ਰਿਸ਼ਭ ਪੰਤ ਨੇ ਕਪਤਾਨੀ ਲੈਣ ਤੋਂ ਕੀਤੀ ਨਾਂਹ, ਇਸ ਖਿਡਾਰੀ ਦੀ ਕੀਤੀ ਵਕਾਲਤ

ਸਪੋਰਟਸ ਡੈਸਕ- ਰਣਜੀ ਦੇ ਆਗਾਮੀ ਮੈਚਾਂ 'ਚ ਦਿੱਲੀ ਲਈ ਰਿਸ਼ਭ ਪੰਤ ਨੂੰ ਕਪਤਾਨ ਬਣਾਉਣ ਦੀਆਂ ਸੰਭਾਵਨਾਵਾਂ ਬਹੁਤ ਜ਼ਿਆਦਾ ਸੀ। ਪਰ ਸੱਤ ਸਾਲਾਂ ਬਾਅਦ ਰਣਜੀ ਮੈਚ ਖੇਡਣ ਲਈ ਤਿਆਰ ਪੰਤ ਨੇ ਕਪਤਾਨੀ ਤੋਂ ਇਨਕਾਰ ਕਰ ਦਿੱਤਾ। ਇਸ ਕਾਰਨ ਆਯੁਸ਼ ਬਡੋਨੀ ਦਿੱਲੀ ਦੀ ਕਪਤਾਨੀ ਕਰਨਗੇ।

ਡੀਡੀਸੀਏ ਦੀ ਸਿਖਰਲੀ ਕੌਂਸਲ ਦੇ ਇੱਕ ਮੈਂਬਰ ਨੇ ਪੱਤਰਕਾਰਾਂ ਨੂੰ ਦੱਸਿਆ, 'ਰਿਸ਼ਭ ਦਾ ਮੰਨਣਾ ਹੈ ਕਿ ਮੌਜੂਦਾ ਕਪਤਾਨ ਨੂੰ ਜ਼ਿੰਮੇਵਾਰੀ ਸੰਭਾਲਣੀ ਚਾਹੀਦੀ ਹੈ।' ਉਸਦਾ ਮੰਨਣਾ ਹੈ ਕਿ ਕਿਉਂਕਿ ਉਹ ਲਗਾਤਾਰ ਉਪਲਬਧ ਨਹੀਂ ਰਹੇਗਾ, ਇਸ ਲਈ ਕਪਤਾਨੀ ਵਿੱਚ ਕੋਈ ਬਦਲਾਅ ਨਹੀਂ ਹੋਣਾ ਚਾਹੀਦਾ। ਜਦੋਂ ਪੰਤ ਨੂੰ ਕਪਤਾਨੀ ਦੀ ਪੇਸ਼ਕਸ਼ ਕੀਤੀ ਗਈ ਸੀ, ਤਾਂ ਉਸਨੇ ਕਿਹਾ ਕਿ ਉਹ ਬਡੋਨੀ ਦੀ ਕਪਤਾਨੀ ਹੇਠ ਖੇਡ ਕੇ ਖੁਸ਼ ਹੈ। ਅਸੀਂ 22 ਖਿਡਾਰੀਆਂ ਦੀ ਚੋਣ ਕੀਤੀ ਹੈ, ਜਿਨ੍ਹਾਂ ਵਿੱਚੋਂ ਪੰਜ ਖਿਡਾਰੀ 23 ਸਾਲ ਤੋਂ ਘੱਟ ਉਮਰ ਦੇ ਹਨ। ਇਹ ਪੰਜ ਖਿਡਾਰੀ 25 ਜਨਵਰੀ ਤੋਂ ਛੱਤੀਸਗੜ੍ਹ ਵਿਰੁੱਧ ਸੀਕੇ ਨਾਇਡੂ ਅੰਡਰ 23 ਮੈਚ ਲਈ ਭਿਲਾਈ ਜਾਣਗੇ।

ਭਾਰਤੀ ਕ੍ਰਿਕਟ ਕੰਟਰੋਲ ਬੋਰਡ (BCCI) ਨੇ ਸਾਰੇ ਕੇਂਦਰੀ ਇਕਰਾਰਨਾਮੇ ਵਾਲੇ ਖਿਡਾਰੀਆਂ ਲਈ ਘਰੇਲੂ ਕ੍ਰਿਕਟ ਖੇਡਣਾ ਲਾਜ਼ਮੀ ਕਰ ਦਿੱਤਾ ਹੈ। ਯਸ਼ਸਵੀ ਜੈਸਵਾਲ ਮੁੰਬਈ ਲਈ ਖੇਡਣ ਜਾ ਰਹੇ ਹਨ ਅਤੇ ਸ਼ੁਭਮਨ ਗਿੱਲ ਪੰਜਾਬ ਲਈ ਖੇਡਣ ਜਾ ਰਹੇ ਹਨ। ਰੋਹਿਤ ਸ਼ਰਮਾ ਨੇ ਵੀ ਮੁੰਬਈ ਲਈ ਰਣਜੀ ਮੈਚ ਖੇਡਣ ਲਈ ਹਾਮੀ ਭਰ ਦਿੱਤੀ ਹੈ। ਜਦਕਿ ਵਿਰਾਟ ਕੋਹਲੀ ਦੇ ਗਰਦਨ 'ਚ ਅਕੜਾਅ ਕਾਰਨ ਤੇ ਕੇਐੱਲ ਰਾਹੁਲ ਦੇ ਸੱਟ ਕਾਰਨ ਰਣਜੀ 'ਚ ਖੇਡਣ ਦੀ ਸੰਭਾਵਨਾ ਨਹੀਂ ਹੈ।