IPL ਚੈਂਪੀਅਨ ਬਣਨ ਤੋਂ ਬਾਅਦ RCB ਨੂੰ ਵੱਡਾ ਝਟਕਾ! ICC ਨੇ ਸਟਾਰ ਖਿਡਾਰੀ ''ਤੇ ਲਾਇਆ ਬੈਨ
Tuesday, Jun 02, 2026 - 09:02 PM (IST)
ਸਪੋਰਟਸ ਡੈਸਕ- ਰਾਇਲ ਚੈਲੰਜਰਜ਼ ਬੈਂਗਲੁਰੂ ਨੇ ਅਹਿਮਦਾਬਾਦ ਦੇ ਨਰਿੰਦਰ ਮੋਦੀ ਸਟੇਡੀਅਮ ਵਿੱਚ ਖੇਡੇ ਗਏ ਫਾਈਨਲ ਮੁਕਾਬਲੇ ਵਿੱਚ ਗੁਜਰਾਤ ਟਾਈਟਨਸ ਨੂੰ 5 ਵਿਕਟਾਂ ਨਾਲ ਹਰਾ ਕੇ ਲਗਾਤਾਰ ਦੂਜੀ ਵਾਰ ਆਈਪੀਐਲ ਖ਼ਿਤਾਬ ਜਿੱਤ ਕੇ ਇਤਿਹਾਸ ਰਚ ਦਿੱਤਾ ਹੈ। ਪਰ ਜਿੱਤ ਦੇ ਜਸ਼ਨਾਂ ਦੇ ਵਿਚਕਾਰ ਹੀ ਟੀਮ ਨੂੰ ਇੱਕ ਵੱਡਾ ਝਟਕਾ ਲੱਗਾ ਹੈ, ਕਿਉਂਕਿ ਬੀਸੀਸੀਆਈ (BCCI) ਨੇ ਟੀਮ ਦੇ ਸਟਾਰ ਬੱਲੇਬਾਜ਼ ਟਿਮ ਡੇਵਿਡ 'ਤੇ ਇੱਕ ਮੈਚ ਦੀ ਪਾਬੰਦੀ ਲਗਾ ਦਿੱਤੀ ਹੈ। ਇਸ ਦੇ ਨਾਲ ਹੀ ਉਨ੍ਹਾਂ ਦੀ 50 ਫੀਸਦੀ ਮੈਚ ਫੀਸ ਵੀ ਕੱਟ ਲਈ ਗਈ ਹੈ।
ਬੀਸੀਸੀਆਈ ਵੱਲੋਂ ਜਾਰੀ ਜਾਣਕਾਰੀ ਅਨੁਸਾਰ, ਫਾਈਨਲ ਮੈਚ ਦੌਰਾਨ ਟਿਮ ਡੇਵਿਡ ਨੂੰ ਕੋਡ ਆਫ ਕੰਡਕਟ ਦੀ ਉਲੰਘਣਾ ਦਾ ਦੋਸ਼ੀ ਪਾਇਆ ਗਿਆ ਹੈ। ਘਟਨਾ ਗੁਜਰਾਤ ਦੀ ਪਾਰੀ ਦੇ 10ਵੇਂ ਓਵਰ ਵਿੱਚ ਵਾਪਰੀ, ਜਦੋਂ ਇੱਕ ਵਿਕਟ ਡਿੱਗਣ ਤੋਂ ਬਾਅਦ ਡੇਵਿਡ ਨੇ ਹਮਲਾਵਰ ਅੰਦਾਜ਼ ਵਿੱਚ ਅੰਪਾਇਰ ਨਿਤਿਨ ਮੇਨਨ ਵੱਲ ਇੱਕ ਆਈਸ ਬੈਗ ਸੁੱਟਿਆ। ਉਨ੍ਹਾਂ ਦੀ ਇਸ ਹਰਕਤ ਨੂੰ ਆਈਪੀਐਲ ਕੋਡ ਆਫ ਕੰਡਕਟ ਦੇ ਆਰਟੀਕਲ 2.9 ਦੀ ਉਲੰਘਣਾ ਮੰਨਿਆ ਗਿਆ ਹੈ, ਜੋ ਕਿਸੇ ਖਿਡਾਰੀ ਜਾਂ ਮੈਚ ਅਧਿਕਾਰੀ ਵੱਲ ਕੋਈ ਸਾਮਾਨ ਸੁੱਟਣ ਨਾਲ ਸਬੰਧਤ ਹੈ। ਡੇਵਿਡ ਨੇ ਮੈਚ ਰੈਫਰੀ ਦੇ ਸਾਹਮਣੇ ਆਪਣੀ ਗਲਤੀ ਸਵੀਕਾਰ ਕਰ ਲਈ ਹੈ।
ਟਿਮ ਡੇਵਿਡ 'ਤੇ ਇਹ ਪਾਬੰਦੀ ਇਸ ਲਈ ਲੱਗੀ ਹੈ ਕਿਉਂਕਿ ਇਸ ਸੀਜ਼ਨ ਵਿੱਚ ਉਨ੍ਹਾਂ ਨੇ ਤੀਜੀ ਵਾਰ ਅਜਿਹੀ ਗਲਤੀ ਕੀਤੀ ਹੈ। ਸੀਜ਼ਨ ਦੇ 20ਵੇਂ ਮੈਚ ਵਿੱਚ ਉਨ੍ਹਾਂ ਨੂੰ 1 ਡੀਮੈਰਿਟ ਪੁਆਇੰਟ ਮਿਲਿਆ ਸੀ। 54ਵੇਂ ਮੈਚ ਵਿੱਚ ਉਨ੍ਹਾਂ ਦੇ ਖਾਤੇ ਵਿੱਚ 2 ਹੋਰ ਪੁਆਇੰਟ ਜੁੜੇ। ਫਾਈਨਲ ਵਿੱਚ ਹੋਈ ਇਸ ਹਰਕਤ ਤੋਂ ਬਾਅਦ ਉਨ੍ਹਾਂ ਦੇ ਕੁੱਲ 5 ਡੀਮੈਰਿਟ ਪੁਆਇੰਟ ਹੋ ਗਏ ਹਨ, ਜਿਸ ਕਾਰਨ ਨਿਯਮਾਂ ਅਨੁਸਾਰ ਉਨ੍ਹਾਂ 'ਤੇ ਇੱਕ ਮੈਚ ਦੀ ਪਾਬੰਦੀ ਲਗਾਈ ਗਈ ਹੈ।
ਕਿਉਂਕਿ ਮੌਜੂਦਾ ਸੀਜ਼ਨ ਖਤਮ ਹੋ ਚੁੱਕਾ ਹੈ, ਇਸ ਲਈ ਟਿਮ ਡੇਵਿਡ ਨੂੰ ਇਹ ਸਜ਼ਾ ਅਗਲੇ ਸਾਲ (IPL 2027) ਭੁਗਤਣੀ ਪਵੇਗੀ। ਉਹ ਅਗਲੇ ਸੀਜ਼ਨ ਦਾ ਪਹਿਲਾ ਮੈਚ ਨਹੀਂ ਖੇਡ ਸਕਣਗੇ। ਇਸ ਤੋਂ ਪਹਿਲਾਂ ਅਜਿਹੀ ਸਜ਼ਾ ਆਈਪੀਐਲ 2024 ਵਿੱਚ ਹਾਰਦਿਕ ਪਾਂਡਿਆ ਨੂੰ ਮਿਲੀ ਸੀ, ਜਿਸ ਕਾਰਨ ਉਹ 2025 ਦਾ ਪਹਿਲਾ ਮੈਚ ਨਹੀਂ ਖੇਡ ਸਕੇ ਸਨ।
