ਇੰਗਲੈਂਡ ਦੇ ਕਪਤਾਨ ਬੇਨ ਸਟੋਕਸ ਦੀ ਅੱਖ ਦੀ ਸਰਜਰੀ ਸਫਲ ਹੋਈ

ਲੰਡਨ : ਇੰਗਲੈਂਡ ਦੇ ਟੈਸਟ ਕਪਤਾਨ ਅਤੇ ਦਿੱਗਜ ਆਲਰਾਊਂਡਰ ਬੇਨ ਸਟੋਕਸ ਦੀ ਸੱਜੀ ਅੱਖ ਦੀ ਸਰਜਰੀ ਸਫਲਤਾਪੂਰਵਕ ਹੋ ਗਈ ਹੈ। 34 ਸਾਲਾ ਸਟੋਕਸ ਨੇ ਸੋਸ਼ਲ ਮੀਡੀਆ ਪਲੇਟਫਾਰਮ ਇੰਸਟਾਗ੍ਰਾਮ 'ਤੇ ਆਪਣੀ ਇੱਕ ਤਸਵੀਰ ਸਾਂਝੀ ਕਰਦਿਆਂ ਇਸ ਦੀ ਜਾਣਕਾਰੀ ਦਿੱਤੀ। ਇਸ ਤਸਵੀਰ ਵਿੱਚ ਉਨ੍ਹਾਂ ਦੀ ਸੱਜੀ ਅੱਖ ਅਤੇ ਗੱਲ੍ਹ 'ਤੇ ਸੱਟ ਦੇ ਨਿਸ਼ਾਨ ਅਤੇ ਕਾਫ਼ੀ ਸੋਜ ਦਿਖਾਈ ਦੇ ਰਹੀ ਹੈ। ਸਟੋਕਸ ਨੇ ਕੈਪਸ਼ਨ ਵਿੱਚ ਲਿਖਿਆ, "ਭਾਵੇਂ ਅਜਿਹਾ ਲੱਗਦਾ ਨਹੀਂ ਹੈ... ਪਰ ਸਰਜਰੀ ਸਫਲ ਰਹੀ"।

ਨੌਜਵਾਨਾਂ ਨੂੰ ਕੋਚਿੰਗ ਦਿੰਦੇ ਸਮੇਂ ਹੋਇਆ ਹਾਦਸਾ 
ਰਿਪੋਰਟਾਂ ਅਨੁਸਾਰ, ਬੇਨ ਸਟੋਕਸ ਨੂੰ ਇਹ ਸੱਟ ਇਸੇ ਮਹੀਨੇ ਦੇ ਸ਼ੁਰੂ ਵਿੱਚ ਡਰਹਮ ਦੇ ਇੰਡੋਰ ਕ੍ਰਿਕਟ ਸੈਂਟਰ ਵਿੱਚ ਲੱਗੀ ਸੀ। ਉਹ ਉੱਥੇ ਅਕੈਡਮੀ ਦੇ ਨੌਜਵਾਨ ਖਿਡਾਰੀਆਂ ਨੂੰ ਕੋਚਿੰਗ ਦੇ ਰਹੇ ਸਨ, ਜਦੋਂ ਅਚਾਨਕ ਇੱਕ ਗੇਂਦ ਉਨ੍ਹਾਂ ਦੇ ਚਿਹਰੇ 'ਤੇ ਜਾ ਲੱਗੀ। ਜ਼ਿਕਰਯੋਗ ਹੈ ਕਿ ਸਟੋਕਸ ਲਈ ਪਿਛਲਾ ਕੁਝ ਸਮਾਂ ਕਾਫ਼ੀ ਨਿਰਾਸ਼ਾਜਨਕ ਰਿਹਾ ਹੈ, ਕਿਉਂਕਿ ਉਨ੍ਹਾਂ ਦੀ ਕਪਤਾਨੀ ਹੇਠ ਇੰਗਲੈਂਡ ਨੂੰ ਆਸਟ੍ਰੇਲੀਆ ਵਿੱਚ ਹੋਈ ਏਸ਼ੇਜ਼ ਸੀਰੀਜ਼ ਵਿੱਚ 1-4 ਨਾਲ ਕਰਾਰੀ ਹਾਰ ਦਾ ਸਾਹਮਣਾ ਕਰਨਾ ਪਿਆ ਸੀ।