ਰਿਲਾਇੰਸ ਨੇ ਖ਼ਰੀਦੀ ਇਸ ਵੱਡੀ ਕੰਪਨੀ ''ਚ 54 ਫੀਸਦੀ ਹਿੱਸੇਦਾਰੀ, 983 ਕਰੋੜ ਰੁਪਏ ''ਚ ਹੋਈ ਡੀਲ

ਮੁੰਬਈ - ਮੁਕੇਸ਼ ਅੰਬਾਨੀ ਦੀ ਅਗਵਾਈ ਵਾਲੀ ਰਿਲਾਇੰਸ ਰਿਟੇਲ ਨੇ ਘਰੇਲੂ ਰੋਬੋਟਿਕਸ ਕੰਪਨੀ ਐਡਵਰਬ ਵਿੱਚ 13.2 ਕਰੋੜ ਅਮਰੀਕੀ ਡਾਲਰ (ਲਗਭਗ 983 ਕਰੋੜ ਰੁਪਏ) ਵਿੱਚ 54 ਫੀਸਦੀ ਹਿੱਸੇਦਾਰੀ ਖਰੀਦੀ ਹੈ। ਐਡਵਰਬ ਟੈਕਨਾਲੋਜੀਜ਼ ਦੇ ਸਹਿ-ਸੰਸਥਾਪਕ ਅਤੇ ਸੀਈਓ ਸੰਗੀਤ ਕੁਮਾਰ ਨੇ ਕਿਹਾ ਕਿ ਕੰਪਨੀ ਸੁਤੰਤਰ ਤੌਰ 'ਤੇ ਕੰਮ ਕਰਨਾ ਜਾਰੀ ਰੱਖੇਗੀ ਅਤੇ ਰਿਲਾਇੰਸ ਦੇ ਫੰਡਾਂ ਦੀ ਵਰਤੋਂ ਵਿਦੇਸ਼ਾਂ ਵਿੱਚ ਕਾਰੋਬਾਰ ਨੂੰ ਵਧਾਉਣ ਅਤੇ ਨੋਇਡਾ ਵਿੱਚ ਇੱਕ ਵਿਸ਼ਾਲ ਰੋਬੋਟ ਨਿਰਮਾਣ ਪਲਾਂਟ ਸਥਾਪਤ ਕਰਨ ਲਈ ਕੀਤੀ ਜਾਵੇਗੀ। ਕੰਪਨੀ ਦਾ ਪਹਿਲਾਂ ਹੀ ਨੋਇਡਾ ਵਿੱਚ ਇੱਕ ਨਿਰਮਾਣ ਪਲਾਂਟ ਹੈ, ਜਿੱਥੇ ਹਰ ਸਾਲ ਲਗਭਗ 10,000 ਰੋਬੋਟ ਬਣਾਏ ਜਾਂਦੇ ਹਨ।

ਇਹ ਵੀ ਪੜ੍ਹੋ : Bitcoin ਨਿਵੇਸ਼ਕਾਂ ਦਾ ਪਸੰਦੀਦਾ ਸਥਾਨ ਬਣਿਆ Puerto Rico, ਇਸ ਕਾਰਨ ਦੇ ਰਹੇ ਤਰਜੀਹ

ਕੁਮਾਰ ਨੇ ਕਿਹਾ, "ਇਸ ਨਿਵੇਸ਼ ਨਾਲ, ਰਿਲਾਇੰਸ ਦੀ ਐਡਵਰਬ ਵਿੱਚ ਲਗਭਗ 54 ਪ੍ਰਤੀਸ਼ਤ ਹਿੱਸੇਦਾਰੀ ਹੋਵੇਗੀ। ਉਹ ਕੰਪਨੀ ਦੇ ਸਭ ਤੋਂ ਵੱਡੇ ਸ਼ੇਅਰਧਾਰਕ ਬਣ ਗਏ ਹਨ। ਰਿਲਾਇੰਸ ਪਹਿਲਾਂ ਹੀ ਸਾਡੇ ਗਾਹਕਾਂ ਵਿੱਚੋਂ ਇੱਕ ਸੀ ਜਿਸ ਨਾਲ ਅਸੀਂ ਉਨ੍ਹਾਂ ਦੇ ਕਰਿਆਨੇ ਦੇ ਕਾਰੋਬਾਰ ਜੀਓ ਮਾਰਟ ਲਈ ਉੱਚ ਸਮਰੱਥਾ ਵਾਲੇ ਸਵੈਚਲਿਤ ਵੇਅਰਹਾਊਸ ਬਣਾਏ ਹਨ। ਸਹੂਲਤ ਅਤੇ ਭਰੋਸੇ ਵਰਗੇ ਕਾਰਕ ਪਹਿਲਾਂ ਹੀ ਮੌਜੂਦ ਸਨ, ਜਿਸ ਕਾਰਨ ਇਹ ਡੀਲ ਬਣੀ।"

ਉਨ੍ਹਾਂ ਕਿਹਾ ਕਿ ਰਿਲਾਇੰਸ ਰਿਟੇਲ ਨਾਲ ਰਣਨੀਤਕ ਸਾਂਝੇਦਾਰੀ ਨਵੀਂ ਊਰਜਾ ਪਹਿਲਕਦਮੀਆਂ ਰਾਹੀਂ 5ਜੀ, ਬੈਟਰੀ ਤਕਨਾਲੋਜੀ ਦਾ ਲਾਭ ਉਠਾਉਣ ਵਿੱਚ ਸਾਡੀ ਮਦਦ ਕਰੇਗੀ। “ਅਸੀਂ ਇੱਕ ਲਾਭਕਾਰੀ ਕੰਪਨੀ ਹਾਂ। ਅਸੀਂ ਇਸ ਪੈਸੇ ਦੀ ਵਰਤੋਂ ਵਿਦੇਸ਼ਾਂ ਵਿੱਚ ਵਿਸਤਾਰ ਕਰਨ ਅਤੇ ਨਿਰਮਾਣ ਪਲਾਂਟ ਲਗਾਉਣ ਲਈ ਕਰਾਂਗੇ।"

ਕੁਮਾਰ ਨੇ ਕਿਹਾ, "ਇਸ ਸਮੇਂ ਸਾਡੀ ਆਮਦਨ ਦਾ 80 ਪ੍ਰਤੀਸ਼ਤ ਭਾਰਤ ਤੋਂ ਆਉਂਦਾ ਹੈ ਪਰ ਅਗਲੇ 4-5 ਸਾਲਾਂ ਵਿੱਚ ਭਾਰਤ ਅਤੇ ਵਿਦੇਸ਼ੀ ਵਪਾਰ ਵਿੱਚ 50-50 ਪ੍ਰਤੀਸ਼ਤ ਹਿੱਸੇਦਾਰੀ ਹੋਣ ਦੀ ਉਮੀਦ ਹੈ। ਸਾਡੇ ਮਾਲੀਏ ਦਾ 15 ਪ੍ਰਤੀਸ਼ਤ ਸਾਫਟਵੇਅਰ ਦਾ ਹੈ, ਜਿਸ ਵਿੱਚ ਮਹੱਤਵਪੂਰਨ ਵਾਧਾ ਹੋਣ ਦਾ ਅਨੁਮਾਨ ਹੈ।” 2016 ਵਿੱਚ ਸਥਾਪਿਤ ਕੀਤੀ ਗਈ ਐਡਵਰਬ ਤੋਂ ਚਾਲੂ ਵਿੱਤੀ ਸਾਲ ਦੌਰਾਨ 400 ਕਰੋੜ ਰੁਪਏ ਦੀ ਆਮਦਨ ਹੋਣ ਦੀ ਉਮੀਦ ਹੈ, ਜੋ ਪਿਛਲੇ ਵਿੱਤੀ ਸਾਲ ਦੇ ਮੁਕਾਬਲੇ 100 ਫੀਸਦੀ ਵਾਧਾ ਦਰਸਾਉਂਦੀ ਹੈ। 

ਇਹ ਵੀ ਪੜ੍ਹੋ : ਕੋਰੋਨਾ ਆਫ਼ਤ ਦਰਮਿਆਨ ਚੀਨ ਦੀ ਆਰਥਿਕਤਾ 'ਚ ਸੁਧਾਰ, 2021 'ਚ 8.1% ਦੀ ਦਰ ਨਾਲ ਹੋਇਆ ਵਾਧਾ

ਨੋਟ - ਇਸ ਖ਼ਬਰ ਬਾਰੇ ਆਪਣੇ ਵਿਚਾਰ ਕੁਮੈਂਟ ਬਾਕਸ ਵਿਚ ਜ਼ਰੂਰ ਸਾਂਝੇ ਕਰੋ।