MS ਧੋਨੀ ਨੂੰ IPL 2025 ''ਚ ਖੇਡਣਾ ਚਾਹੀਦਾ ਹੈ, ਸੁਰੇਸ਼ ਰੈਨਾ ਨੇ ਦੱਸਿਆ ਵੱਡਾ ਕਾਰਨ

ਸਪੋਰਟਸ ਡੈਸਕ : ਚੇਨਈ ਸੁਪਰ ਕਿੰਗਜ਼ (ਸੀਐੱਸਕੇ) ਦੇ ਸਾਬਕਾ ਆਲਰਾਊਂਡਰ ਸੁਰੇਸ਼ ਰੈਨਾ ਚਾਹੁੰਦੇ ਹਨ ਕਿ ਐੱਮਐੱਸ ਧੋਨੀ ਇੰਡੀਅਨ ਪ੍ਰੀਮੀਅਰ ਲੀਗ (ਆਈਪੀਐੱਲ) 2025 ਵਿੱਚ ਖੇਡਣ ਕਿਉਂਕਿ ਟੂਰਨਾਮੈਂਟ ਦੇ ਪਿਛਲੇ ਸੈਸ਼ਨ ਵਿੱਚ ਉਨ੍ਹਾਂ ਦੀ ਬੱਲੇਬਾਜ਼ੀ ਸ਼ਾਨਦਾਰ ਰਹੀ ਸੀ। ਆਈਪੀਐੱਲ 2024 ਦੇ ਓਪਨਰ ਤੋਂ ਪਹਿਲਾਂ ਕਪਤਾਨੀ ਛੱਡਣ ਵਾਲੇ ਧੋਨੀ ਨੂੰ ਆਈਪੀਐੱਲ 2024 ਵਿੱਚ ਫਿਨਿਸ਼ਰ ਵਜੋਂ ਖੇਡਿਆ ਗਿਆ ਸੀ, ਜਿੱਥੇ ਉਨ੍ਹਾਂ ਨੇ 14 ਮੈਚਾਂ ਵਿੱਚ 220.25 ਦੀ ਸਟ੍ਰਾਈਕ ਰੇਟ ਨਾਲ 161 ਦੌੜਾਂ ਬਣਾਈਆਂ ਅਤੇ ਉਨ੍ਹਾਂ ਦਾ ਸਰਵੋਤਮ ਸਕੋਰ ਨਾਬਾਦ 37 ਸੀ।
ਰਾਇਲ ਚੈਲੰਜਰਜ਼ ਬੈਂਗਲੁਰੂ (ਆਰਸੀਬੀ) ਦੇ ਖਿਲਾਫ ਆਈਪੀਐੱਲ 2024 ਦੇ ਓਪਨਰ ਤੋਂ ਪਹਿਲਾਂ ਰੁਤੂਰਾਜ ਗਾਇਕਵਾੜ ਨੂੰ ਚੇਨਈ ਸਥਿਤ ਫਰੈਂਚਾਇਜ਼ੀ ਦਾ ਨਵਾਂ ਕਪਤਾਨ ਨਿਯੁਕਤ ਕੀਤਾ ਗਿਆ ਸੀ। ਰੈਨਾ ਨੇ ਸਪੋਰਟਸ ਤੱਕ ਨੂੰ ਕਿਹਾ, 'ਮੈਂ ਚਾਹੁੰਦਾ ਹਾਂ ਕਿ ਮਹਿੰਦਰ ਸਿੰਘ ਧੋਨੀ 2025 'ਚ ਖੇਡਣ, ਕਿਉਂਕਿ ਪਿਛਲੇ ਸਾਲ ਉਨ੍ਹਾਂ ਨੇ ਜਿਸ ਤਰ੍ਹਾਂ ਨਾਲ ਬੱਲੇਬਾਜ਼ੀ ਕੀਤੀ ਸੀ। ਮੈਨੂੰ ਲੱਗਦਾ ਹੈ ਕਿ ਰੁਤੂਰਾਜ ਗਾਇਕਵਾੜ ਨੂੰ ਇਕ ਹੋਰ ਸਾਲ ਦੀ ਲੋੜ ਹੈ, ਜਿਸ ਤਰ੍ਹਾਂ ਨਾਲ ਉਨ੍ਹਾਂ ਨੇ ਕਪਤਾਨੀ ਕੀਤੀ ਅਤੇ ਆਰਸੀਬੀ ਦੀ ਹਾਰ ਤੋਂ ਬਾਅਦ ਬਹੁਤ ਸਾਰੀਆਂ ਗੱਲਾਂ ਕਹੀਆਂ ਗਈਆਂ। ਹਾਲਾਂਕਿ ਰੁਤੂਰਾਜ ਨੇ ਸ਼ਾਨਦਾਰ ਪ੍ਰਦਰਸ਼ਨ ਕੀਤਾ ਹੈ।
ਆਈਪੀਐੱਲ 2024 ਵਿੱਚ ਸੀਐੱਸਕੇ ਦੀ ਹਾਰ ਤੋਂ ਬਾਅਦ, ਕਈ ਕਿਆਸ ਲਗਾਏ ਜਾ ਰਹੇ ਸਨ ਕਿ ਇੱਕ ਖਿਡਾਰੀ ਦੇ ਰੂਪ ਵਿੱਚ ਐੱਮਐੱਸ ਧੋਨੀ ਦਾ ਇਹ ਆਖਰੀ ਆਈਪੀਐੱਲ ਹੋਵੇਗਾ, ਪਰ ਸਾਬਕਾ ਭਾਰਤੀ ਕਪਤਾਨ ਨੇ ਅਜੇ ਤੱਕ ਕੁਝ ਨਹੀਂ ਕਿਹਾ ਹੈ। ਇਸ ਮਹੀਨੇ ਦੇ ਸ਼ੁਰੂ ਵਿੱਚ, ਹੈਦਰਾਬਾਦ ਵਿੱਚ ਇੱਕ ਸਮਾਗਮ ਵਿੱਚ, ਧੋਨੀ ਨੇ ਕਿਹਾ ਸੀ ਕਿ ਉਹ ਨਵੇਂ ਨਿਯਮਾਂ ਦੀ ਘੋਸ਼ਣਾ ਤੋਂ ਬਾਅਦ ਆਪਣੇ ਆਈਪੀਐੱਲ ਕਰੀਅਰ ਬਾਰੇ ਫੈਸਲਾ ਲੈਣਗੇ। ਉਨ੍ਹਾਂ ਕਿਹਾ, 'ਇਸ ਲਈ ਅਜੇ ਕਾਫੀ ਸਮਾਂ ਹੈ। ਸਾਨੂੰ ਦੇਖਣਾ ਹੋਵੇਗਾ ਕਿ ਉਹ ਖਿਡਾਰੀ ਰਿਟੇਨ ਆਦਿ 'ਤੇ ਕੀ ਫੈਸਲਾ ਲੈਂਦੇ ਹਨ। ਗੇਂਦ ਇਸ ਸਮੇਂ ਸਾਡੇ ਕੋਰਟ ਵਿੱਚ ਨਹੀਂ ਹੈ। ਇਸ ਲਈ ਨਿਯਮ ਰਸਮੀ ਹੋਣ ਤੋਂ ਬਾਅਦ ਮੈਂ ਫੈਸਲਾ ਲਵਾਂਗਾ, ਪਰ ਇਹ ਟੀਮ ਦੇ ਹਿੱਤ ਵਿੱਚ ਹੋਣਾ ਚਾਹੀਦਾ ਹੈ।