ਪਹਿਲੀ ਵਿਸ਼ਵ AI ਚੈਂਪਿਅਨਸ਼ਿਪ ਦੇ 3 ਜੇਤੂਆਂ ਵਿਚੋਂ 2 ਭਾਰਤੀ, ਮਿਲਿਆ 22 ਕਰੋੜ ਰੁਪਏ ਦਾ ਇਨਾਮ

ਇੰਟਰਨੈਸ਼ਨਲ ਡੈੱਸਕ -  ਦੁਨੀਆ ਦੀ ਪਹਿਲੀ ਏਆਈ ਚੈਂਪੀਅਨਸ਼ਿਪ ਦੁਬਈ ਵਿੱਚ ਆਯੋਜਿਤ ਕੀਤੀ ਗਈ। ਇਸ ਮੁਕਾਬਲੇ ਦੇ 3 ਵਿਜੇਤਾ ਵਿੱਚੋਂ 2 ਚੈਂਪੀਅਨ ਭਾਰਤੀ ਵਿਅਕਤੀ ਸਨ। ਮੁੰਬਈ ਦੇ ਆਦਿਤਿਆ ਨਾਇਰ ਅਤੇ ਕੋਚੀ ਦੇ ਅਜੈ ਸਿਰਿਲ ਨੇ ਵਰਲਡ ਬੈਸਟ ਪ੍ਰੌਮਪਟ ਇੰਜੀਨੀਅਰ ਦਾ ਖਿਤਾਬ ਜਿੱਤਿਆ। ਅਜੈ ਅਤੇ ਆਦਿਤਿਆ ਨੇ ਕੋਡਿੰਗ ਅਤੇ ਸਾਹਿਤ ਸ਼੍ਰੇਣੀਆਂ ਵਿੱਚ ਜਿੱਤ ਪ੍ਰਾਪਤ ਕੀਤੀ। ਇਸ ਸਖ਼ਤ ਮੁਕਾਬਲੇ ਵਿੱਚ ਲਗਭਗ 100 ਤੋਂ ਵੱਧ ਦੇਸ਼ਾਂ ਦੇ ਇੰਜੀਨੀਅਰਾਂ ਨੇ ਹਿੱਸਾ ਲਿਆ ਸੀ। ਕਰੀਬ 10 ਹਜ਼ਾਰ ਉਮੀਦਵਾਰਾਂ ਨੂੰ ਹਰਾ ਕੇ ਅਜੇ ਅਤੇ ਅਦਿੱਤਿਆ ਚੈਂਪਿਅਨ ਬਣੇ ਹਨ। 

ਕੋਚੀ ਦੇ ਰਹਿਣ ਵਾਲੇ ਏਆਈ ਚੈਂਪੀਅਨ ਅਜੇ ਸਿਰਿਲ ਨੇ ਬੀਆਈਟੀ ਮੇਸਰਾ ਤੋਂ ਇੰਜੀਨੀਅਰਿੰਗ ਦੀ ਡਿਗਰੀ ਹਾਸਲ ਕੀਤੀ ਹੈ। ਇਸ ਤੋਂ ਬਾਅਦ ਵਿੱਚ ਉਸਨੇ ਆਈਆਈਐਮ ਕੋਝੀਕੋਡ ਤੋਂ ਐਮਬੀਏ ਕੀਤਾ। ਹੁਣ ਉਹ ਦੁਬਈ ਦੀ ਦੂਰਸੰਚਾਰ ਕੰਪਨੀ Etisalat ਵਿੱਚ ਕੰਮ ਕਰ ਰਹੇ ਹਨ। ਇਥੇ ਉਹ ਸਾਲ 2019 ਤੋਂ ਕੰਮ ਕਰ ਰਹੇ ਹਨ। ਮੁਕਾਬਲੇ ਬਾਰੇ ਅਜੇ ਨੇ ਦੱਸਿਆ ਕਿ ਇਸ ਵਿਚ ਸਭ ਤੋਂ ਵੱਡੀ ਚੁਣੌਤੀ ਸਮੇਂ ਦੀ ਸੀ। ਮੈਨੂੰ 10 ਮਿੰਟਾਂ ਵਿੱਚ ਇੱਕ ਮੌਸਮ ਐਪ ਬਣਾਉਣਾ ਪਿਆ। ਚੈਂਪੀਅਨਸ਼ਿਪ ਵਿੱਚ ਬਹੁਤ ਸਾਰੇ ਲੋਕ ਮੇਰੇ ਨਾਲੋਂ ਬਿਹਤਰ ਤਕਨਾਲੋਜੀ ਨੂੰ ਜਾਣਦੇ ਸਨ, ਪਰ ਮੈਂ ਇੱਕ ਐਪ ਨੂੰ ਡਿਜ਼ਾਈਨ ਕਰਨ ਦੀ ਕੋਸ਼ਿਸ਼ ਕੀਤੀ ਜੋ ਗਾਹਕ ਦੇ ਦ੍ਰਿਸ਼ਟੀਕੋਣ ਤੋਂ ਸੰਪੂਰਨ ਸੀ। ਸ਼ਾਇਦ ਇਹੀ ਕਾਰਨ ਸੀ ਕਿ ਮੈਂ ਜਿੱਤ ਸਕਿਆ। ਭਾਰਤ ਨੂੰ ਏਆਈ ਵਿੱਚ ਕਿਵੇਂ ਅੱਗੇ ਵਧਣਾ ਚਾਹੀਦਾ ਹੈ? ਇਸ 'ਤੇ ਉਹ ਕਹਿੰਦੇ ਹਨ, 'ਜੇਕਰ ਅਸੀਂ UPI ਪੇਮੈਂਟ 'ਚ AI 'ਤੇ ਕੰਮ ਕਰਦੇ ਹਾਂ, ਤਾਂ AI ਬੇਸਡ ਪੇਮੈਂਟ ਮਾਡਲ ਭਾਰਤ ਤੋਂ ਹੀ ਸਾਹਮਣੇ ਆਵੇਗਾ।

ਚੈਂਪੀਅਨਸ਼ਿਪ ਦੇ ਦੂਜੇ ਭਾਰਤੀ ਵਿਜੇਤਾ ਸਾਹਿਤ ਵਰਗ ਵਿੱਚ ਮੁੰਬਈ ਦੇ ਆਦਿਤਿਆ ਨਾਇਰ ਵਿਸ਼ਵ ਚੈਂਪੀਅਨ ਬਣ ਗਏ ਹਨ। ਉਨ੍ਹਾਂ ਨੂੰ 10 ਮਿੰਟਾਂ ਵਿੱਚ AI ਰਾਹੀਂ 200 ਸ਼ਬਦਾਂ ਦੀ ਕਹਾਣੀ ਲਿਖਣੀ ਸੀ। ਆਦਿਤਿਆ ਦਾ ਕਹਿਣਾ ਹੈ, 'ਮੈਨੂੰ ਬਚਪਨ ਤੋਂ ਹੀ ਤਕਨੀਕ ਅਤੇ ਕਹਾਣੀਆਂ ਦਾ ਸ਼ੌਕ ਹੈ। ਇਸ ਤੋਂ ਪਹਿਲਾਂ ਮੈਂ ਪੱਤਰਕਾਰ ਵਜੋਂ ਵੀ ਕੰਮ ਕੀਤਾ ਹੈ।  ਇਸ ਲਈ ਮੈਨੂੰ ਲਿਖਣ ਦਾ ਤਜਰਬਾ ਸੀ। ਹਾਲਾਂਕਿ, ਏਆਈ ਦੀ ਮਦਦ ਨਾਲ ਕਹਾਣੀ ਲਿਖਣਾ ਮੇਰੇ ਲਈ ਇੱਕ ਨਵਾਂ ਅਨੁਭਵ ਸੀ। ਮੈਂ ਪ੍ਰੋਂਪਟ ਵਿੱਚ ਹੋਰ ਜਾਣਕਾਰੀ ਦੇਣ ਦੀ ਕੋਸ਼ਿਸ਼ ਕੀਤੀ ਤਾਂ ਜੋ ਕਹਾਣੀ ਦਿਲਚਸਪ ਹੋ ਸਕੇ। AI ਦੀ ਤਾਕਤ ਇਸਦੀ ਗਤੀ ਹੈ। ਚੈਂਪੀਅਨਸ਼ਿਪ ਵਿੱਚ ਏਆਈ ਨੇ 10-15 ਮਿੰਟਾਂ ਵਿੱਚ 7 ​​ਕਹਾਣੀਆਂ ਲਿਖੀਆਂ ਸਨ, ਜਿਸ ਕਾਰਨ ਮੈਂ ਨਵੇਂ ਵਿਚਾਰ ਪ੍ਰਾਪਤ ਕਰਨ ਵਿੱਚ ਕਾਮਯਾਬ ਰਿਹਾ। ਆਦਿਤਿਆ ਅਲਟ੍ਰੂਸਟਿਕ ਏਆਈ ਵਿੱਚ ਕੰਮ ਕਰ ਰਿਹਾ ਹੈ।

ਜ਼ਿਕਰਯੋਗ ਹੈ ਕਿ ਇਹ ਦੁਨੀਆ ਦਾ ਪਹਿਲਾ AI ਅਧਾਰਿਤ ਮੁਕਾਬਲਾ ਹੈ, ਜਿਸ ਦਾ ਆਯੋਜਨ ਦੁਬਈ ਫਿਊਚਰ ਫਾਊਂਡੇਸ਼ਨ ਦੁਆਰਾ ਮਿਊਜ਼ਿਅਮ ਆਫ਼ ਫਿਊਚਰ ਵਿਖੇ ਆਯੋਜਿਤ ਕੀਤਾ ਹੈ। ਗਲੋਬਲ ਪ੍ਰੋਂਪਟ ਇੰਜਨੀਅਰਿੰਗ ਚੈਂਪੀਅਨਸ਼ਿਪ ਵਿੱਚ ਲਗਭਗ 100 ਦੇਸ਼ਾਂ ਦੇ 10 ਹਜ਼ਾਰ ਤੋਂ ਵੱਧ ਉਮੀਦਵਾਰਾਂ ਨੇ ਹਿੱਸਾ ਲਿਆ। ਇਸ ਵਿੱਚ 3 ਸ਼੍ਰੇਣੀਆਂ ਸਨ: ਕਲਾ, ਸਾਹਿਤ ਅਤੇ ਕੋਡਿੰਗ। 10 ਮਿੰਟ ਦੇ ਸਮੇਂ ਵਿਚ ਉਮੀਦਵਾਰਾਂ ਨੂੰ ਇਕ ਟਾਸਕ ਪੂਰਾ ਕਰਨ ਲਈ ਦਿੱਤਾ ਗਿਆ ਸੀ। ਹਰ ਸ਼੍ਰੇਣੀ ਵਿਚੋਂ ਇਕ ਵਿਜੇਤਾ ਘੋਸ਼ਿਤ ਕੀਤਾ ਗਿਆ ਸੀ ਅਤੇ ਵਿਜੇਤਾਵਾਂ ਨੂੰ 22 ਕਰੋੜ ਰੁਪਏ ਦੀ ਸੰਯੁਕਤ ਰਾਸ਼ੀ ਮਿਲੀ ਹੈ।