ਆਰ. ਬੀ. ਆਈ. ਜਾਰੀ ਕਰੇਗਾ 200 ਰੁਪਏ ਦੇ ਨੋਟ : ਵਿੱਤ ਮੰਤਰਾਲਾ

ਨਵੀਂ ਦਿੱਲੀ— ਖੁੱਲ੍ਹੇ ਪੈਸਿਆਂ ਦੀ ਕਮੀ ਤੋਂ ਜਲਦ ਹੀ ਛੁਟਕਾਰਾ ਮਿਲਣ ਵਾਲਾ ਹੈ। 50 ਰੁਪਏ ਦੇ ਨਵੇਂ ਨੋਟ ਦੇ ਐਲਾਨ ਦੇ ਬਾਅਦ ਬੁੱਧਵਾਰ ਨੂੰ ਵਿੱਤ ਮੰਤਰਾਲੇ ਨੇ ਸਪੱਸ਼ਟ ਕਰ ਦਿੱਤਾ ਹੈ ਕਿ 200 ਰੁਪਏ ਦੇ ਨੋਟ ਜਾਰੀ ਹੋਣਗੇ। ਭਾਰਤੀ ਰਿਜ਼ਰਵ ਬੈਂਕ (ਆਰ. ਬੀ. ਆਈ.) ਦੀ ਕੋਸ਼ਿਸ਼ ਹੈ ਕਿ ਕਿਸੇ ਤਰ੍ਹਾਂ ਨਕਲੀ ਨੋਟਾਂ 'ਤੇ ਲਗਾਮ ਲਾਈ ਜਾ ਸਕੇ, ਇਸ ਲਈ ਪਹਿਲੀ ਵਾਰ 200 ਰੁਪਏ ਦਾ ਨੋਟ ਲਿਆਂਦਾ ਜਾ ਰਿਹਾ ਹੈ। ਸਤੰਬਰ ਦੇ ਪਹਿਲੇ ਹਫਤੇ ਇਹ ਨੋਟ ਜਾਰੀ ਕੀਤੇ ਜਾ ਸਕਦੇ ਹਨ। ਜਾਣਕਾਰਾਂ ਮੁਤਾਬਕ ਕਾਲੇ ਧਨ ਨੂੰ ਰੋਕਣ ਲਈ ਇਹ ਕਦਮ ਚੁੱਕੇ ਜਾ ਰਹੇ ਹਨ। ਸੂਤਰਾਂ ਮੁਤਾਬਕ 200 ਰੁਪਏ ਦੇ 50 ਕਰੋੜ ਨੋਟ ਬਾਜ਼ਾਰ 'ਚ ਲਿਆਂਦੇ ਜਾਣਗੇ।
ਇਕ ਸੂਤਰ ਮੁਤਾਬਕ, 100 ਰੁਪਏ ਅਤੇ 500 ਰੁਪਏ ਵਿਚਕਾਰ ਦਾ ਕੋਈ ਨੋਟ ਅਜੇ ਤਕ ਉਪਲੱਬਧ ਨਹੀਂ ਹੈ, ਇਸ ਲਈ ਆਰ. ਬੀ. ਆਈ. ਦਾ ਮੰਨਣਾ ਹੈ ਕਿ 200 ਰੁਪਏ ਦਾ ਨੋਟ ਬਹੁਤ ਫਾਇਦੇਮੰਦ ਹੋਵੇਗਾ ਅਤੇ ਇਸ ਨਾਲ ਨੋਟਾਂ ਦੀ ਉਪਲੱਬਧਾ ਵੀ ਯਕੀਨੀ ਕੀਤੀ ਜਾ ਸਕੇਗੀ।
ਇਕ ਬੈਂਕ ਅਧਿਕਾਰੀ ਮੁਤਾਬਕ, 200 ਰੁਪਏ ਦੇ ਨੋਟ ਆਉਣ ਦੇ ਦੋ ਫਾਇਦੇ ਹੋਣਗੇ, ਇਕ ਤਾਂ ਨਕਦ ਲੈਣ-ਦੇਣ 'ਚ ਆਸਾਨੀ ਹੋਵੇਗੀ ਅਤੇ ਦੂਜਾ ਇਸ ਨਾਲ ਕੁੱਲ ਕਰੰਸੀ 'ਚ ਛੋਟੇ ਨੋਟਾਂ ਦੀ ਗਿਣਤੀ ਵਧ ਜਾਵੇਗੀ। ਤੁਹਾਨੂੰ ਦੱਸ ਦੇਈਏ ਕਿ ਨੋਟਬੰਦੀ ਤੋਂ ਪਹਿਲਾਂ 500 ਦੇ 1,717 ਕਰੋੜ ਨੋਟ ਸਨ ਅਤੇ 1000 ਦੇ 686 ਕਰੋੜ ਸਨ। ਐੱਸ. ਬੀ. ਆਈ. ਦੇ ਸੋਧ ਮੁਤਾਬਕ, ਨੋਟਬੰਦੀ ਦੇ ਬਾਅਦ ਵੱਡੇ ਨੋਟਾਂ ਦੇ ਹਿੱਸੇ 'ਚ 70 ਫੀਸਦੀ ਦੀ ਕਮੀ ਆਈ ਹੈ।