ਇਜ਼ਰਾਈਲ ਦੇ ਈਰਾਨ 'ਤੇ ਹਮਲੇ ਦਰਮਿਆਨ ਸੈਂਸੈਕਸ 833 ਅੰਕ ਡਿੱਗਾ, ਨਿਫਟੀ ਵੀ 244 ਅੰਕ ਟੁੱਟਿਆ

ਬਿਜ਼ਨੈੱਸ ਡੈਸਕ - ਇਜ਼ਰਾਈਲ ਦੇ ਈਰਾਨ 'ਤੇ ਹਮਲੇ ਦਰਮਿਆਨ ਅੱਜ 13 ਜੂਨ ਨੂੰ ਸ਼ੇਅਰ ਬਾਜ਼ਾਰ ਗਿਰਾਵਟ ਵਿਚ ਕਾਰੋਬਾਰ ਕਰਦਾ ਦੇਖਿਆ ਜਾ ਰਿਹਾ ਹੈ। ਸੈਂਸੈਕਸ 833.31 ਅੰਕ ਭਾਵ 1.02% ਦੀ ਗਿਰਾਵਟ ਨਾਲ 80,858.67 ਦੇ ਪੱਧਰ 'ਤੇ ਕਾਰੋਬਾਰ ਕਰਦਾ ਦੇਖਿਆ ਜਾ ਰਿਹਾ ਹੈ। ਸੈਂਸੈਕਸ ਦੇ ਸਾਰੇ ਸਟਾਕ ਗਿਰਾਵਟ ਨਾਲ ਕਾਰੋਬਾਰ ਕਰ ਰਹੇ ਹਨ। 

ਦੂਜੇ ਪਾਸੇ ਨਿਫਟੀ ਵਿੱਚ ਵੀ 244.85 ਅੰਕ ਭਾਵ 0.98% ਦੀ ਗਿਰਾਵਟ ਦੇਖਣ ਨੂੰ ਮਿਲੀ ਹੈ। ਇਹ 24,643.35 ਦੇ ਪੱਧਰ 'ਤੇ ਕਾਰੋਬਾਰ ਕਰ ਰਿਹਾ ਹੈ।  ਬੈਂਕਿੰਗ, ਆਟੋ ਅਤੇ ਆਈਟੀ ਸ਼ੇਅਰਾਂ ਵਿੱਚ ਵੱਡੀ ਗਿਰਾਵਟ ਦੇਖਣ ਨੂੰ ਮਿਲ ਰਹੀ ਹੈ। ਬੈਂਕਿੰਗ, ਆਟੋ ਅਤੇ ਆਈਟੀ ਐਫਐਮਸੀਜੀ ਸਮੇਤ ਬਾਜ਼ਾਰ ਦੇ ਸਾਰੇ ਸੈਕਟਰ ਲਗਭਗ 1% ਦੀ ਗਿਰਾਵਟ ਨਾਲ ਕਾਰੋਬਾਰ ਕਰ ਰਹੇ ਹਨ। ਇਸ ਦੇ ਨਾਲ ਹੀ, ਮੇਨਬੋਰਡ ਸੈਗਮੈਂਟ ਓਸਵਾਲ ਪੰਪਸ ਦਾ ਆਈਪੀਓ ਅੱਜ ਤੋਂ ਖੁੱਲ੍ਹ ਗਿਆ ਹੈ।

ਬਾਜ਼ਾਰ 'ਚ ਗਿਰਾਵਟ ਦੇ ਕਾਰਨ

ਉਹ ਡਰ ਜੋ ਲੰਬੇ ਸਮੇਂ ਤੋਂ ਵਿਸ਼ਵ ਨੇਤਾਵਾਂ ਅਤੇ ਡਿਪਲੋਮੈਟਾਂ ਨੂੰ ਪਰੇਸ਼ਾਨ ਕਰ ਰਿਹਾ ਸੀ, ਹੁਣ ਹਕੀਕਤ ਬਣ ਗਿਆ ਹੈ। ਇਜ਼ਰਾਈਲ ਅਤੇ ਈਰਾਨ ਵਿਚਕਾਰ ਤਣਾਅ ਹੁਣ ਜੰਗ ਵਿੱਚ ਬਦਲ ਗਿਆ ਹੈ। ਇਜ਼ਰਾਈਲ ਨੇ ਈਰਾਨ 'ਤੇ ਹਮਲਾ ਕਰ ਦਿੱਤਾ ਹੈ ਅਤੇ ਇਰਾਨ ਨੇ ਜਵਾਬੀ ਕਾਰਵਾਈ ਕਰਨ ਬਾਰੇ ਕਿਹਾ ਹੈ।ਦੋ ਵੱਡੇ ਦੇਸ਼ਾਂ ਵਿਚਕਾਰ ਜੰਗ ਜਾਂ ਤਣਾਅ ਕਾਰਨ ਨਿਵੇਸ਼ਕ ਡਰੇ ਹੋਏ ਹਨ। ਨਿਵੇਸ਼ਕ ਸਟਾਕ ਮਾਰਕੀਟ ਤੋਂ ਪੈਸੇ ਕਢਵਾ ਰਹੇ ਹਨ।  ਦੁਨੀਆ ਵਿਚ ਜੰਗੀ ਹਾਲਾਤਾਂ ਦਰਮਿਆਨ ਸਟਾਕ ਮਾਰਕੀਟ ਡਿੱਗਦੀ ਹੈ, ਸੋਨਾ, ਕੱਚਾ ਤੇਲ ਅਤੇ ਡਾਲਰ ਮਹਿੰਗੇ ਹੋ ਜਾਂਦੇ ਹਨ।

ਇਸ ਤਣਾਅ ਦਰਮਿਆਨ ਕੱਚੇ ਤੇਲ ਦੀਆਂ ਕੀਮਤਾਂ ਵਿੱਚ 10% ਤੋਂ ਵੱਧ ਦਾ ਵਾਧਾ ਦਰਜ ਕੀਤਾ ਗਿਆ ਹੈ। ਜ਼ਿਕਰਯੋਗ ਹੈ ਕਿ ਦੁਨੀਆ ਦਾ ਜ਼ਿਆਦਾਤਰ ਤੇਲ ਮੱਧ ਪੂਰਬ ਤੋਂ ਆਉਂਦਾ ਹੈ। ਜੇਕਰ ਉੱਥੇ ਸਪਲਾਈ ਬੰਦ ਹੋ ਜਾਂਦੀ ਹੈ, ਤਾਂ ਤੇਲ ਹੋਰ ਮਹਿੰਗਾ ਹੋ ਸਕਦਾ ਹੈ। ਇਹ ਭਾਰਤ ਵਰਗੇ ਦੇਸ਼ਾਂ ਲਈ ਹੋਰ ਵੀ ਚਿੰਤਾ ਦਾ ਵਿਸ਼ਾ ਹੈ, ਕਿਉਂਕਿ ਸਾਨੂੰ ਜ਼ਿਆਦਾਤਰ ਤੇਲ ਬਾਹਰੋਂ ਖਰੀਦਣਾ ਪੈਂਦਾ ਹੈ। 

ਏਸ਼ੀਆਈ ਬਾਜ਼ਾਰਾਂ ਦਾ ਹਾਲ

ਏਸ਼ੀਆਈ ਬਾਜ਼ਾਰਾਂ ਵਿੱਚ, ਜਾਪਾਨ ਦਾ ਨਿੱਕੇਈ ਅਤੇ ਕੋਰੀਆ ਦਾ ਕੋਸਪੀ ਗਿਰਵਾਟ ਕਾਰੋਬਾਰ ਕਰਦਾ ਦੇਖਿਆ ਗਿਆ।

ਹਾਂਗ ਕਾਂਗ ਦਾ ਹੈਂਗ ਸੇਂਗ ਇੰਡੈਕਸ ਅਤੇ ਚੀਨ ਦਾ ਸ਼ੰਘਾਈ ਕੰਪੋਜ਼ਿਟ ਗਿਰਾਵਟ ਨਾਲ ਕਾਰੋਬਾਰ ਕਰਦਾ ਦੇਖਿਆ ਗਿਆ।

ਓਸਵਾਲ ਪੰਪ ਦਾ ਆਈਪੀਓ ਅੱਜ ਖੁੱਲ੍ਹਿਆ

ਓਸਵਾਲ ਪੰਪ ਦਾ ਆਈਪੀਓ ਅੱਜ ਕੁੱਲ 1,387.34 ਕਰੋੜ ਇਕੱਠੇ ਕਰਨ ਲਈ ਖੁੱਲ੍ਹ ਗਿਆ ਹੈ। ਨਿਵੇਸ਼ਕ 17 ਜੂਨ ਤੱਕ ਇਸ ਲਈ ਅਰਜ਼ੀ ਦੇ ਸਕਦੇ ਹਨ। ਕੰਪਨੀ ਦੇ ਸ਼ੇਅਰ 20 ਜੂਨ ਨੂੰ ਬੰਬੇ ਸਟਾਕ ਐਕਸਚੇਂਜ (BSE) ਅਤੇ ਨੈਸ਼ਨਲ ਸਟਾਕ ਐਕਸਚੇਂਜ (NSE) ਵਿੱਚ ਸੂਚੀਬੱਧ ਹੋਣਗੇ।

ਇਸ ਵਿੱਚੋਂ 890 ਕਰੋੜ ਮੁੱਲ ਦੇ ਨਵੇਂ ਸ਼ੇਅਰ ਜਾਰੀ ਕੀਤੇ ਜਾਣਗੇ ਅਤੇ  497.34 ਕਰੋੜ ਮੁੱਲ ਦੇ ਸ਼ੇਅਰ ਆਫਰ ਫਾਰ ਸੇਲ (OFS) ਦੇ ਤਹਿਤ ਵੇਚੇ ਜਾਣਗੇ।

ਬੀਤੇ ਦਿਨ ਬਾਜ਼ਾਰ ਦਾ ਹਾਲ

12 ਜੂਨ ਨੂੰ ਸ਼ੇਅਰ ਬਾਜ਼ਾਰ ਵਿੱਚ ਗਿਰਾਵਟ ਦੇਖਣ ਨੂੰ ਮਿਲੀ ਸੀ। ਸੈਂਸੈਕਸ 823 ਅੰਕ ਡਿੱਗ ਕੇ 81,691 'ਤੇ ਬੰਦ ਹੋਇਆ। ਸੈਂਸੈਕਸ ਦੇ 30 ਸਟਾਕਾਂ ਵਿੱਚੋਂ 27 ਵਿੱਚ ਗਿਰਾਵਟ ਆਈ ਅਤੇ ਸਿਰਫ਼ 3 ਵਿੱਚ ਵਾਧਾ ਹੋਇਆ। ਨਿਫਟੀ ਵੀ 253 ਅੰਕ ਡਿੱਗ ਕੇ 24,888 'ਤੇ ਬੰਦ ਹੋਇਆ।