ਵਿਸ਼ਵ ਸਕੁਐਸ਼ ਚੈਂਪੀਅਨਸ਼ਿਪ : ਚੋਟਰਾਨੀ ਦੁਨੀਆ ਦੇ ਨੰਬਰ ਇਕ ਖਿਡਾਰੀ ਅਸਲ ਤੋਂ ਹਾਰੇ

ਗੀਜ਼ਾ (ਮਿਸਰ) : ਮਿਸਰ ਦੇ ਗੀਜ਼ਾ ਵਿੱਚ ਚੱਲ ਰਹੀ ਵਿਸ਼ਵ ਸਕੁਐਸ਼ ਚੈਂਪੀਅਨਸ਼ਿਪ ਵਿੱਚ ਭਾਰਤ ਦੀ ਉਮੀਦਾਂ ਨੂੰ ਉਸ ਸਮੇਂ ਵੱਡਾ ਝਟਕਾ ਲੱਗਾ ਜਦੋਂ ਦੇਸ਼ ਦੇ ਸਟਾਰ ਖਿਡਾਰੀ ਵੀਰ ਚੋਟਰਾਨੀ ਪੁਰਸ਼ ਵਰਗ ਦੇ ਦੂਜੇ ਦੌਰ ਵਿੱਚ ਹਾਰ ਕੇ ਬਾਹਰ ਹੋ ਗਏ। ਇਸ ਦੇ ਨਾਲ ਹੀ ਇਸ ਵੱਕਾਰੀ ਟੂਰਨਾਮੈਂਟ ਵਿੱਚ ਭਾਰਤੀ ਚੁਣੌਤੀ ਵੀ ਪੂਰੀ ਤਰ੍ਹਾਂ ਸਮਾਪਤ ਹੋ ਗਈ ਹੈ।

ਇੱਕਤਰਫਾ ਰਿਹਾ ਮੁਕਾਬਲਾ 
ਵਿਸ਼ਵ ਰੈਂਕਿੰਗ ਵਿੱਚ 45ਵੇਂ ਸਥਾਨ 'ਤੇ ਕਾਬਜ਼ ਵੀਰ ਚੋਟਰਾਨੀ ਦਾ ਸਾਹਮਣਾ ਮੇਜ਼ਬਾਨ ਦੇਸ਼ ਦੇ ਵਿਸ਼ਵ ਨੰਬਰ ਇੱਕ ਅਤੇ ਮੌਜੂਦਾ ਚੈਂਪੀਅਨ ਮੁਸਤਫਾ ਅਸਲ ਨਾਲ ਸੀ। ਅਸਲ ਨੇ ਆਪਣੇ ਦਬਦਬੇ ਨੂੰ ਬਰਕਰਾਰ ਰੱਖਦਿਆਂ ਚੋਟਰਾਨੀ ਨੂੰ ਸਿੱਧੇ ਸੈੱਟਾਂ ਵਿੱਚ 5-11, 2-11, 4-11 ਨਾਲ ਮਾਤ ਦਿੱਤੀ।

ਭਾਰਤੀ ਖਿਡਾਰੀਆਂ ਦਾ ਨਿਰਾਸ਼ਾਜਨਕ ਪ੍ਰਦਰਸ਼ਨ 
ਵੀਰ ਚੋਟਰਾਨੀ ਤੋਂ ਪਹਿਲਾਂ ਭਾਰਤ ਦੇ ਹੋਰ ਦਿੱਗਜ ਖਿਡਾਰੀ ਵੀ ਕੋਈ ਖਾਸ ਕਮਾਲ ਨਹੀਂ ਦਿਖਾ ਸਕੇ ਸਨ। ਅਭੈ ਸਿੰਘ, ਰਮਿਤ ਟੰਡਨ ਅਤੇ ਵੇਲਵਨ ਸੇਂਥਿਲਕੁਮਾਰ ਪਹਿਲੇ ਦੌਰ ਦੇ ਮੁਕਾਬਲਿਆਂ ਵਿੱਚ ਹੀ ਹਾਰ ਕੇ ਟੂਰਨਾਮੈਂਟ ਤੋਂ ਬਾਹਰ ਹੋ ਗਏ ਸਨ, ਜਿਸ ਕਾਰਨ ਵੀਰ ਚੋਟਰਾਨੀ ਭਾਰਤ ਦੀ ਆਖਰੀ ਉਮੀਦ ਬਚੇ ਸਨ।

ਮੁਸਤਫਾ ਅਸਲ ਨੇ ਕੀਤੀ ਵੀਰ ਦੀ ਤਾਰੀਫ਼ 
ਜਿੱਤ ਤੋਂ ਬਾਅਦ ਮੁਸਤਫਾ ਅਸਲ ਨੇ ਵੀਰ ਚੋਟਰਾਨੀ ਦੀ ਖੇਡ ਦੀ ਸ਼ਲਾਘਾ ਕੀਤੀ। ਉਨ੍ਹਾਂ ਕਿਹਾ ਕਿ ਵੀਰ ਇੱਕ ਅਜਿਹਾ ਖਿਡਾਰੀ ਹੈ ਜੋ ਕਿਸੇ ਵੀ ਪਲ ਵਿਰੋਧੀ ਨੂੰ ਹੈਰਾਨ ਕਰ ਸਕਦਾ ਹੈ। ਅਸਲ ਨੇ ਅੱਗੇ ਦੱਸਿਆ, "ਅਸੀਂ ਜੂਨੀਅਰ ਪੱਧਰ ਤੋਂ ਹੀ ਕਈ ਮੈਚ ਇਕੱਠੇ ਖੇਡੇ ਹਨ ਅਤੇ ਨਿਊਯਾਰਕ ਵਿੱਚ ਇਕੱਠੇ ਅਭਿਆਸ ਵੀ ਕਰਦੇ ਹਾਂ। ਮੈਨੂੰ ਖੁਸ਼ੀ ਹੈ ਕਿ ਉਸਨੇ ਅੱਜ ਇੱਥੇ ਆਪਣੀ ਸਰਵੋਤਮ ਖੇਡ ਦਿਖਾਉਣ ਦੀ ਕੋਸ਼ਿਸ਼ ਕੀਤੀ।"