ਸਾਤਵਿਕ-ਚਿਰਾਗ ਦੀ ਜੋੜੀ ਨਾਲ ਹਾਂਗਕਾਂਗ ਓਪਨ ਵਿੱਚ ਅੱਗੇ ਵਧਿਆ ਕਿਰਨ ਚਾਰਜ

ਹਾਂਗਕਾਂਗ- ਭਾਰਤ ਦੀ ਚੋਟੀ ਦੀ ਪੁਰਸ਼ ਜੋੜੀ ਸਾਤਵਿਕ ਸਾਈਰਾਜ ਰੈਂਕੀਰੈਡੀ ਅਤੇ ਚਿਰਾਗ ਸ਼ੈੱਟੀ ਨੇ ਮੰਗਲਵਾਰ ਨੂੰ ਇੱਥੇ ਹਾਂਗਕਾਂਗ ਓਪਨ ਸੁਪਰ 500 ਬੈਡਮਿੰਟਨ ਵਿੱਚ ਜਿੱਤ ਨਾਲ ਆਪਣੀ ਮੁਹਿੰਮ ਦੀ ਸ਼ੁਰੂਆਤ ਕੀਤੀ, ਜਦੋਂ ਕਿ ਕਿਰਨ ਜਾਰਜ ਨੇ ਕੁਆਲੀਫਾਇੰਗ ਮੈਚ ਜਿੱਤ ਕੇ ਪੁਰਸ਼ ਸਿੰਗਲਜ਼ ਦੇ ਮੁੱਖ ਡਰਾਅ ਵਿੱਚ ਜਗ੍ਹਾ ਬਣਾਈ। 

ਸਾਤਵਿਕ ਅਤੇ ਚਿਰਾਗ ਦੀ ਜੋੜੀ, ਜਿਸ ਨੇ ਹਾਲ ਹੀ ਵਿੱਚ ਪੈਰਿਸ ਵਿਸ਼ਵ ਚੈਂਪੀਅਨਸ਼ਿਪ ਵਿੱਚ ਆਪਣਾ ਦੂਜਾ ਕਾਂਸੀ ਦਾ ਤਗਮਾ ਜਿੱਤਿਆ ਹੈ, ਨੇ ਆਪਣੇ ਪਹਿਲੇ ਦੌਰ ਦੇ ਮੈਚ ਵਿੱਚ ਚੀਨੀ ਤਾਈਪੇ ਦੇ ਚਿਉ ਸ਼ਿਆਂਗ ਚੀ ਅਤੇ ਵਾਂਗ ਚੀ-ਲਿਨ ਨੂੰ 21-13, 18-21, 21-10 ਨਾਲ ਹਰਾਇਆ। ਸਾਬਕਾ ਵਿਸ਼ਵ ਨੰਬਰ ਇੱਕ ਜੋੜੀ ਮੈਚ ਦੇ ਸ਼ੁਰੂਆਤੀ ਗੇਮ ਵਿੱਚ ਚੰਗੀ ਲੈਅ ਵਿੱਚ ਦਿਖਾਈ ਦਿੱਤੀ ਪਰ ਉਨ੍ਹਾਂ ਨੇ ਆਪਣੇ ਵਿਰੋਧੀ ਨੂੰ ਦੂਜੇ ਗੇਮ ਵਿੱਚ ਵਾਪਸੀ ਦਾ ਮੌਕਾ ਦਿੱਤਾ। ਹਾਲਾਂਕਿ, ਤੀਜੀ ਗੇਮ ਵਿੱਚ, ਸਾਤਵਿਕ ਅਤੇ ਚਿਰਾਗ ਨੇ ਆਪਣੇ ਜਾਣੇ-ਪਛਾਣੇ ਅੰਦਾਜ਼ ਵਿੱਚ ਨੈੱਟ ਦੀ ਸ਼ਾਨਦਾਰ ਵਰਤੋਂ ਕਰਕੇ ਅਤੇ ਕੁਝ ਸ਼ਕਤੀਸ਼ਾਲੀ ਸਮੈਸ਼ ਮਾਰ ਕੇ ਸ਼ਾਨਦਾਰ ਵਾਪਸੀ ਕੀਤੀ। ਅੱਠਵਾਂ ਦਰਜਾ ਪ੍ਰਾਪਤ ਜੋੜੀ ਹੁਣ ਜਾਪਾਨ ਦੇ ਕੀਨੀਆ ਮਿਤਸੁਹਾਸ਼ੀ ਅਤੇ ਹਿਰੋਕੀ ਓਕਾਮੁਰਾ ਅਤੇ ਥਾਈਲੈਂਡ ਦੇ ਪੀਰਚਾਈ ਸੁਕਫੁਨ ਅਤੇ ਪੱਕਾਪੋਨ ਤੀਰਾਤਸੁਕੁਲ ਵਿਚਕਾਰ ਹੋਣ ਵਾਲੇ ਮੈਚ ਦੇ ਜੇਤੂ ਨਾਲ ਭਿੜੇਗੀ। 

ਪੁਰਸ਼ ਸਿੰਗਲ ਵਰਗ ਵਿੱਚ, ਕਿਰਨ ਨੇ ਕੁਆਲੀਫਾਇਰ ਵਿੱਚ ਲਗਾਤਾਰ ਦੋ ਮੈਚ ਜਿੱਤ ਕੇ ਮੁੱਖ ਡਰਾਅ ਵਿੱਚ ਆਪਣੀ ਜਗ੍ਹਾ ਬਣਾਈ। ਮਲੇਸ਼ੀਆ ਦੇ ਚਿਆਮ ਜੂਨ ਵੇਈ ਨੂੰ 21-14, 21-13 ਨਾਲ ਹਰਾਉਣ ਤੋਂ ਬਾਅਦ, ਉਸਨੇ ਹਮਵਤਨ ਐਸ ਸ਼ੰਕਰ ਮੁਥੁਸਾਮੀ ਸੁਬਰਾਮਨੀਅਮ ਨੂੰ 21-18, 21-14 ਨਾਲ ਹਰਾਇਆ। ਸ਼ੰਕਰ ਨੇ ਇਸ ਤੋਂ ਪਹਿਲਾਂ ਸ਼ੁਰੂਆਤੀ ਮੈਚ ਵਿੱਚ ਇੰਗਲੈਂਡ ਦੇ ਵਾਂਗ ਯੂ ਹੈਂਗ ਨੂੰ 21-10, 21-5 ਨਾਲ ਹਰਾਇਆ ਸੀ। ਦੁਨੀਆ ਵਿੱਚ 38ਵੇਂ ਸਥਾਨ 'ਤੇ ਕਾਬਜ਼ ਕਿਰਨ ਦਾ ਅਗਲਾ ਮੁਕਾਬਲਾ ਸਿੰਗਾਪੁਰ ਦੇ ਜੀਆ ਹੇਂਗ ਜੇਸਨ ਤੇਹ ਨਾਲ ਹੋਵੇਗਾ। 

ਥਾਰੁਨ ਮੰਨੇਪੱਲੀ ਨੇ ਕੁਆਲੀਫਾਇਰ ਦੇ ਪਹਿਲੇ ਮੈਚ ਵਿੱਚ ਸਾਬਕਾ ਵਿਸ਼ਵ ਨੰਬਰ ਇੱਕ ਕਿਦਾਂਬੀ ਸ਼੍ਰੀਕਾਂਤ ਨੂੰ 28-26, 21-13 ਨਾਲ ਹਰਾ ਕੇ ਦਿਨ ਦਾ ਸਭ ਤੋਂ ਵੱਡਾ ਉਲਟਫੇਰ ਕੀਤਾ। ਹਾਲਾਂਕਿ, 20 ਸਾਲਾ ਖਿਡਾਰੀ ਆਪਣੀ ਲੈਅ ਬਰਕਰਾਰ ਨਹੀਂ ਰੱਖ ਸਕਿਆ ਅਤੇ ਅਗਲੇ ਮੈਚ ਵਿੱਚ ਮਲੇਸ਼ੀਆ ਦੇ ਚੌਥਾ ਦਰਜਾ ਪ੍ਰਾਪਤ ਜਸਟਿਨ ਹੋਹ ਤੋਂ 21-23, 13-21, 18-21 ਨਾਲ ਹਾਰ ਗਿਆ।