T20 WC 2022 : ਆਇਰਲੈਂਡ ਨੇ ਵੱਡਾ ਉਲਟਫੇਰ ਕਰਦੇ ਹੋਏ ਇੰਗਲੈਂਡ ਨੂੰ 5 ਦੌੜਾਂ ਨਾਲ ਹਰਾਇਆ

ਸਪੋਰਟਸ ਡੈਸਕ- ਟੀ20 ਵਿਸ਼ਵ ਕੱਪ ਦੇ ਸੁਪਰ 12 ਮੁਕਾਬਲੇ 'ਚ ਇੰਗਲੈਂਡ ਤੇ ਆਇਰਲੈਂਡ ਦਰਮਿਆਨ ਮੈਲਬੋਰਨ ਕ੍ਰਿਕਟ ਗਰਾਊਂਡ 'ਚ ਮੈਚ ਖੇਡਿਆ ਗਿਆ। ਮੀਂਹ ਨਾਲ ਪ੍ਰਭਾਵਿਤ ਮੈਚ 'ਚ ਆਇਰਲੈਂਡ ਨੇ ਡਕਵਰਥ ਲੁਈਸ ਸਿਸਟਮ (DLS) ਤਹਿਤ ਇੰਗਲੈਂਡ ਖਿਲਾਫ 5 ਦੌੜਾਂ ਜਿੱਤ ਦਰਜ ਕੀਤੀ। ਆਇਰਲੈਂਡ ਦੀ ਟੀਮ ਪਹਿਲਾਂ ਬੱਲੇਬਾਜ਼ੀ ਦਾ ਸੱਦਾ ਮਿਲਣ 'ਤੇ 19.2 ਓਵਰ 'ਚ 157 ਦੌੜਾਂ 'ਤੇ ਆਊਟ ਹੋ ਗਈ। ਇਸ ਦੇ ਜਵਾਬ 'ਚ ਇੰਗਲੈਂਡ ਨੇ ਜਦੋਂ 14.3 ਓਵਰ 'ਚ 5 ਵਿਕਟਾਂ 'ਤੇ 105 ਦੌੜਾਂ ਬਣਾਈਆਂ ਤਾਂ ਮੀਂਹ ਸ਼ੁਰੂ ਹੋ ਗਿਆ ਜਿਸ ਕਾਰਨ ਖੇਡ ਅੱਗੇ ਨਹੀਂ ਖੇਡਿਆ ਜਾ ਸਕਿਆ। 

ਡਕਵਰਥ ਲੁਈਸ ਸਿਸਟਮ ਅਨੁਸਾਰ ਇੰਗਲੈਂਡ ਨੂੰ ਜਿੱਤ ਲਈ 14.3 ਓਵਰਾਂ ਵਿੱਚ 110 ਦੌੜਾਂ ਦੇ ਸਕੋਰ ਤੱਕ ਪਹੁੰਚਣਾ ਸੀ। ਨਿਰਧਾਰਤ ਸਮੇਂ ਤੱਕ ਮੀਂਹ ਨਾ ਰੁਕਣ ਤੋਂ ਬਾਅਦ ਮੈਚ ਰੱਦ ਕਰ ਦਿੱਤਾ ਗਿਆ ਅਤੇ ਆਇਰਲੈਂਡ ਪੰਜ ਦੌੜਾਂ ਨਾਲ ਜਿੱਤ ਗਿਆ। ਆਇਰਲੈਂਡ ਨੇ ਆਪਣੇ ਪੁਰਾਣੇ ਵਿਰੋਧੀ ਇੰਗਲੈਂਡ ਖਿਲਾਫ ਟੀ-20 ਵਿਸ਼ਵ ਕੱਪ 'ਚ ਪਹਿਲੀ ਜਿੱਤ ਦਰਜ ਕੀਤੀ ਹੈ। ਇਸ ਤੋਂ ਪਹਿਲਾਂ ਦੋਵੇਂ ਟੀਮਾਂ ਚੋਟੀ ਦੇ ਟੂਰਨਾਮੈਂਟ 'ਚ ਸਿਰਫ ਇਕ ਵਾਰ ਆਹਮੋ-ਸਾਹਮਣੇ ਹੋਈਆਂ ਸਨ, ਜਿੱਥੇ ਮੀਂਹ ਕਾਰਨ ਮੈਚ ਰੱਦ ਕਰਨਾ ਪਿਆ ਸੀ। 

ਗਰੁੱਪ-ਏ ਦੇ ਮੈਚ ਵਿੱਚ ਇੰਗਲੈਂਡ ਨੇ ਟਾਸ ਜਿੱਤ ਕੇ ਆਇਰਲੈਂਡ ਨੂੰ ਬੱਲੇਬਾਜ਼ੀ ਲਈ ਸੱਦਾ ਦਿੱਤਾ। ਪਾਲ ਸਟਰਲਿੰਗ (14) ਦੇ ਸ਼ੁਰੂਆਤੀ ਵਿਕਟ ਡਿੱਗਣ ਤੋਂ ਬਾਅਦ ਬਲਬਰਨੀ ਨੇ ਲੋਕਰਾਨ ਟਕਰ ਨਾਲ 82 ਦੌੜਾਂ ਦੀ ਅਹਿਮ ਸਾਂਝੇਦਾਰੀ ਕੀਤੀ। ਬਾਲਬਰਨੀ ਨੇ 47 ਗੇਂਦਾਂ 'ਤੇ ਪੰਜ ਚੌਕਿਆਂ ਅਤੇ ਦੋ ਛੱਕਿਆਂ ਦੀ ਮਦਦ ਨਾਲ 62 ਦੌੜਾਂ ਬਣਾਈਆਂ ਜਦਕਿ ਟਕਰ ਨੇ 27 ਗੇਂਦਾਂ 'ਤੇ ਤਿੰਨ ਚੌਕਿਆਂ ਅਤੇ ਇਕ ਛੱਕੇ ਦੀ ਮਦਦ ਨਾਲ 34 ਦੌੜਾਂ ਬਣਾਈਆਂ। ਬਾਲਬਰਨੀ-ਟਕਰ ਦੀ ਸਾਂਝੇਦਾਰੀ ਨੇ ਆਇਰਲੈਂਡ ਨੂੰ ਮਜ਼ਬੂਤ ​​ਸਥਿਤੀ ਵਿੱਚ ਪਹੁੰਚਾ ਦਿੱਤਾ ਪਰ ਬਾਕੀ ਬੱਲੇਬਾਜ਼ ਟੀਮ ਨੂੰ ਵੱਡੇ ਸਕੋਰ ਤੱਕ ਲਿਜਾਣ ਵਿੱਚ ਅਸਫਲ ਰਹੇ। 

ਇਹ ਵੀ ਪੜ੍ਹੋ : ਟੀ20 ਵਿਸ਼ਵ ਕੱਪ: ਭਾਰਤੀ ਟੀਮ ਨੇ ਲੰਚ ਦੇ ਬਾਇਕਾਟ ਤੋਂ ਬਾਅਦ ਪ੍ਰੈਕਟਿਸ ਤੋਂ ਕੀਤਾ ਇਨਕਾਰ, ਜਾਣੋ ਵਜ੍ਹਾ

ਆਇਰਲੈਂਡ ਦਾ ਸਕੋਰ 15 ਓਵਰਾਂ 'ਚ ਤਿੰਨ ਵਿਕਟਾਂ 'ਤੇ 127 ਦੌੜਾਂ ਸੀ ਪਰ ਅਗਲੇ ਪੰਜ ਓਵਰਾਂ 'ਚ ਟੀਮ ਨੇ ਸਿਰਫ 30 ਦੌੜਾਂ ਜੋੜੀਆਂ ਅਤੇ ਸੱਤ ਵਿਕਟਾਂ ਗੁਆ ਦਿੱਤੀਆਂ। ਗੈਰੇਥ ਡੇਲਾਨੀ 12 ਦੌੜਾਂ ਬਣਾ ਕੇ ਅਜੇਤੂ ਰਹੇ, ਜਦਕਿ ਆਇਰਲੈਂਡ ਦੇ ਛੇ ਬੱਲੇਬਾਜ਼ 10 ਦੇ ਅੰਕੜੇ ਨੂੰ ਵੀ ਨਹੀਂ ਛੂਹ ਸਕੇ।ਇੰਗਲੈਂਡ ਲਈ ਕ੍ਰਿਸ ਵੋਕਸ ਅਤੇ ਲਾਈਮ ਲਿਵਿੰਗਸਟਨ ਨੇ ਤਿੰਨ-ਤਿੰਨ ਵਿਕਟਾਂ ਲਈਆਂ ਜਦਕਿ ਸੈਮ ਕਰਾਨ ਨੇ ਦੋ ਵਿਕਟਾਂ ਹਾਸਲ ਕੀਤੀਆਂ। ਬੇਨ ਸਟੋਕਸ ਨੇ 20ਵੇਂ ਓਵਰ ਦੀ ਦੂਜੀ ਗੇਂਦ 'ਤੇ ਜੋਸ਼ੂਆ ਲਿਟਲ ਦਾ ਵਿਕਟ ਲੈ ਕੇ ਆਇਰਲੈਂਡ ਦੀ ਪਾਰੀ 157 ਦੌੜਾਂ 'ਤੇ ਸਮੇਟ ਦਿੱਤੀ। 

ਆਇਰਲੈਂਡ ਨੇ ਇਸ ਸਕੋਰ ਦਾ ਬਚਾਅ ਕੀਤਾ ਅਤੇ ਜੋਸ ਬਟਲਰ, ਐਲੇਕਸ ਹੇਲਸ ਅਤੇ ਬੇਨ ਸਟੋਕਸ ਨੂੰ 29 ਦੌੜਾਂ 'ਤੇ ਪਵੇਲੀਅਨ ਭੇਜਿਆ। ਡੇਵਿਡ ਮਲਾਨ ਅਤੇ ਹੈਰੀ ਬਰੂਕ ਨੇ ਚੌਥੀ ਵਿਕਟ ਲਈ 38 ਦੌੜਾਂ ਦੀ ਸਾਂਝੇਦਾਰੀ ਕੀਤੀ ਪਰ ਉਹ ਰਨ ਰੇਟ ਵਧਾਉਣ ਵਿੱਚ ਨਾਕਾਮ ਰਹੇ। ਬਰੂਕ ਨੇ 21 ਗੇਂਦਾਂ 'ਤੇ 18 ਦੌੜਾਂ ਬਣਾਈਆਂ ਜਦਕਿ ਮਲਾਨ ਨੇ 37 ਗੇਂਦਾਂ ਦੀ ਸਖਤ ਪਾਰੀ 'ਚ 35 ਦੌੜਾਂ ਜੋੜੀਆਂ। 

ਛੇਵੇਂ ਨੰਬਰ 'ਤੇ ਬੱਲੇਬਾਜ਼ੀ ਕਰਨ ਆਏ ਮੋਈਨ ਅਲੀ ਨੇ 12 ਗੇਂਦਾਂ 'ਤੇ ਤਿੰਨ ਚੌਕੇ ਅਤੇ ਇਕ ਛੱਕਾ ਲਗਾਇਆ ਪਰ ਜਿਵੇਂ ਹੀ ਰਨ ਰੇਟ ਵਧਿਆ ਤਾਂ ਮੈਲਬੌਰਨ ਕ੍ਰਿਕਟ ਗਰਾਊਂਡ 'ਤੇ ਬਾਰਿਸ਼ ਆ ਗਈ। ਡਕਵਰਥ ਲੁਈਸ ਮੈਥਡ ਟੀਚੇ ਤੋਂ ਪੰਜ ਦੌੜਾਂ ਘੱਟ ਹੋਣ ਕਾਰਨ ਇੰਗਲੈਂਡ ਮੈਚ ਹਾਰ ਗਿਆ ਅਤੇ ਆਇਰਲੈਂਡ ਨੂੰ ਦੋ ਕੀਮਤੀ ਅੰਕ ਮਿਲੇ। ਆਇਰਲੈਂਡ ਦਾ ਅਗਲਾ ਮੈਚ ਅਫਗਾਨਿਸਤਾਨ ਨਾਲ ਹੈ ਜਦਕਿ ਇੰਗਲੈਂਡ ਨੂੰ ਆਪਣੇ ਅਗਲੇ ਮੈਚ 'ਚ ਆਸਟ੍ਰੇਲੀਆ ਦਾ ਸਾਹਮਣਾ ਕਰਨਾ ਹੈ। 

ਨੋਟ : ਇਸ ਖ਼ਬਰ ਬਾਰੇ ਕੀ ਹੈ ਤੁਹਾਡੀ ਰਾਏ। ਕੁਮੈਂਟ ਕਰਕੇ ਦਿਓ ਜਵਾਬ।