਾਤ

ਨਵੀਂ ਦਿੱਲੀ - ਭਾਰਤ ਤੋਂ ਵਾਹਨਾਂ ਦੀ ਬਰਾਮਦ ਨੂੰ ਲੈ ਕੇ ਵੱਡੀ ਪ੍ਰਾਪਤੀ ਸਾਹਮਣੇ ਆਈ ਹੈ। ਇਸ ਵਿੱਤੀ ਸਾਲ ਦੀ ਪਹਿਲੀ ਛਿਮਾਹੀ ਭਾਰਤੀ ਆਟੋਮੋਬਾਈਲ ਸੈਕਟਰ ਲਈ ਬੇਹੱਦ ਸਫਲ ਸਾਬਤ ਹੋਈ ਹੈ। ਘਰੇਲੂ ਬਾਜ਼ਾਰ 'ਚ ਸ਼ਾਨਦਾਰ ਪ੍ਰਦਰਸ਼ਨ ਦੇ ਨਾਲ-ਨਾਲ ਵਾਹਨ ਨਿਰਮਾਤਾਵਾਂ ਨੇ ਨਿਰਯਾਤ ਬਾਜ਼ਾਰ 'ਚ ਵੀ ਮਹੱਤਵਪੂਰਨ ਤਰੱਕੀ ਕੀਤੀ ਹੈ, ਜਿਸ ਨੇ ਸਾਲ-ਦਰ-ਸਾਲ ਦੇ ਆਧਾਰ 'ਤੇ 14 ਫੀਸਦੀ ਦਾ ਵਾਧਾ ਦਰਜ ਕੀਤਾ ਹੈ। ਖਾਸ ਕਰਕੇ ਯਾਤਰੀ ਵਾਹਨਾਂ ਅਤੇ ਦੋਪਹੀਆ ਵਾਹਨਾਂ ਦੀ ਸ਼ਿਪਮੈਂਟ ਵਿੱਚ ਵਾਧਾ ਹੋਇਆ ਹੈ।

ਸੋਸਾਇਟੀ ਆਫ ਇੰਡੀਅਨ ਆਟੋਮੋਬਾਈਲ ਮੈਨੂਫੈਕਚਰਰਜ਼ (ਸਿਆਮ) ਦੇ ਅੰਕੜਿਆਂ ਮੁਤਾਬਕ ਅਪ੍ਰੈਲ-ਸਤੰਬਰ ਦੀ ਮਿਆਦ 'ਚ ਕੁੱਲ ਨਿਰਯਾਤ 25,28,248 ਇਕਾਈ ਰਿਹਾ, ਜੋ ਇਕ ਸਾਲ ਪਹਿਲਾਂ ਦੀ ਮਿਆਦ 'ਚ 22,11,457 ਇਕਾਈਆਂ ਦੇ ਮੁਕਾਬਲੇ 14 ਫੀਸਦੀ ਜ਼ਿਆਦਾ ਹੈ। ਸਿਆਮ ਦੇ ਪ੍ਰਧਾਨ ਸ਼ੈਲੇਸ਼ ਚੰਦਰਾ ਨੇ ਕਿਹਾ, "ਲਾਤੀਨੀ ਅਮਰੀਕਾ ਅਤੇ ਅਫਰੀਕਾ ਵਰਗੇ ਪ੍ਰਮੁੱਖ ਬਾਜ਼ਾਰ, ਜੋ ਕਿ ਵੱਖ-ਵੱਖ ਕਾਰਨਾਂ ਕਰਕੇ ਸੁਸਤ ਹੋ ਗਏ ਸਨ, ਨੇ ਫਿਰ ਤੋਂ ਗਤੀ ਫੜੀ ਹੈ, ਜਿਸ ਕਾਰਨ ਭਾਰਤ ਤੋਂ ਬਰਾਮਦ ਤੇਜ਼ੀ ਨਾਲ ਵਧੀ ਹੈ।"

ਸ਼ੈਲੇਸ਼ ਚੰਦਰਾ ਨੇ ਕਿਹਾ, ''ਲਾਤੀਨੀ ਅਮਰੀਕਾ ਅਤੇ ਅਫਰੀਕਾ ਵਰਗੇ ਬਾਜ਼ਾਰ ਪਿਛਲੇ ਕੁਝ ਸਾਲਾਂ 'ਚ ਕਈ ਵੱਖ-ਵੱਖ ਕਾਰਨਾਂ ਕਰਕੇ ਮੰਦੀ 'ਚ ਸਨ ਪਰ ਹੁਣ ਉਹ ਤੇਜ਼ੀ ਨਾਲ ਉਭਰ ਰਹੇ ਹਨ। ਜੇਕਰ ਅਸੀਂ ਪਿਛਲੇ ਸਾਲਾਂ ਦੇ ਅੰਕੜਿਆਂ 'ਤੇ ਨਜ਼ਰ ਮਾਰੀਏ ਤਾਂ ਮੁਦਰਾ ਸੰਕਟ ਕਾਰਨ ਵਿੱਤੀ ਵਿੱਤੀ ਸਾਲ 24 ਵਿਚ ਆਟੋਮੋਬਾਈਲ ਨਿਰਯਾਤ ਵਿਚ 5.5 ਫ਼ੀਸਦੀ ਦੀ ਗਿਰਾਵਟ ਦੇਖੀ ਗਈ ਸੀ। ਪਿਛਲੇ ਵਿੱਤੀ ਸਾਲ ਵਿਚ ਕੁੱਲ ਨਿਰਯਾਤ45,00,492 ਯੂਨਿਟ ਸੀ, ਜਦੋਂਕਿ ਵਿੱਤੀ ਸਾਲ 23 ਵਿੱਚ ਇਹ 47,61,299 ਯੂਨਿਟਾ ਸੀ। ਮੌਜੂਦਾ ਵਿੱਤੀ ਸਾਲ ਦੀ ਪਹਿਲੀ ਛਿਮਾਹੀ ਵਿਚ ਯਾਤਰੀ ਕਾਰਾਂ ਦੀ ਸ਼ਿਪਮੈਂਟ ਸਾਲ ਦਰ ਸਾਲ 12 ਪ੍ਰਤੀਸ਼ਤ ਵਧ ਕੇ 3,76,679 ਯੂਨਿਟ ਹੋ ਗਈ ਹੈ।

ਮਾਰੂਤੀ ਸੁਜ਼ੂਕੀ 

ਦੇਸ਼ ਦੀ ਸਭ ਤੋਂ ਵੱਡੀ ਕਾਰ ਨਿਰਮਾਤਾ ਕੰਪਨੀ ਮਾਰੂਤੀ ਸੁਜ਼ੂਕੀ ਨੇ ਸਭ ਤੋਂ ਵੱਧ ਯਾਤਰੀ ਕਾਰਾਂ ਦਾ ਨਿਰਯਾਤ ਕੀਤਾ ਹੈ। ਇਸ ਮਿਆਦ ਦੇ ਦੌਰਾਨ, ਕੰਪਨੀ 1,47,063 ਵਾਹਨਾਂ ਦੀ ਖੇਪ ਦੇ ਨਾਲ ਚੋਟੀ 'ਤੇ ਬਣੀ ਹੋਈ ਹੈ, ਜੋ ਪਿਛਲੇ ਸਾਲ ਦੀ ਇਸੇ ਮਿਆਦ ਵਿੱਚ 1,31,546 ਯੂਨਿਟਾਂ ਦੇ ਨਿਰਯਾਤ ਦੇ ਮੁਕਾਬਲੇ 12 ਪ੍ਰਤੀਸ਼ਤ ਵੱਧ ਹੈ। ਹਾਲ ਹੀ ਵਿੱਚ, ਮਾਰੂਤੀ ਸੁਜ਼ੂਕੀ ਨੇ ਆਪਣੀ ਪ੍ਰਸਿੱਧ ਕੰਪੈਕਟ SUV ਮਾਰੂਤੀ ਫ੍ਰਾਂਕਸ ਦੀ ਪਹਿਲੀ ਖੇਪ ਆਪਣੀ ਮੂਲ ਕੰਪਨੀ ਸੁਜ਼ੂਕੀ ਦੇ ਹੋਮ ਗਰਾਊਂਡ ਯਾਨੀ ਜਾਪਾਨ ਨੂੰ ਭੇਜੀ ਹੈ।

ਦੂਜੇ ਪਾਸੇ ਹੁੰਡਈ ਮੋਟਰ ਇੰਡੀਆ ਨੇ 84,900 ਕਾਰਾਂ ਦਾ ਨਿਰਯਾਤ ਕੀਤਾ, ਜੋ ਪਿਛਲੇ ਵਿੱਤੀ ਸਾਲ ਦੇ ਅਪ੍ਰੈਲ-ਸਤੰਬਰ ਦੀ ਮਿਆਦ 'ਚ 86,105 ਕਾਰਾਂ ਦੇ ਨਿਰਯਾਤ ਦੇ ਮੁਕਾਬਲੇ ਲਗਭਗ 1 ਫੀਸਦੀ ਘੱਟ ਹੈ।

ਦੋਪਹੀਆ ਵਾਹਨਾਂ ਨੇ ਫੜੀ ਰਫ਼ਤਾਰ 

ਦੋਪਹੀਆ ਵਾਹਨਾਂ ਦੇ ਨਿਰਯਾਤ ਦੀ ਗੱਲ ਕਰੀਏ ਤਾਂ ਇਸ ਵਿੱਤੀ ਸਾਲ ਦੇ ਅਪ੍ਰੈਲ-ਸਤੰਬਰ ਦੀ ਮਿਆਦ 'ਚ ਦੋਪਹੀਆ ਵਾਹਨਾਂ ਦਾ ਨਿਰਯਾਤ 16 ਫੀਸਦੀ ਵਧ ਕੇ 19,59,145 ਯੂਨਿਟ ਹੋ ਗਿਆ ਹੈ, ਜਦੋਂ ਕਿ ਪਿਛਲੇ ਸਾਲ ਇਸੇ ਮਿਆਦ 'ਚ 16,85,907 ਇਕਾਈਆਂ ਦਾ ਨਿਰਯਾਤ ਕੀਤਾ ਗਿਆ ਸੀ। ਭਾਰਤ 'ਚ ਬਣੇ ਸਕੂਟਰਾਂ ਦੀ ਮੰਗ ਵਿਦੇਸ਼ੀ ਬਾਜ਼ਾਰ 'ਚ ਵੀ ਤੇਜ਼ੀ ਨਾਲ ਵਧੀ ਹੈ। ਅੰਕੜੇ ਦਰਸਾਉਂਦੇ ਹਨ ਕਿ, ਸਕੂਟਰ ਨਿਰਯਾਤ 19 ਪ੍ਰਤੀਸ਼ਤ ਵਧ ਕੇ 3,14,533 ਯੂਨਿਟ ਹੋ ਗਿਆ, ਜਦੋਂ ਕਿ ਮੋਟਰਸਾਈਕਲ ਨਿਰਯਾਤ 16 ਪ੍ਰਤੀਸ਼ਤ ਵਧ ਕੇ 16,41,804 ਯੂਨਿਟ ਹੋ ਗਿਆ।

ਵਪਾਰਕ ਵਾਹਨਾਂ ਦੀ ਬਰਾਮਦ ਵਧੀ 

ਵਿੱਤੀ ਸਾਲ ਦੇ ਪਹਿਲੇ ਛੇ ਮਹੀਨਿਆਂ 'ਚ ਵਪਾਰਕ ਵਾਹਨਾਂ ਦਾ ਨਿਰਯਾਤ ਵੀ ਸਾਲਾਨਾ ਆਧਾਰ 'ਤੇ 12 ਫੀਸਦੀ ਵਧ ਕੇ 35,731 ਇਕਾਈ ਹੋ ਗਿਆ ਹੈ। ਹਾਲਾਂਕਿ, ਇਸ ਮਿਆਦ ਦੇ ਦੌਰਾਨ, ਤਿੰਨ ਪਹੀਆ ਵਾਹਨਾਂ ਦੀ ਖੇਪ ਵਿੱਚ ਵੀ 1 ਪ੍ਰਤੀਸ਼ਤ ਦੀ ਮਾਮੂਲੀ ਗਿਰਾਵਟ ਆਈ ਹੈ ਜੋ ਵਿੱਤੀ ਸਾਲ 2023-24 ਦੇ ਅਪ੍ਰੈਲ-ਸਤੰਬਰ ਵਿੱਚ 1,55,154 ਯੂਨਿਟਾਂ ਦੇ ਨਿਰਯਾਤ ਦੇ ਮੁਕਾਬਲੇ 1,53,199 ਯੂਨਿਟ ਸੀ।