ਰਿਤੁਪਰਣਾ-ਸ਼ਵੇਤਾਪਰਣਾ ਦੀ ਜੋੜੀ ਜਾਪਾਨ ਓਪਨ ਬੈਡਮਿੰਟਨ ਤੋਂ ਬਾਹਰ

ਟੋਕੀਓ- ਭਾਰਤੀ ਮਹਿਲਾ ਡਬਲਜ਼ ਜੋੜੀ ਰਿਤੁਪਰਣਾ ਪਾਂਡਾ ਅਤੇ ਸ਼ਵੇਤਾਪਰਣਾ ਪਾਂਡਾ ਮੰਗਲਵਾਰ ਨੂੰ ਜਾਪਾਨ ਓਪਨ ਸੁਪਰ 750 ਬੈਡਮਿੰਟਨ ਟੂਰਨਾਮੈਂਟ ਦੇ ਪਹਿਲੇ ਦੌਰ ਵਿੱਚ ਕੋਕੋਨਾ ਇਸ਼ੀਕਾਵਾ ਅਤੇ ਮਾਈਕੋ ਕਾਵਾਜ਼ੋਈ ਤੋਂ ਸਿੱਧੇ ਗੇਮਾਂ ਵਿੱਚ ਹਾਰ ਗਈ। ਵਿਸ਼ਵ ਰੈਂਕਿੰਗ ਵਿੱਚ 39ਵੇਂ ਸਥਾਨ 'ਤੇ ਕਾਬਜ਼ ਭਾਰਤੀ ਜੋੜੀ ਜਾਪਾਨੀ ਜੋੜੀ ਨੂੰ ਕੋਈ ਮੁਕਾਬਲਾ ਨਹੀਂ ਦੇ ਸਕੀ। 

ਇਸ਼ੀਕਾਵਾ ਅਤੇ ਕਾਵਾਜ਼ੋਈ ਨੇ ਸ਼ੁਰੂਆਤ ਤੋਂ ਹੀ ਮੈਚ 'ਤੇ ਦਬਦਬਾ ਬਣਾਇਆ ਅਤੇ ਸਿਰਫ਼ 32 ਮਿੰਟਾਂ ਵਿੱਚ 21-13, 21-7 ਨਾਲ ਇੱਕ ਪਾਸੜ ਜਿੱਤ ਪ੍ਰਾਪਤ ਕੀਤੀ। ਦੋ ਵਾਰ ਦੇ ਓਲੰਪਿਕ ਤਗਮਾ ਜੇਤੂ ਪੀਵੀ ਸਿੰਧੂ, ਲਕਸ਼ਯ ਸੇਨ ਅਤੇ ਪੁਰਸ਼ ਡਬਲਜ਼ ਵਿੱਚ ਸਾਤਵਿਕਸਾਈਰਾਜ ਰੰਕੀਰੈਡੀ ਅਤੇ ਚਿਰਾਗ ਸ਼ੈੱਟੀ ਦੀ ਜੋੜੀ ਬੁੱਧਵਾਰ ਨੂੰ ਆਪਣੀ ਮੁਹਿੰਮ ਦੀ ਸ਼ੁਰੂਆਤ ਕਰੇਗੀ।