15 ਸਾਲ ਦੀ ਉਮਰ 'ਚ ਬੇਹੱਦ ਪਰਿਪੱਕ ਹਨ ਵੈਭਵ ਸੂਰਿਆਵੰਸ਼ੀ: ਭੁਵਨੇਸ਼ਵਰ ਕੁਮਾਰ
Saturday, Apr 11, 2026 - 05:06 PM (IST)
ਗੁਹਾਟੀ : ਰਾਇਲ ਚੈਲੰਜਰਜ਼ ਬੈਂਗਲੁਰੂ (RCB) ਦੇ ਤੇਜ਼ ਗੇਂਦਬਾਜ਼ ਭੁਵਨੇਸ਼ਵਰ ਕੁਮਾਰ ਨੇ ਰਾਜਸਥਾਨ ਰਾਇਲਜ਼ ਦੇ ਨੌਜਵਾਨ ਬੱਲੇਬਾਜ਼ ਵੈਭਵ ਸੂਰਿਆਵੰਸ਼ੀ ਦੀ ਜੰਮ ਕੇ ਤਾਰੀਫ਼ ਕੀਤੀ ਹੈ। ਉਨ੍ਹਾਂ ਕਿਹਾ ਕਿ ਵੈਭਵ ਦੀ ਉਮਰ ਭਾਵੇਂ ਮਹਿਜ਼ 15 ਸਾਲ ਹੈ, ਪਰ ਉਹ ਮੈਦਾਨ 'ਤੇ ਬਹੁਤ ਹੀ ਪਰਿਪੱਕਤਾ (Maturity) ਅਤੇ ਸਪੱਸ਼ਟਤਾ ਨਾਲ ਬੱਲੇਬਾਜ਼ੀ ਕਰਦੇ ਹਨ।
ਬਕਾਇਦਾ ਕ੍ਰਿਕਟ ਸ਼ਾਟਸ ਅਤੇ ਸ਼ਾਨਦਾਰ ਬੱਲੇਬਾਜ਼ੀ
ਮੈਚ ਤੋਂ ਬਾਅਦ ਪ੍ਰੈਸ ਕਾਨਫਰੰਸ ਦੌਰਾਨ ਭੁਵਨੇਸ਼ਵਰ ਕੁਮਾਰ ਨੇ ਕਿਹਾ, "ਜਿਸ ਤਰ੍ਹਾਂ ਉਹ ਸ਼ਾਟਸ ਖੇਡਦਾ ਹੈ, ਉਹ ਬਕਾਇਦਾ ਕ੍ਰਿਕਟ ਸ਼ਾਟ ਹੁੰਦੇ ਹਨ। 15 ਸਾਲ ਦੀ ਉਮਰ ਵਿੱਚ ਉਹ ਕਾਫੀ ਪਰਿਪੱਕ ਹੈ। ਜਿਸ ਤਰ੍ਹਾਂ ਉਹ ਬੱਲੇਬਾਜ਼ੀ ਕਰ ਰਿਹਾ ਹੈ, ਸਾਨੂੰ ਉਸ ਨੂੰ ਇਸ ਦਾ ਕ੍ਰੈਡਿਟ ਦੇਣਾ ਚਾਹੀਦਾ ਹੈ"।ਜ਼ਿਕਰਯੋਗ ਹੈ ਕਿ ਸੂਰਿਆਵੰਸ਼ੀ ਨੇ ਆਰਸੀਬੀ ਵਿਰੁੱਧ ਮਹਿਜ਼ 26 ਗੇਂਦਾਂ ਵਿੱਚ 78 ਦੌੜਾਂ ਬਣਾ ਕੇ ਰਾਜਸਥਾਨ ਰਾਇਲਜ਼ ਨੂੰ 6 ਵਿਕਟਾਂ ਨਾਲ ਜਿੱਤ ਦਿਵਾਈ।
ਦਬਾਅ ਅਤੇ ਰਣਨੀਤੀ 'ਤੇ ਬੋਲੇ ਭੁਵਨੇਸ਼ਵਰ
ਹਾਰ ਦੇ ਬਾਵਜੂਦ ਭੁਵਨੇਸ਼ਵਰ ਨੇ ਕਿਹਾ ਕਿ ਆਰਸੀਬੀ ਕਦੇ ਵੀ ਪੂਰੀ ਤਰ੍ਹਾਂ ਦਬਾਅ ਵਿੱਚ ਨਹੀਂ ਸੀ। ਉਨ੍ਹਾਂ ਅਨੁਸਾਰ, "ਇਹ ਟੀ-20 ਮੈਚ ਹੈ। ਜੇਕਰ ਇੱਕ 15 ਸਾਲ ਦਾ ਲੜਕਾ ਇਸ ਤਰ੍ਹਾਂ ਬੱਲੇਬਾਜ਼ੀ ਕਰ ਰਿਹਾ ਹੈ ਜਾਂ ਕੋਈ 25 ਸਾਲ ਦਾ, ਇਹ ਇਸ ਫਾਰਮੈਟ ਦਾ ਹਿੱਸਾ ਹੈ"।
ਉਨ੍ਹਾਂ ਮੰਨਿਆ ਕਿ ਟੀਮ ਨੇ ਰਣਨੀਤੀ ਬਣਾਈ ਸੀ ਅਤੇ ਇੱਕ ਕੈਚ ਵੀ ਛੁੱਟਿਆ, ਪਰ ਉਹ ਆਪਣੀ ਯੋਜਨਾ 'ਤੇ ਪੂਰੀ ਤਰ੍ਹਾਂ ਅਮਲ ਨਹੀਂ ਕਰ ਸਕੇ।
