ਉਸ ਨੂੰ ਸ਼ੀਸ਼ੇ ਵਿੱਚ ਆਪਣੇ ਆਪ ਨੂੰ ਦੇਖਣ ਦੀ ਲੋੜ ਹੈ : ਸਟੀਵ ਵਾ ਦੀ ਰੋਹਿਤ ''ਤੇ ਤਿੱਖੀ ਟਿੱਪਣੀ

ਮੈਡ੍ਰਿਡ : ਆਸਟ੍ਰੇਲੀਆ ਦੇ ਮਹਾਨ ਬੱਲੇਬਾਜ਼ ਸਟੀਵ ਵਾ ਦਾ ਮੰਨਣਾ ਹੈ ਕਿ ਆਲੋਚਨਾ ਦਾ ਸ਼ਿਕਾਰ ਰੋਹਿਤ ਸ਼ਰਮਾ ਜੇਕਰ ਭਾਰਤੀ ਕ੍ਰਿਕਟ ਦੀ ਸੇਵਾ ਜਾਰੀ ਰੱਖਣਾ ਚਾਹੁੰਦੇ ਹਨ ਤਾਂ ਉਨ੍ਹਾਂ ਨੂੰ ਆਤਮ ਸੰਤੁਸ਼ਟ ਨਹੀਂ ਹੋਣਾ ਚਾਹੀਦਾ  ਤੇ ਆਰਾਮ ਨਹੀਂ ਕਰਨਾ ਚਾਹੀਦਾ ਹੈ। ਇਸ ਵਿੱਚ ਇੰਗਲੈਂਡ ਵਿਰੁੱਧ ਆਉਣ ਵਾਲੀ ਟੈਸਟ ਲੜੀ ਤੋਂ ਪਹਿਲਾਂ ਕਪਤਾਨੀ ਬਾਰੇ ਫੈਸਲਾ ਲੈਣਾ ਵੀ ਸ਼ਾਮਲ ਹੈ। ਰੋਹਿਤ ਦੇ ਭਵਿੱਖ ਬਾਰੇ ਉੱਠ ਰਹੇ ਸਵਾਲਾਂ ਦੇ ਵਿਚਕਾਰ, ਵਾ ਨੇ ਕਿਹਾ ਕਿ ਭਾਰਤ ਦੀ ਕਪਤਾਨੀ ਦਾ ਫੈਸਲਾ ਰੋਹਿਤ ਨੂੰ ਖੁਦ ਲੈਣਾ ਚਾਹੀਦਾ ਹੈ। ਭਾਰਤ 2025-27 ਵਿਸ਼ਵ ਟੈਸਟ ਚੈਂਪੀਅਨਸ਼ਿਪ (WTC) ਚੱਕਰ ਦੀ ਸ਼ੁਰੂਆਤ ਜੂਨ ਵਿੱਚ ਇੰਗਲੈਂਡ ਵਿਰੁੱਧ ਲੜੀ ਨਾਲ ਕਰੇਗਾ।

ਵਾ ਨੇ ਕਿਹਾ ਕਿ ਇਹ ਪੂਰੀ ਤਰ੍ਹਾਂ ਉਸ 'ਤੇ ਨਿਰਭਰ ਕਰਦਾ ਹੈ। ਉਸਨੇ ਕਿਹਾ ਕਿ ਉਹ ਇਕੱਲਾ ਹੀ ਇਸ ਸਮੱਸਿਆ ਦਾ ਹੱਲ ਕਰ ਸਕਦਾ ਹੈ। ਉਸਨੂੰ ਸ਼ੀਸ਼ੇ ਵਿੱਚ ਆਪਣੇ ਆਪ ਨੂੰ ਦੇਖਣਾ ਪਵੇਗਾ ਅਤੇ ਕਹਿਣਾ ਪਵੇਗਾ ਕਿ ਕੀ ਮੈਂ ਅਜੇ ਵੀ ਕਪਤਾਨ ਬਣਨਾ ਚਾਹੁੰਦਾ ਹਾਂ ਜਾਂ ਕੀ ਮੈਂ ਭਾਰਤ ਲਈ ਖੇਡਣਾ ਚਾਹੁੰਦਾ ਹਾਂ? ਕੀ ਮੈਂ ਵਚਨਬੱਧ ਹਾਂ? ਕੀ ਮੈਂ ਇਸ ਵਿੱਚ ਕਾਫ਼ੀ ਸਮਾਂ ਅਤੇ ਮਿਹਨਤ ਲਗਾ ਰਿਹਾ ਹਾਂ? ਆਪਣੇ ਦੇਸ਼ ਲਈ ਖੇਡਣਾ ਇੱਕ ਸਨਮਾਨ ਅਤੇ ਮਾਣ ਦੀ ਗੱਲ ਹੈ।

ਲੌਰੀਅਸ ਵਰਲਡ ਸਪੋਰਟਸ ਅਕੈਡਮੀ ਦੇ ਮੈਂਬਰ, ਵਾ ਨੇ ਕਿਹਾ ਕਿ ਤੁਸੀਂ ਸੰਤੁਸ਼ਟ ਜਾਂ ਆਰਾਮਦਾਇਕ ਨਹੀਂ ਹੋ ਸਕਦੇ। ਰੋਹਿਤ 30 ਅਪ੍ਰੈਲ ਨੂੰ 38 ਸਾਲ ਦੇ ਹੋ ਜਾਣਗੇ। ਬੰਗਲਾਦੇਸ਼, ਨਿਊਜ਼ੀਲੈਂਡ ਅਤੇ ਆਸਟ੍ਰੇਲੀਆ ਵਿਰੁੱਧ ਪਿਛਲੀਆਂ ਤਿੰਨ ਟੈਸਟ ਸੀਰੀਜ਼ਾਂ ਵਿੱਚ ਉਸਦਾ ਪ੍ਰਦਰਸ਼ਨ ਮਾੜਾ ਰਿਹਾ। ਉਸਨੇ ਖਰਾਬ ਫਾਰਮ ਦਾ ਹਵਾਲਾ ਦਿੰਦੇ ਹੋਏ ਸਿਡਨੀ ਟੈਸਟ ਤੋਂ ਬਾਹਰ ਹੋਣ ਦਾ ਫੈਸਲਾ ਕੀਤਾ ਜਿਸ ਵਿੱਚ ਭਾਰਤ ਇਸ ਸਾਲ ਦੇ ਸ਼ੁਰੂ ਵਿੱਚ 1-3 ਨਾਲ ਲੜੀ ਹਾਰ ਗਿਆ ਸੀ।