ਬਿਹਤਰ ਮਾਨਸੂਨ ਕਾਰਨ ਘਟ ਸਕਦੀਆਂ ਹਨ ਖੁਰਾਕੀ ਵਸਤਾਂ ਦੀਆਂ ਕੀਮਤਾਂ : RBI ਦੀ ਰਿਪੋਰਟ
06/28/2024 6:44:53 PM
ਨਵੀਂ ਦਿੱਲੀ : ਭਾਰਤੀ ਰਿਜ਼ਰਵ ਬੈਂਕ ਦੀ ਵਿੱਤੀ ਸਥਿਰਤਾ ਰਿਪੋਰਟ ਦੇ ਅਨੁਸਾਰ, 2024 ਵਿੱਚ ਆਮ ਤੋਂ ਵੱਧ ਦੱਖਣ-ਪੱਛਮੀ ਮਾਨਸੂਨ ਬਾਰਿਸ਼ ਆਉਣ ਵਾਲੇ ਸਾਉਣੀ ਸੀਜ਼ਨ ਲਈ ਇੱਕ ਚੰਗਾ ਸੰਕੇਤ ਹੈ ਅਤੇ ਇਸ ਨਾਲ ਖੁਰਾਕੀ ਕੀਮਤਾਂ 'ਤੇ ਦਬਾਅ ਘੱਟ ਸਕਦਾ ਹੈ। ਰਿਪੋਰਟ ਵਿੱਚ ਕਿਹਾ ਗਿਆ ਹੈ ਕਿ ਮਹਿੰਗਾਈ ਵਿੱਚ ਗਿਰਾਵਟ ਦੇ ਸੰਕੇਤ ਹਨ, ਹਾਲਾਂਕਿ ਇਹ ਅਸਮਾਨ ਹੈ। ਇਸ ਦੇ ਨਾਲ ਹੀ ਵਿੱਤੀ ਘਾਟੇ 'ਚ ਕਮੀ ਦੇ ਮਾਮਲੇ 'ਚ ਸਥਿਤੀ ਅੱਗੇ ਵਧ ਰਹੀ ਹੈ।
ਮਈ ਮਹੀਨੇ ਵਿੱਚ ਸਮੁੱਚੀ ਮਹਿੰਗਾਈ ਦਰ 4.75 ਫੀਸਦੀ ਦੇ 12 ਮਹੀਨਿਆਂ ਦੇ ਹੇਠਲੇ ਪੱਧਰ 'ਤੇ ਆ ਗਈ ਹੈ, ਜੋ ਅਪ੍ਰੈਲ ਦੇ 4.83 ਫੀਸਦੀ ਤੋਂ ਘੱਟ ਹੈ। ਇਸ ਗਿਰਾਵਟ ਦੇ ਬਾਵਜੂਦ ਖੁਰਾਕੀ ਮਹਿੰਗਾਈ ਦਰ ਲਗਾਤਾਰ ਚੌਥੇ ਮਹੀਨੇ ਉੱਚੀ ਰਹੀ ਅਤੇ ਮਈ 'ਚ ਇਹ 8.5 ਫੀਸਦੀ ਨੂੰ ਪਾਰ ਕਰ ਗਈ। ਕੋਰ ਸੈਕਟਰ ਮਹਿੰਗਾਈ, ਜਿਸ ਵਿੱਚ ਭੋਜਨ ਅਤੇ ਈਂਧਨ ਸ਼ਾਮਲ ਨਹੀਂ ਹੈ, ਮਈ ਵਿੱਚ 3 ਪ੍ਰਤੀਸ਼ਤ ਤੱਕ ਡਿੱਗੀ, ਜੋ ਮੌਜੂਦਾ ਸੀਪੀਆਈ ਲੜੀ ਵਿੱਚ ਸਭ ਤੋਂ ਨੀਵਾਂ ਪੱਧਰ ਹੈ।
ਦੂਜੇ ਪਾਸੇ, ਮੈਕਰੋ-ਆਰਥਿਕ ਅਤੇ ਵਿੱਤੀ ਸਥਿਰਤਾ ਦੇ ਕਾਰਨ, ਅਸਲ ਜੀਡੀਪੀ ਵਿਕਾਸ ਦਰ ਲਗਾਤਾਰ ਵਧ ਰਹੀ ਹੈ, ਰਿਪੋਰਟ ਵਿੱਚ ਕਿਹਾ ਗਿਆ ਹੈ। ਸੰਸਾਰਕ ਝਟਕਿਆਂ ਦੇ ਬਾਵਜੂਦ, ਵਿਦੇਸ਼ੀ ਖੇਤਰ ਵਿੱਚ ਸੁਧਾਰ ਹੋ ਰਿਹਾ ਹੈ।
ਮੁਦਰਾ ਨੀਤੀ ਕਮੇਟੀ ਨੇ ਵਿੱਤੀ ਸਾਲ 2024-25 ਲਈ ਜੀਡੀਪੀ ਵਿਕਾਸ ਦਰ ਦਾ ਅਨੁਮਾਨ 7 ਫੀਸਦੀ ਤੋਂ ਵਧਾ ਕੇ 7.2 ਫੀਸਦੀ ਕਰ ਦਿੱਤਾ ਹੈ। ਰਿਪੋਰਟ 'ਚ ਕਿਹਾ ਗਿਆ ਹੈ ਕਿ ਮੌਜੂਦਾ ਆਰਥਿਕ ਸਥਿਤੀ ਕੁਝ ਸਕਾਰਾਤਮਕ ਕਾਰਨਾਂ ਨਾਲ ਬਿਹਤਰ ਹਾਲਾਤ ਦਿਖਾ ਰਹੀ ਹੈ। ਘਰੇਲੂ ਮੰਗ ਮਜ਼ਬੂਤ ਹੈ। ਵਪਾਰਕ ਵਿਸ਼ਵਾਸ ਵਧਿਆ ਹੈ। ਇਸ ਕਾਰਨ ਭਾਰਤ ਦੁਨੀਆ ਦੀਆਂ ਕਈ ਹੋਰ ਅਰਥਵਿਵਸਥਾਵਾਂ ਨਾਲੋਂ ਬਿਹਤਰ ਪ੍ਰਦਰਸ਼ਨ ਕਰ ਰਿਹਾ ਹੈ।
