ਓਲੰਪਿਕ ਲਈ 117 ਖਿਡਾਰੀਆਂ ਤੇ ਸਹਿਯੋਗੀ ਸਟਾਫ ਦੇ 140 ਮੈਂਬਰਾਂ ਦੀ ਸੂਚੀ ਜਾਰੀ, ਆਭਾ ਖਟੂਆ ਬਾਹਰ
Thursday, Jul 18, 2024 - 10:48 AM (IST)
![](https://static.jagbani.com/multimedia/2024_7image_10_47_47805071832.jpg)
ਨਵੀਂ ਦਿੱਲੀ– ਪੈਰਿਸ ਓਲੰਪਿਕ ਵਿਚ ਭਾਰਤ ਦੇ 117 ਖਿਡਾਰੀ ਹਿੱਸਾ ਲੈਣਗੇ। ਖੇਡ ਮੰਤਰਾਲਾ ਨੇ ਇਸ ਤੋਂ ਇਲਾਵਾ ਸਹਿਯੋਗੀ ਸਟਾਫ ਦੇ 140 ਮੈਂਬਰਾਂ ਨੂੰ ਵੀ ਮਨਜ਼ੂਰੀ ਦਿੱਤੀ ਹੈ, ਜਿਸ ਵਿਚ ਖੇਡ ਅਧਿਕਾਰੀ ਵੀ ਸ਼ਾਮਲ ਹਨ। ਸਹਿਯੋਗੀ ਸਟਾਫ ਦੇ 72 ਮੈਂਬਰਾਂ ਨੂੰ ਸਰਕਾਰ ਦੇ ਖਰਚੇ ’ਤੇ ਮਨਜ਼ੂਰੀ ਮਿਲੀ ਹੈ। ਓਲੰਪਿਕ ਲਈ ਜਿਹੜੇ ਖਿਡਾਰੀਆਂ ਨੇ ਕੁਆਲੀਫਾਈ ਕੀਤਾ ਹੈ, ਉਨ੍ਹਾਂ ਵਿਚ ਸਿਰਫ ਸ਼ਾਟਪੁੱਟਰ ਆਭਾ ਖਟੂਆ ਦਾ ਨਾਂ ਸੂਚੀ ਵਿਚ ਨਹੀਂ ਹੈ। ਵਿਸ਼ਵ ਰੈਂਕਿੰਗ ਰਾਹੀਂ ਕੋਟਾ ਹਾਸਲ ਕਰਨ ਵਾਲੀ ਆਭਾ ਖਟੂਆ ਦਾ ਨਾਂ ਹਟਾਉਣ ਨੂੰ ਲੈ ਕੇ ਕੋਈ ਸਪੱਸ਼ਟੀਕਰਨ ਨਹੀਂ ਦਿੱਤਾ ਗਿਆ। ਕੁਝ ਦਿਨ ਪਹਿਲਾਂ ਵਿਸ਼ਵ ਐਥਲੈਟਿਕਸ ਦੀ ਓਲੰਪਿਕ ਵਿਚ ਹਿੱਸਾ ਲੈਣ ਵਾਲੇ ਖਿਡਾਰੀਆਂ ਦੀ ਸੂਚੀ ਤੋਂ ਉਸਦਾ ਨਾਂ ਹਟਾ ਦਿੱਤਾ ਗਿਆ ਸੀ। ਅਜੇ ਤਕ ਇਸ ਦੇ ਬਾਰੇ ਵਿਚ ਕੋਈ ਜਾਣਕਾਰੀ ਨਹੀਂ ਹੈ ਕਿ ਸੱਟ ਲੱਗਣ, ਡੋਪਿੰਗ ਉਲੰਘਣਾ ਜਾਂ ਕਿਸੇ ਹੋਰ ਤਕਨੀਕੀ ਸਮੱਸਿਆ ਕਾਰਨ ਉਸਦਾ ਨਾਂ ਹਟਾਇਆ ਗਿਆ ਹੈ।
ਓਲੰਪਿਕ ਲਈ ਕੁਆਲੀਫਾਈ ਕਰਨ ਵਾਲੇ ਹੋਰਨਾਂ ਖਿਡਾਰੀਆਂ ਨੂੰ ਉਮੀਦ ਦੇ ਅਨੁਸਾਰ ਮਨਜ਼ੂਰੀ ਮਿਲ ਗਈ ਹੈ। ਲੰਡਨ ਓਲੰਪਿਕ ਦੇ ਕਾਂਸੀ ਤਮਗਾ ਜੇਤੂ ਸਾਬਕਾ ਨਿਸ਼ਾਨੇਬਾਜ਼ ਗਗਨ ਨਾਰੰਗ ਨੂੰ ਦਲ ਪ੍ਰਮੁੱਖ ਬਣਾਇਆ ਗਿਆ ਹੈ। ਨਾਰੰਗ ਭਾਰਤੀ ਓਲੰਪਿਕ ਸੰਘ (ਆਈ. ਓ. ਏ.) ਵਿਚ ਉਪ ਮੁਖੀ ਵੀ ਹੈ। ਆਭਾ ਖਟੂਆ ਦਾ ਨਾਂ ਸ਼ਾਮਲ ਨਾ ਹੋਣ ਦੇ ਬਾਵਜੂਦ ਖਿਡਾਰੀਆਂ ਦੀ ਸੂਚੀ ਵਿਚ ਸਭ ਤੋਂ ਵੱਧ 21 (11 ਮਹਿਲਾ ਤੇ 18 ਪੁਰਸ਼) ਖਿਡਾਰੀ ਐਥਲੈਟਿਕਸ ਦੇ ਹਨ। ਉਸ ਤੋਂ ਬਾਅਦ ਨਿਸ਼ਾਨੇਬਾਜ਼ੀ (21) ਤੇ ਹਾਕੀ (19) ਦਾ ਨੰਬਰ ਆਉਂਦਾ ਹੈ। ਟੇਬਲ ਟੈਨਿਸ ਵਿਚ ਭਾਰਤ ਦੇ 8 ਜਦਕਿ ਬੈਡਮਿੰਟ ਵਿਚ ਦੋ ਵਾਰ ਦੀ ਓਲੰਪਿਕ ਤਮਗਾ ਜੇਤੂ ਪੀ. ਵੀ. ਸਿੰਧੂ ਸਮੇਤ 7 ਖਿਡਾਰੀ ਹਿੱਸਾ ਲੈਣਗੇ।
ਕੁਸ਼ਤੀ (6), ਤੀਰਅੰਦਾਜ਼ੀ (6) ਤੇ ਮੁੱਕੇਬਾਜ਼ੀ (6) ਵਿਚ 6-6 ਖਿਡਾਰੀ ਓਲੰਪਿਕ ਵਿਚ ਆਪਣੀ ਚੁਣੌਤੀ ਪੇਸ਼ ਕਰਨਗੇ। ਇਸ ਤੋਂ ਬਾਅਦ ਗੋਲਫ (4), ਟੈਨਿਸ (3), ਤੈਰਾਕੀ (2), ਸੇਲਿੰਗ (2) ਦਾ ਨੰਬਰ ਆਉਂਦਾ ਹੈ। ਘੋੜਸਵਾਰੀ, ਜੂਡੋ, ਰੋਇੰਗ ਤੇ ਵੇਟਲਿਫਟਿੰਗ ਵਿਚ 1-1 ਖਿਡਾਰੀ ਹਿੱਸਾ ਲਵੇਗਾ।
ਨਿਸ਼ਾਨੇਬਾਜ਼ੀ ਦਲ ਵਿਚ 11 ਮਹਿਲਾ ਤੇ 10 ਪੁਰਸ਼ ਖਿਡਾਰੀ ਸ਼ਾਮਲ ਹਨ। ਟੇਬਲ ਟੈਨਿਸ ਵਿਚ ਪੁਰਸ਼ ਤੇ ਮਹਿਲਾ ਦੋਵੇਂ ਵਰਗਾਂ ਵਿਚ 4-4 ਖਿਡਾਰੀ ਸ਼ਾਮਲ ਹਨ। ਟੋਕੀਓ ਓਲੰਪਿਕ ਦੀ ਚਾਂਦੀ ਤਮਗਾ ਜੇਤੂ ਮੀਰਾਬਾਈ ਚਾਨੂ ਦਲ ਵਿਚ ਸ਼ਾਮਲ ਇਕਲੌਤੀ ਵੇਟਲਿਫਟਰ ਹੈ। ਉਹ ਮਹਿਲਾਵਾਂ ਦੇ 49 ਕਿ. ਗ੍ਰਾ. ਭਾਰ ਵਰਗ ਵਿਚ ਚੁਣੌਤੀ ਪੇਸ਼ ਕਰੇਗੀ।
ਟੋਕੀਓ ਓਲੰਪਿਕ ਵਿਚ ਭਾਰਤ ਦੇ 119 ਖਿਡਾਰੀਆਂ ਨੇ ਹਿੱਸਾ ਲਿਆ ਸੀ, ਜਿਨ੍ਹਾਂ ਨੇ 7 ਤਮਗੇ ਜਿੱਤੇ ਸਨ। ਇਨ੍ਹਾਂ ਵਿਚ ਨੀਰਜ ਚੋਪੜਾ ਦਾ ਜੈਵਲਿਨ ਥ੍ਰੋਅ ਵਿਚ ਜਿੱਤਿਆ ਇਤਿਹਾਸ ਸੋਨਾ ਵੀ ਸ਼ਾਮਲ ਹੈ। ਚੋਪੜਾ ਪੈਰਿਸ ਵਿਚ ਆਪਣੇ ਖਿਤਾਬ ਦਾ ਬਚਾਅ ਕਰਨ ਲਈ ਉਤਰੇਗਾ।
ਦਲ ਵਿਚ ਸ਼ਾਮਲ 21 ਅਧਿਕਾਰੀਆਂ ਵਿਚੋਂ 11 ਖੇਡ ਪਿੰਡ ਵਿਚ ਰੁਕਣਗੇ ਜਦਕਿ ਬਾਕੀ ਅਧਿਕਾਰੀ ਖੇਡ ਪਿੰਡ ਦੇ ਬਾਹਰ ਹੋਟਲ ਵਿਚ ਰੁਕਣਗੇ। ਇਨ੍ਹਾਂ ਦਾ ਖਰਚਾ ਸਰਕਾਰ ਸਹਿਣ ਕਰੇਗੀ। ਨਿਸ਼ਾਨੇਬਾਜ਼ੀ ਵਿਚ ਸਹਿਯੋਗੀ ਸਟਾਫ ਦੇ ਸਭ ਤੋਂ ਵੱਧ 18 ਮੈਂਬਰ ਸ਼ਾਮਲ ਹਨ, ਜਿਨ੍ਹਾਂ ਵਿਚ 1 ਹਾਈ ਪ੍ਰਫਾਰਮੈਂਸ ਨਿਰਦੇਸ਼ਕ ਤੇ 6 ਕੋਚ ਖੇਡ ਪਿੰਡ ਵਿਚ ਰੁਕਣਗੇ। ਬਾਕੀ 11 ਮੈਂਬਰ ਹੋਟਲ ਵਿਚ ਰੁਕਣਗੇ, ਜਿਨ੍ਹਾਂ ਵਿਚ 4 ਕੋਚ, 4 ਫਿਜ਼ੀਓ, 2 ਮਨੋਵਿਗਿਆਨਿਕ ਤੇ ਇਕ ਅਨੁਕੂਲ ਮਾਹਿਰ ਸ਼ਾਮਲ ਹੈ। ਐਥਲੈਟਿਕਸ ਵਿਚ ਸਹਿਯੋਗੀ ਸਟਾਫ ਦੇ 17 ਮੈਂਬਰ ਸ਼ਾਮਲ ਹਨ। ਉਸ ਤੋਂ ਬਾਅਦ ਕੁਸ਼ਤੀ (12), ਮੁੱਕੇਬਾਜ਼ੀ (11), ਹਾਕੀ (10), ਟੇਬਲ ਟੈਨਿਸ (9), ਬੈਡਮਿੰਟਨ (9), ਗੋਲਫ (7), ਘੋੜਸਵਾਰੀ (5), ਤੀਰਅੰਦਾਜ਼ੀ (4), ਕਿਸ਼ਤੀ ਚਲਾਉਣ (4), ਵੇਟਲਿਫਟਰ (4), ਟੈਨਿਸ (3), ਤੈਰਾਕੀ (2), ਤੇ ਜੂਡੋ (1) ਦਾ ਨੰਬਰ ਆਉਂਦਾ ਹੈ।