RIL ਦਾ M-Cap 21 ਲੱਖ ਕਰੋੜ ਰੁਪਏ ਦੇ ਪਾਰ, ਇਹ ਮੁਕਾਮ ਹਾਸਲ ਕਰਨ ਵਾਲੀ ਬਣੀ ਪਹਿਲੀ ਕੰਪਨੀ

ਮੁੰਬਈ - ਮੁਕੇਸ਼ ਅੰਬਾਨੀ ਦੀ ਰਿਲਾਇੰਸ ਇੰਡਸਟਰੀਜ਼ ਦਾ ਬਾਜ਼ਾਰ ਪੂੰਜੀਕਰਣ 21 ਲੱਖ ਕਰੋੜ ਰੁਪਏ ਦੇ ਅੰਕੜੇ ਨੂੰ ਪਾਰ ਕਰ ਗਿਆ ਹੈ। ਰਿਲਾਇੰਸ ਇੰਡਸਟਰੀਜ਼ ਇਸ ਅੰਕ ਤੱਕ ਪਹੁੰਚਣ ਵਾਲੀ ਪਹਿਲੀ ਭਾਰਤੀ ਕੰਪਨੀ ਹੈ। 28 ਜੂਨ ਨੂੰ ਰਿਲਾਇੰਸ ਇੰਡਸਟਰੀਜ਼ ਦੇ ਸ਼ੇਅਰਾਂ ਵਿੱਚ ਵਾਧਾ ਹੋਇਆ ਹੈ। ਸਵੇਰੇ BSE 'ਤੇ ਸਟਾਕ 3060.95 ਰੁਪਏ 'ਤੇ ਲਾਲ ਰੰਗ 'ਚ ਖੁੱਲ੍ਹਿਆ ਪਰ ਫਿਰ ਇਹ ਪਿਛਲੀ ਬੰਦ ਕੀਮਤ ਤੋਂ 2 ਫੀਸਦੀ ਵਧ ਕੇ 3129 ਰੁਪਏ ਦੇ ਉੱਚ ਪੱਧਰ 'ਤੇ ਪਹੁੰਚ ਗਿਆ। ਇਹ ਸਟਾਕ ਦਾ ਨਵਾਂ 52 ਹਫ਼ਤੇ ਦਾ ਉੱਚ ਪੱਧਰ ਵੀ ਹੈ।

ਪਿਛਲੇ ਇਕ ਸਾਲ 'ਚ ਸ਼ੇਅਰਾਂ ਦੀ ਕੀਮਤ 30 ਫੀਸਦੀ ਮਜ਼ਬੂਤ ​​ਹੋਈ ਹੈ। ਇੱਕ ਦਿਨ ਪਹਿਲਾਂ, ਰਿਲਾਇੰਸ ਜੀਓ ਇੰਫੋਕਾਮ ਲਿਮਟਿਡ ਨੇ ਘੋਸ਼ਣਾ ਕੀਤੀ ਸੀ ਕਿ ਉਹ ਆਪਣੇ ਮੋਬਾਈਲ ਟੈਰਿਫ ਦੀਆਂ ਕੀਮਤਾਂ ਵਿੱਚ ਵਾਧਾ ਕਰਨ ਜਾ ਰਹੀ ਹੈ। ਨਵੇਂ ਅਨਲਿਮਟਿਡ ਪਲਾਨ 3 ਜੁਲਾਈ ਤੋਂ ਲਾਗੂ ਹੋਣਗੇ।

17 ਫੀਸਦੀ ਵਧ ਸਕਦੇ ਹਨ RIL ਦੇ ਸ਼ੇਅਰ 

ਰਿਲਾਇੰਸ ਇੰਡਸਟਰੀਜ਼ ਦੇ ਸ਼ੇਅਰ 17 ਫੀਸਦੀ ਹੋਰ ਵਧ ਸਕਦੇ ਹਨ। ਇਹ ਉਮੀਦ ਗਲੋਬਲ ਬ੍ਰੋਕਰੇਜ ਫਰਮ ਜੇਫਰੀਜ਼ ਨੇ ਪ੍ਰਗਟਾਈ ਹੈ। ਜੈਫਰੀਜ਼ ਨੇ ਸਟਾਕ 'ਤੇ 'ਬਾਇ' ਰੇਟਿੰਗ ਨੂੰ ਬਰਕਰਾਰ ਰੱਖਦੇ ਹੋਏ, ਜੈਫਰੀਜ਼ ਨੇ ਟੀਚਾ ਕੀਮਤ 3,380 ਰੁਪਏ ਤੋਂ ਵਧਾ ਕੇ 3,580 ਰੁਪਏ ਪ੍ਰਤੀ ਸ਼ੇਅਰ ਕਰ ਦਿੱਤੀ ਹੈ। ਇਹ ਬੀਐਸਈ 'ਤੇ 27 ਜੂਨ ਨੂੰ ਸ਼ੇਅਰ ਦੀ ਬੰਦ ਕੀਮਤ ਤੋਂ 17 ਫੀਸਦੀ ਜ਼ਿਆਦਾ ਹੈ। ਜੈਫਰੀਜ਼ ਦੁਆਰਾ ਦਿੱਤੀ ਗਈ ਨਵੀਂ ਟੀਚਾ ਕੀਮਤ ਰਿਲਾਇੰਸ ਇੰਡਸਟਰੀਜ਼ ਲਈ ਮਾਰਕੀਟ ਵਿੱਚ ਸਭ ਤੋਂ ਵੱਧ ਹੈ।

ਮੋਰਗਨ ਸਟੈਨਲੀ ਕਿਹੜੀਆਂ ਸੰਭਾਵਨਾਵਾਂ ਦੇਖਦਾ ਹੈ?

ਮੋਰਗਨ ਸਟੈਨਲੀ ਨੇ 'ਓਵਰਵੇਟ' ਰੇਟਿੰਗ ਨੂੰ ਬਰਕਰਾਰ ਰੱਖਦੇ ਹੋਏ ਰਿਲਾਇੰਸ ਇੰਡਸਟਰੀਜ਼ ਦੇ ਸ਼ੇਅਰਾਂ ਲਈ 3,046 ਰੁਪਏ ਪ੍ਰਤੀ ਸ਼ੇਅਰ ਦਾ ਟੀਚਾ ਮੁੱਲ ਤੈਅ ਕੀਤਾ ਹੈ। ਬ੍ਰੋਕਰੇਜ ਨੇ ਕਿਹਾ ਕਿ ਕੰਪਨੀ ਨੇ ਸਾਡੀਆਂ ਉਮੀਦਾਂ ਦੇ ਮੁਤਾਬਕ ਟੈਲੀਕਾਮ ਟੈਰਿਫ 'ਚ ਵਾਧੇ ਦਾ ਐਲਾਨ ਕੀਤਾ ਹੈ। ਮੋਰਗਨ ਸਟੈਨਲੀ ਨੂੰ FY2027 ਤੱਕ ਕਿਸੇ ਹੋਰ ਟੈਰਿਫ ਵਾਧੇ ਦੀ ਉਮੀਦ ਨਹੀਂ ਹੈ ਪਰ ਇਹ ਵੀ ਕਿਹਾ ਕਿ ਅਗਲੇ ਸਾਲ ਲਗਭਗ 20% ਦੇ ਟੈਰਿਫ ਵਾਧੇ ਨਾਲ ਕਮਾਈ ਵਿੱਚ 10-15% ਵਾਧਾ ਹੋ ਸਕਦਾ ਹੈ।
ਰਿਲਾਇੰਸ ਇੰਡਸਟਰੀਜ਼ ਨੂੰ ਕਵਰ ਕਰਨ ਵਾਲੇ 35 ਵਿਸ਼ਲੇਸ਼ਕਾਂ ਵਿੱਚੋਂ, 28 ਨੇ 'ਬਾਇ' ਰੇਟਿੰਗ ਦੀ ਸਿਫਾਰਸ਼ ਕੀਤੀ ਹੈ, 5 ਨੇ 'ਹੋਲਡ' ਕਾਲ ਦਿੱਤੀ ਹੈ, ਜਦੋਂ ਕਿ 2 ਨੇ ਸਟਾਕ 'ਤੇ 'ਸੇਲ' ਰੇਟਿੰਗ ਦਿੱਤੀ ਹੈ।