ਸੇਬੀ ਨੇ ਫਰੈਂਕਲਿਨ ਟੈਂਪਲਟਨ ਏਐਮਸੀ ਦੇ ਅਧਿਕਾਰੀਆਂ, ਟਰੱਸਟੀਆਂ ਨੂੰ ਲਗਾਇਆ ਜੁਰਮਾਨਾ

ਮੁੰਬਈ - ਕੈਪੀਟਲ ਮਾਰਕੀਟ ਰੈਗੂਲੇਟਰ ਸੇਬੀ ਨੇ ਸੋਮਵਾਰ ਨੂੰ ਫਰੈਂਕਲਿਨ ਟੈਂਪਲਟਨ ਏਐਮਸੀ ਦੇ ਸੀਨੀਅਰ ਅਧਿਕਾਰੀਆਂ ਅਤੇ ਇਸਦੇ ਟਰੱਸਟੀਆਂ ਨੂੰ 15 ਕਰੋੜ ਰੁਪਏ ਦਾ ਜ਼ੁਰਮਾਨਾ ਲਗਾਇਆ ਹੈ। ਇਹ ਜੁਰਮਾਨਾ ਸਾਲ 2020 ਵਿਚ ਛੇ ਕਰਜ਼ਾ ਸਕੀਮਾਂ ਨੂੰ ਬੰਦ ਕਰਨ ਦੇ ਰੈਗੂਲੇਟਰੀ ਨਿਯਮਾਂ ਦੀ ਉਲੰਘਣਾ ਕਰਨ ਲਈ ਲਗਾਇਆ ਗਿਆ ਹੈ। ਸੇਬੀ ਦੇ ਆਦੇਸ਼ ਵਿਚ ਕਿਹਾ ਗਿਆ ਹੈ ਕਿ ਫ੍ਰੈਂਕਲਿਨ ਟੈਂਪਲਟਨ ਟਰੱਸਟੀ ਸਰਵਿਸਿਜ਼ ਪ੍ਰਾਈਵੇਟ. ਲਿਮਟਿਡ 'ਤੇ 3 ਕਰੋੜ ਰੁਪਏ ਦਾ ਜ਼ੁਰਮਾਨਾ ਲਗਾਇਆ ਗਿਆ ਹੈ। ਇਸ ਤੋਂ ਇਲਾਵਾ ਫ੍ਰੈਂਕਲਿਨ ਐਸੇਟ ਮੈਨੇਜਮੈਂਟ (ਇੰਡੀਆ) ਪ੍ਰਾਈਵੇਟ ਲਿਮਟਡ ਦੇ ਚੇਅਰਮੈਨ ਸੰਜੇ ਸਾਪਰੇ ਅਤੇ ਇਸਦੇ ਮੁੱਖ ਨਿਵੇਸ਼ ਅਧਿਕਾਰੀ ਸੰਤੋਸ਼ ਕਾਮਤ ਨੂੰ ਦੋ-ਦੋ ਕਰੋੜ ਰੁਪਏ ਜੁਰਮਾਨਾ ਕੀਤਾ ਗਿਆ ਹੈ।

ਇਸ ਦੇ ਨਾਲ ਸੇਬੀ ਨੇ ਕੁਨਾਲ ਅਗਰਵਾਲ, ਸੁਮਿਤ ਗੁਪਤਾ, ਪੱਲਬ ਰਾਏ, ਸਚਿਨ ਪਦਵਾਲ ਦੇਸਾਈ ਅਤੇ ਉਮੇਸ਼ ਸ਼ਰਮਾ, ਜੋ ਕਿ ਉਲੰਘਣਾ ਵੇਲੇ ਸਕੀਮ ਦੇ ਫੰਡ ਮੈਨੇਜਰ ਸਨ, 'ਤੇ ਹਰੇਕ ਨੂੰ 1.5 ਕਰੋੜ ਰੁਪਏ ਦਾ ਜੁਰਮਾਨਾ ਲਗਾਇਆ ਹੈ। ਸੇਬੀ ਨੇ ਕੰਪਨੀ ਦੇ ਤਤਕਾਲੀ ਮੁੱਖ ਪਾਲਣਾ ਅਧਿਕਾਰੀ ਸੌਰਭ ਗੰਗਰੇਡੇ ਨੂੰ 50 ਲੱਖ ਰੁਪਏ ਦਾ ਜੁਰਮਾਨਾ ਲਗਾਇਆ ਹੈ। ਇਨ੍ਹਾਂ ਲੋਕਾਂ ਨੂੰ 45 ਦਿਨਾਂ ਦੇ ਅੰਦਰ ਜੁਰਮਾਨੇ ਦੀ ਰਾਸ਼ੀ ਦਾ ਭੁਗਤਾਨ ਕਰਨ ਲਈ ਕਿਹਾ ਗਿਆ ਹੈ। ਸੇਬੀ ਨੇ ਨੋਟ ਕੀਤਾ ਹੈ ਕਿ ਫ੍ਰੈਂਕਲਿਨ ਟੈਂਪਲਟਨ ਮਿਊੁਚੁਅਲ ਫੰਡ (ਐੱਮ. ਐੱਫ.) ਦੇ ਟਰੱਸਟੀ ਆਪਣੇ ਖੇਤਰ ਵਿਚ ਪੇਸ਼ੇਵਰ ਲੋਕ ਹਨ ਅਤੇ ਉਹ ਆਪਣੇ ਕੰਮ ਦੇ ਖੇਤਰ ਵਿਚ ਮੁਹਾਰਤ ਰੱਖਦੇ ਹਨ, ਫਿਰ ਵੀ ਉਹ ਮਿਉਚੁਅਲ ਫੰਡਾਂ ਦੇ ਕੰਮਕਾਜ ਵਿਚ ਸਾਹਮਣੇ ਆਉਣ ਵਾਲੀਆਂ ਕਮੀਆਂ ਨੂੰ ਦੂਰ ਕਰਨ ਵਿਚ ਅਸਫਲ ਰਹੇ ਹਨ।

ਆਪਣੇ 151 ਪੰਨਿਆਂ ਦੇ ਆਦੇਸ਼ ਵਿਚ ਸੇਬੀ ਨੇ ਕਿਹਾ ,'ਆਪਣੇ ਅਹੁਦੇ ਉੱਤੇ ਰਹਿੰਦੇ ਹੋਏ ਉਨ੍ਹਾਂ ਦੁਆਰਾ ਕੀਤਾ ਕੰਮ ਕਿਸੇ ਵੀ ਯੂਨਿਟ ਧਾਰਕਾਂ ਦੇ ਹਿੱਤ ਵਿੱਚ ਨਹੀਂ ਸੀ। ਇਨ੍ਹਾਂ ਅਧਿਕਾਰੀ ਨੇ ਉਸ ਸਮੇਂ ਆਪਣੀਆਂ ਜ਼ਿੰਮੇਵਾਰੀਆਂ ਨੂੰ ਸਹੀ ਢੰਗ ਨਾਲ ਨਹੀਂ ਨਿਭਾਇਆ ਅਤੇ ਨਿਯਮ ਦੀਆਂ ਜ਼ਰੂਰਤਾਂ ਦੀ ਉਲੰਘਣਾ ਕੀਤੀ। ਜਿਸ ਕਾਰਨ ਯੁਨਿਟ ਧਾਰਕਾਂ ਨੂੰ ਨੁਕਸਾਨ ਹੋਇਆ ।' ਫਰੈਂਕਲਿਨ ਟੈਂਪਲਟਨ ਐਮਐਫ ਨੇ 23 ਅਪ੍ਰੈਲ 2020 ਨੂੰ ਛੇ ਕਰਜ਼ਾ ਮਿਊਚੁਅਲ ਫੰਡ ਯੋਜਨਾਵਾਂ ਬੰਦ ਕਰ ਦਿੱਤੀਆਂ ਸਨ। ਕੰਪਨੀ ਨੇ ਕਿਹਾ ਸੀ ਕਿ ਉਸਨੇ ਬਾਂਡ ਮਾਰਕੀਟ ਵਿਚ ਤਰਲਤਾ ਦੀ ਘਾਟ ਅਤੇ ਛੁਟਕਾਰੇ ਦੇ ਦਬਾਅ ਦੇ ਮੱਦੇਨਜ਼ਰ ਯੋਜਨਾਵਾਂ ਨੂੰ ਬੰਦ ਕਰ ਦਿੱਤਾ ਹੈ। ਬੰਦ ਹੋਈਆਂ ਯੋਜਨਾਵਾਂ ਦੇ ਪ੍ਰਬੰਧਨ ਅਧੀਨ ਕੁੱਲ ਸੰਪਤੀ 25,000 ਕਰੋੜ ਰੁਪਏ ਸੀ।

ਬੰਦ ਨਾ ਹੋਣ ਵਾਲੀਆਂ 6 ਯੋਜਨਾਵਾਂ ਵਿਚ ਫ੍ਰੈਂਕਲਿਨ ਇੰਡੀਆ ਲੋਅ ਡਿਊਰੇਸ਼ਨ ਫੰਡ, ਫ੍ਰੈਂਕਲਿਨ ਇੰਡੀਆ ਡਾਇਨਾਮਿਕ ਏਕਰੂਅਲ ਫੰਡ, ਫ੍ਰੈਂਕਲਿਨ ਇੰਡੀਆ ਕ੍ਰੈਡਿਟ ਰਿਸਕ ਫੰਡ, ਫ੍ਰੈਂਕਲਿਨ ਇੰਡੀਆ ਸ਼ਾਰਟ ਟਰਮ ਇਨਕਮ ਪਲਾਨ, ਫ੍ਰੈਂਕਲਿਨ ਇੰਡੀਆ ਅਲਟਰਾ ਸ਼ਾਰਟ ਬਾਂਡ ਫੰਡ ਅਤੇ ਫ੍ਰੈਂਕਲਿਨ ਇੰਡੀਆ ਇਨਕਮ ਐਪਰਚੁਨੀਟੀਜ ਫੰਡ ਸ਼ਾਮਲ ਹਨ। ਇਕ ਵੱਖਰੇ ਆਦੇਸ਼ ਵਿਚ ਰੈਗੂਲੇਟਰ ਨੇ ਮਾਈਵਿਸ਼ ਮਾਰਕੀਟਪਲੇਸਾਂ ਉੱਤੇ 5 ਕਰੋੜ ਰੁਪਏ, ਜੈਰਾਮ ਐਸ ਅਈਅਰ ਨੂੰ 25 ਲੱਖ ਰੁਪਏ, ਵੈਂਕਟਾ ਰਾਧਾਕ੍ਰਿਸ਼ਨਨ ਨੂੰ 45 ਲੱਖ ਰੁਪਏ ਅਤੇ ਮਲਾਥੀ ਰਾਧਾਕ੍ਰਿਸ਼ਨਨ ਨੂੰ 5 ਲੱਖ ਰੁਪਏ ਜੁਰਮਾਨਾ ਲਗਾਇਆ ਹੈ। ਇਨ੍ਹਾਂ ਲੋਕਾਂ ਨੇ ਯੋਜਨਾਵਾਂ ਬੰਦ ਹੋਣ ਤੋਂ ਪਹਿਲਾਂ ਹੀ ਆਪਣੀਆਂ ਇਕਾਈਆਂ ਨੂੰ ਛੁਡਾ ਲਿਆ ਸੀ।

ਸੇਬੀ ਨੇ ਨੋਟ ਕੀਤਾ ਹੈ ਕਿ ਫਰੈਂਕਲਿਨ ਟੈਂਪਲਟਨ ਦੇ ਏਸ਼ੀਆ ਪ੍ਰਸ਼ਾਂਤ ਖੇਤਰ ਦੇ ਪ੍ਰਮੁੱਖ ਵਿਵੇਕ ਕੁਡਵਾ ਅਤੇ ਫਰੈਂਕਲਿਨ ਟੈਂਪਲਟਨ ਟਰੱਸਟੀਜ਼ ਦੇ ਨਿਰਦੇਸ਼ਕ ਅਲੋਕ ਸੇਠੀ ਦੋਵੇਂ ਮਾਈਵਿਸ਼ ਮਾਰਕੀਟਪਲੇਸ ਦੇ ਡਾਇਰੈਕਟਰ ਆਫ਼ ਬੋਰਡ ਦੇ ਡਾਇਰੈਕਟਰ ਸਨ। ਇਨ੍ਹਾਂ ਲੋਕਾਂ ਨੂੰ ਉਨ੍ਹਾਂ ਦੀ ਗੁਪਤ ਜਾਣਕਾਰੀ ਹੁੰਦੇ ਹੋਏ ਉਨ੍ਹਾਂ ਦੀਆਂ ਇਕਾਈਆਂ ਨੂੰ ਛੁਡਾਉਣ ਦੀ ਸਜ਼ਾ ਦਿੱਤੀ ਗਈ ਹੈ।

ਇਹ ਵੀ ਪੜ੍ਹੋ : ਖ਼ੁਸ਼ਖ਼ਬਰੀ! 815 ਰੁਪਏ ਵਾਲਾ ਗੈਸ ਸਿਲੰਡਰ ਖ਼ਰੀਦੋ ਸਿਰਫ਼ 15 ਰੁਪਏ ਵਿਚ, ਜਾਣੋ ਕਿਵੇਂ

ਨੋਟ - ਇਸ ਖ਼ਬਰ ਬਾਰੇ ਆਪਣੇ ਵਿਚਾਰ ਕੁਮੈਂਟ ਬਾਕਸ ਵਿਚ ਜ਼ਰੂਰ ਸਾਂਝੇ ਕਰੋ।