ਰਾਸ਼ਿਦ ਦਾ ਆਲਰਾਊਂਡਰ ਪ੍ਰਦਰਸ਼ਨ, ਅਫਗਾਨਿਸਤਾਨ ਨੇ ਸ਼ਿਕੰਜਾ ਕੱਸਿਆ

ਚਟਗਾਂਵ (ਬੰਗਲਾਦੇਸ਼)— ਸਪਿਨਰ ਰਾਸ਼ਿਦ ਖਾਨ ਦੇ ਬੱਲੇ ਤੋਂ ਬਾਅਦ ਗੇਂਦ ਨਾਲ ਸ਼ਾਨਦਾਰ ਪ੍ਰਦਰਸ਼ਨ ਦੇ ਦਮ 'ਤੇ ਅਫਗਾਨਿਸਤਾਨ ਨੇ ਇਕਲੌਤੇ ਟੈਸਟ ਦੇ ਦੂਜੇ ਦਿਨ 194 ਦੌੜਾਂ 'ਤੇ ਸਟੰਪਸ ਤਕ ਬੰਗਲਾਦੇਸ਼ ਦੀਆਂ 8 ਵਿਕਟਾਂ ਹਾਸਲ ਕੀਤੀਆਂ। ਰਾਸ਼ਿਦ ਨੇ ਸਵੇਰੇ 61 ਗੇਂਦਾਂ ਵਿਚ 51 ਦੌੜਾਂ ਦੀ ਪਾਰੀ ਖੇਡੀ, ਜਿਸ ਨਾਲ ਅਫਗਾਨਿਸਤਾਨ ਨੇ ਪਹਿਲੀ ਪਾਰੀ ਵਿਚ 342 ਦੌੜਾਂ ਬਣਾਈਆਂ ਤੇ ਫਿਰ ਇਸ ਸਪਿਨਰ ਨੇ 47 ਦੌੜਾਂ ਦੇ ਕੇ 4 ਵਿਕਟਾਂ ਹਾਸਲ ਕੀਤੀਆਂ, ਜਿਸ ਵਿਚ ਆਪਣੇ ਪਹਿਲੇ ਹੀ ਓਵਰ ਵਿਚ ਇਕ ਵਿਕਟ ਹਾਸਲ ਕਰਨਾ ਵੀ ਮੁਸ਼ਕਿਲ ਰਿਹਾ। ਬੰਗਲਾਦੇਸ਼ ਦੀ ਟੀਮ ਦਿਨ ਦੀ ਖੇਡ ਖਤਮ ਹੋਣ ਤਕ 8 ਵਿਕਟਾਂ 'ਤੇ 194 ਦੌੜਾਂ ਬਣਾ ਕੇ ਜੂਝ ਰਹੀ ਸੀ।
ਮੋਮੀਨੁਲ ਹੱਕ ਹੀ ਬੰਗਲਾਦੇਸ਼ ਲਈ ਅਰਧ ਸੈਂਕੜੇ ਵਾਲੀ ਪਾਰੀ ਖੇਡ ਸਕਿਆ ਜਦਕਿ ਮੋਸਾਦੇਕ ਹੁਸੈਨ 44 ਦੌੜਾਂ ਬਣਾ ਕੇ ਕ੍ਰੀਜ਼ 'ਤੇ ਡਟਿਆ ਹੈ। ਮੋਮੀਨੁਲ ਨੇ 71 ਗੇਂਦਾਂ ਵਿਚ 52 ਦੌੜਾਂ ਬਣਾਈਆਂ। ਪਿਛਲੇ ਬੱਲੇਬਾਜ਼ ਤਾਈਜੁਲ ਇਸਲਾਮ 14 ਦੌੜਾਂ ਬਣਾ ਕੇ ਦੂਜੇ ਪਾਸੇ 'ਤੇ ਹੈ। ਟੀਮ ਅਜੇ ਵੀ 148 ਦੌੜਾਂ ਨਾਲ ਪਿਛੜ ਰਹੀ ਹੈ ਅਤੇ ਉਸਦੀਆਂ ਸਿਰਫ 2 ਵਿਕਟਾਂ ਬਾਕੀ ਹਨ।