ਸੀਤਾਰਮਣ ਨੇ ਅਮਰੀਕੀ ਸੈਮੀਕੰਡਕਟਰ ਕੰਪਨੀਆਂ ਨੂੰ ਭਾਰਤ ’ਚ ਦਿੱਤਾ ਸੱਦਾ

ਵਾਸ਼ਿੰਗਟਨ–ਵਿੱਤ ਮੰਤਰੀ ਨਿਰਮਲਾ ਸੀਤਾਰਮਣ ਨੇ ਅਮਰੀਕੀ ਸੈਮੀਕੰਡਕਟਰ ਉਦਯੋਗ ਦੇ ਪ੍ਰਤੀਨਿਧੀਆਂ ਨਾਲ ਬੈਠਕ ਕੀਤੀ ਅਤੇ ਉਨ੍ਹਾਂ ਨੂੰ ਭਾਰਤ ’ਚ ਨਿਵੇਸ਼ ਲਈ ਸੱਦਾ ਦਿੱਤਾ। ਵਿੱਤ ਮੰਤਰੀ ਨੇ ਸਿਲੀਕਾਨ ਵੈਲੀ ’ਚ ਸਥਿਤ ਕੰਪਨੀਆਂ ਲਈ ਭਾਰਤ ’ਚ ਮੌਕਿਆਂ ਬਾਰੇ ਦੱਸਿਆ। ਉਨ੍ਹਾਂ ਨੇ ਕਿਹਾ ਕਿ ਭਾਰਤ ਸਰਕਾਰ ਸੈਮੀਕੰਡਕਟਰ ਮਿਸ਼ਨ ਰਾਹੀਂ ਪ੍ਰੋਤਸਾਹਨ ਦੇਣ ਨਾਲ ਸੰਪੂਰਨ ਸੈਮੀਕੰਡਕਟਰ ਮੁੱਲ ਲੜੀ ’ਚ ਇਕ ਭਰੋਸੇਮੰਦ ਖਿਡਾਰੀ ਬਣਨ ਲਈ ਵਚਨਬੱਧ ਹੈ। ਸਰਕਾਰ ਨੇ ਪਿਛਲੇ ਸਾਲ ਦੇਸ਼ ’ਚ ਸੈਮੀਕੰਡਕਟਰ ਅਤੇ ਡਿਸਪਲੇ ਨਿਰਮਾਣ ਨੂੰ ਬੜ੍ਹਾਵਾ ਦੇਣ ਲਈ 76,000 ਕਰੋੜ ਰੁਪਏ ਦੀ ਯੋਜਨਾ ਨੂੰ ਮਨਜ਼ੂਰੀ ਦਿੱਤੀ ਸੀ।
ਇਸ ਯੋਜਨਾ ਦਾ ਮਕਸਦ ਗਲੋਬਲ ਪੱਧਰ ’ਤੇ ਭਾਰਤ ਨੂੰ ਉੱਚ ਤਕਨਾਲੋਜੀ ਆਧਾਰਿਤ ਉਤਪਾਦਨ ਕੇਂਦਰ ਵਜੋਂ ਸਥਾਪਿਤ ਕਰਨਾ ਅਤੇ ਵੱਡੇ ਚਿੱਪ ਨਿਰਮਾਤਾਵਾਂ ਨੂੰ ਆਕਰਸ਼ਿਤ ਕਰਨਾ ਹੈ। ਡਿਜਾਈਨ, ਨਿਰਮਾਣ, ਉਪਕਰਨ, ਤਕਨਾਲੋਜੀ ਅਤੇ ਪ੍ਰਣਾਲੀਆਂ ਸਮੇਤ ਸੈਮੀਕੰਡਕਟਰ ਈਕੋ ਸਿਸਟਮ ਦੀਆਂ ਦਿੱਗਜ਼ ਹਸਤੀਆਂ ਨੇ ਸੈਨ ਫ੍ਰਾਂਸਿਸਕੋ ਦੇ ਵਿੱਤ ਮੰਤਰੀ ਨਾਲ ਬੈਠਕ ’ਚ ਕਿਹਾ ਕਿ ਉਨ੍ਹਾਂ ਨੇ ਪਿਛਲੇ ਕੁੱਝ ਸਾਲਾਂ ’ਚ ਭਾਰਤ ’ਚ ਆਪਣੀਆਂ ਸਮਰੱਥਾਵਾਂ ਨੂੰ ਕਾਫੀ ਹੱਦ ਤੱਕ ਵਧਾਇਆ ਹੈ। ਬੈਠਕ ’ਚ ਏ. ਐੱਮ. ਡੀ. ਦੇ ਮੁੱਖ ਵਿੱਤੀ ਅਧਿਕਾਰੀ ਅਤੇ ਖਜ਼ਾਨਚੀ ਦਵਿੰਦਰ ਕੁਮਾਰ, ਵੈਸਟਰਨ ਡਿਜੀਟਲ ਦੇ ਸੀਨੀਅਰ ਉੱਪ-ਪ੍ਰਧਾਨ ਡੈਨ ਸਟੀਅਰ, ਮਾਈਕ੍ਰੋਨ ਟੈੱਕ ’ਚ ਗਲੋਬਲ ਆਪ੍ਰੇਟਿੰਗ ਦੇ ਕਾਰਜਕਾਰੀ ਉੱਪ-ਪ੍ਰਧਾਨ ਮਨੀਸ਼ ਭਾਟੀਆ ਸਮੇਤ ਕਈ ਦਿੱਗਜ਼ ਸ਼ਾਮਲ ਹੋਏ।
ਐੱਫ. ਆਈ. ਆਈ. ਡੀ. ਐੱਸ. ਨੇ ਐੱਨ. ਆਰ. ਆਈ., ਓ. ਸੀ. ਆਈ. ਲਈ ਭਾਰਤੀ ਸ਼ੇਅਰ ਬਾਜ਼ਾਰਾਂ ’ਚ ਨਿਵੇਸ਼ ਦੀ ਮੰਗੀ ਇਜਾਜ਼ਤ
ਪ੍ਰਵਾਸੀ ਭਾਰਤੀਆਂ ਦੀ ਇਕ ਪ੍ਰਮੁੱਖ ਸੰਸਥਾ ਐੱਫ. ਆਈ. ਆਈ. ਡੀ. ਐੱਸ. ਨੇ ਵਿੱਤ ਮੰਤਰੀ ਨਿਰਮਲਾ ਸੀਤਾਰਮਣ ਨੂੰ ਕਿਹਾ ਕਿ ਪ੍ਰਵਾਸੀ ਭਾਰਤੀਆਂ (ਐੱਨ. ਆਰ. ਆਈ.) ਅਤੇ ਭਾਰਤ ਦੇ ਵਿਦੇਸ਼ੀ ਨਾਗਰਿਕ (ਓ. ਸੀ. ਆਈ.) ਕਾਰਡਧਾਰਕਾਂ ਨੂੰ ਭਾਰਤੀ ਸ਼ੇਅਰ ਬਾਜ਼ਾਰਾਂ ’ਚ ਨਿਵੇਸ਼ ਕਰਨ ਦੀ ਇਜਾਜ਼ਤ ਦਿੱਤੀ ਜਾਵੇ। ਫਾਊਂਡੇਸ਼ਨ ਫਾਰ ਇੰਡੀਆ ਐਂਡ ਇੰਡੀਅਨ ਡਾਇਸਪੋਰਾ ਸਟੱਡੀਜ਼ (ਐੱਫ. ਆਈ. ਆਈ. ਡੀ. ਐੱਸ.) ਅਮਰੀਕਾ ਨੇ ਕਿਹਾ ਕਿ ਇਸ ਤਰ੍ਹਾਂ ਦੇ ਕਦਮ ਨਾਲ ਕੌਮਾਂਤਰੀ ਭਾਰਤੀ ਭਾਈਚਾਰੇ ਦੇ ਨਿਵੇਸ਼ ਨਾਲ ਭਾਰਤੀ ਅਰਥਵਿਵਸਥਾ ਨੂੰ ਹੋਰ ਬੜ੍ਹਾਵਾ ਮਿਲੇਗਾ। ਐੱਫ. ਆਈ. ਆਈ. ਡੀ. ਐੱਸ. ਇਕ ਅਮਰੀਕਾ ਸਥਿਤ ਸੰਸਥਾਨ ਹੈ ਜੋ ਭਾਰਤ-ਅਮਰੀਕਾ ਸਬੰਧਾਂ ਨੂੰ ਬੜ੍ਹਾਵਾ ਦੇਣ ਲਈ ਕੰਮ ਕਰਦਾ ਹੈ। ਸੀਤਾਰਮਣ ਕੌਮਾਂਤਰੀ ਮੁਦਰਾ ਫੰਡ (ਆਈ. ਐੱਮ. ਐੱਫ.) ਅਤੇ ਵਿਸ਼ਵ ਬੈਂਕ ਦੀ ਸਾਲਾਨਾ ਬਸੰਤ ਬੈਠਕ ’ਚ ਹਿੱਸਾ ਲੈਣ ਤੋਂ ਬਾਅਦ ਇਸ ਸਮੇਂ ਵੈਸਟ ਕੋਸਟ ’ਚ ਹਨ।