ਮਹਿਲਾ ਯੂਰੋ ਟੂਰਨਾਮੈਂਟ : ਸੈਮੀਫਾਈਨਲ ਵਿਚ ਇਟਲੀ ਨੂੰ ਹਰਾ ਕੇ ਇੰਗਲੈਂਡ ਫਾਈਨਲ ''ਚ ਪੁੱਜਾ

ਜਿਨੇਵਾ- ਸਾਬਕਾ ਜੇਤੂ ਇੰਗਲੈਂਡ ਨੇ ਹਾਰ ਦੀ ਕਗਾਰ 'ਤੇ ਪਹੁੰਚਣ ਤੋਂ ਬਾਅਦ ਸ਼ਾਨਦਾਰ ਵਾਪਸੀ ਕਰਦੇ ਹੋਏ ਇਟਲੀ ਨੂੰ 2-1 ਨਾਲ ਹਰਾ ਕੇ ਮਹਿਲਾ ਯੂਰਪੀਅਨ ਫੁੱਟਬਾਲ ਚੈਂਪੀਅਨਸ਼ਿਪ (ਯੂਰੋ 2025) ਦੇ ਫਾਈਨਲ ਵਿਚ ਪ੍ਰਵੇਸ਼ ਕੀਤਾ। ਜਦੋਂ ਇਟਲੀ ਦੀ ਜਿੱਤ ਤੈਅ ਲੱਗ ਰਹੀ ਸੀ ਤਦ ਮੈਚ ਦਾ ਪਾਸਾ ਇਕਦਮ ਨਾਲ ਪਲਟ ਗਿਆ ਤੇ ਇੰਗਲੈਂਡ ਫਾਈਨਲ ਵਿਚ ਪਹੁੰਚਣ ਵਿਚ ਸਫਲ ਰਿਹਾ, ਜਿੱਥੇ ਉਸਦਾ ਸਾਹਮਣਾ ਜਰਮਨੀ ਤੇ ਸਪੇਨ ਵਿਚਾਲੇ ਹੋਣ ਵਾਲੇ ਦੂਜੇ ਸੈਮੀਫਾਈਨਲ ਦੇ ਜੇਤ ਨਾਲ ਹੋਵੇਗਾ।

ਇਟਲੀ ਨੇ ਬਾਰਬਰਾ ਬੋਨਸੀ ਦੇ 33ਵੇਂ ਮਿੰਟ ਵਿਚ ਕੀਤੇ ਗਏ ਗੋਲ ਨਾਲ ਬੜ੍ਹਤ ਹਾਸਲ ਕੀਤੀ, ਜਿਸ ਨੂੰ ਉਸ ਨੇ ਨਿਰਧਾਰਿਤ ਸਮੇਂ ਦੀ ਖੇਡ ਦੇ ਆਖਰੀ ਪਲਾਂ ਤੱਕ ਬਰਕਰਾਰ ਰੱਖਿਆ ਸੀ । ਇਟਲੀ ਜਦੋਂ ਜਿੱਤ ਦਾ ਜਸ਼ਨ ਮਨਾਉਣ ਦੀ ਤਿਆਰੀ ਕਰ ਰਿਹਾ ਸੀ ਤਦ ਦੂਜੇ ਹਾਫ ਦੇ ਇੰਜਰੀ ਟਾਈਮ ਦੇ ਛੇਵੇਂ ਮਿੰਟ ਵਿਚ ਮਿਸ਼ੇਲ ਅਗਯੇਮੰਗ ਨੇ ਗੋਲ ਕਰ ਕੇ ਇੰਗਲੈਂਡ ਨੂੰ ਬਰਾਬਰੀ ਦਿਵਾ ਦਿੱਤੀ।

ਇਸ ਨਾਲ ਮੈਚ ਵਾਧੂ ਸਮੇਂ ਤੱਕ ਖਿੱਚਿਆ ਗਿਆ । ਇਸ ਤੋਂ ਬਾਅਦ ਜਦੋਂ ਲੱਗ ਰਿਹਾ ਸੀ ਕਿ ਮੈਚ ਦਾ ਫੈਸਲਾ ਪੈਨਲਟੀ ਸ਼ੂਟਆਊਟ ਵਿਚ ਹੋਵੇਗਾ ਤਦ ਇੰਗਲੈਂਡ ਨੇ 119ਵੇਂ ਮਿੰਟ ਵਿਚ ਕਲੋ ਕੇਲੀ ਦੇ ਗੋਲ ਨਾਲ ਜਿੱਤ ਹਾਸਲ ਕਰ ਲਈ। ਇਟਲੀ ਦੀਆਂ ਖਿਡਾਰਨਾਂ ਇਸ ਹਾਰ ਤੋਂ ਬਾਅਦ ਆਪਣੀਆਂ ਭਾਵਨਾਵਾਂ ਨੂੰ ਕਾਬੂ ਵਿਚ ਨਹੀਂ ਰੱਖ ਸਕੀਆਂ ਤੇ ਉਨ੍ਹਾਂ ਦੇ ਹੰਝੂ ਨਿਕਲ ਆਏ।