ਟੀਮ ਇੰਡੀਆ ਨੂੰ ਨਹੀਂ ਮਿਲੇਗੀ ਅਸਲੀ ਵਰਲਡ ਕੱਪ ਟਰਾਫੀ! ਜਾਣੋ ਵਜ੍ਹਾ

ਸਪੋਰਟਸ ਡੈਸਕ- ਭਾਰਤੀ ਮਹਿਲਾ ਕ੍ਰਿਕਟ ਟੀਮ ਨੇ ਪਹਿਲੀ ਵਾਰ ਵਿਸ਼ਵ ਕੱਪ ਜਿੱਤ ਕੇ ਇਤਿਹਾਸ ਰਚ ਦਿੱਤਾ। ਹਰਮਨਪ੍ਰੀਤ ਕੌਰ ਦੀ ਅਗਵਾਈ ਵਿੱਚ ਭਾਰਤ ਨੇ ਦੱਖਣੀ ਅਫਰੀਕਾ ਨੂੰ 52 ਦੌੜਾਂ ਨਾਲ ਹਰਾਇਆ। ਇਸ ਜਿੱਤ ਤੋਂ ਬਾਅਦ ਟੀਮ ਇੰਡੀਆ ਨੂੰ ਚਮਕਦਾਰ ਵਿਸ਼ਵ ਕੱਪ ਟਰਾਫੀ ਮਿਲੀ ਪਰ ਆਈਸੀਸੀ ਨਿਯਮਾਂ ਦੇ ਕਾਰਨ ਇਹ ਟਰਾਫੀ ਭਾਰਤੀ ਟੀਮ ਤੋਂ ਵਾਪਸ ਲੈ ਲਈ ਜਾਵੇਗੀ। ਆਈਸੀਸੀ ਟੂਰਨਾਮੈਂਟ ਜਿੱਤਣ ਵਾਲੀ ਕਿਸੇ ਵੀ ਟੀਮ ਨੂੰ ਅਸਲ ਟਰਾਫੀ ਨਹੀਂ ਦਿੱਤੀ ਜਾਂਦੀ। ਇਸ ਦੀ ਬਜਾਏ, ਉਨ੍ਹਾਂ ਨੂੰ ਇੱਕ ਡਮੀ ਜਾਂ ਪ੍ਰਤੀਕ੍ਰਿਤੀ ਟਰਾਫੀ ਦਿੱਤੀ ਜਾਂਦੀ ਹੈ। ਅਸਲ ਟਰਾਫੀ ਪੁਰਸਕਾਰ ਸਮਾਰੋਹ ਦੌਰਾਨ ਦਿੱਤੀ ਜਾਂਦੀ ਹੈ ਅਤੇ ਫੋਟੋਸ਼ੂਟ ਤੋਂ ਬਾਅਦ ਇਹ ਆਈਸੀਸੀ ਕੋਲ ਵਾਪਸ ਆ ਜਾਂਦੀ ਹੈ।

ਟਰਾਫੀ ਨੂੰ ਲੈ ਕੇ ਕੀ ਹੈ ICC ਦਾ ਨਿਯਮ

ਆਈਸੀਸੀ ਨੇ 26 ਸਾਲ ਪਹਿਲਾਂ ਇੱਕ ਨਿਯਮ ਬਣਾਇਆ ਸੀ ਜਿਸ ਮੁਤਾਬਕ, ਜਿੱਤਣ ਵਾਲੀ ਟੀਮ ਨੂੰ ਟਰਾਫੀ ਦਿੱਤੀ ਜਾਵੇਗੀ ਅਤੇ ਉਹ ਉਸਨੂੰ ਫੋਟੋ ਸੈਸ਼ਨ ਅਤੇ ਵਿਕਟੀਰ ਪਰੇਡ 'ਚ ਇਸਤੇਮਾਲ ਕਰੇਗੀ ਪਰ ਇਸ ਤੋਂ ਬਾਅਦ ਉਹ ਵਾਪਸ ਕਰਨੀ ਪਵੇਗੀ। ਆਈਸੀਸੀ ਜੇਤੂ ਟੀਮ ਨੂੰ ਡਮੀ ਟਰਾਫੀ ਦਿੰਦੀ ਹੈ ਜੋ ਬਿਲਕੁਲ ਅਸਲੀ ਵਰਗੀ ਹੁੰਦੀ ਹੈ। ਉਸ ਵਿਚ ਸੋਨੇ ਅਤੇ ਚਾਂਦੀ ਦੀ ਵਰਤੋਂ ਵੀ ਹੁੰਦੀ ਹੈ। ਦੱਸ ਦੇਈਏ ਕਿ ਟਰਾਫੀ ਨੂੰ ਆਈਸੀਸੀ ਦੇ ਦੁਬਈ ਹੈੱਡਕੁਆਟਰ 'ਚ ਰੱਖਿਆ ਜਾਂਦਾ ਹੈ। ਇਹ ਟਰਾਫੀ ਚੋਰੀ ਹੋਣ ਜਾਂ ਨੁਕਸਾਨ ਪਹੁੰਚਾਉਣ ਤੋਂ ਬਚਾਉਣ ਲਈ ਕੀਤਾ ਜਾਂਦਾ ਹੈ। 

ਮਹਿਲਾ ਵਿਸ਼ਵ ਕੱਪ 2025 ਟਰਾਫੀ ਦੀ ਖਾਸੀਅਤ

ਮਹਿਲਾ ਵਿਸ਼ਵ ਕੱਪ 2025 ਦੀ ਟਰਾਫੀ ਦੀ ਗੱਲ ਕਰੀਏ ਤਾਂ ਇਸਦਾ ਭਾਰ 11 ਕਿਲੋਗ੍ਰਾਮ ਹੈ। ਇਸਦੀ ਉਚਾਈ ਲਗਭਗ 60 ਸੈਂਟੀਮੀਟਰ ਹੈ। ਇਹ ਚਾਂਦੀ ਅਤੇ ਸੋਨੇ ਦੀ ਬਣੀ ਹੋਈ ਹੈ। ਇਸਦੇ ਤਿੰਨ ਚਾਂਦੀ ਦੇ ਕਾਲਮ ਸਟੰਪ ਅਤੇ ਬੇਲਾਂ ਵਰਗੇ ਹਨ। ਇਸਦਾ ਸਿਖਰ ਇੱਕ ਗੋਲ ਸੋਨੇ ਦਾ ਗਲੋਬ ਹੈ। ਟਰਾਫੀ ਵਿੱਚ ਸਾਰੇ ਸਮੇਂ ਦੇ ਜੇਤੂਆਂ ਦੇ ਨਾਮ ਵੀ ਹਨ। ਇਸ ਸਾਲ, ਭਾਰਤ ਦਾ ਨਾਮ ਪਹਿਲੀ ਵਾਰ ਟਰਾਫੀ ਵਿੱਚ ਜੋੜਿਆ ਗਿਆ ਹੈ। ਮਹਿਲਾ ਵਿਸ਼ਵ ਕੱਪ ਦੇ 13 ਐਡੀਸ਼ਨ ਹੋ ਚੁੱਕੇ ਹਨ, ਜਿਸ ਵਿੱਚ ਆਸਟ੍ਰੇਲੀਆ ਨੇ ਸੱਤ ਵਾਰ ਜਿੱਤ ਪ੍ਰਾਪਤ ਕੀਤੀ ਹੈ। ਇੰਗਲੈਂਡ ਨੇ ਚਾਰ ਖਿਤਾਬ ਜਿੱਤੇ ਹਨ, ਜਦੋਂ ਕਿ ਨਿਊਜ਼ੀਲੈਂਡ ਅਤੇ ਭਾਰਤ ਨੇ ਇੱਕ-ਇੱਕ ਜਿੱਤਿਆ ਹੈ।