ਕੋਹਲੀ ਦੀ IPL ਟੀਮ ਦਾ ਹਿੱਸਾ ਰਹੇ 2 ਖਿਡਾਰੀਆਂ ਦੀ ਹੋਈ ਗ੍ਰਿਫਤਾਰੀ, ਫਿਕਸਿੰਗ ਦਾ ਲੱਗਿਆ ਦੋਸ਼

ਨਵੀਂ ਦਿੱਲੀ : ਭਾਰਤੀ ਕ੍ਰਿਕਟ 'ਤੇ ਇਕ ਵਾਰ ਫਿਰ ਤੋਂ ਫਿਕਸਿੰਗ ਦਾ ਸਾਇਆ ਮੰਡਰਾ ਰਿਹਾ ਹੈ। ਇਸ ਵਾਰ ਕਰਨਾਟਕ ਪ੍ਰੀਮੀਅਰ ਲੀਗ 'ਚ ਸਪਾਟ ਫਿਕਸਿੰਗ ਨੂੰ ਲੈ ਕੇ ਰੋਜ਼ਾਨਾ ਹੈਰਾਨ ਕਰਨ ਵਾਲੇ ਖੁਲਾਸੇ ਹੋ ਰਹੇ ਹਨ। ਇਸ ਮੈਚ ਫਿਕਸਿੰਗ ਮਾਮਲੇ 'ਚ ਇਕ ਤੋਂ ਬਾਅਦ ਇਕ ਗ੍ਰਿਫਤਾਰੀ ਹੋ ਰਹੀ ਹੈ। ਹੁਣ ਤਕ ਇਕ ਟੀਮ ਦੇ ਮਾਲਕ, ਕੋਚ ਅਤੇ ਬੱਲੇਬਾਜ਼ ਨੂੰ ਬੈਂਗਲੁਰੂ ਪੁਲਸ ਦੀ ਕ੍ਰਾਈਮ ਬ੍ਰਾਂਚ ਗ੍ਰਿਫਤਾਰ ਕਰ ਚੁੱਕੀ ਹੈ। ਇਸ ਲੀਗ ਵਿਚ ਸਪਾਟ ਫਿਕਸਿੰਗ ਮਾਮਲੇ 'ਚ ਵੀਰਵਾਰ ਨੂੰ 2 ਹੋਰ ਵੱਡੇ ਨਾਂ ਸਾਹਮਣੇ ਆਏ ਹਨ, ਜਿਸ ਨੇ ਭਾਰਤੀ ਕ੍ਰਿਕਟ ਨੂੰ ਹਿਲਾ ਕੇ ਰੱਖ ਦਿੱਤਾ ਹੈ। ਪੁਲਸ ਨੇ ਹੁਣ ਆਈ. ਪੀ. ਐੱਲ. ਲੀਗ ਵਿਚ ਵਿਰਾਟ ਕੋਹਲੀ ਦੀ ਕਪਤਾਨੀ ਵਾਲੀ ਫ੍ਰੈਂਚਾਈਜ਼ੀ ਟੀਮ ਰਾਇਲ ਚੈਲੰਜਰਜ਼ ਬੈਂਗਲੁਰੂ ਟੀਮ ਦਾ ਹਿੱਸਾ ਰਹਿ ਚੁੱਕੇ 2 ਖਿਡਾਰੀਆਂ ਨੂੰ ਗ੍ਰਿਫਤਾਰ ਕੀਤਾ ਹੈ।

ਕੋਹਲੀ ਤੇ ਰੋਹਿਤ ਦੀ ਟੀਮ ਦਾ ਰਹਿ ਚੁੱਕਾ ਹਿੱਸਾ

33 ਸਾਲਾ ਸੀ. ਐੱਮ. ਗੌਤਮ ਅਤੇ ਅਬਰਾਰ ਕਾਜੀ ਨੂੰ ਪੁਲਸ ਨੇ ਗ੍ਰਿਫਤਾਰ ਕੀਤਾ ਹੈ। ਦੋਵੇਂ ਖਿਡਾਰੀ ਆਈ. ਪੀ. ਐੱਲ. ਦੀ ਫ੍ਰੈਂਚਾਈਜ਼ੀ ਵਾਲੀ ਟੀਮ ਰਾਇਲ ਚੈਲਂਜਰਜ਼ ਬੈਂਗਲੁਰੂ ਟੀਮ ਦਾ ਵੀ ਹਿੱਸਾ ਰਹਿ ਚੁੱਕੇ ਹਨ। ਗੌਤਮ ਰੋਹਿਤ ਸ਼ਰਮਾ ਦੀ ਅਗਵਾਈ ਵਾਲੀ ਟੀਮ ਮੁੰਬਈ ਇੰਡੀਅਨਜ਼ ਦਾ ਹਿੱਸਾ ਵੀ ਰਹਿ ਚੁੱਕੇ ਹਨ। ਦੋਵੇਂ ਖਿਡਾਰੀਆਂ 'ਤੇ ਕੇ. ਪੀ. ਐੱਲ. ਦੇ ਇਸ ਸੀਜ਼ਨ ਦੇ ਖਿਤਾਬੀ ਮੁਕਾਬਲੇ ਵਿਚ ਸਲੋਅ ਬੱਲੇਬਾਜ਼ੀ ਲਈ 20 ਲੱਖ ਰੁਪਏ ਲੈਣ ਦਾ ਦੋਸ਼ ਲੱਗਾ ਹੈ। ਕੇ. ਪੀ. ਐੱਲ. 2019 ਦਾ ਫਾਈਨਲ ਹੁਬਲੀ ਅਤੇ ਬੇਲਾਰੀ ਟੀਮ ਵਿਚਾਲੇ ਖੇਡਿਆ ਗਿਆ ਸੀ, ਜਿਸ ਵਿਚ ਸਪਾਟ ਫਿਕਸਿੰਗ ਹੋਈ ਸੀ। ਇਸ ਤੋਂ ਪਹਿਲਾਂ ਇਸ ਲੀਗ ਵਿਚ ਫਿਕਸਿੰਗ ਨੂੰ ਲੈ ਕੇ ਭਾਰਤੀ ਕ੍ਰਿਕਟਰ ਨਿਸ਼ਾਂਤ ਸ਼ੇਖਾਵਤ ਨੂੰ ਵੀ ਪੁਲਸ ਗ੍ਰਿਫਤਾਰ ਕਰ ਚੁੱਕੀ ਹੈ।

ਬੁਕੀ ਨੂੰ ਖਿਡਾਰੀਆਂ ਤਕ ਪਹੁੰਚਾਉਣ 'ਚ ਕੀਤੀ ਸੀ ਮਦਦ

ਇਸ ਮਾਮਲੇ ਵਿਚ ਕਰਨਾਟਕ ਪੁਲਸ ਦੀ ਕ੍ਰਾਈਮ ਬ੍ਰਾਂਚ ਟੀਮ ਨੇ ਸ਼ਿਵਮੋਗਾ ਲਾਇੰਸ ਫ੍ਰੈਂਚਾਈਜ਼ੀ ਦੇ ਖਿਡਾਰੀ ਨਿਸ਼ਾਂਤ ਸ਼ੇਖਾਵਤ ਨੂੰ ਵੀ ਕਲ ਹਿਰਾਸਤ 'ਚ ਲਿਆ ਸੀ। ਕਰਨਾਟਕ ਪ੍ਰੀਮੀਅਰ ਲੀਗ ਵਿਚ ਕਈ ਟੀਮਾਂ ਵੱਲੋਂ ਖੇਡਣ ਵਾਲੇ ਸ਼ੇਖਵਤ 'ਤੇ ਦੋਸ਼ ਲੱਗਾ ਸੀ ਕਿ ਉਹ ਬੁਕੀਆਂ ਨੂੰ ਖਿਡਾਰੀਆਂ ਅਤੇ ਕੋਚਿੰਗ ਸਟਾਫ ਤਕ ਪਹੁੰਚਾਉਂਦੇ ਸੀ। ਮੀਡੀਆ ਰਿਪੋਰਟਸ ਮੁਤਾਬਕ ਨਿਸ਼ਾਂਤ ਨੇ ਬੈਂਗਲੁਰੂ ਬਲਾਸਟਰਸ ਦੇ ਗੇਂਦਬਾਜ਼ੀ ਕੋਚ ਵੀਨੂੰ ਪ੍ਰਸਾਦ ਅਤੇ ਬੁਕੀ ਮਨੋਜ ਤਿਵਾਰੀ ਵਿਚਾਲੇ ਦਲਾਲ ਦੀ ਭੂਮਿਕਾ ਨਿਭਾਈ ਸੀ। ਦੱਸ ਦਈਏ ਕਿ ਵੀਨੂੰ ਪ੍ਰਸਾਦ ਅਤੇ ਬੈਂਗਲੁਰੂ ਬਲਾਸਟਰਸ ਦੇ ਬੱਲੇਬਾਜ਼ ਐੱਮ. ਵਿਸ਼ਵਨਾਥਨ ਨੂੰ ਪਿਛਲੇ ਮਹੀਨੇ ਪੁਲਸ ਨੇ ਗ੍ਰਿਫਤਾਰ ਕੀਤਾ ਸੀ। ਪੁਲਸ ਮੁਤਾਬਕ 29 ਸਾਲਾ ਨਿਸ਼ਾਂਤ ਸ਼ੇਖਾਵਤ ਅਤੇ ਵੀਨੂੰ ਪ੍ਰਸਾਦ ਨੇ ਕੇ. ਪੀ.ਐੱਲ. ਦੇ 2018 ਸੀਜ਼ਨ ਵਿਚ ਬੈਂਗਲੁਰੂ ਬਲਾਸਟਰਸ ਅਤੇ ਹੁਬਲੀ ਟਾਈਗਰਸ ਵਿਚਾਲੇ ਹੋਏ ਮੁਕਾਬਲੇ ਦੌਰਾਨ ਮੈਚ ਫਿਕਸਿੰਗ ਕੀਤੀ ਸੀ। ਇਨ੍ਹਾਂ ਦੋਵਾਂ ਨੇ ਬੱਲੇਬਾਜ਼ ਐੱਮ. ਵਿਸ਼ਵਨਾਥਨ ਨੂੰ ਮੈਚ ਫਿਕਸ ਕਰਾਉਣ ਲਈ ਭੜਕਾਇਆ ਸੀ। ਦੋਵਾਂ ਨੇ ਵਿਸ਼ਵਨਾਥਨ ਨੂੰ 20 ਗੇਂਦਾਂ ਵਿਚ 20 ਤੋਂ ਘੱਟ ਦੌੜਾਂ ਬਣਾ ਕੇ ਆਊਟ ਹੋਣ ਲਈ ਕਿਹਾ ਸੀ। ਵਿਸ਼ਵਨਾਥਨ ਨੇ ਵੀ ਇਸ 'ਤੇ ਹਾਮੀ ਭਰੀ ਅਤੇ ਸਿਗਨਲ ਦੇ ਰੂਪ ਵਿਚ ਉਸ ਨੇ ਆਪਣੀ ਬਾਂਹ ਤੋਂ ਜਰਸੀ ਉੱਪਰ ਚੁੱਕੀ ਅਤੇ ਬੱਲਾ ਬਦਲਿਆ।

ਜਿੱਥੇ ਗੌਤਮ ਅਤੇ ਕਾਜੀ 'ਤੇ ਸਲੋਅ ਬੱਲੇਬਾਜ਼ੀ ਲਈ 20 ਲੱਖ ਰੁਪਏ ਲੈਣ ਦਾ ਦੋਸ਼ ਲੱਗਾ ਹੈ, ਉੱਥੇ ਹੀ ਵਿਸ਼ਵਨਾਥਨ 'ਤੇ ਸਲੋਅ ਬੱਲੇਬਾਜ਼ੀ ਲਈ 5 ਲੱਖ ਰੁਪਏ ਲੈਣ ਦਾ ਦੋਸ਼ ਲੱਗਾ ਹੈ। ਵਿਸ਼ਵਨਾਥਨ ਨੂੰ 1 ਮੈਚ ਵਿਚ 20 ਗੇਂਦਾਂ ਵਿਚ 10 ਤੋਂ ਘੱਟ ਦੌੜਾਂ ਬਣਾਉਣ ਲਈ ਕਿਹਾ ਗਿਆ ਸੀ ਅਤੇ ਇਸੇ ਮੈਚ ਵਿਚ ਉਸ ਨੇ 17 ਗੇਂਦਾਂ 'ਤੇ 9 ਦੌੜਾਂ ਬਣਾ ਕੇ ਆਊਟ ਹੋਏ ਸੀ।