ਟਾਪ ਸੀਡ ਸਵਿਤੋਲਿਨਾ ਨੇ ਆਕਲੈਂਡ ਦਾ ਖਿਤਾਬ ਜਿੱਤਿਆ

ਵੈਲਿੰਗਟਨ : ਟੌਪ-ਸੀਡ ਯੂਕਰੇਨੀ ਖਿਡਾਰਨ ਐਲੀਨਾ ਸਵਿਤੋਲੀਨਾ ਨੇ ਐਤਵਾਰ ਨੂੰ ਨਿਊਜ਼ੀਲੈਂਡ ਦੇ ਆਕਲੈਂਡ ਵਿੱਚ ਖੇਡੇ ਗਏ ਏਸੀਬੀ (ASB) ਕਲਾਸਿਕ ਦੇ ਫਾਈਨਲ ਵਿੱਚ ਚੀਨ ਦੀ ਵਾਂਗ ਸ਼ਿਨਿਊ ਨੂੰ ਹਰਾ ਕੇ ਆਪਣੇ ਕਰੀਅਰ ਦਾ 19ਵਾਂ ਡਬਲਯੂ.ਟੀ.ਏ. (WTA) ਖਿਤਾਬ ਜਿੱਤ ਲਿਆ ਹੈ। 31 ਸਾਲਾ ਸਵਿਤੋਲੀਨਾ ਨੇ ਇਹ ਮੁਕਾਬਲਾ 6-3, 7-6(8) ਨਾਲ ਆਪਣੇ ਨਾਮ ਕੀਤਾ। ਮੈਚ ਦੌਰਾਨ ਉਨ੍ਹਾਂ ਨੇ ਸ਼ਾਨਦਾਰ ਗੇਮ ਦਾ ਪ੍ਰਦਰਸ਼ਨ ਕਰਦਿਆਂ ਸਾਰੇ ਚਾਰ ਬ੍ਰੇਕ ਪੁਆਇੰਟ ਬਚਾਏ ਅਤੇ ਆਪਣੀ ਪਹਿਲੀ ਸਰਵਿਸ 'ਤੇ 74 ਫੀਸਦੀ ਅੰਕ ਹਾਸਲ ਕੀਤੇ।

ਸਵਿਤੋਲੀਨਾ ਨੇ ਮੈਚ ਦਾ ਇੱਕੋ-ਇੱਕ ਬ੍ਰੇਕ 4-2 ਦੇ ਸਕੋਰ 'ਤੇ ਵਾਂਗ ਦੀ ਸਰਵਿਸ ਤੋੜ ਕੇ ਹਾਸਲ ਕੀਤਾ, ਜਿਸ ਤੋਂ ਬਾਅਦ ਉਨ੍ਹਾਂ ਨੇ ਦੂਜੇ ਸੈੱਟ ਦਾ ਟਾਈਬ੍ਰੇਕ ਜਿੱਤ ਕੇ ਖਿਤਾਬ 'ਤੇ ਕਬਜ਼ਾ ਕਰ ਲਿਆ। ਇੱਕ ਘੰਟਾ 42 ਮਿੰਟ ਤੱਕ ਚੱਲੇ ਇਸ ਮੁਕਾਬਲੇ ਤੋਂ ਬਾਅਦ ਕੋਰਟ 'ਤੇ ਸਵਿਤੋਲੀਨਾ ਨੇ ਕਿਹਾ ਕਿ ਇਕ ਹੋਰ ਖਿਤਾਬ ਜਿੱਤਣਾ ਵਾਕਈ ਬਹੁਤ ਵਧੀਆ ਅਹਿਸਾਸ ਹੈ, ਖਾਸ ਕਰਕੇ ਸਾਲ ਦੇ ਚੰਗੇ ਅੰਤ ਤੋਂ ਬਾਅਦ। ਜ਼ਿਕਰਯੋਗ ਹੈ ਕਿ ਸਵਿਤੋਲੀਨਾ ਨੇ 2025 ਦੇ ਅਖੀਰ ਵਿੱਚ ਸੱਟ ਕਾਰਨ ਲਗਾਤਾਰ ਚਾਰ ਮੈਚ ਹਾਰਨ ਦੇ ਸਿਲਸਿਲੇ ਨੂੰ ਖਤਮ ਕਰਦਿਆਂ ਇਸ ਡਬਲਯੂ.ਟੀ.ਏ. 250 ਈਵੈਂਟ ਵਿੱਚ ਲਗਾਤਾਰ ਪੰਜ ਮੈਚ ਜਿੱਤੇ ਹਨ।

ਦੂਜੇ ਪਾਸੇ, ਸੱਤਵੀਂ ਦਰਜਾ ਪ੍ਰਾਪਤ 24 ਸਾਲਾ ਵਾਂਗ ਸ਼ਿਨਿਊ ਨੇ ਸ਼ਨੀਵਾਰ ਨੂੰ ਸੈਮੀਫਾਈਨਲ ਵਿੱਚ ਫਿਲੀਪੀਨਜ਼ ਦੀ ਐਲੇਗਜ਼ੈਂਡਰਾ ਏਲਾ ਨੂੰ ਹਰਾ ਕੇ ਆਪਣੇ ਕਰੀਅਰ ਦੇ ਦੂਜੇ ਫਾਈਨਲ ਵਿੱਚ ਜਗ੍ਹਾ ਬਣਾਈ ਸੀ। ਇਸ ਤੋਂ ਪਹਿਲਾਂ ਉਹ ਪਿਛਲੇ ਸਾਲ ਜੂਨ ਵਿੱਚ ਬਰਲਿਨ ਵਿੱਚ ਘਾਹ ਦੇ ਕੋਰਟ 'ਤੇ ਫਾਈਨਲ ਵਿੱਚ ਪਹੁੰਚੀ ਸੀ, ਜਿੱਥੇ ਉਸ ਨੂੰ ਚੈੱਕ ਖਿਡਾਰਨ ਮਾਰਕੇਟਾ ਵੋਂਡਰੋਸੋਵਾ ਤੋਂ ਹਾਰ ਦਾ ਸਾਹਮਣਾ ਕਰਨਾ ਪਿਆ ਸੀ। ਸਵਿਤੋਲੀਨਾ ਦੀ ਇਹ ਜਿੱਤ ਉਸ ਨੂੰ ਆਉਣ ਵਾਲੇ ਟੂਰਨਾਮੈਂਟਾਂ ਲਈ ਮਜ਼ਬੂਤ ਆਤਮ-ਵਿਸ਼ਵਾਸ ਪ੍ਰਦਾਨ ਕਰੇਗੀ।